Magpaambit sa Iban Suno sa Ila mga Kinahanglanon
1 Si Jehova nagaaman sing bugana para sa aton espirituwal nga mga kinahanglanon paagi sa matutom nga “ulipon.” (Mat. 24:45-47) Sanglit nakabaton kita sing bugana, ginapaabot ni Jehova nga magpaambitay kita sa isa kag isa subong bug-os kalibutan nga panimalay, nagapat-od nga makabenepisyo ang tanan sing alangay. (Mat. 10:8) Paano naton ini mahimo? Binagbinagon naton ang tatlo ka paagi.
2 Pag-amot Para sa Literatura: Ang kalabanan sa mga literatura nga ginabaton naton ginapanagtag sa mas manubo nga bili agod buligan ang mga may limitado nga materyal nga manggad. Ginapautang man ini anay sa mga kongregasyon. Sa amo, kon ginapanagtag naton dayon ang literatura nga nabaton naton kag ginabayaran ini sa kabug-usan sang mga kongregasyon sa Sosiedad, ginauli naton ang pundo nga magamit sa pag-imprinta sing madamo pa nga literatura. Ginabinagbinag naton ang mga kinahanglanon sang iban, indi lamang ang aton, kag nagapahalipay ini sing labi. (Binu. 20:35) Apang kon utangon sang mga manugbantala ukon mga payunir ang literatura kag indi ini pagbayaran, nian ginapunggan nila ang pundo nga mahimo makabulig sa pag-imprinta sing madamo pa nga literatura.
3 Mga Utang sa Kingdom Hall: Nag-utang bala ang inyo kongregasyon agod makapatindog sing Kingdom Hall? Kon amo, walay duhaduha nga nalipay ka sa maayong mga pasilidad nga ginagamit. Ining pundo gin-aman paagi sa mga kontribusyon sang mga kauturan sa bug-os nga kalibutan. Sang panahon nga nangabay nga makautang, walay duhaduha nga nangako ka sing personal nga mag-amot sing pat-od nga kantidad kada bulan sa pagbulig nga mabayaran ang utang. Kon ginatuman mo ini sing matutom, nian nagapaambit ka sa tanan mo nga kauturan sa bug-os nga kalibutan. Kon ang kongregasyon subong kabilugan nagabayad sing matutom sang kuwarta nga ginhulam sa Sosiedad kada bulan suno sa ila ginpangako, nagabulig sila sa pagpatindog sing madamo pa nga Kingdom Hall.
4 Diri sa Pilipinas, ang kuwarta nga mahimo ipahulam para sa bag-ong mga Kingdom Hall ginalatiran sang kantidad nga ginabaton kada bulan gikan sa mga nakahulam na ukon gikan sa mga donasyon sa Kingdom Hall Fund. Busa, kon indi mahatag sang mga kongregasyon ang bug-os nga kantidad kada bulan, ginadingutan gid nila ang iban pa nga mga kongregasyon sang pundo para sa pagpatindog sang ila mga Kingdom Hall. Pat-od gid nga indi naton luyag ina himuon, indi bala? Gani tuguti ang tanan nga may mga utang sa pagsabat sa laygay ni Pablo nga magpaambit sa iban “suno sa ila mga kinahanglanon,” sa sining paagi “ginatuon ang mata, indi sa personal nga interes sang inyo kaugalingon lamang nga mga butang, kundi sa personal man nga interes sang iban.”—Roma 12:13; Filip. 2:4.
5 Boluntaryo nga mga Kontribusyon: Sa naunang mga parapo ginhambalan naton ilabi na ang pagbalik sang pundo sang Sosiedad bilang bayad sa mga aman nga nabaton. Apang, ang mga tunay nga nagapasalamat sa tanan nga ginahimo ni Jehova paagi sa iya organisasyon indi lamang kontento sa paghimo sini. Sa baylo, luyag nila magpaambit sa iban paagi sa paghatag sing boluntaryo nga mga kontribusyon sa Sosiedad. Bisan pa may mga obligasyon sa lokal nga mga kongregasyon, madamo ang kinabubut-on nga nagaamot sa bug-os kalibutan nga hilikuton sang Sosiedad ukon sa Kingdom Hall Fund kada bulan.—Tan-awa ang Disiembre 1, 1995 nga Lalantawan, pahina 30 kag 31.
6 Si Jesus nagsiling nga ang iya mga disipulo mahimo makilala paagi sa ila gugma sa isa kag isa. (Juan 13:34, 35) Ang aton kaalwan sa paghatag sa materyal kag ang aton dikakagod sa pagpaambit sa iban suno sa ila mga kinahanglanon maayo gid nga mga paagi agod pamatud-an ang aton kaugalingon subong matuod nga mga Cristiano.