Rut nangin katigulangan ni David kag sang ulihi ni Jesucristo. Busa natigayon niya ang “tuman nga balus.” Dugang pa, ang mga nagabasa sang Makasulatanhon nga kasaysayan nakatuon sing isa ka hamili nga leksion: Magmainunungon kay Jehova, kag pagapakamaayuhon ikaw sing bugana.​—⁠Rut 2:12; 4:​17-22; Hulubaton 10:⁠22; Mateo 1:​1, 5, 6.

16. Anong pagtilaw ang naagihan sang tatlo ka Hebreo, kag paano ining kasaysayan nagabulig sa aton?

¹⁶ Ang kasaysayan sang mga Hebreo nga sanday Sadrac, Mesac, kag Abednego makabulig sa aton nga magmatutom sa Dios sa mabudlay nga mga kahimtangan. Handurawa ang hitabo samtang ang Daniel kapitulo 3 ginabasa sing mabaskog. Isa ka daku nga larawan nga bulawan ang ginpatindog sa kapatagan sang Dura, diin nagtipon ang Babilonianhon nga mga opisyales. Sa pagtunog sang mga instrumento sa musika, naghapa sila kag nagsimba sa larawan nga ginhimo ni Hari Nabocodonosor. Ginhimo ina sang tanan luwas nanday Sadrac, Mesac, kag Abednego. Sing matinahuron, apang malig-on, ginsugiran nila ang hari nga indi sila magaalagad sa iya mga ­dios kag magasimba sa larawan nga bulawan. Ining pamatan-on nga mga Hebreo gindap-ong sa ginpainit katama nga hurno. Apang ano ang natabo? Nagatan-aw sa sulod, nakita sang hari ang apat ka mabukod nga lalaki, ang isa sa ila “kaangay sa anak sang mga dios.” (Daniel 3:25) Ang tatlo ka Hebreo ginpaguwa sa hurno, kag ginpakamaayo ni Nabocodonosor ang ila Dios. Makalilipay gid handurawon ang kasaysayan. Kag daku gid nga leksion ang ginahatag sini nahanungod sa pagkatutom kay Jehova sa idalom sang pagtilaw!

Manginpulos Gikan sa Pagbasa sa Biblia Subong Isa ka Pamilya

17. Ihatag sa malip-ot ang pila sang mapuslanon nga mga butang nga matun-an sang imo pamilya paagi sa pagbasa sang Biblia sing ulupod.

¹⁷ Ang imo pamilya mahimo makaagom sang madamong kapuslanan kon tayuyon kamo nga maghinguyang sing tion sa pagbasa sang Biblia sing ulupod. Sugod sa Genesis, masaksihan ninyo ang pagpanuga kag mahimutaran ang orihinal nga Paraiso nga puluy-an sang tawo. Maupdan ninyo ang matutom nga mga patriarka kag ang ila mga pamilya kag masundan ang mga Israelinhon samtang nagalakat sila sa nagmala nga Dagat nga Mapula. Makita ninyo ang bata nga manugbantay nga si David nga naglutos sa Filistinhon nga higante nga si Goliat. Makita sang inyo pamilya ang pagtukod sa templo ni Jehova sa Jerusalem, ang paghapay sa sini sang Babilonianhon nga mga hangaway, kag ang pagtukod liwat sa sini sa idalom ni Gobernador Zorobabel. Upod sa kubos nga mga manugbantay malapit sa Betlehem, mabatian ninyo ang pahibalo sang anghel tuhoy sa pagkabun-ag ni Jesus. Matigayon ninyo ang mga detalye tuhoy sa pagbawtismo sa iya kag sa ministeryo niya, makita sia nga naghatag sang iya tawhanon nga kabuhi subong gawad, kag magkalipay sa iya pagkabanhaw. Masunod, makalakbay kamo kaupod ni apostol Pablo kag makita ang pagtukod sa mga kongregasyon samtang nagalapnag ang Cristianismo. Nian, sa tulun-an sang Bugna, malipay ang inyo pamilya sa dakung palanan-awon ni apostol Juan tuhoy sa palaabuton, lakip ang Isa ka Tuig nga Paggahom ni Cristo.

18, 19. Anong mga panugda ang ginahatag nahanungod sa pagbasa sa Biblia sang pamilya?

¹⁸ Kon ginabasa ninyo ang Biblia sing mabaskog subong isa ka pamilya, basaha ini sing maathag kag mapagsik. Kon nagabasa sang pila ka bahin sang Kasulatan, mahimo mabasa sang isa ka katapo sang pamilya​—⁠ayhan ang amay​—⁠ang sugilanon. Makuha sang iban sa inyo ang papel sang mga karakter sa Biblia, nagabasa sang inyo bahin upod ang nagakaigo nga balatyagon.

¹⁹ Samtang ulupod ninyo nga ginabasa ang Biblia subong isa ka pamilya, ang inyo ikasarang sa pagbasa mahimo mag-uswag. Ayhan, ang imo ihibalo sa Dios magadugang, kag magapasuod pa gid ini sa imo sa iya. Si Asap nag-amba: “Apang maayo sa akon nga magpalapit sa Dios. Ginhimo ko nga akon dalangpan ang Soberanong Ginuo nga si Jehova, agod nga masugid ko ang tanan mong binuhatan.” (Salmo 73:28) Magabulig ini sa imo pamilya nga mangin kaangay ni Moises, nga “nagbatas sia subong nga nagatan-aw sa Isa nga dimakita,” nga amo, si Jehova nga Dios.​—⁠Hebreo 11:⁠27.

Ang Pagbasa kag ang Cristianong Ministeryo

20, 21. Paano naangot ang aton pagbantala nga hilikuton sa ikasarang sa pagbasa?

²⁰ Ang aton handum nga simbahon ang “Isa nga dimakita” dapat magpahulag sa aton nga manikasog agod mangin maayong mga bumalasa. Ang ikasarang sa pagbasa sing maayo nagabulig sa aton nga makapanaksi gikan sa Pulong sang Dios. Nagabulig gid ini sa aton nga magpadayon sa pagbantala sang Ginharian nga hilikuton nga sa sini ginsugo ni Jesus ang iya mga sumulunod sang nagsiling sia: “Lakat kamo . . . kag maghimo sing mga disipulo sang katawhan sa tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu, nagatudlo sa ila sa pagbantay sang tanan nga butang nga ginsugo ko sa inyo.” (Mateo 28:​19, 20; Binuhatan 1:8) Ang pagpanaksi amo ang pangunang hilikuton sang katawhan ni Jehova, kag ang ikasarang sa pagbasa nagabulig sa aton sa paghimo sini.

²¹ Kinahanglan ang panikasog agod mangin maayo nga bumalasa kag sampaton nga manunudlo sang Pulong sang Dios. (Efeso 6:17) Gani, ‘himua ang imo bug-os nga masarangan nga ipresentar ang imo kaugalingon nga kalahamut-an sa Dios, nagagamit sang pulong sang kamatuoran sing husto.’ (2 Timoteo 2:15) Dugangi ang imo ihibalo sang Makasulatanhon nga kamatuoran kag ang imo ikasarang subong isa ka Saksi ni Jehova paagi sa paghugod sang imo kaugalingon sa pagbasa.

Basaha ang Pulong sang Dios kag Alagda Sia sa Kamatuoran

“Tudlui ako sang imo dalanon, O Jehova. Magalakat ako sa imo kamatuoran.” —⁠SALMO 86:⁠11.

1. Sing kinahanglanon, ano ang ginsiling sang nahaunang guwa sini nga magasin tuhoy sa kamatuoran?

SI Jehova nagapadala sang kapawa kag kamatuoran. (Salmo 43:⁠3) Nagahatag man sia sa aton sing ikasarang sa pagbasa sang iya Pulong, ang Biblia, kag sa pagtuon sang kamatuoran. Ang nahauna nga guwa sini nga magasin​—⁠Hulyo 1879​—⁠nagsiling: “Ang kamatuoran, kaangay sang kubos nga diutay nga bulak sa ka­mingawan sang kabuhi, ginapalibutan kag halos ginalumos sang dagaya nga pagtubo sang mga gamhon sang kasaypanan. Kon luyag mo ini makita dapat ka pirme magbantay. Kon luyag mo makita ang katahom sini dapat mo ipahigad ang mga gamhon sang kasaypanan kag ang mga talungon sang pagkapanatiko. Kon luyag mo ini panag-iyahan dapat ka magduko agod makuha ini. Indi mangin kontento sa isa ka bulak sang kamatuoran. Kon ang isa bastante na kuntani wala na sing gindugang pa. Magpadayon sa pagtipon, magpadayon sa pagpangita.” Ang pagbasa kag pagtuon sa Pulong sang Dios nagabulig sa