sing nagakaigo, mahimo ini makapadya sa aton sing tudok nga kaayawan kag paghidait. Mahimo ini makatuytoy, makaamlig, kag makapahulag sa aton. Ang The Interpreter’s Bible nagkomento: “Ang kapagros sa panghunahuna kag emosyon mahimo lamang mapreserbar kon ang indibiduwal manikasog nga iangot ang kal-ang sa tunga sang kon ano ang iya ginahimo kag kon ano ang iya ginabatyag nga dapat himuon.” Paano maangot ina nga kal-ang? Posible bala nga dihunon kag hanason ang aton konsiensia? Ini nga mga pamangkot pagabinagbinagon sa masunod nga artikulo.

Kon Paano Hanason ang Imo Konsiensia

“ANG matinlo nga konsiensia makapahamuok sang imo katulugon.” Ining dumaan nga hulubaton nagapadaku sang isa ka importante nga kamatuoran: Kon aton sundon ang aton konsiensia, mabatyagan naton ang tudok nga paghidait kag kahim-ong.

Apang, indi tanan ang nagahimo sina. Gindeklarar ni Adolf Hitler ang iya kaugalingon nga napaidalom sa isa ka misyon sa paghilway sa tawo gikan sa makapanubo nga pamensaron, ukon ilusyon, nga nakilala subong amo ang konsiensia. Ang iya makakulugmat nga paggahom nagahatag sing isa ka makapakibang nga laragway kon daw ano ka pintas ang mga tawo kon sikwayon nila ang ila konsiensia. Apang, bisan karon madamo sang masingki nga kriminal ang subong sina ka walay pasunaid​—⁠yadtong nagapanglugos kag nagapamatay nga wala sing paghinulsol. Ang nagauswag nga kadamuon sang nagabuhat sini mga lamharon pa kaayo. Ang libro nga nagatuon sining makalilibog nga hitabo nagadala sing subtitulo nga Children Without a Conscience.

Samtang ang kalabanan nga tawo wala gid nagahunahuna sa pagbuhat sing masingki nga krimen, madamo ang wala ginatublag sa pagbuhat sing seksuwal nga imoralidad, pagbutig, ukon pagpangdaya. Ang moral nagnubo sa bug-os nga kalibutan. Nagapatuhoy sa lapnag nga apostasya gikan sa matuod nga pagsimba, si apostol Pablo nagsulat nga ang pila ka mga Cristiano madala sa impluwensia sang kalibutan kag gani ‘namarkahan ang ila konsiensia subong sang salsalon nga inugmarka.’ (1 Timoteo 4:⁠2) Ang peligro sang kagarukan mas daku pa karon sa sining “katapusan nga mga adlaw.” (2 Timoteo 3:⁠1) Gani ang mga Cristiano dapat magpanikasog sing lakas nga amligan ang ila konsiensia. Mahimo naton ini paagi sa paghanas kag pagpauswag sa sini.

Ang Hunahuna, ang Tagipusuon, kag ang Imo Konsiensia

Si apostol Pablo nagsiling: “Nagasugid ako sing matuod sa Cristo; wala ako nagabutig, sanglit ang akon konsiensia nagapanaksi sa akon kaugalingon sa balaan nga espiritu.” (Roma 9:⁠1) Ang konsiensia nian mahimo nga isa nga nagasaksi. Mahimo ini makausisa sa dalanon sang pagginawi kag mahimo nga mag-ugyon ukon magpakamalaut sa sini. Ang kalabanan sang aton igbalatyag sa kon ano ang maayo kag malain ginbutang na sa aton sang aton Manunuga. Sa gihapon, ang aton konsiensia mahimo nga madihon kag mahanas. Paano? Paagi sa pagkuha naton sing sibu nga ihibalo gikan sa Pulong sang Dios. “Magbalhin kamo paagi sa pagbag-o sang inyo painuino, agod nga inyo matilawan kon ano ang maayo kag kalahamut-an kag himpit nga kabubut-on sang Dios,” siling ni apostol Pablo. (Roma 12:⁠2) Samtang ginapatudok mo ang panghunahuna kag kabubut-on sang Dios sa imo kaisipan, ang imo konsiensia magasugod sa paghulag sa mas diosnon nga paagi.

Ang mga Saksi ni Jehova nakabulig sa minilyon sa bug-os nga kalibutan sa ‘pagkuha sing ihibalo tuhoy kay Jehova nga Dios kag kay Jesucristo.’ (Juan 17:⁠3) Paagi sa ila walay bayad nga pagtuon sing Biblia sa puluy-an nga kahimusan, ginatudluan