Maglakat Paagi sa Pagtuo
1 Minilyon ka tawo ang nagasentro sang ila kabuhi sa materyal nga mga pagkabutang, binuang nga nagasalig sa malimbungon nga gahom sang manggad. (Mat. 13:22) Ginalaygayan kita sa paglakat sa mas maalamon nga dalanon, nga nagatinguha sang espirituwal nga mga bahandi. (Mat. 6:19, 20) Nagakahulugan ini sang ‘paglakat paagi sa kamatuoran.’—2 Cor. 5:7.
2 Ang tinaga nga “pagtuo” sa Griego nagapaalinton sang ideya sang kompiansa, pagsalig, malig-on nga paghaylo. Ang paglakat paagi sa pagtuo nagakahulugan sang pag-atubang sa mabudlay nga mga kahimtangan nga may kompiansa sa Dios, nagasalig sa iya ikasarang sa pag-ubay sang aton mga tikang. Nagpahamtang si Jesus sing himpit nga huwaran; pirme niya ginpadaku kon ano gid ang importante. (Heb. 12:2) Sa kaanggid, dapat naton huptan ang aton mga tagipusuon nga nasentro sa dikitaon, espirituwal nga mga butang.—2 Cor. 4:18.
3 Dapat man kita nahaylo sing malig-on nga ginatuytuyan ni Jehova ang iya kitaon nga organisasyon sa idalom sang panuytoy sang “matutom kag mainandamon nga ulipon.” (Mat. 24:45-47) Ginapakita naton ang aton pagtuo kon “matinumanon [kita] sa mga nagapanguna” sa kongregasyon. (Heb. 13:17) Ang mapainubuson nga pagkooperar sa teokratikong kahimusan nagapadayag sang aton pagsalig kay Jehova. (1 Ped. 5:6) Dapat naton sakdagon sing tinagipusuon ang hilikuton nga ginapahimo sang organisasyon. Magapasuod ini sa aton sing labi sa aton mga kauturan sa isa ka mabakod nga higot sang gugma kag paghiusa.—1 Cor. 1:10.
4 Kon Paano Pabakuron ang Pagtuo: Indi naton dapat pagtugutan ang aton pagtuo nga magkunol. Dapat kita manikasog sing lakas nga pabakuron ini. Ang tayuyon nga pagtuon, pagpangamuyo, kag pagtambong sa mga miting magabulig sa aton sa pagpabakod sang aton pagtuo agod nga, sa bulig ni Jehova, mabatuan naton ang bisan anong pagtilaw. (Efe. 6:16) Batasan mo na bala ang magbasa sang Biblia sa adlaw-adlaw kag maghanda para sa mga miting? Masunson mo bala nga ginapamalandungan ang imo natun-an, kag nagapalapit ka bala kay Jehova sa pangamuyo? Batasan mo bala ang magtambong sa tanan nga miting kag makigbahin sa sini?—Heb. 10:23-25.
5 Ang mabakod nga pagtuo mapamatud-an paagi sa maayong mga binuhatan. (Sant. 2:26) Nagapangita ka bala sing mga kahigayunan agod mapaambit ang maayong balita? Sarang bala mabag-o ang imo mga kahimtangan agod labi pa ang imo mahimo sa ministeryo? Ginagamit mo bala ang mga panugda nga nabaton naton agod mapauswag ang kalidad kag pagkaepektibo sang aton ministeryo?
6 Nagpaandam si Jesus tuhoy sa sobra nga pagkanadalahig sa adlaw-adlaw nga mga hilikuton sa kabuhi kag sa pagtugot nga padulmon sang materyalistiko ukon makagod nga mga interes ang aton espirituwal nga panan-aw. (Luc. 21:34-36) Dapat naton bantayan sing maayo kon paano kita nagalakat agod malikawan ang pagkalunod may kaangtanan sa aton pagtuo. (Efe. 5:15; 1 Tim. 1:19) Nagalaum kita tanan nga sa ulihi masiling naton nga aton ‘naaway ang maayong pagpakig-away, natapos ang dalaganon tubtob sa katapusan, kag natipigan ang pagtuo.’—2 Tim. 4:7.