Pamangkot

◼ Ano nga pangandam ang dapat himuon sang mga ginikanan kon ang ila menor-de-edad nga kabataan nagapakigbahin sa pag-alagad sa latagon?

Nagakaigo nga ginaupod sang Cristianong mga ginikanan ang ila mga anak sa ministeryo sa latagon, ginahanas sila nga ipaambit sa iban ang maayong balita sang Ginharian. Bangod sini, dapat nila pirme bantayan ang ila mga anak bangod sang posible nga mga katalagman sa teritoryo, bisan sa “indi peligruso” nga mga lugar. Nagakabuhi kita sa sining “makahalanguyos nga tion” kag ang mga kabataan labi kag labi pa nga nangin sentro sang kasingki kag abuso bangod sang pagdugang sang kakagod kag pag-usmod sang moral. (2 Tim. 3:​1-5) Ang mga ginikanan dapat maghimo sing makatarunganon nga mga pangandam agod amligan ang ila mga magagmay nga kabataan gikan sa mahimo nga magabiktima sa ila. Ano ang sarang himuon?

Ang Biblia maalamon nga nagalaygay nga dapat kita maghalong kag mag-andam sa posible nga katalagman. (Hulu. 22:​3; Mat. 10:16) Ang katuyuan sini indi amo ang paghimo sing mga pagsulundan, kundi maalamon para sa isa ka ginikanan ukon sa iban pa nga adulto nga updan ang bata kon nagaalagad sa latagon. Kon ang duha ka masaligan nga pamatan-on nga manugbantala nagaupdanay, mas maayo nga tulutan-awon sila pirme sang isa ka ginikanan ukon sang isa pa ka hamtong. Sa pagkamatuod, samtang nagahamtong ang bata kag napamatud-an nga mas responsable, ang mga ginikanan sarang makapamat-od kon bala wala na sia nagakinahanglan sing maid-id nga pagbantay sang mga ginikanan.​—⁠Tan-awa man ang “Pamangkot” sa Nobiembre 1992 nga Ang Aton Ministeryo sa Ginharian.

Maalamon man nga pirme dumdumon ang kaluwasan samtang nagalakbay sakay sang awto kag samtang nagalakat. Ang paghimo sing nagakaigo nga mga pangandam masunson nga nagatapna sing mga aksidente kag sing masubo nga kasakit, mga gastos sa pagpabulong, kag posible nga legal nga obligasyon sa mahuyugon gid sa demanda nga kalibutan sa palibot naton.

Nagakaigo para sa mga bata nga ‘dayawon ang ngalan ni Jehova.’ (Salmo 148:​12, 13) Ang ila mainanggaon nga hambal kag maayo nga paggawi samtang nagaalagad sa latagon nagapahamuot gid sa iban kag nagahatag sing kadungganan kay Jehova. Mga ginikanan, buligi gid ang inyo kabataan nga makigbahin sing tayuyon sa pagbantala sing maayong balita samtang alisto man kamo sa pag-amlig sa ila gikan sa bisan anong posible nga mga katalagman!