Kinahanglan Bala Naton ang Biblia?

NALIPAY si Oxana, isa ka Ruso nga lin-ay, sang makita niya ang Biblia nga ginatanyag sang isa ka manuglibod sing libro sa kalye sa Moscow. Ang iya kaupod nga si John, nga naghalin sa pungsod diin madali matigayon ang Biblia, nahamuot sa kakunyag ni Oxana. “Bilang isa ka ateista, luyag ko nga baklon ini para sa iya,” baton niya. Bisan pa nangindi sang primero si Oxana, ginbaton niya sang ulihi ang regalo ni John.

Madamo, kaangay ni Oxana, ang may daku nga handum nga makatigayon sing Biblia. Matuod ini labi na sa mga pungsod diin ginadumilian ini sa madamong tinuig. Ang mga manugbalhag sining magasin, halimbawa, nagapanikasog sa pag-imprinta sang mga Biblia nga ginakinahanglan sa anay Sobyet nga mga republika, subong man sa iban pa nga mga bahin sang kalibutan. Sa nahauna nga tion, madamo nga tawo sa sining mga duog ang may kahigayunan nga mausisa sing nagakaigo ang Biblia​—⁠kag madamo ang nagakaganyat sa gamhanan nga mensahe sini.

Mga Kritiko kag mga Nagaduhaduha

Kabaliskaran sang bag-o lang masambit, labi na sa naaminhan nga Europa, ang Biblia ginapayab-ukan lamang sa bulutangan sing mga libro. “Patay na nga maragtas!” siling sang iban, nga nagadugang, “Ginsulat ini para sa tuhay nga dag-on. Wala ini sing kaangtanan sa moderno nga tawo.” Bisan gani ang kilala nga mga klerigo dayag nga naghambal batok sa Biblia. Ang Anglikano nga arsobispo nga si Desmond Tutu ginreport sa The Star, isa ka pamantalaan sa Bagatnan nga Aprika, subong nagsiling: “May mga bahin ang Biblia nga wala sing permanente nga kapuslanan.” Bangod sining mga pinamulong, madamo ang nagapalibog kon bala patihan nila ang Biblia ukon indi.

Kinahanglan ang Tuytoy

Dapat batunon sang mga kritiko kag sang mga tumuluo nga, kapin sa bisan anong tion, ang kalibutan nagakinahanglan sing mga solusyon nga epektibo. “Kon indi dayon matun-an sang tawo nga kontrolon ang kadasigon sang pagbag-o sa iya personal nga kabuhi kag sang katilingban sa kabilugan,” sulat ni Alvin Toffler sa iya libro nga Future Shock, “nagapadulong kita tanan sa . . . pagkalusod.” Ginhatag ina nga paandam sang nagligad nga kapin sa 20 ka tuig. Ang pagkalusod nga ginhambal ni Toffler daw nagakatabo na karon.

Samtang nagahingapos ining siglo, ang mga kauswagan sa teknolohiya kag ang mga pilosopiya sang tawo napaslawan sa pagpaluntad sing kalig-unan sa kalibutan. Ang paglaum para sa isa ka bag-ong kalibutan nga kahimusan ginbuslan sang pagkawalay paglaum, kag madamo ang nagakabuhi agod lamang makatibawas sa adlaw-adlaw.

Ginapakita sang estadistika nga ang kal-ang sa pangabuhi sa ulot sang manggaranon kag imol tuman kadaku. Ang isa ka pag-usisa sining karon lang nagapakita nga 82.7 porsiento sang manggad sang kalibutan ang ginauyatan sang 20 porsiento lamang sang populasyon sini. Katingalahan bala kon ngaa lapnag ang inaway, tiggulutom, balatian, kinagamo, kag anarkiya sa madamo nga mga pungsod? Ang pag-ipit nga malandas ang nagabudlay nga pangabuhi nagapahuol sa katawhan. Subong resulta, bisan gani ang labing sadsaran nga yunit sang katilingban, ang pamilya, nagakalusod.

Bisan pa madamo, kaangay ni Toffler, ang nagapanugda nga ang tawo may salabton sa “pagpangita sing bag-o gid nga mga paagi agod makasapo sing kapag-on kag kalig-unan,” ang ebidensia nagapamatuod nga ang mga tawo wala sing ikasarang sa pag-aman sang ila kaugalingon nga mga solusyon.

Ang Lamang nga Tal-us

Ang Balaan nga Biblia, nga ginsugdan nga sulaton sang mga 3,500 ka tuig nga nagligad, wala magbag-o sa pagligad sang mga siglo. Ang mga prinsipio sini amo gihapon. Halimbawa, ang mga pulong sang Jeremias 10:23 napamatud-an nga matuod karon sing kapin sa bisan anong tion: “Ang dalanon sang dutan-on nga tawo wala sa iya kaugalingon. Wala sa tawo nga nagalakat ang pagtuytoy sang iya tikang.” Kon indi matuytuyan sang tawo ang iya dalanon, sin-o ang makasarang sini? Ginatudlo sang Biblia ang lamang nga Tuburan sang pagtuytoy: “Ako, si Jehova, nga imo Dios, ang Isa nga nagatudlo sa imo sa kapuslanan, ang Isa nga nagatuytoy sa imo sa dalanon nga laktan mo.”​—⁠Isaias 48:⁠17.

Paagi sa mga pahina sang Biblia, gintudluan kita ni Jehova nga Dios sa pagbulig sang aton kaugalingon. Puno ini sing laygay nga nagapakita sang dalanon nga dapat naton laktan. Ang laygay sini mapuslanon man sa karon subong sang ginsulat ini anay. Usisaon sang masunod nga artikulo ang pagkapraktikal sang Biblia para sa aton modernong dag-on. Tuhoy sa nanuhaytuhay nga mga butang, halin sa panglawas tubtob sa manggad, pagkabuhi sang pamilya, kag personal nga paggawi, matukiban mo nga ang Biblia malig-on gid kaangay sang isa ka igang sa tunga sang mahuyang nga mga kahimtangan sang kalibutan karon.

[Piktyur sa pahina 4]

Ang Biblia isa ka angkla sang kalig-unan sa mabalod nga kalibutan karon