“Ginaapresyar Naton ang mga Tigulang!”

“WALA bala sing kaalam sa tunga sang mga tigulang kag sing paghangop sa kalawigon sang mga adlaw?” pamangkot ni Job. (Job 12:12) Si Solomon nagsiling man sing kaanggid: “Ang ubanon nga ulo amo ang purongpurong sang himaya kon makita ini sa dalanon sang pagkamatarong.” (Hulubaton 16:31) Ining mga pulong ginhambal sang tion nga ang mga tigulang ginapadunggan kag ginatahod. Kag makapila nga ginapakita sang Biblia kon paano ang mga pamatan-on sadtong mga adlaw nakabenepisyo gikan sa pagpakig-upod sa mga tigulang.

Si Rut, halimbawa, nakahigayon sa sulod sang mga tuig sa pagpanilag kag sa pagbinagbinag sang halimbawa nga ginpahamtang sang iya ugangan nga si Noemi. Mahimo nga ining pagpakig-upod nagresulta sa pagtigayon ni Rut sing handum nga simbahon si Jehova. Gani sang ginhatagan sia sing kahigayunan nga magbulag kay Noemi kag magpauli sa iya pungsod sang mga sumilimba sa idolo, si Rut matutom nga nagsabat: “Bisan diin ka makadto magakadto ako, kag bisan diin ka mapabilin magapabilin ako. Ang imo katawhan mangin akon katawhan, kag ang imo Dios akon Dios.” (Rut 1:16, 17) Huo, subong resulta sang iya pagpakig-abyan kay Noemi, si Rut nangin “isa ka maayo gid nga babayi.”—Rut 3:11.

Si Timoteo isa pa nga nakabenepisyo gikan sa pagpakig-upod sa isa ka tigulang nga tawo. Naghinguyang sia sing madamo nga tinuig sa paglakbay upod kay apostol Pablo. Kag bisan pa sang ginbulag sila nga duha sang bilanggoan, si Timoteo nakabaton sing mga sulat gikan kay Pablo nga nagpalig-on sa iya nga ‘padabdabon ang hiyas sang Dios’ nga yara kay Timoteo. (2 Timoteo 1:6-8) Maid-id gid ang naton-an ni Timoteo gikan kay Pablo amo kon ngaa sang magsulat sia sa mga taga-Filipos, si Pablo nagpaathag nga ‘wala sing tawo nga may panimuot nga kaangay sa iya [Timoteo] nga magakabalaka sing matuod gid sa inyo kahimtangan.’—Filipos 2:20.

Apang, sa karon nga mga adlaw ang pagtahod sa mga tigulang halos nadula na sa pila ka pungsod. Apang, amo bala sini sa tunga sang mga Cristiano? Indi gid. Ginaapresyar gihapon karon sang matuod nga mga Cristiano nga ang mga tigulang may daku nga matanyag bangod sang ila pagtuo, debosyon, kag eksperiensia sa kabuhi. Halimbawa, ang isa ka utod nga babayi nagsulat: “Sa kada tion nga mabug-atan ako bangod sining sistema, nagadangop ako sa mga tigulang sa sulod sang kongregasyon kag nagakuha sing kaisog gikan sa ila kalig-on.” Ang isa pa ka pamatan-on nga utod nga lalaki, 34 anyos, nagsiling sing kaanggid man tuhoy sa matutom nga mga tigulang: “Nabuligan nila ako sa tanan nga bahin sang kabuhi. Halimbawa, kinahanglan ko ton-an kon paano mangin balanse. Bueno, ang isa ka 72 anyos nga utod nga lalaki nagsiling sa akon, ‘Pat-ora nga himoa ang mga butang nga luyag ni Jehova unahon mo. Isa ini ka pagpakig-away pirme. Apang nagaabot ang pagkabalanse samtang ginapangita mo anay ang Ginharian.’”

Sa isa naman ka kaso, ang isa ka utod nga 87 anyos nagmasakit sing malala. Ang isa ka gulang, upod sa isa pa ka utod nga indi aktibo, nagduaw sa iya. Nagahibi, ang utod nga indi aktibo nagsiling, “Isa ikaw ka maayong abyan. Mingawon ako sa imo.” Sa amo nagsabat ang tigulang, “Mingawon man ako sa imo.” Nagahibi pa gihapon, ang utod nga indi aktibo nagsiling, “Makitaay kita sa Bag-ong Kahimusan—kon maabot ini.” Bisan pa maluya, ang aton tigulang nga utod nanikasog sa pagpungko, kag malig-on nga nagsabat: “Magaabot ini.” Bisan pa wala sing reaksion ang indi aktibo sa sining pagpalig-on, ang pagtuo sang tigulang nagtandog sa tagipusuon sang gulang nga nagapanilag sini. “Ang iya pagtuo nakabulig sa akon sing daku,” siling niya.

Ang tigulang nga mga utod nga lalaki kag babayi masami nga nagakuha gikan sa ila eksperiensia sa Cristianong pagkabuhi kag nagahatag sing makatarunganon kag praktikal nga laygay. “Hakwata ang inyo gamay nga kabataan kag kugosa sila,” laygay sang isa ka tigulang, “kay sa dili madugay magadaku na sila. Tatapa sila anay. Sila ang inyo hamili nga mga disipulo.” “Kon ang mga pag-ipit gikan sa sining sistema mag-abot sa imo ukon kon tilawan ikaw ni Satanas,” rekomendar sang isa pa, “indi gid pagbiyai ang kamatuoran. Padayon nga buhata ini, kay magaresulta ini sa kalipay para sa imo.” Ang isa ka tigulang nga mag-asawa nga nakaalagad sing matutom sa isa ka bahin sang New Zealand sing mga 43 ka tuig naghatag sining praktikal nga laygay: “Kon masarangan mo, mas maayo nga magpabilin sa isa ka duog, sa baylo nga magsaylosaylo. Ang kamatuoran may daku pa nga epekto sa komunidad, kag ginahuptan ka sini nga magkabuhi nahisuno sa sini, sa amo nagapalig-on pa sa imo.”

Matuod, madamo sang aton tigulang nga mga utod nga lalaki kag babayi ang indi makapakigbahin sa pamalaybalay nga hilikuton subong sang mga hoben pa. Ang iban nagaparumatay sa higdaan. Ang iban may masakit nga balatian. Ang isa ka tigulang nga utod nga babayi nagsiling, “Wala sa akon ang magtigulang ako. Ang indi ko luyag amo ang ginadala sang katigulangon.” Apang nagapakita gihapon sia sing Cristianong kakugi!

Nagahinguyang ka bala sing tion nga makilala ang imo tigulang nga mga utod nga lalaki kag babayi? Nagatinguha ka bala nga ilugon ang mga kinaiya nga ila ginapakita, mga kinaiya nga napadalisay subong sang bulawan paagi sa tion kag eksperiensia? Sa pagkamatuod, ang aton tigulang nga Cristianong kauturan nga lalaki kag babayi mapuslanon nga dalangpan kon maghinguyang lamang kita sing tion nga panilagan kag hambalon sila. Ang isa ka hoben pa nga Cristiano nagsiling: “Ang matutom nga mga tigulang nangin mga halimbawa sa akon sa pag-unong sa kamatuoran, matuod nga gugma, pagtuo nga buhi, kaluoy, kag kakugi sa pag-alagad sa Dios. Para sa akon ang ila katahom subong sang kakahoyan nga nagapamulak, kag subong sila sang mainit nga dabdab sa isa ka matugnaw nga kagab-ihon.” Sa pagkamatuod, may rason kita nga apresyahon ang mga tigulang!

Ang mga Mata ni Jehova “Yara sa mga Gulang”

ANG mga gulang karon masami nga dapat maghimo sing mga desisyon nga daw labaw sa kasangkaron sang ila ihibalo kag eksperiensia. Apang, binagbinaga ang kahimtangan nga gin-atubang anay sang pila ka Judiyo nga mga lider sang mga adlaw ni Esdras.

Sang makabalik ang Judiyong mga nagkalabilin gikan sa Babilonia, wala sila sing ginhimo sa sulod sang 16 ka tuig. Napukaw sang mga manalagna nga sanday Hageo kag Zacarias ang mga Judiyo gikan sa ila indi pagsapak, kag ginpadayon ang pagpatindog liwat sang templo ni Jehova. Apang, wala magdugay, ining hilikuton ginhangkat sang Persianhon nga mga opisyal. “Sin-o bala ang naghatag sa inyo sing mando sa pagpatindog sining balay?” pamangkot sang mga manugpamatok.—Esdras 5:1-3.

Ang sabat sa sining pamangkot mabudlay. Kon magpahadlok ang mga gulang, ang pagpasag-uli sa templo hinali nga magadulog. Kon batoan sang mga gulang ining mga opisyal, gilayon nga dumilian ang hilikuton. Gani ang mga gulang (sa wala sing duhaduha ginpangunahan ni Gobernador Zorobabel kag sang Mataas nga Saserdote nga si Josue) mataktikanhon apang epektibo nga nagsabat. Ginpahanumdom nila ang mga opisyal sang madugay na nalipatan nga mando ni Ciro nga naghatag sa mga Judiyo sing pahanugot nga padayunon ining hilikuton. Bangod nahibaloan sang mga opisyal ang pagsulundan sang Persia nga indi mabag-o ang mando sang hari, maalamon nga ginlikawan nila ang pagpamatok sa mando sang hari. Sa amo gintugutan ang hilikuton nga magpadayon tubtob sang ulihi si Hari Dario naghatag sang iya opisyal nga pahanugot!—Esdras 5:11-17; 6:6-12.

Bangod bala sa kaalam sang tawo ining makatilingala nga resulta? Sa kabaliskaran, ang rekord ni Esdras nagasiling nga “ang mata sang ila Dios yara sa mga gulang sang mga Judiyo.” (Esdras 5:5) Maathag nga gintuytuyan ni Jehova ang ila sabat kag ang paborable nga reaksion sang Persianhon nga hari. Ang Cristianong mga gulang karon makapaabot man kay Jehova sing tuytoy kag direksion kon nagaatubang sing mabudlay nga mga desisyon ukon nagapakig-angot sa mga manugpamatok. Nagapasalig si Jehova sa Salmo 32:8: “Pahangpon ko ikaw kag tudloan ikaw sang dalanon nga dapat mo laktan. Laygayan ko ikaw nga ang akon mata yara sa ibabaw nimo.”