Ikaw Bala Isa ka Timbang nga Payunir?

ANG mata sang amay nagainggat sa kalipay samtang ginahulat niya nga nagahumlad ang mga butkon ang una nga pagtakangtakang sang iya anak nga babayi. Sang hinali sia nga natumba, ginpalig-on niya sia nga magtilaw liwat. Nahibaluan niya nga sa dili madugay matigayon niya ang iya timbang kag kusog.

Sa kaanggid nga paagi, ang bag-ong payunir nga ministro mahimo nagakinahanglan sing tion kag pagpalig-on antes niya matigayon ang kinahanglanon nga pagkatimbang agod magmadinalag-on subong bug-os tion nga manugbantala sang Ginharian. Madamong payunir ang nagapadayon sa pag-alagad sing malipayon sa sulod sang mga dekada. Ang pila nadulaan sing pagkatimbang bangod sang wala ginapaabot nga mga pagbalhin sa ila mga kahimtangan. Nawasi pa gani sang iban ang ila kalipay. Sa isa ka pungsod, 20 porsiento sang mga nagpayunir ang nag-untat sa sulod sang nahaunang duha ka tuig sang ila bug-os tion nga pag-alagad. Ngaa nagauntat ang isa ka payunir sa sining labing makalilipay nga pag-alagad? May mahimo bala agod malikawan ining mga kapaslawan?

Walay sapayan nga ang mapigaw nga panglawason, pinansial nga mga kinahanglanon, kag mga responsabilidad sa pamilya mahimo nga amo ang rason nga ang pila nag-untat sa bug-os tion nga ministeryo, ang kasablagan para sa iban amo ang kapaslawan sa paghupot sing maayo nga pagkatimbang sa ulot sang nanuhaytuhay nga Cristianong mga obligasyon. Ang pagkatimbang nagakahulugan sing “kahimtangan diin wala sing isa ka bahin, elemento, butang, ukon impluwensia ang nagabugtoy sa isa ukon indi pareho sing proporsion sa isa.”

Ginpakita ni Jesucristo sa iya mga disipulo kon paano himuon ang hilikuton sa pagbantala kag paghimo sing disipulo. Sa iya mismo ministeryo, ginpakita man niya kon paano huptan ang pagkatimbang. Ginpakita ni Jesus nga ang Judiyong relihioso nga mga lider kulang sing pagkatimbang, nga nagasiling sa ila: “Nagahatag kamo sang ikapulo sang hierbabuena kag sang anis kag sang comino, kag ginbayaan ninyo ang mga pagsulundan sang Kasuguan nga dalagku pa, ang katarungan kag ang kaluoy kag ang katutom. Ini sila ang dapat ninyo kuntani buhaton, kag dili pagbayaan ang iban.”​—⁠Mateo 23:⁠23.

Ining prinsipio naaplikar man sa aton karon, ilabi na sa payunir nga ministeryo. Napahulag sang kapagsik kag maayong tinutuyo, ang pila nagpayunir nga wala makahanda sing bug-os para sa sini ukon makabinagbinag sang tanan nga nadalahig sa sini. (Lucas 14:​27, 28) Ang iban nawili katama sa ministeryo sa latagon kag napasapayanan nila ang iban importante nga mga bahin sang Cristianismo. Paano nila matigayon kag mahuptan ang pagkatimbang?

Magpabilin nga Mabakod sa Espirituwal!

Wala gid ginpatumbayaan ni Jesus ang iya espirituwalidad. Bisan pa nga ang kadam-an nga nagkari sa pagpamati sa iya kag pagaayuhon niya nagkinahanglan sang dikinaandan nga kadamuon sang iya tion, nag-iskedyul sia sing tion para sa mapamalandungon nga pangamuyo. (Marcos 1:35; Lucas 6:12) Ang timbang nga pagpayunir karon nagakinahanglan man nga gamiton sing nagakaigo sang isa ka payunir ang tanan nga aman agod magpabilin nga mabakod sa espirituwal. Si Pablo nangatarungan: “Nian ikaw nga nagatudlo sa iban, wala ka bala nagatudlo sa imo kaugalingon?” (Roma 2:21) Sayop gid ang paggamit sang tanan nga tion sa pagbantala sa iban samtang ginapatumbayaan ang personal nga pagtuon kag regular nga pagpangamuyo.

Si Kumiko isa ka payunir sa sulod sang duha ka dekada. Walay sapayan nga tatlo ang iya mga kabataan kag ang iya bana ditumuluo, natun-an niya paagi sa eksperiensia nga ang labing maayo nga tion para sa iya sa pagbasa kag pagtuon sa Biblia amo ang antes sia matulog. Samtang nagatuon sia, ginasulat niya ang mga punto nga sarang niya magamit sa ministeryo sa latagon agod ang iya adlaw-adlaw nga pagministeryo padayon nga bag-o kag makawiwili. Ang iban pa nga madinalag-on nga mga payunir nagabugtaw sing una sa iban nga katapo sang pamilya agod magpapagsik sa espirituwal sa malinong nga inoras sa kaagahon. Ayhan may iban pa nagakaigo nga mga tion nga ginpain ikaw sa paghanda para sa mga miting kag sa pagbasa sa pinakaulihi nga Cristianong mga publikasyon. Kon luyag mo huptan ang kalipay sang ministeryo, ang personal nga pagtuon indi butang nga mahimo naton dalidalion ukon patumbayaan.

Pagbalanse sang mga Responsabilidad sa Pamilya

Dapat man dumdumon sang nagapayunir nga mga ginikanan nga ang daku nga bahin sang “kabubut-on ni Jehova” para sa ila nagalakip sang pag-atipan sa pisikal, emosyonal, kag espirituwal nga mga kinahanglanon sang ila kaugalingon nga pamilya. (Efeso 5:17; 6:​1-4; 1 Timoteo 5:⁠8) Kon kaisa bisan ang tumuluo nga tiayon kag mga katapo sang pamilya nahangawa nga basi indi sila makabaton sing lugpay kag suporta gikan sa asawa kag iloy sa tion nga magpayunir na sia. Inang mga balatyagon nagaresulta sa indi masyado mapagsik nga pag-ugyon sa iya handum nga magpayunir. Apang, paagi sa maayo nga pagplano kag paghunahuna, ang pagkatimbang mahimo mahuptan.

Madamong payunir ang nagapanikasog nga himuon ang tanan nila nga pagbantala nga hilikuton kon ang mga katapo sang pamilya wala sa balay. Si Kumiko, nga ginhinambitan kaina, nagadungan sa iya pamilya sa pamahaw, nagapaalam sa iya bana kag mga anak kon maghalin sila sa aga, kag nagauna pauli sa ila. Nagaluto na sia sing pila ka putahe sang pagkaon sa adlaw sang Lunes agod makarelaks sia kag makadungan sa iya pamilya sa tion sang pagkaon sa baylo nga magmasako sa kusina. Ang paghimo sing kapin sa isa ka hilikuton sa isa ka tion, subong sang paghimo sang iban nga hilikuton sa balay samtang nagahanda sing pagkaon, nakabulig man. Sa sinang paagi, may tion pa si Kumiko nga maagda ang mga abyan sang iya mga kabataan kag magluto sing espesyal nga pagkaon para sa ila.

Kon magtin-edyer na ang mga kabataan, sa masami nagakinahanglan sila sing dugang pa nga igtalupangod gikan sa ila mga ginikanan sa pag-atubang sa bag-ong mga emosyon, luyag, pangduhaduha, kag pangalag-ag nga maagihan nila. Nagakinahanglan ini sing pagkaalisto kag pagbag-o sang iskedyul sang ginikanan nga isa ka payunir. Binagbinaga si Hisako, ang isa ka payunir nga iloy nga may tatlo ka kabataan. Ano ang ginhimo niya sang ang iya kamagulangan nga anak nga babayi nagsugod sa pagpakita sing kakulang sing kalipay kag kapagsik para sa Cristianong mga miting kag pag-alagad sa latagon bangod sang impluwensia sang kalibutanon nga mga abyan sa eskwelahan? Ang tunay nga kinahanglanon amo ang pagbulig sa iya anak nga ipatudok gid ang kamatuoran sa iya tagipusuon kag makumbinsi nga ang paghamulag sa kalibutan amo ang labing maayo nga dalanon.​—⁠Santiago 4:⁠4.

Si Hisako nagsiling: “Namat-od ako nga tun-an liwat upod sa iya ang sadsaran nga mga doktrina sa Mabuhi sing Dayon nga libro sa adlaw-adlaw. Sang primero nagtuon kami sa sulod sang pila lamang ka minuto, nga ang akon anak pirme nagareklamo sang sobra nga pagsakit sang tiyan kag ulo sa tion sang pagtuon. Apang ginhimo ko ang pagtuon sing regular. Pagligad sang pila ka bulan, ang iya panimuot nag-uswag sing daku, nga nagdul-ong sa sulod sang malip-ot lamang nga tion sa iya pagdedikar kag pagpabawtismo.” Si Hisako nagaalagad karon sa bug-os tion kaupod sang iya anak nga babayi.

Ang mga amay nga nagapayunir dapat man maghalong nga indi sila mawili sing tuman sa pag-atipan sa mga interesado sa latagon kag sa mga katungdanan sa kongregasyon sa bagay nga mapaslawan sila sa paghatag sa ila nagadalagku nga mga kabataan sing mabakod emosyonal nga pagsakdag kag panuytoy nga nagakabagay sa ila. Butang ini nga indi matugyan sang bana sa iya asawa. Ang isa ka masako nga Cristianong gulang nga madugay na nagapayunir kag nagapalakat man sang diutay nga negosyo nagahinguyang sing tion sa pagtuon upod sa tagsa sang iya apat ka kabataan sing isa-isa. (Efeso 6:⁠4) Dugang pa, ginahandaan niya ang semanal nga mga miting kaupod sang iya pamilya. Ang timbang nga mga payunir wala nagapatumbaya sang ila mga pamilya sa materyal ukon espiri­tuwal.

Pagkatimbang sa Ekonomiya

Ang nagakaigo nga pagtamod sa matag-adlaw nga mga kinahanglanon isa pa ka bahin nga dapat panikasugan sang mga payunir nga huptan ang maayong pagkatimbang. Sa liwat, makatuon kita gikan sa maayong halimbawa kag laygay ni Jesus. Nagpaandam sia batok sa sobra nga pagkabalaka sa materyal nga mga butang. Sa baylo, ginpalig-on niya ang iya mga disipulo nga unahon ang Ginharian, nagasaad nga ang Dios magaatipan sa ila subong sang pag-atipan niya sa iban pa niya nga mga tinuga. (Mateo 6:​25-34) Paagi sa pagsunod sa sining maayong laygay, madamong payunir ang nakapabilin sa bug-os tion nga pag-alagad sa sulod sang mga tinuig, kag ginpakamaayo ni Jehova ang ila mga panikasog agod matigayon ang ‘tinapay para sa tagsa ka adlaw.’​—⁠Mateo 6:⁠11.

Si apostol Pablo naglaygay sa mga masigka-Cristiano nga ‘ipakilala ang ila pagkamakatarunganon sa tanan nga tawo.’ (Filipos 4:⁠5) Sa pagkamatuod, ang pagkamakatarunganon magakinahanglan nga atipanon naton sing nagakaigo ang aton panglawas. Ang timbang nga mga payunir nagahimo sang tanan nga panikasog nga ipakita ang pagkamakatarunganon sa ila dalanon sang kabuhi kag sa ila panimuot sa materyal nga mga butang, nakahibalo nga ang iban nagapanilag sa ila pagginawi.​—⁠Ipaanggid ang 1 Corinto 4:⁠9.

Indi dapat paghingalitan sing dinagakaigo sang payunir nga mga pamatan-on ang kaalwan sang ila mga ginikanan. Kon nagapuyo sila sa puluy-an sang ila mga ginikanan, pagpakita sang maayong pagkatimbang kag pagpasalamat ang magpiyanpiyan sa mga ulubrahon sa balay kag magtrabaho sing part-time agod makaamot sa mga galastuhon sa balay.​—⁠2 Tesalonica 3:⁠10.

Ang Timbang nga mga Payunir Tunay nga Pagpakamaayo

Ayhan isa ikaw ka payunir nga nagapangabudlay sing lakas agod mahuptan ang nagakaigo nga pagkatimbang. Makasalig ka nga matigayon mo ini. Kaangay sang isa ka diutay nga bata nga nagakinahanglan sing tion agod matun-an ang pagtimbang sang iya kaugalingon kag makalakat, madamong hamtong nga mga payunir ang nagasiling nga nagkinahanglan sing tion agod matigayon nila ang pagkatimbang sa pag-atipan sang tanan nila nga katungdanan.

Ang personal nga pagtuon, pag-atipan sa mga katapo sang pamilya, kag pag-aman sang ila kaugalingon materyal nga mga kinahanglanon amo ang pila ka bahin nga sa sini ang mga payunir magapanikasog para sa pagkatimbang. Ginapakita sang report nga madamong payunir ang nagahimo sang ila mga responsabilidad sa tumalagsahon nga paagi. Isa gid sila ka pagpakamaayo sa komunidad kag kadayawan kay Jehova kag sa iya organisasyon.