Pagbulig sa Iban sa Pagsimba sa Dios

“Kon . . . may magsulod nga dimatinuohon ukon ordinaryo nga tawo, . . . ginapadayag ang mga tinago sang iya tagipusuon, kag magahapa sia kag magasimba sa Dios.”​—⁠1 CORINTO 14:​24, 25.

1-3. Paano ang madamo sa Corinto nabuligan sa pagtigayon sang kahamuot sang Dios?

SA IYA ikaduhang misyonero nga paglakbay, si apostol Pablo nagpabilin sa siudad sang Corinto sa isa ka tuig kag tunga. Didto “masako [sia] sa pagwali, nga nagapanaksi.” Upod ang anong resulta? “Madamo sang mga taga-Corinto nga nakabati kay Pablo nagtuo kag ginbawtismuhan.” (Binuhatan 18:​5-11) Sila “ginpakabalaan . . . , ginatawag nga mga balaan.”​—⁠1 Corinto 1:⁠2.

² Ginduaw sang ulihi ni Apolos ang Corinto. Sang una, ginbuligan sia nanday Priscila kag Aquila sa paghangop “sa dalan sang Dios sing mas husto,” lakip ang nahanungod sa bawtismo. Busa nangin isa sia ka Cristiano nga may maayong kabubut-on ukon kahamuot sang Dios. (Binuhatan 18:24–19:⁠7) Si Apolos, man, nagbulig sa mga taga-Corinto nga ‘ginpangdala [anay] sa mga diosdios nga apa.’ (1 Corinto 12:⁠2) Ining katawhan mahimo nga ginhatagan sing instruksion sa Biblia sa ila mga puluy-an; nakatuon man sila paagi sa pagtambong sa Cristianong mga miting.​—⁠Binuhatan 20:20; 1 Corinto 14:​22-24.

³ Ang resulta sinang panudlo amo nga madamo sang ‘mga dimatinuohon kag ordinaryo nga mga tawo’ anay ang naganyat sa matuod nga pagsimba. Daw ano ka makalilipay nga makita ang mga lalaki kag mga babayi nga nagauswag padulong sa bawtismo kag sa kahamuot sang Dios! Makalilipay gihapon ini.

Pagbulig sa ‘mga Dimatinuohon kag Ordinaryo nga mga Tawo’

4. Sa anong mga paagi ang madamo karon ginabuligan subong sadtong sa Corinto?

⁴ Ang mga Saksi ni Jehova karon nagatuman man sang sugo ni Jehova nga ‘maghimo sing mga disipulo sa tanan nga kapungsoran, nagabawtismo sa ila.’ (Mateo 28:​19, 20) Sa tapos matanum ang mga binhi sang kamatuoran sa mabinatunon nga mga tagipusuon, nagabalik sila kag nagabunyag sini. (1 Corinto 3:​5-9; Mateo 13:​19, 23) Ang mga Saksi nagatanyag sing walay bayad nga pagtuon sang Biblia sa balay kada semana agod masabat ang mga pamangkot sang mga tawo kag makatuon sila sang mga kamatuoran sang Biblia. Ginaagda man sila sa pagtambong sa lokal nga mga miting sang mga Saksi ni Jehova, subong nga ang unang-siglo nga “mga dimatinuohon” nagtambong sa Corinto. Apang paano dapat tamdon sang mga Saksi ni Jehova ang mga tawo nga nagatuon sang Biblia kag nagakadto sa mga miting?

5. Anong Makasulatanhon nga sadsaran ang maghalong sa pagpakig-angot sa sina nga mga indibiduwal?

⁵ Nalipay kita sa pagtan-aw sa ila nga nagapalapit sa Dios. Apang, dumduma nga indi pa sila bawtismado nga mga matinuohon. Dumduma man ang duha ka leksion pasad sa nauna nga artikulo. (1) Ang mga Israelinhon nagpakita sing paghalong sa dumuluong nga mga pumuluyo nga, bisan pa kaupod sang katawhan sang Dios kag nagtuman sa pila ka kasuguan, indi sirkunsidado nga mga proselita, mga kauturan sa pagsimba. (2) Ang taga-Corinto nga mga Cristiano nga nagapakig-angot sa ‘mga dimatinuohon kag ordinaryo nga mga tawo’ nagahalong bangod sang pinamulong ni Pablo: “Dili kamo magpagota sing linibagon upod sa mga dimatinuohon. Kay ano bala ang pag-updanay sang pagkamatarong kag kalautan?”​—⁠2 Corinto 6:⁠14.

6. Paano ang “mga dimatinuohon” “ginasabdong” sa mga miting, kag ano ang kinaugali sina nga pagsabdong?

⁶ Busa samtang ginaabiabi naton ang ‘mga dimatinuohon kag ordinaryo nga mga tawo,’ nakahibalo kita nga wala pa nila masugata ang mga talaksan sang Dios. Subong sang ginapakita sang Biblia sa 1 Corinto 14:​24, 25, dapat sila “usisaon sing maayo,” “ginasabdong” pa gani, sang naton-an nila. Inang pagsabdong indi hudisyal nga sahi; wala sila gintawag sa atubangan sang isa ka hudisyal nga komite sang kongregasyon bangod indi pa sila bawtismado nga mga katapo sini. Sa baylo, subong resulta sang naton-an nila, ining mga bag-ohan nangin kombinsido nga ginatagudilian sang Dios ang bisan anong makagud kag imoral nga mga dalanon.

7. Anong dugang nga pag-uswag ang luyag nga himuon sang madamong estudyante kag ngaa?

⁷ Madamong dibawtismado ang maluyag sa ulihi nga maghimo sing labaw pa sa pagtambong sa mga miting subong interesado nga mga manugtuon. Ining mga pulong ni Jesus nagapakita kon ngaa: “Ang gintoton-an indi labi sa iya manunudlo, apang ang tagsatagsa sang mahimpit sia mangin subong sang iya manunudlo.” (Lucas 6:40) Mahangpan sang estudyante sa Biblia nga ginatamod sang iya manunudlo ang pag-alagad sa latagon subong importante kag makatigayon sing kalipay gikan sini. (Mateo 24:14) Busa, upod ang dugang nga pagtuo, ang isa nga nagatuon sang mga kamatuoran sang Biblia kag nagatambong sa mga miting mahimo nga magadumdom sang mga pulong: “Daw ano katahom sa mga bukid ang mga tiil sang nagadala sang maayong mga balita, nga nagabantala sang paghidait, nga nagadala sang maayong mga balita sang kaayuhan, nga nagabantala sang kaluwasan.” (Isaias 52:7; Roma 10:​13-15) Bisan dibawtismado, mahimo nga luyag niya mangin manugbantala sang Ginharian nga nagapakig-upod sa kongregasyon sang mga Saksi ni Jehova.

8, 9. (a) Ano ang dapat himuon kon ang estudyante sang Biblia maluyag sa pagpakigbahin sa dayag nga ministeryo? (b) Kon ang duha ka gulang makigkita sa palaabuton nga manugbantala kag sa iya manunudlo, ano ang himuon nila? (c) Anong responsabilidad ang ginakuha sang bag-ong manugbantala?

⁸ Kon nasapwan sang Saksi nga nagadumala sang pagtuon sa Biblia nga ang estudyante maluyag sa pagpakigbahin sa pag-alagad sa latagon, sarang niya ini mahambalan upod sa nagadumala nga manugtatap, nga magahimo para sa duha ka gulang nga makigkita sa estudyante sang Biblia kag sa iya manunudlo. Ang mga gulang nalipay kon ang bag-ohan maluyag mag-alagad sa Dios. Wala nila ginapaabot nga may pareho sia kadamo nga ihibalo nga ginapanag-iyahan sang mga bawtismado kag abanse na sa kamatuoran, nga sa ila labi ang ginakinahanglan. Apang, ang mga gulang maluyag sa pagtan-aw nga sa wala pa ang bag-ohan magpakigbahin sa pag-alagad sa latagon upod sa kongregasyon, may ihibalo sia nahanungod sa mga panudlo sang Biblia kag nagpahisuno sang iya kabuhi sa mga prinsipio sang Dios. Busa tungod sang maayong mga rason nga ang duha ka gulang makigkita sa mahimo nga mangin manugbantala kag sa Saksi nga nagadumala sang pagtuon.a

⁹ Pahibaluon sang duha ka gulang ang estudyante nga kon kalipikado sia kag nagapakigbahin sa pag-alagad sa latagon, mahimo niya ihatag ang iya report sa pag-alagad sa latagon kag himuan sia sing isa ka Congregation’s Publisher Record card sa iya ngalan. Magapakita ini sang iya pagpakig-upod sa teokratikong organisasyon sang mga Saksi ni Jehova kag sang iya pagpasakop sa sini. (Matuod man ini sa tanan pa nga nagahatag sang mga report sa pag-alagad sa latagon.) Ang paghinun-anon magatuptop man sa laygay sang Biblia, subong sang ginabalay sa pahina 98 kag 99 sang Organisado sa Pagtuman sang Aton Ministeryo.b Busa, mangin nagakaigo ini nga tion para sa estudyante sa pagtigayon sing personal nga kopya sina nga libro.

10. (a) Paano ang dibawtismado nga manugbantala padayon nga mag-uswag, kag upod ang anong tulumuron? (b) Ngaa ginhimo ang pagbag-o tuhoy sa termino nga “nahamut-an nga kaupod”? (Tan-awa ang footnote.)

¹⁰ Ang tawo nga nakalipikar subong dibawtismado nga manugbantala sang maayong balita nagpadulong sa direksion nga mangin ‘tawo nga maayo sing kabubut-on.’c (Lucas 2:14) Bisan pa indi sia dedikado kag bawtismado, mareport niya karon ang iya pagpanaksi nga hilikuton upod sa mga minilyon ka aktibo sa bug-os nga duta nga “nagabantala sang pulong sang Dios.” (Binuhatan 13:5; 17:3; 26:​22, 23) Himuon ang pahibalo sa kongregasyon nga isa sia ka bag-o dibawtismado nga manugbantala. Dapat sia magpadayon sa pagtuon sa Biblia, sa pagpakigbahin sa mga miting, sa pag-aplikar sang naton-an niya, kag sa pagpaambit sini sa iban. Sa ulihi, luyag niya maghimo sing tikang sang Cristianong bawtismo, busa mangin kalahamut-an sang Dios kag ‘gintandaan’ para sa kaluwasan.​—⁠Ezequiel 9:​4-6.

Bulig sa Isa nga Nakasala

11. Paano pakig-angotan sang kongregasyon ang bawtismado nga mga makasasala?

¹¹ Sa nagligad nga artikulo, ginhambalan naton ang mga aman sang kongregasyon sa pagbulig sa bawtismado nga Cristiano nga nakahimo sing mabug-at nga sala. (Hebreo 12:​9-13) Kag nakita naton gikan sa Biblia nga kon ang bawtismado nga nakasala wala nagahinulsol, ang kongregasyon dapat magpaguwa sa iya kag sa ulihi magalikaw sa pagpakig-upod sa iya. (1 Corinto 5:​11-13; 2 Juan 9-11; 2 Tesalonica 2:​11, 12) Apang, anong mga tikang ang himuon kon ang dibawtismado nga manugbantala nakasala sing mabug-at?

12. (a) Ngaa ang maluluy-on nga bulig matigayon man sang dibawtismado nga mga manugbantala nga nakasala? (b) Paano ang prinsipio sa Lucas 12:48 maangot sa pagkamaysalabton nahanungod sa sala?

¹² Si Judas naglaygay nga ipakita ang kaluoy sa hinaplas nga mga Cristiano nga nagpalambo sing mga pangduhaduha ukon nahulog sa mga sala sang unod, lamang nga sila mahinulsulon. (Judas 22, 23; tan-awa man ang 2 Corinto 7:10.) Indi bala, nian, labi nga nagakaigo nga ipakita ang kaluoy sa nakasala nga dibawtismado nga tawo nga nagapakita sing paghinulsol? (Binuhatan 3:19) Huo, kay ang iya espirituwal nga sadsaran indi subong kapag-on, kag ang iya eksperiensia sa Cristianong pagkabuhi mas limitado. Mahimo nga wala pa niya maton-i ang panghunahuna sang Dios nahanungod sa pila ka butang. Wala pa sia makahimo sing mga serye sang wala pa ang bawtismo nga paghinun-anon sa Biblia upod sa mga gulang, kag wala pa sia makahimo sang serioso nga tikang sang pagpatugmaw sa tubig. Dugang pa, si Jesus nagsiling nga “ang bisan sin-o nga ginhatagan sing madamo, madamo ang kinahanglanon sa iya.” (Lucas 12:⁠48) Gani, madamo ang ginakinahanglan sa mga bawtismado nga, upod ang dugang nga ihibalo kag mga pagpakamaayo, may pinasahi nga salabton.​—⁠Santiago 4:17; Lucas 15:​1-7; 1 Corinto 13:⁠11.

13. Kon ang dibawtismado nga manugbantala nakasala, ano ang himuon sang mga gulang sa pagbulig?

¹³ Nahisuno sa laygay ni Pablo, ang kalipikado sa espirituwal nga mga kauturan maluyag sa pagbulig sa dibawtismado nga manugbantala nga nakahimo sing sayop nga tikang sa wala pa sia makamarasmas sa sini. (Ipaanggid ang Galacia 6:⁠1.) Mapangabay sang mga gulang ang duha sa ila (ayhan ang nakigsugilanon na anay sa iya) sa pagpanikasog nga ipasag-uli sia kon luyag niya magpabulig. Himuon nila ini, indi tungod sang handum nga sabdungon sia sing matigdas, kundi sa maluluy-on nga paagi kag sa espiritu sang kalum-ok. (Salmo 130:⁠3) Sa kalabanan nga kaso, ang Makasulatanhon nga laygay kag praktikal nga mga panugda bastante na sa pagpatubas sing paghinulsol kag sa pagbutang sa iya sa husto nga banas.

14, 15. (a) Ano ang himuon kon ang makasasala tunay nga nagahinulsol? (b) Anong malip-ot nga nagapaathag nga komento ang himuon sa sinang mga kaso?

¹⁴ Ang duha ka gulang magahatag sing mga panuytoy nga nagakaigo sa kahimtangan sang dibawtismado nga nakasala. Sa pila ka hitabo, mahimo nila hisugtan nga ang nakasala indi anay hatagan sing bahin sa Teokratikong Eskwelahan sa Ministeryo ukon pahanugotan nga makakomento sa mga miting. Ukon mahimo nila sia silingan nga indi makigbahin sa dayag nga ministeryo upod sa kongregasyon tubtob nakahimo sia sing dugang nga pag-uswag sa espirituwal. Sugiran na lamang nila sia ugaling nga mahimo na sia liwat makapakigbahin sa pag-alagad sa latagon. Kon ang sala wala nagahatag sing malain nga ngalan kag wala nagatuga sing katalagman sa katinlo sang panong, indi kinahanglan nga pahibaluon ang kongregasyon paagi sa isa ka pahibalo.

¹⁵ Apang, ano kon masapwan sang duha ka gulang nga mahinulsulon gid sia, apang ang sayop naburuka? Ukon ano kon ang sala naburuka sang ulihi? Sa duha ka kaso, sarang nila masilingan ang Service Committee sang Kongregasyon, nga maghimo sing isa ka simple nga pahibalo, subong sang masunod: “Ang bagay nga nagadalahig ka . . . gintatap na, kag padayon sia nga nagaalagad subong dibawtismado nga manugbantala upod sang kongregasyon.” Subong sang tanan pa nga mga butang, ang hubon sang mga gulang sarang makapamat-od kon bala nagakaigo nga sa ulihi maghatag sing Makasulatanhon nga laygay upod ang laygay nahanungod sa sahi sang sala nga nadalahig.

16, 17. (a) Anong duha ka kahimtangan ang mahimo nga sadsaran para sa tuhay nga pahibalo? (b) Ano nga sahi ining pahibalo?

¹⁶ Kon kaisa, ang dibawtismado nga manugbantala nga nakasala wala nagabaton sang mahigugmaon nga bulig. Ukon ang dibawtismado nga manugbantala mahimo magapamat-od nga indi niya luyag magpadayon sa pag-uswag padulong sa bawtismo, kag ginapahibalo niya ang mga gulang nga indi niya luyag makilala subong isa ka manugbantala. Ano ang himuon? Ang pagdisfellowship indi mahimo sa ila nga sa pagkamatuod wala pa mangin kalahamut-an sang Dios. Ang kahimusan tuhoy sa pagdisfellowship sa dimahinulsulon nga mga makasasala naaplikar sa ‘ginatawag nga mga kauturan,’ sa mga bawtismado. (1 Corinto 5:11) Apang, nagakahulugan bala ini nga ang sala ginapasapayanan? Indi.

¹⁷ Ang mga gulang amo ang may salabton sa ‘pagtatap sa panong sang Dios sa tunga nila.’ (1 Pedro 5:⁠2) Kon ang duha ka gulang nga nagahatag sing bulig mamat-od nga ang dibawtismado nga makasasala indi mahinulsulon kag indi kalipikado nga mangin manugbantala, pahibaluon nila ang indibiduwal.d Ukon kon ang dibawtismado magasiling sa mga gulang nga indi na niya luyag makilala subong manugbantala, batunon nila ang iya desisyon. Sa duha ka hitabo, nagakaigo para sa Service Committee sang Kongregasyon nga maghimo sing simple nga pahibalo sa nagakaigo nga tion, nagasiling “Si . . . indi na manugbantala sang maayong balita.”

18. (a) Pagkatapos sang pahibalo, ano ang dumdumon sang mga Cristiano sa pagpamat-od sing personal kon paano magpanghikot? (b) Kinahanglan bala nga bug-os nga likawan ang mga dibawtismado nga nakasala sang nagligad?

¹⁸ Paano sia tamdon sang mga Saksi pagkatapos? Ti, sa nauna pa nga punto ‘dimatinuohon’ sia nga nagatambong sa mga miting. Nian luyag niya nga mangin kag makalipikar nga mangin manugbantala sang maayong balita. Indi na amo sini ang kaso, gani sa liwat isa sia ka tawo sang kalibutan. Ang Biblia wala nagakinahanglan nga ang mga Saksi magalikaw sa pagpakigsugilanon sa iya, kay indi sia disfellowship.e Apang, ang mga Cristiano dapat mag-andam nahanungod sa sinang tawo sang kalibutan nga wala nagasimba kay Jehova, subong sang ginhimo sang mga Israelinhon nahanungod sa disirkunsidado nga mga dumuluong. Ining pag-andam nagabulig sa pag-amlig sa kongregasyon gikan sa “diutay nga linamas,” ukon malaut nga elemento. (1 Corinto 5:⁠6) Kon sa ulihi nagapabutyag sia sing hanuot nga handum para sa isa ka pagtuon sa Biblia nga hiwaton upod sa iya, kag nagakaigo ini sa mga gulang, ayhan magabulig ini sa iya sa pag-apresyar liwat kon daw ano nga pribilehiyo ang magsimba kay Jehova upod sa Iya katawhan.​—⁠Salmo 100.

19. Paano makahatag sing dugang nga bulig sing pribado ang mga gulang sa pila ka kaso?

¹⁹ Kon nakita sang mga gulang nga ining sahi sang tawo makatalagam gid sa panong, sarang nila mapaandaman sing pribado ang mga yara sa katalagman. Halimbawa, ang manugbantala anay mahimo nga isa ka pamatan-on nga nakahimo sing pagpahubog ukon imoralidad. Walay sapayan sang pahibalo nga indi na sia dibawtismado nga manugbantala, mahimo sia magatinguha sa pagpakig-upod sa mga pamatan-on sa kongregasyon. Sa sina nga kahimtangan, ang mga gulang magapakigsugilanon sing pribado sa mga ginikanan sang mga yara sa katalagman, kag mahimo nga sa mga pamatan-on man. (Hebreo 12:​15, 16; Binuhatan 20:​28-30) Sa malaka nga kaso sang isa ka tawo nga matinublagon ukon masingki nga makatalagam, sarang sia masugiran nga wala sia ginaabiabi sa mga miting kag nga ang bisan anong panikasog sa pagsulod pagakabigon nga paglabang.

Pagbulig sa mga Menor-de-Edad sa Pagsimba sa Dios

20. Anong bulig ang mahatag sang mga Cristianong ginikanan para sa ila kabataan, kag upod ang anong resulta?

²⁰ Ang Biblia nagahatag sa mga ginikanan sing responsabilidad nga tudluan ang ila kabataan sa dalanon sang balaan nga kamatuoran. (Deuteronomio 6:​4-9; 31:​12, 13) Busa, ang mga Saksi ni Jehova madugay na nga naglaygay sa Cristianong mga pamilya nga maghimo sing semanal nga pagtuon sa Biblia. Ang Cristianong mga ginikanan dapat magpalig-on sa ila mga kabataan sa pag-uswag padulong sa dedikasyon kag bawtismo kag sa amo matigayon ang kahamuot sang Dios. (Hulubaton 4:​1-7) Nakita naton sa kongregasyon ang makalilipay nga resulta​—⁠ginatos ka libolibo ka huwaran nga mga kabataan nga nagahigugma kay Jehova kag maluyag sa pagsimba sa iya sing dayon.

21-23. (a) Primero, paano tatapon ang sala sang menor-de-edad? (b) Ano ang katungdanan sang mga gulang sa kongregasyon sa sinang mga kahimtangan?

²¹ Ang Cristianong mga ginikanan may pangunang responsabilidad man sa pagdisiplina kag sa pagsabdong sa ila kabataan, nagapatuman sang bisan anong mga pagdumili ukon mahigugmaon nga mga silot nga sa banta nila kinahanglanon. (Efeso 6:4; Hebreo 12:​8, 9; Hulubaton 3:​11, 12; 22:15) Apang, kon ang menor-de-edad nga bata nga nagapakig-upod subong dibawtismado nga manugbantala makahimo sing mabug-at nga sala, kabalak-an ini sang mga gulang nga ‘nagabantay sa mga kalag’ sang panong.​—⁠Hebreo 13:⁠17.

²² Sing sadsaran, ina nga sala dapat tatapon subong sang ginbalay kaina sa sining artikulo. Ang duha ka gulang sarang matangdo sa pag-usisa sa sini. Mahimo nila, halimbawa, hambalan primero upod sa mga ginikanan (ukon ginikanan) kon ano ang natabo, kon ano ang panimuot sang bata, kag kon anong mga tikang sa pagtadlong ang nahimo na. (Ipaanggid ang Deuteronomio 21:​18-21.) Kon masarangan sang Cristianong mga ginikanan ang kahimtangan, ang mga gulang makapulupamangkot na lamang sa ila sa tion kag tion sa paghatag sing mapuslanon nga laygay, mga panugda, kag mahigugmaon nga pagpalig-on.

²³ Apang, kon kaisa ang pagpakigsugilanon sa mga ginikanan nagapakita nga labing maayo para sa mga gulang nga makigkita upod sa balingag nga menor-de-edad kag sa mga ginikanan. Ginadumdom ang mga limitasyon kag mga huyog sang mga pamatan-on, ang mga manugtatap magapanikasog sa pagtudlo sa lamharon, dibawtismado nga manugbantala nga may kalum-ok. (2 Timoteo 2:​22-26) Sa pila ka hitabo, mahimo mangin maathag nga indi na sia kalipikado mangin manugbantala kag nga ang nagakaigo nga pahibalo dapat himuon.

24. (a) Bisan pa nga ang menor-de-edad nakahimo sing mabug-at nga sala, ano ang nagakaigo nga himuon sang mga ginikanan, kag paano nila ini himuon? (b) Paano ini naaplikar sa menor-de-edad nga gindisfellowship?

²⁴ Pagkatapos sina, ano ang himuon sang mga ginikanan tungod sa ila nakasala nga menor-de-edad nga bata? May salabton gihapon sila sa ila bata, bisan pa indi na sia kalipikado subong dibawtismado nga manugbantala ukon bisan pa nga gindisfellowship sia bangod sang paghimo sing sala pagkatapos sang bawtismo. Subong nga padayon sila nga magaaman sa iya sang pagkaon, panapton, kag pasilungan, dapat nila tudluan kag disiplinahon sia nahisuno sa Pulong sang Dios. (Hulubaton 6:​20-22; 29:17) Busa ang mahigugmaon nga mga ginikanan magahimus sing isa ka pagtuon sang Biblia sa balay upod sa iya, bisan pa nga gindisfellowship sia.f Mahimo nga makatigayon sia sing nagatadlong nga benepisyo gikan sa ila pagtuon upod sa iya sing isahanon. Ukon mahimo sila mamat-od nga sarang sia makapadayon sa pagpakigbahin sa kahimusan sa pagtuon sang pamilya. Bisan pa nga nagtalang sia, luyag nila sia makita nga nagabalik kay Jehova, subong sang ginhimo sang buhaha nga anak sa ilustrasyon ni Jesus.​—⁠Lucas 15:​11-24.

25. Ngaa ang mahigugmaon nga interes kag bulig ginpatuhoy sa “mga dimatinuohon” karon?

²⁵ Ang katuyuan sang aton pagbantala kag pagtudlo amo ang pagbulig sa iban nga mangin malipayon nga mga sumilimba sang matuod nga Dios. Ang ‘mga dimatinuohon kag ordinaryo nga mga tawo’ sa Corinto napahulag sa ‘paghapa kag sa pagsimba sa Dios, nagasiling: “Ang Dios totoo nga yara sa inyo.” ’ (1 Corinto 14:25) Daw ano nga kalipay nga makita sa karon ang dugang kag dugang nga mga tawo nga nagasimba sa Dios! Mahimayaon ini nga katumanan sang pahibalo sang mga anghel: “Himaya sa Dios sa kahitaasan, kag paghidait sa duta sa tunga sang mga tawo nga maayo sing kabubut-on [ukon, mga tawo nga iya nahamut-an].”​—⁠Lucas 2:14.

[Mga Footnote]

Nadumduman Mo Bala?

◻ Ano ang pagtamod sang mga Cristiano sa “mga dimatinuohon” nga nagatambong sa mga miting?

◻ Kon ang estudyante sang Biblia maluyag sa pagpakigbahin sa pag-alagad sa latagon, anong mga tikang ang ginasunod sang mga gulang, kag anong responsabilidad ang ginabaton sang estudyante?

◻ Ano ang himuon kon ang dibawtismado nga manugbantala nakahimo sing mabug-at nga sala?

◻ Paano mabuligan sang mga ginikanan kag sang mga gulang ang menor-de-edad nga mga kabataan nga nagaistar sa balay, bisan pa nga inang mga pamatan-on mabug-at nga nakasala?

[Laragway sa pahina 16]

Ang mangin manugbantala, bisan indi pa bawtismado, importante kag responsable nga tikang sa pagtigayon sing kahamuot sang Dios