Mga Pamatan-on—Ano ang Himuon Ninyo sa Inyo Kabuhi?

“Agod nga ang mga nagakabuhi indi na magkabuhi nga sa ila kaugalingon, kundi nga sa iya nga tungod sa ila napatay.”—2 CORINTO 5:15.

1. Ano nga ekspresyon sang pagpasalamat ang ginhimo sang mga tawo, kag ngaa?

‘SALAMAT! Utang ko sa imo ang akon kabuhi!’ Ang mga tawo nga nasalbar gikan sa nasunog nga balay ukon gikan sa pagkalumos nagsiling sina sa mga nagluwas sa ila. Kag ang mainapresyahon nga Cristianong mga pamatan-on nagpabutyag sina sa ila mga ginikanan. Wala lamang nila ginapatuhuyan ang pisikal nga kabuhi nga nabaton gikan sa ila mga ginikanan kundi labi na ang mahigugmaon nga pag-atipan kag instruksion nga nagabutang sa mga pamatan-on sa dalanon padulong sa pagbaton sa “ginsaad niya sa aton, ang kabuhi nga walay katapusan.”—1 Juan 2:25.

2. Bangod sang anong impormasyon nga dapat ninyo binagbinagon ang pamangkot, Ano ang himuon ninyo sa inyo kabuhi?

² Ang gugma ang nagpahulag kay Jehova nga Dios nga himuon ang kabuhi nga walay katapusan, “ang matuod nga kabuhi,” nga matigayon sang kada isa sa aton. “Ginhigugma niya kita kag ginpadala ang iya Anak nga katumbasan sang aton mga sala.” (1 Timoteo 6:19; 1 Juan 4:10) Hunahunaa man ang gugma nga ginpakita sang iya Anak nga si Jesus sang mapatay sa masakit nga kamatayon agod matigayon naton ang kabuhi nga walay katapusan! (Juan 15:13) Bangod sang nasambit na, Ano ang himuon ninyo sa inyo kabuhi?

3. Ano sing masunson ang nagapat-od kon ano ang himuon sang mga tawo sa ila kabuhi?

³ Ang mga pamatan-on masunson nga ginapamangkot sini nga pakiana, sa lainlain nga dagway, sang mga manuglaygay sang estudyante sa eskwelahan ukon sang iban nga interesado sa ila palaabuton. Ano ang magapat-od sang imo sabat? Mapat-od bala ini paagi lamang sa personal nga pagpili? Ang nagapamat-od bala amo ang laygay sang mga maluyag sa imo nga matigayon ang malig-on nga posisyon sa sekular nga kalibutan? Ukon ang imo bala himuon sa imo kabuhi mapat-od paagi sa superyor nga mga pagbinagbinag? Ang inspirado nga pahanumdom nagasiling: “Napatay sia tungod sa tanan agod nga ang mga nagakabuhi indi na magkabuhi nga sa ila kaugalingon, kundi nga sa iya nga tungod sa ila napatay kag nabanhaw.” (2 Corinto 5:15) Huo, daw ano kaayo kon sa paagi nga ginagamit naton ang aton kabuhi nagapakita ini sing pagpasalamat sa kon ano ang ginhimo ni Jesucristo kag sang iya langitnon nga Amay para sa aton!

Kilala nga mga Huwaran

4. Sin-o ang labing bantog nga huwaran sa karon?

⁴ Apang, sin-o ang pinakabantog nga tawo karon, ang mga tawo nga ginakabig sang kalabanan nga mga pamatan-on subong mga huwaran? Indi bala ang manggaranon kag bantog sang kalibutan, walay sapayan sang ila mga talaksan sa moral? Kon tan-awon ninyo ang hulot sang madamong pamatan-on, kay sin-o mga larawan ang nakita ninyo nga nagakabit sa dingding? Sing masami amo ini ang iya sang mga musikero, mga artista, kag mga humalampang. Ang mga pamatan-on kinaandan nga nagadamgo nga sa pila ka adlaw matigayon nila ang kaanggid nga kalibutanon nga kadalag-an sini nga mga tawo. Kamusta kamo? Ano ang luyag ninyo sa kabuhi?

5, 6. (a) Ngaa masiling naton nga ang kalibutanon nga kadalag-an wala makahatag sing matuod nga pagkakontento? (b) Ano ang tuburan sang matuod nga pagkakontento?

⁵ Kon matigayon ninyo ang kalibutanon nga kadalag-an sang ginadayaw nga bantog nga mga tawo, mangin malipayon kag maayawan gid bala kamo? Ang isa sa labing madinalag-on nga artista sa Holly­wood nagsiling: “Natilawan ko ang manggad kag ang tanan nga materyal nga mga butang. Wala ini sing pulos. May saykayatris nga nagakadto sa tanan nga swim­ming ­pool diri, indi na pagsambiton ang mga diborsio kag kabataan nga akig sa ila mga ginikanan.”—Manugwali 5:10; 1 Timoteto 6:10.

⁶ Ang isa ka talalupangdon nga estudyante nga humalampang, nga nagdaug sang 1981 sa 10 ka kilometro nga palumba sang kababayin-an sa Nueva York, nabang-awan katama nga magahikog sia kuntani. “Naton-an ko ang madamong kamatuoran sa kabuhi sang nagligad nga pila ka bulan,” sulat niya pagkatapos. “Ang isa amo nga ang matuod nga pagkakontento indi matigayon sa mga paagi nga ginapanikasogan sang madamo nga tawo para sa kahimpitan kag katigayonan. Ang pagkakontento para sa akon wala maghalin gikan sa pagkamangin pulos-A nga estudyante, kampeonato nga manugdalagan sang estado ukon pagpanag-iya sing matahom nga bayhon.” Huo, dapat ton-an sang mga tawo nga ang matuod nga pagkakontento nagahalin lamang paagi sa pagtigayon sing personal nga kaangtanan sa Dios, ang lamang nga makahatag sing matuod nga paghidait kag kalipay.—Salmo 23:1, 6; 16:11.

7. Tuhoy sa pagtigayon sang matuod nga kaayawan, daw ano ka importante ang edukasyon sa kolehiyo kag ang kalibutanon nga kadalag-an?

⁷ Sing maathag, nian, indi ninyo luyag nga ilugon ang mga nagapanikasog nga matigayon lamang ang kabantugan kag manggad. Bisan ang sekular nga mga manunulat nakatalupangod sa kapaslawan sang kalibutanon nga kadalag-an sa paghatag sing matuod nga kaayawan. Ang kolumnista nga si Bill ­Reel nagsulat: “Naggradwar kamo gikan sa kolehiyo upod ang mga damgo para sa palaabuton. Sing masubo, ang kalabanan sang inyo mga handum mangin abo. Indi ko luyag nga paluyahon kamo, apang dapat ninyo mabatian ang kamatuoran: Kon matigayon ninyo ang mga butang nga ginakaibugan ninyo, kon matigayon ninyo ini, kag kon matigayon ninyo ang mga kadalag-an nga ginahimud-osan ninyo, kon matigayon ninyo ini, indi kamo maayawan sa sini. Sa baylo, sa mga higayon nga ginapaabot ninyo nga magkasadya sa kadalag-an, mabatyagan ninyo ang pagkawalay unod sa baylo sang may hinimuan, nasubuan sa baylo nga nalipay, natublag sa baylo nga malinong.”—New York Daily News, Mayo 26, 1983.

8. Ano ang makusog nga rason para indi paghimud-osan ang kalibutanon nga karera?

⁸ Apang para sa aton nga alisto sa importansia sang mga hitabo sa kalibutan bangod sang tagna sang Biblia, may mas makusog nga mga rason para indi paghimuon ang kalibutanon nga karera nga una sa kabuhi. (Mateo 24:3-14) Ayhan mapaanggid naton ang aton kaugalingon sa tawo nga nakakita sang tinukod nga may karatula: “Ini nga Kompaniya Magasara Na.” Magaobra bala kita dira? Siempre indi! Kag kon nagaobra na kita sa sina nga kompaniya, maalamon nga magapangita na kita sing ulubrahan sa iban. Ti, ang karatula makita bisan diin sa institusyon sini nga kalibutan: “Magasara Na—Malapit Na ang Katapusan!” Huo, “Ang kalibutan nagataliwan,” pasalig sa aton sang Bibblia. (1 Juan 2:17) Gani, sing maalamon, indi naton paghimuon nga mga huwaran yadtong nadalahig gid sa sini.

Ang Laygay nga Pagasundon

9. Anong kalibutanon nga laygay ang ihatag sang mga daw maluyag sang labing maayo para sa inyo?

⁹ Ang inyo kabuhi ginadihon indi lamang sang mga ginatahod ninyo kundi sing masami sang mga himata kag mga abyan man nga, subong sang ginasiling nila, ‘maluyag sang labing maayo para sa inyo.’ ‘Dapat ka magtrabaho,’ isiling nila. Gani mahimo nila kamo laygayan nga mag-eskwela sa kolehiyo ukon unibersidad agod ihanda ang inyo kaugalingon para sa maayo sing sueldo nga propesyon. ‘Ang manunulat sang Biblia nga si Lucas isa ka manugbulong,’ isiling nila, ‘kag si apostol Pablo gintudluan sang manunudlo sa Kasuguan nga si Gamaliel.’ (Colosas 4:14; Binuhatan 5:34; 22:3) Apang, analisaha sing maayo ina nga laygay.

10. Ano nga laygay ang ginhatag ni Lucas kag ni Pablo, kag ano ang masiling naton tuhoy sa ila antes-Cristiano nga hilikuton?

¹⁰ Ang manugbulong nga si Lucas wala gid magpalig-on sa mga Cristiano nga sundon ang iya anay karera paagi sa pagkamangin doktor; sa baylo, ginpakita ni Lucas nga ang kabuhi ni Jesus kag sang iya mga apostoles ang dapat ilugon. Sing maathag si Lucas nangin manugbulong sa wala pa niya maton-i ang nahanungod kay Cristo apang sang ulihi gin-una niya ang Cristianong ministeryo sa kabuhi. Amo man kay Pablo. Sa baylo nga palig-unon ang iban nga ilugon sia subong sang pag-ilog niya kay Gamaliel, si Pablo nagsulat: “Magmanug-ilog kamo sa akon, subong nga ako manug-ilog ni Cristo.” Daku gid ang pagpabalor ni Pablo sa ihibalo tuhoy kay Cristo nga nagsiling sia nga sing paanggid ginakabig niya ang iya anay hinimuan nga “mga sagbut.”—1 Corinto 11:1; Filipos 3:8.

11. (a) Ano ang ginsiling ni Pedro kay Jesus, kag ngaa? (b) Ano ang sabat ni Jesus?

¹¹ Dumduma, ang balatyagon magatiklod sa mga nagahigugma sa inyo sa paghatag sing mapigaw nga laygay. Halimbawa, sang si Jesus naghambal nahanungod sa kon ano ang nagahulat sa iya sa iya ministeryo sa Jerusalem, si apostol Pedro nagsabat: “Magmalulo sa imo kaugalingon, Ginuo; indi gid ini mahanabo sa imo.” Mahal ni Pedro si Jesus kag indi niya luyag nga mag-antos sia. Apang ginsabdong ni Jesus si Pedro bangod nahibaluan Niya nga agod matuman ang kabubut-on sang Dios magadalahig ini sang pag-antos kag pagpatay sa iya sang mga manugpamatok.—Mateo 16:21-23.

12. Ano nga laygay ang ginahatag sang may maayong tinutuyo nga mga tawo sa mga pamatan-on, kag ngaa?

¹² Sing kaanggid, ang iban nga mga ginikanan ukon mga abyan mahimo nga magapaluya sa inyo gikan sa nagasakripisyo sa kaugalingon nga dalanon. Bangod sang indi maayo nga opinyon, ayhan magapangalag-ag sila sa pagpalig-on sa inyo nga himuon ang bug-os tion payunir nga pag-alagad, ang pag-alagad subong misyonero, ukon ang pagpangabudlay sing boluntaryo sa sanga talatapan sang mga Saksi ni Jehova. Ayhan magasiling sila: ‘Ngaa indi, sa baylo, magminyo kag mag-istar malapit sa amon? Ukon, ‘Bal-an mo, mabudlay ang trabaho sa Bethel. Ayhan mas maayo kon diri ka na lang sa amon.’ Sa iban nga hambal, subong sang ginsiling ni Pedro, ‘Magmalulo sa imo kaugalingon.’

13. (a) Anong nagbalhin nga punto-de-vista ang ginpabutyag ni Pedro? (b) Ano ang nadalahig sa pagkamangin matuod nga Cristiano?

¹³ Kon kaisa bisan ang mga alagad ni Jehova dapat mag­bag-o sang ila mga panghunahuna. Si Pedro dapat mag­bag-o sang iya panghunahuna, kag upod ang na­bag-o nga punto-de-vista, nagsulat sia: “Kay sa sini mga gintawag kamo, kay si Cristo man nag-antos tungod sa inyo, nga nagabilin sa inyo sing sulundan, agod nga pagsundon ninyo ang iya mga tikang.” (1 Pedro 2:21) Ang pagkabuhi sang matuod nga Cristianong kabuhi nagalakip sang pagsakripisyo sa kaugalingon, huo, sang pag-antos pa gani. Indi ini isa ka mahapos nga dalanon, kundi nga sa sini gintawag kita nga mga Cristiano. Ang pagbaton sa sini nagalakip sang ‘indi na magkabuhi nga sa ila kaugalingon, kundi nga sa iya nga tungod sa aton napatay.’ (2 Corinto 5:15) Ang paghupot sing maayong mga huwaran magabulig sa aton nga gamiton ang aton kabuhi sa sining nagasakripisyo sa kaugalingon nga paagi.

Mga Huwaran nga Huptan

14. Ano nga huwaran ang gin-aman ni Jesus?

¹⁴ Ang huwaran nga dapat ninyo huptan labi na amo ang ginhatag ni Jesus. Subong himpit, mahimo sia kuntani mangin labing maayo nga humalampang, musikero, manugbulong, ukon abogado nga nakilal-an sa kalibutan. Apang ang iya igtalupangod nahugod sa pagpahamuot sa iya langitnon nga Amay, bisan samtang pamatan-on pa si Jesus. (Lucas 2:42-49) Nagsiling sia sang ulihi: “Kinahanglan ako magwali sang maayong balita sang ginharian sang Dios, kay sa sining katuyuan nga ginpadala ako.” (Lucas 4:43) Sang nagligad nga tig-ilinit ang isa ka sulat sang magasin sang simbahan nga Ministry nagpaathag: “Luyag sang aton Manunubos nga mapalayo sa kadam-an, kag sa amo nagpamalaybalay Sia—nagapangita sing kalag. Ang isa ka kalag nga tumalambong amo ang Iya kalipay. Nian mabubo Niya ang kamatuoran—ang gugma sang Dios.”—Lucas 10:1-16.

15. (a) Ngaa ang pamalaybalay nga pagbantala isa ka hangkat? (b) Ano ang nagapakita nga ang pamalaybalay nga ministeryo sang mga pamatan-on epektibo?

¹⁵ Isiling ta, ang pamalaybalay nga pagbantala indi mahapos. Nagakinahanglan ini sing makugi nga pagtuon agod mahangpan ang maayong balita sang Ginharian kag sing madamo nga trabaho agod mahanda ang makahulugan nga mga presentasyon. Ini nga pag-alagad nagakinahanglan man sing kaisog, bangod kalabanan sang mga tagbalay indi interesado, kag ang iban akig. Apang, ang pamalaybalay nga pag-alagad ninyo nga mga pamatan-on may makatilingala nga epekto, subong sang ginsiling sang Italyano nga magasin sang parokya nga La Voce. Ang manunulat nagsiling: “Sing personal, gusto ko ang mga Saksi ni Jehova,” nga, paathag niya, “nagakari kag nagaduaw sa inyo sa balay.” Nagkomento sia: “Ang mga kilala ko maayo gid sing batasan, malum-ok maghambal; matahom man nga mga tawo kag ang kalabanan pamatan-on. Ang katahom kag pagkapamatan-on, kon ipakita, labing makahalaylo.”

16. (a) Para sa anong hilikuton nga ang mga pamatan-on nagakabagay sing komendasyon? (b) Paano ipaanggid ang organisasyon sang mga Saksi ni Jehova sa mga iglesia sa paghimo sang pinakaimportante nga hilikuton sa duta?

¹⁶ Sa pagkamatuod, kamo nga mga pamatan-on nga nagabaton kay Cristo subong inyo huwaran dapat hatagan sing komendasyon! Kapin sa 12,000 ka pamatan-on, nga nagaedad sing 25 paubos, ang yara sa payunir nga hilikuton sa Estados Unidos, kag napulo ka libo pa ang nagapayunir bisan diin. (Salmo 110:3) Magsalig nga wala sing iban pa nga hilikuton nga mahimo ninyo ang mas importante! Bisan ang manunulat sa ginsambit kaina nga magasin sang simbahan nagsiling: “Ang Dios nagasiling nga ang labing kinahanglanon nga hilikuton amo ang pamalaybalay nga pagduaw—pagpangita sing kalag,” apang nagpadayon, “Ano ang masiling ninyo nahanungod sini? Daw ano ka daku nga pagduaw ang ginahimo ninyo kag nakon? Wala ko makita ang daku nga pagsambit sa sini nga sahi sang hilikuton sa MINISTERYO.” Wala bala kita nagapasalamat nga nagabuylog kita sa organisasyon nga nagapadaku sang kinahanglanon nga ilugon ang halimbawa ni Jesus sa pagbantala?

17. Ano ang nahimo ni Timoteo samtang ayhan tin-edyer pa, kag ano ang nagapakita nga amo sia sina ka lamharon sadto nga tion?

¹⁷ Bangod ginaimpluensiahan sing daku sadtong inyo ginadayaw ang inyo ginahimo sa inyo kabuhi, palamboa man ang pagdayaw sa huwaran nga gin-aman sang pamatan-on nga si Timoteo. Natawo wala madugay nga mapatay si Jesus, ginbiyaan ni Timoteo samtang pamatan-on pa ang iya pamilya kag nag-upod kay apostol Pablo sa iya ikaduhang misyonero nga paglakbay. Mga pila ka bulan sang ulihi napilit sang kadam-an sanday Pablo kag Silas nga magpalagyo gikan sa Tesalonica, apang sa tapos nga makahimo na sila sing pila ka disipulo. (Binuhatan 16:1-3; 17:1-10, 13-15) Sang ulihi ginpadala ni Pablo si Timoteo sa sinang makatalagam nga teritoryo agod lugpayan ining mga disipulo sa ila mga pagtilaw. (1 Tesalonica 3:1-3) Mahimo nga si Timoteo manugbeinte anyos na sadto, bangod mga 12 tubtob 14 ka tuig sang ulihi si Pablo naghambal gihapon nahanungod sa iya “pagkapamatan-on.” (1 Timoteo 4:12) Wala bala ninyo ginadayaw ang maisog kag nagasakripisyo sa kaugalingon nga pamatan-on kaangay sina?

18. Ngaa ginpadala ni Pablo si Timoteo sa mga taga-Corinto?

¹⁸ Lima ka tuig pagkatapos sang asaynment ni Timoteo agod palig-unon ang mga kauturan sa Tesalonica, ginsulatan ni Pablo ang mga taga-Corinto gikan sa Efeso: “Magmanug-ilog kamo sa akon. Busa napadala ko sa inyo si Timoteo, . . . kag magapahanumdom sia sa inyo sang akon mga paagi sa kay Cristo Jesus, subong sang ginapanudlo ko sa tanan nga duog.” (1 Corinto 4:16, 17) Ang pamatan-on nga si Timoteo, nga nakapangabudlay na sing lima ka tuig kaupod ni Pablo, nakahibalo sing maayo sang mga metodo sa pagpanudlo ni Pablo. Nahibal-an niya kon paano ginpresentar ni Pablo ang mensahe sa mga taga-Efeso, lakip kon paano niya gintudluan sila “sing dayag kag sa pamalaybalay.” (Binuhatan 20:20, 21) Bangod nahanas sing maayo sa sinang mga paagi sa pagbantala, isa gid ka matahom nga bulig si Timoteo sa mga kongregasyon!

19. Ano ang ginsiling ni Pablo tuhoy kay Timoteo sa tapos sang kapin sa napulo ka tuig nga pag-updanay nila sa pag-alagad?

¹⁹ Lima ukon anum pa ka tuig ang nagligad, kag si Pablo nabilanggo sa Roma. Si Timoteo, nga sia mismo bag-o lang makaguwa sa bilanggoan, kaupod niya. (Hebreo 13:23) Handurawa ang danyag: Posible nga naggamit kay Timoteo subong iya sekretaryo, si Pablo nagdikta sang sulat sa mga taga-Filipos. Naghambal sing maathag, si Pablo nagsiling: “Nagalaum ako kay Ginuong Jesus sa pagpadala kay Timoteo sa inyo sa indi madugay . . . Wala ako sing tawo nga kaangay sa iya nga magakabalaka sing matuod gid sa inyo kahimtangan . . . Kamo nakahibalo sang kapuslanan ni Timoteo, kon paano nga subong nga anak upod sa amay nag-alagad sia upod sa akon sa maayong balita.”—Filipos 1:1; 2:19-22.

20. Ano ang nagahimo kay Timoteo nga isa ka dalayawon nga huwaran para sa mga pamatan-on?

²⁰ Sa pagkamatuod, ang pamatan-on nga si Timoteo isa ka dalayawon nga huwaran! Isa sia ka masaligan kag matutom nga kaupod ni Pablo, nagpabilin sa iya bisan ano man ang natabo, nagsakdag sa iya sa hilikuton nga pagbantala, kag handa sa pag-alagad bisan diin nga ipadala sia. Ginsakripisyo niya ang normal nga kabuhi sa balay, apang daw ano nga pagkakontento kag pagkanaayawan ang ginhatag sa iya sang iya pag-alagad sa Dios! Si Timoteo sa pagkamatuod ‘wala na magkabuhi nga sa iya kaugalingon, kundi nga kay Cristo nga tungod sa iya napatay.’ (2 Corinto 5:15) Napahulag bala ikaw sa pag-ilog sang iya huwaran?

Magkabuhi Para sa Bag-ong Kalibutan sang Dios

21. Ngaa masiling naton nga si Timoteo mahunahunaon sa espirituwal?

²¹ Gani, si Timoteo nagkabuhi para sa bag-ong kalibutan sang Dios. Wala lamang niya ginhunahuna ang karon kundi ang paggamit sang iya kabuhi nga makapatubas sing dayon nga mga kaayuhan. (Mateo 6:19-21) Tungod ang amay ni Timoteo isa ka Griego kag ayhan ditumuluo, mahimo nga ginpalig-on niya si Timoteo nga magkuha sing mataas nga edukasyon kag maghimud-os sing kalibutanon nga karera. Apang subong resulta sang diosnon nga panudlo sang iya iloy kag lola, ang kabuhi ni Timoteo nahugod sa Cristianong kongregasyon. Ginhimud-osan niya ang espirituwal nga mga interes, ayhan nagpabilin nga soltero sa magkubos sing madugaydugay, kag kalipikado sa pag-alagad kaupod ni apostol Pablo.—2 Timoteo 1:5.

22. Paano ginapadaku sang School nga brosyur para sa mga pamatan-on sa karon ang dalanon sang kabuhi nga kaangay sang iya ni Timoteo?

²² Kamusta kamo? Gamiton bala ninyo ang inyo pagkapamatan-on pareho sa ginhimo ni Timoteo? Ang brosyur nga School and Jehovah’s Witnesses nagapatuhoy sa sinang dalanon sang kabuhi sang magpaathag ini nahanungod sa Saksi nga mga pamatan-on: “Ang ila pangunang tulumuron sa kabuhi amo ang mag-alagad sing epektibo subong mga ministro sang Dios, kag ginaapresyar nila ang pag-eskwela subong bulig sa sina nga katuyuan. Gani ginapili nila ang mga kurso nga mapuslanon sa pagsuporta sa ila kaugalingon sa modernong kalibutan. Busa, madamo ang nagakuha sing bokasyonal nga mga kurso ukon nagaeskwela sa bokasyonal nga mga eskwelahan. Kon makatapos na sila sa pag-eskwela luyag nila makatigayon sing obra nga magapahanugot sa ila nga magkonsentrar sa ila panguna nga hilikuton, ang Cristianong ministeryo.”

23. Ngaa indi mahapos para sa Cristianong mga pamatan-on ang pagsabat sa pamangkot, Ano ang himuon ko sa akon kabuhi?

²³ Agod inyo maapresyar sing maayo ang ginhimo ni Jehova nga Dios kag sang iya Anak para sa inyo, indi mahapos ang pagsabat sa pamangkot, Ano ang himuon ko sa akon kabuhi? Sa baylo nga magkabuhi para sa inyo kaugalingon kag personal nga kalipayan, gamita ninyo ang inyo kabuhi sa paghimo sang kabubut-on sang Dios. Magkabuhi kamo, kaangay ni Timoteo, subong espirituwal nga tawo.

Mga Pamangkot nga Repasuhon

◻ Ngaa indi dapat pag-unahon sa kabuhi sang matuod nga mga Cristiano ang kalibutanon nga mga karera?

◻ Anong sayop nga laygay ang ginhatag sang iban, apang ano ang maton-an naton gikan sa ginsabat ni Jesus kay Pedro?

◻ Sa anong mga paagi nga si Jesus kag si Timoteo naghatag sing maayong huwaran para sa mga pamatan-on?

◻ Ano ang nadalahig sa pagkamangin mahunahunaon sa espirituwal?

Mga Pamatan-on—Kamo Bala Mainuswagon sa Espirituwal?

“Himoa ining mga katungdanan; ukuri ini sila, agod nga ang imo pag-uswag makita sang tanan.”—1 TIMOTEO 4:15.

1, 2. Ano ang kahulugan, kag wala ginakahulugan, sang pagkamangin mainuswagon sa espirituwal?

ANO ang buot silingon sang mainuswagon sa espirituwal? Nagakahulugan ini sang mangin kaangay sa lamharon nga si Jesus kag si Timoteo, nga nag-una sang espirituwal nga mga interes sa ila kabuhi. Kon kamo mainuswagon sa espirituwal, mahibaluan ninyo kon ano ang luyag ninyo nga himuon sa inyo kabuhi. Indi kamo magasiling: ‘Magasugod ako sa paghunahuna sing serioso nahanungod sa pag-alagad kay Jehova kon magdakudaku na ako.’ Indi, magaalagad kamo sa iya karon!

² Sa pihak nga bahin, ang pagkamangin mainuswagon sa espirituwal wala nagakahulugan nga mangin kaangay sang monghe, nga mangin sobra ka relihioso, ukon mangin palabasa; wala ini nagakahulugan nga mangin masinulub-on, solemne, kag wala na gid nagapakigsosyalan. (Juan 2:1-10) Si Jehova isa ka malipayon nga Dios, kag luyag niya ang iya dutan-on nga kabataan nga magmalipayon. Gani ang haganhagan nga pagpakigbahin sa mga hampang kag sa iban nga mga kalingawan may kahamuot sang Dios.—1 Timoteo 1:11; 4:8.

Bawtismo Isa ka Pamatuod

3. San-o si Timoteo mahimo ginbawtismuhan?

³ Ang paghanda para sa kag ang pagpabawtismo mga pamatuod nga ang isa ka pamatan-on mainuswagon sa espirituwal. Kon, subong sang ginapakita, si Timoteo tin-edyer pa lang sang mangin kaupod sia ni apostol Pablo sa pagkamisyonero, ayhan si Timoteo nabawtismuhan sang mga 14-15 anyos ukon 12-13 anyos sia. Gintudluan sia sang Kasulatan kutob sang pagkabata, kag sang masangkapan sang sibu nga ihibalo kag apresasyon, wala sia magpangalag-ag sa pagpabawtismo.—2 Timoteo 3:15.

4. Ano nga pamangkot ang ginpamangkot ni Felipe, kag bisan pa nga bag-o lang naton-an sang nagpamangkot ang nahanungod kay Cristo, ngaa ginhimo ni Felipe ang iya pangabay?

⁴ Kamusta kamo nga mga tin-edyer nga gintudluan sang Kasulatan? Ginbinagbinag bala ninyo ang pamangkot: “Ano bala ang nagasablag sa akon sa pagpabawtismo?” Sang nahaunang siglo, ina nga pamangkot ginpamangkot sang isa ka tawo nga lantip kaayo sa Kasulatan apang bag-o lang makahibalo sa pagkilala kay Cristo. Matuod, wala niya mahibalui ang tanan nahanungod sa katuyuan sang Dios, apang napahulag sia bangod sang tudok nga apresasyon sa nahibaluan niya! Busa, wala sing rason si disipulo Felipe nga indi sia bawtismuhan.—Binuhatan 8:26-39.

5. Ano ang kinahanglanon para ikaw mabawtismuhan?

⁵ Ano ang nagasablag sa imo sa pagpabawtismo? Agod makalipikar, siempre pa, dapat mo mahangpan kon ano ang nadalahig. Dapat nga luyag mo mag-alagad kay Jehova bangod ginahigugma mo sia. Dapat man ikaw maghimo sing personal nga dedikasyon sa iya sa pangamuyo. Dugang pa, dapat mo sundon ang moral nga mga kinahanglanon sang Dios kag may bastante nga eksperiensia sa pagpaambit sang imo pagtuo sa iban. Kon ikaw kalipikado, importante nga padayunon mo ini kag magpabawtismo.—Mateo 28:19, 20; Binuhatan 2:38.

6. Sa ano mahimo mapaanggid ang bawtismo, kag ano ang magasunod sa sini?

⁶ Bisan pa nga ang pagpabawtismo isa ka pamatuod nga ikaw mainuswagon sa espirituwal, dumduma nga ang bawtismo pamuno lamang nga tikang. Paagi sa paghimo sing dedikasyon kay Jehova, nangin dumuluong ikaw sa sining dumaan nga kalibutan nga ginagamhan ni Satanas. Gani ang dedikasyon mapaanggid sa pag-aplikar para sa kabuhi nga walay katapusan sa bag-ong sistema sang Dios, kag ang pormal nga seremoniya sang bawtismo, sa epekto, isa ka pagpakita sa atubangan sang mga saksi nga nagapalig-on sini nga kamatuoran. (Juan 12:31; Hebreo 11:13) Pagkatapos dapat ikaw matutom nga magpabilin sa imo dedikasyon agod makabaton sang dulot sang Dios nga kabuhi nga walay katapusan.—Roma 6:23.

Ginapamatud-an sang Paggawi

7. Paano ang imo panimuot sa mga butang sang ka­libutan naangot sa imo pagkamainuswagon sa espirituwal?

⁷ Kon bala kamo mainuswagon sa espirituwal ukon indi mapamatud-an man paagi sa inyo panimuot sa mga butang sa kalibutan. Ano nga mga butang? Nagalakip ini sa maluho nga estilo sang pagkabuhi, mga droga, seksuwal nga kahilwayan, imoral nga mga sine, matinugdaon nga musika, malaw-ay nga hambal, makapulukaw sa sekso nga saot, rasyal kag nasyonal nga bugal, kag iban pa. (1 Juan 2:16; Efeso 5:3-5) Ang mga pamatan-on, labi na, dapat magbantay. Dumduma, ang inyo paggawi tuhoy sa sina nga mga butang magapakita sang kahimtangan sang ­inyo espirituwal nga kapagros.—Hulubaton 20:11.

8. Ngaa ang iban nga mga pamatan-on nagapangalag-ag sa pagpabawtismo?

⁸ Ginatinguhaan ni Satanas nga ang imoral nga mga dalanon ni Satanas mangin tuman ka makagalanyat. Sa katunayan, ang isa ka 15-anyos nagsiling: “Sa aton labi nga pagtan-aw sang sekso kag droga sa TV, labi nga daw normal ini sa sosiedad.” Ang mga pamatan-on nga wala nagaapresyar sang dalanon sang kalibutan daw ginapabatyag nga tuhay sila kag nawasi nila ang kalipay. Amo bala sina ang inyo balatyagon? Ang iban nga nagapakig-upod sa kongregasyon nagabatyag sing amo sina, kag indi sila makapamat-od. Sang ginpamangkot tuhoy sa pagpabawtismo, ang isa ka pamatan-on nagsiling: ‘Indi ko pa luyag sa karon bangod ayhan makahimo ako sing butang nga madis­fellow­ship ako.’ Apang indi mahimo nga indi kamo mamat-od ukon magpangduhaduha. Ang manalagna sang Dios nagsiling anay: “Kon si Jehova among matuod nga Dios, sunda sia; apang kon si Baal, nian sunda sia.”—1 Hari 18:21.

9. Ano nga pangamlig ang matigayon paagi sa pagkamangin mainuswagon sa espirituwal?

⁹ Sa pagkamatuod, paagi sa paglikaw sa imoral nga mga dalanon sang kalibutan, ang tanan nga nawasi ninyo ang daku gid nga problema. “Ang sobra nga pagbatyag sing daku nga pag­bag-o kag paghinulsul sa paagi sang akon pagkabuhi ang nagtublag sa akon,” tu-ad sang isa ka babayi. “Ginpakanubo kag gindaya ko ang akon kaugalingon kag ang bata nga akon ginapanamkon.” Huo, ang ganyat kag idlak sang kalibutan sang Yawa isa gid ka handurawan, isa ka daya. Wala ini sing pulos. Ang pagsunod sa dalanon sang kalibutan nagadul-ong sa wala makasal nga pagmabdos, pagkaguba sang pamilya, ginliton paagi sa sekso nga mga balatian, kag dimasugid nga mga kabang-awan kag kasubo. Gani pamatii ang laygay, magmainuswagon sa espirituwal. “Maglikaw sa kalautan kag maghimo sang matarong.”—1 Pedro 3:11.

10. Ano nga laygay kag kay sin-o mga halimbawa ang pamatian sang mainuswagon sa espirituwal nga pamatan-on?

¹⁰ Ang mainuswagon sa espirituwal nga pamatan-on magapamati sa laygay ni apostol Pablo: “Magpakabata kamo sa kalautan; apang magpakahamtong kamo sa ikasarang sa paghangop.” (1 Corinto 14:20) Gin-aplikar sang pamatan-on nga si Timoteo ini nga laygay. Mahanduraw bala ninyo sia nga nagapanikasog nga makig-upod sa bastos kag kalibutanon nga mga pamatan-on sang kaadlawan niya? Indi gid! Ang iya mga kaupdanan amo ang kaupod nga mga alagad sang Dios. (Hulubaton 13:20) Iluga ang iya huwaran. Kon daw makahimo sing kwestionable nga buhat, pamangkuta ang inyo kaugalingon: Himuon bala ini ni Timoteo kag ni Jesus?

Ginapamatud-an sang Pagtuon sa Biblia

11. Ano nga panan-aw ang wala sa mga pamatan-on sang kalibutan, kag paano ini matigayon kag mahuptan?

¹¹ Ang isa ka artikulo halin sa Italya nga ginbalhag sa World Press Review nagsiling: “Ang sayop nga pagpati kag pagkawalay paglaum sang mga pamatan-on nagadugang adlaw-adlaw, kag wala sing isa nga makahatag sa ila sing makapalig-on nga palaabuton.” Ang nabulag nga itololok sang mga yara sa kalibutan ni Satanas wala nagatan-aw sa ginsaad nga bag-ong kalibutan sang Dios kag sa mahimayaon nga palaabuton nga nagahulat sa mga kalipikado nga magkabuhi didto. (2 Corinto 4:4; Hulubaton 29:18; 2 Pedro 3:13) Apang ang mainuswagon sa espirituwal nga mga pamatan-on may subong sina nga panan-aw nga ginahuptan nga masanag kag maathag paagi sa regular nga pagtuon sang Biblia.

12. (a) Paano naton matigayon ang ihibalo nahanungod sa Dios? (b) Ngaa ini nga ihibalo takus sa panikasog?

¹² Matuod gid bala sa inyo ang bag-ong kalibutan sang Dios? Mahimo ini mangin matuod, apang ang pagtigayon sa sini nagakinahanglan sing matuod nga panikasog sa bahin ninyo. Dapat ninyo palambuon ang tudok nga gana sa paghangop sa Biblia agod “pangitaon mo sia subong sang pilak, kag mag-usisa sa iya subong sang mga bahandi nga natago.” (Hulubaton 2:1-6) Ano ang nagatiklod sa mga nagapangita sing bahandi nga padayon nga magpangita kag magkutkot, kon kaisa sing tinuig? Ginakaibugan niya ang mga manggad nga ihatag sa iya sang bahandi. Apang ang ihibalo mas labi pa ka bilidhon sang sa materyal nga bahandi. “Nagakahulugan sang kabuhi nga walay katapusan,” siling ni Jesus, “ang pagkuha sing ihibalo nahanungod sa imo, ang lamang matuod nga Dios, kag sa isa nga imo ginpadala, si Jesucristo.” (Juan 17:3) Kon ginapatihan gid ninyo ang ginsiling didto ni Jesus, ang pagtuon sang Biblia mangin isa ka malangkagon nga buhat nga magapadya sa imo sing labi pa ka hamili sa bilidhon nga bato.—Hulubaton 3:13-18.

13. Ano nga mga panugda para sa pagtuon ang ginasunod sang mainuswagon sa espirituwal nga pamatan-on?

¹³ Masapwan ninyo nga sa inyo labi nga pagtuon, labi pa gid nga nagakusog ang inyo gana para sa espirituwal nga pagkaon. Ton-i ang maayong mga batasan sa pagtuon. Indi lamang pagkuriti ang mga sabat, kundi tan-awa ang ginsitar nga mga teksto sa Biblia, kag nian pangitaa ang may kahilabtanan nga mga teksto paagi sa ­cross-­refer­ences sang Biblia. Makahimo man kamo sing dugang nga panalawsaw nga nagagamit sang mga indese, subong sang Watch Tower Publications Index 1930-1985. Analisaha kon paano naaplikar ang materyal kag kon paano ini magamit. Isugid sa iban kon ano ang inyo naton-an. Magapatudok ini sang mga punto sa inyo hunahuna kag magapalig-on sa iban nga magpanalawsaw man. Paagi sa pag-aplikar sa inyo kaugalingon, ginapamatian ninyo ang laygay nga ginhatag sa pamatan-on nga si Timoteo: “Hunahunaa ining mga butang; ukuri ini sila, agod nga ang imo pag-uswag makita sang tanan.”—1 Timoteo 4:15; 2 Timoteo 2:15.

Ginapakita sa mga Miting kag sa Pag-alagad

14. Ano ang nagabulig agod ang Cristianong mga miting labi nga makalilipay, kag sa anong mga paagi sarang nimo mapalig-on ang iban samtang nagatambong?

¹⁴ Kon naluyagan ninyo ang pagtuon sa Biblia kag nakahanda sing maayo, ang Cristianong mga miting mangin labi ka makalilipay. (Salmo 122:1; Hebreo 2:12) Nian ginakalangkagan ninyo sing labi ang pagkomento sa mga bahin nga kinahanglan ang pagpakigbahin sang tumalambong kag ang paghatag sing pamulongpulong sa Teokratikong Eskwelahan sa Ministeryo. Apang kon nagatambong sa mga miting, may iban pa nga mga paagi nga matuman ang instruksion nga ‘magpalig-onay sa isa kag isa’ kag “magpukaw sa isa kag isa sa gugma kag maayong mga buhat.” (Hebreo 10:24, 25) Kamo bala, halimbawa, nagauna sa pagpakighambal sa iban? Ang mainabyanon nga, “Hello, nalipay ako nga makita ka!” ukon ang hanuot nga pamangkot, “Kamusta ka?” mangin tuman ka makapalig-on, labi na kon nagahalin sa isa ka pamatan-on.

15. Paano mo mahimo ang imo kaugalingon nga matigayon sa pagbuhat sang kinahanglanon nga mga pag-alagad, kag ngaa maayo pirme dumdumon ang huwaran ni Cristo?

¹⁵ Daku nga hilikuton ang nadalahig sa mga buluhaton sa kongregasyon. Makapakigbahin ka bala? Ang pamatan-on nga si Timoteo nakahimo sing madamong mabuligon nga mga pag-alagad kay Pablo—masugosugo, magkuha sing mga suplay, magdul-ong sang mga mensahe, kag iban pa. Kon wala pa ninyo ina mahimo, ngaa indi ninyo pagsambiton sa mga gulang ang inyo kahanda nga magbulig. Ayhan pangabayon kamo sa pagpanagtag sang mga asaynment sa miting, paghupot sang tiliponan nga matinlo, ukon paghimo sang iban pa kinahanglanon nga serbisyo. Dumduma, si Cristo naghinaw sang mga tiil sang iya mga disipulo, gani wala sing obra nga ubos sa dignidad sang isa nga mainuswagon sa espirituwal.—Juan 13:4, 5.

16. Ano nga buhat ang ginakilala sang isa ka Katoliko nga pamantalaan subong Cristianong responsabilidad?

¹⁶ Kon tan-awon naton ang iban nga mga relihion, nagapasalamat gid kita sa paghanas nga aton ginabaton sa aton mga miting para sa pinakaimportante nga hilikuton sa pagbantala. Nagasulat sa U.S. Catholic sang nagligad nga Septiembre, si Ken­neth Guen­tert nagsiling: “Nagdaku ako sadto anay sang ang mga Katoliko indi dapat magbasa sang Biblia bangod makatigayon sila sing dikinaandan nga ideya—kaangay sang pagpanuktok sa mga ganhaan sang mahunahunaon nga mga Cristiano sa pagkombertir sa mga tawo. Nian nag-abot ang Batikano II, kag nagsugod ako sa pagbasa sang Biblia. Matuod gid; karon nahunahuna ko nga ang mga Cristiano dapat maglakat kag magpanuktok sa mga ganhaan sa pagkombertir sa mga tawo.” Dugang niya: “Indi nga komportable gid ako sa ideya; kundi kon basahon ninyo ang Bag-o nga Testamento, halos imposible nga malikawan ini nga konklusion.”—Mateo 10:11-13; Lucas 10:1-6; Binuhatan 20:20, 21.

17. Paano mangin labi ka makalilipay para sa imo ang ministeryo?

¹⁷ Huo, ang dumaan nga mga Cristiano aktibo sa pamalaybalay nga pagbantala, kag ang mga pamatan-on kaangay ni Timoteo kaupod sang mga may edad sa ministeryo. Apang, para sa iban sa karon indi ini ang labing malipayon nga hilikuton. Ngaa indi? Ang pagkanahanas amo ang rason. Halimbawa, kon maayo ka sa isa ka hampang, indi bala nga maluyagan mo ini sing labi? Amo man sa ministeryo. Kon labi ka nga nagalantip sa paggamit sang Biblia kag sa paghinun-anon sang mga topiko sa Biblia, ang ministeryo mangin tuburan sang kalipay, labi na kon may makita ka nga mapaambitan mo sing nagahatag kabuhi nga ihibalo. Gani magmangin mainuswagon sa espirituwal! Praktisa ang inyo pamalaybalay nga presentasyon. Magpangayo sing panugda sa iban. Mangabay sang bulig ni Jehova.—Lucas 11:13.

Sa Kaangtanan sa Iban

18. Ano nga sahi sang kaangtanan ang gin-agom ni Jesus kag ni Timoteo upod sa mga may edad?

¹⁸ Sang 12 anyos pa lamang sia, si Jesus nalipay maghinguyang sang tion upod sa mga may edad, nga nagahambalanay sa espirituwal nga mga butang. “Nakita sia [anay sang iya mga ginikanan] sa templo, nga nagalingkod sa tunga sang mga manunudlo kag nagapamati sa ila kag nagapamangkot sa ila.” (Lucas 2:46) Amo man si Timoteo. Sang si apostol Pablo kag ang iya mga kaupdanan nagduaw sa Listra, si Timoteo nalipay gid makig-upod sa ila kag nagpamati sing maayo sa ila mga panudlo. Amo sina ang iya balatyagon sa lokal nga mga kauturan nga nagrekomendar sa iya.—Binuhatan 16:1-3.

19. Ngaa ginpili labi na ni Pablo si Timoteo subong kaupod sa paglakbay, kag paano nakabulig si Timoteo?

¹⁹ Bisan pa nga si Timoteo kinabubut-on nga nag-alagad para sa iban, ginpili sia ni Pablo subong kaupod nga maglakbay labi na bangod sang iya ikasarang sa pag-alagad sa espirituwal nga mga kinahanglanon sang mga tawo. Bangod sina, sang ginpilit sang kadam-an si Pablo nga maghalin sa Tesalonica, ginpadala niya ang pamatan-on nga si Timoteo agod lugpayan kag pabakuron ang bag-ong mga disipulo. Gani indi lamang nga si Timoteo nalangkag sa pagtuon gikan sa mga may edad kag sa pagkalipay sa pag-upod sa ila; isa sia ka matuod nga espirituwal nga bulig sa ila.—Binuhatan 17:1-10; 1 Tesalonica 3:1-3.

20. Ano ang maalamon nga himuon mo, kag anong mga pag-alagad ang sarang mo mahimo tungod sa mga may edad?

²⁰ Maalamon nga inyo mailog si Jesus kag si Timoteo kag malangkag nga makabenepisyo gikan sa eksperiensia kag ihibalo sang mga may edad. Makig-upod sa ila kag pamangkota sila. Apang ipakita man ang inyo pagkamainuswagon sa espirituwal paagi sa pagbulig sa ila. May mga tigulang bala ukon balatianon nga magaapresyar kon kamo magapamalaklon kag magahimo sang iban nga pag-alagad sa ila? Ayhan duawon lang ninyo sila, basahan sila, kag magsugid sang mga eksperiensia nga naagom ninyo sa ministeryo.

Papel sang mga Ginikanan kag sang Iban Pa

21. Daw ano ka importante ang papel sang mga ginikanan, kag ano ang indi sarang mapadaku sing sobra?

²¹ Ang espirituwal nga kapagros sang mga pamatan-on nagadepende sing daku sa panudlo kag halimbawa sang ila mga ginikanan. (Hulubaton 22:6) Si Jesus nakabenepisyo gikan sa pagnuytoy nga ginhatag sa iya sang iya mahadlukon sa Dios nga mga ginikanan sa duta. (Lucas 2:51, 52) Kag pat-od gid nga si Timoteo indi mahimo nga nangin mainuswagon sa espirituwal kon indi bangod sa paghanas sang iya iloy kag lola. (2 Timoteo 1:5; 3:15) Ang importansia sang regular nga panudlo sang Biblia indi gid mapadaku sing labi! Subong mga ginikanan, ginahatag ninyo bala ini? Ukon ginapatumbayaan bala ini?

22. (a) Kon ginakabig sang mga ginikanan ang pagtuon sa Biblia sang pamilya nga importante, paano naapektuhan ang kabataan? (b) Ano nga panuytoy ang mahatag sang mga ginikanan sa ila kabataan?

²² Ang isa ka pamatan-on sa ulong-talatapan sang mga Saksi ni Jehova nagapaathag nga sa sulod sang mga tinuig nga pagtubo, ang wala naga­bag-o nga bahin sang pagkabuhi sang ila pamilya amo ang semanal nga pagtuon sang Biblia upod sa kabataan. “Kon kaisa kapoy gid katama si Dad halin sa obra nga halos katulugon na gid sia, apang ang pagtuon ginahiwat bisan paano, kag nagbulig ini sa amon sa pag-apresyar sang pagkaserioso sini.” Mga ginikanan, indi mahimo nga ang inyo kabataan magapabalor sing daku sang espirituwal nga mga butang kon kamo wala nagapabalor sa sini. Gani ipatudok ang mga tulumuron nga pagpayunir kag pagmisyonero kag pag-alagad sa Bethel. Buligi sila nga maapresyar nga ang ministeryo amo ang karera nga may palaabuton kag wala gid sing matuod nga palaabuton sa kalibutanon nga karera.—Ipaanggid ang 1 Samuel 1:26-28.

23. Paano mabuligan sang iban sa kongregasyon ang mga pamatan-on agod mangin mainuswagon sa espirituwal?

²³ Mabuligan man sang iban ang mga pamatan-on nga magmainuswagon sa espirituwal. Ayhan matinguhaan ninyo nga makigsugilanon sa ila sa mga miting. Matinguhaan man ninyo nga ilakip sila sa iban ninyo nga hilimuon. Sa pahanugot sang ginikanan, ayhan maupod sang isa ka gulang ang isa ka pamatan-on sa asaynment sa pagpamulongpulong ukon malakip sia sa pagliwaliwa. (Job 31:16-18) Ang diutay nga butang daku sing kahulugan. Ang isa ka nagalakbay nga manugtatap, sang makita nga ang bata nga nagapamati sa iya pamulongpulong wala sing Biblia, nagregalo sang ulihi sa iya sang Biblia. Nalipay gid ang bata indi lamang bangod sa regalo kundi sa interes man nga ginpakita sa iya. Kapin sa 30 ka tuig sang ulihi, ang bata, nga karon isa na ka gulang, nagadumdom gihapon sang pagkalipay sa mahigugmaon nga ginhimo sina nga utod.

24. Ano ang makalilipay nga isugid, kag ano ang dapat nga mangin determinasyon naton?

²⁴ Indi bala makakulunyag mahibaluan nga ginatos ka libo ka “pamatan-on nga kalalakin-an nga kaangay sang tun-og” ang nagabantala sang makapapagsik nga mensahe sang Ginharian kag sa magkubos may amo man kadamo nga pamatan-on nga kababayin-an nga nagahuman ‘sang dakung hubon nga nagbantala sang maayong balita’? Kabay nga iaplikar nila nga tanan ang ila kaugalingon nga magmainuswagon sa espirituwal, kag kabay nga buligan naton sila tanan sa sina nga katuyuan.—Salmo 110:3; 68:11.

Mga Pamangkot nga Repasuhon

◻ Ano ang makabulig sa pamatan-on sa pagpamat-od kon san-o sia mabawtismuhan?

◻ Paano ginatakus sang pagginawi sang pamatan-on ang iya pagkamainuswagon sa espirituwal?

◻ Ano ang magabulig sa mga pamatan-on nga maluyagan ang mga miting kag pag-alagad sa latagon?

◻ Ano nga kaangtanan ang dapat palambuon sang mga pamatan-on upod sa mga may edad?

◻ Paano mabuligan sang mga ginikanan kag mga may edad ang mga pamatan-on?