May Tulumanon Kita
1 Ginsugo ni Jesus ang iya mga sumulunod sa ‘paghimo sing mga disipulo sa mga tawo sa tanan nga kapungsuran.’ (Mat. 28:19) Sa 232 ka kadutaan kag kapuluan sa bug-os nga duta, kapin sa lima ka milyon ka dumalayaw ni Jehova nga Dios ang nagahatag sing buhi nga pamatuod sa katumanan sang sugo ni Jesus. Apang kamusta kita sing personal? Ginahunahuna bala naton sing serioso ang sugo nga magbantala?
2 Isa ka Moral nga Obligasyon: Ang tulumanon “isa ka sugo sa paghimo sang ginpatuman nga mga buhat.” Ginsugo kita ni Cristo sa pagbantala. (Binu. 10:42) Nahangpan ni apostol Pablo nga naghatag ini sa iya sang isa ka kinahanglanon, ukon isa ka moral nga obligasyon. (1 Cor. 9:16) Sa pag-ilustrar: Handurawa nga tripulante ikaw sang isa ka nalunod nga barko. Ginsugo ka sang kapitan nga paandaman ang mga pasahero kag dalhon sila sa mga balsa. Indi mo bala pagsapakon ina nga sugo kag panikasugan na lamang nga luwason ang imo kaugalingon? Aba indi! Nabutang sa katalagman ang kabuhi sang iban! Moral mo nga obligasyon nga tumanon ang sugo sa imo nga buligan sila.
3 Ginsugo kita sang Dios sa paghatag sing paandam. Sa dili madugay dulaon ni Jehova ining bug-os malauton nga sistema sang mga butang. Minilyon ka kabuhi ang nabutang sa katalagman! Husto bala para sa aton nga indi pagsapakon ang katalagman sa iban kag hunahunaon lamang ang pagluwas sa aton kaugalingon? Siempre indi! Moral nga obligasyon naton nga buligan nga luwason ang kabuhi sang iban.—1 Tim. 4:16.
4 Matutom nga mga Huwaran nga Sundon: Si manalagna Ezequiel nakabatyag sing salabton nga paandaman ang dimatutom nga mga Israelinhon. Ginpaandaman sia ni Jehova sang mga resulta kon indi niya pagtumanon ang iya asaynment: “Kon magsiling ako sa isa nga malauton, ‘Mapatay ka sing totoo,’ kag wala ka maghatag sing paandam sa iya . . . , sia subong malauton, mapatay sia sa iya kalautan, apang ang iya dugo pagasukton ko sa imo kaugalingon nga kamot.” (Ezeq. 3:18) Gintuman sing matutom ni Ezequiel ang iya tulumanon walay sapayan sang mabaskog nga paghingabot. Busa, mahimo kita magkasadya kon ang mga paghukom ni Jehova matuman na.
5 Mga siglo sang ulihi, nagsulat si apostol Pablo tuhoy sa iya salabton sa pagbantala. Sia nagsiling: “Matinlo ako sa dugo sang tanan nga tawo, kay wala ako mag-isol sa pagsugid sa inyo sang tanan nga laygay sang Dios.” Si Pablo nagbantala sa dayag kag sa pamalaybalay bangod nahibaluan niya nga ang indi paghimo sini magahimo sa iya nga nakasala sa dugo sa atubangan sang Dios.—Binu. 20:20, 26, 27.
6 Kita bala may kakugi ni Ezequiel? Nagabatyag bala kita nga ginatiklod sa pagbantala kaangay ni Pablo? Linibo pa ang magasabat sa mensahe sang Ginharian kag magasiling: “Magaupod kami sa inyo, kay nabatian namon nga ang Dios nagaupod sa inyo.” (Zac. 8:23) Kabay nga ang aton gugma sa Dios kag sa aton isigkatawo magapahulag sa aton nga indi mag-untat. May tulumanon kita nga magbantala!