Paano Mo Mapakita ang Matuod nga Pagkamapainubuson?

ANG matuod nga pagkamapainubuson may daku nga kabilihanan sa mga mata sang Dios. Si Santiago nagsulat: “Ginapamatukan sang Dios ang mga matinaastaason, apang ginahatagan niya sing dibagay nga kaayo ang mga mapainubuson.” (Santiago 4:6) Mahimo nga ginapatuhuyan diri ni Santiago ang pila ka ideya nga ginasiling sa Hebreo nga Kasulatan. “Si Jehova mataas, apang ginatamod niya ang mga mapainubuson; apang ang mga matinaastaason nakilala lamang niya sa malayo.” “Ang mata nga matinaastaason sang tawo panubuon, kag ang pagkamapalabilabihon sang mga tawo payaubon; kag si Jehova lamang ang pakataason.” “Kon tuhoy sa mga mayubiton, ginayubit niya [sang Dios] sila; apang nagahatag sia sing bugay sa mga mahagop.”—Salmo 138:6; Isaias 2:11; Hulubaton 3:⁠34.

Ginpalig-on man ni apostol Pedro ang pagkamapainubuson. Sia nagsulat: “Magpangwagkus kamo tanan sa inyo kaugalingon sing pagpaubos sang hunahuna sa isa kag isa, bangod ang Dios nagasumpong sang mga bugalon, apang nagahatag sing di-bagay nga kaaayo sa mga mapainubuson.”—1 Pedro 5:5.

Ang Halimbawa ni Cristo sang Pagkamapainubuson

Mahimo ipamangkot mo, Ano ang kaayuhan ukon bentaha sang pagkamapainubuson? Para sa tawo nga nagatinguha nga mangin tunay nga Cristiano ang sabat importante—ang mangin mapainubuson pag-ilog kay Cristo. Ginpakita ni Jesus ang iya pagkamapainubuson paagi sa pagbaton sa pinasahi nga asaynment nga magkari sa duta gikan sa langitnon nga duog kag mangin kubos nga tawo, nga manubo sa mga anghel. (Hebreo 2:7) Walay sapayan nga sia ang Anak sang Dios, ginbatas niya ang kahuy-anan nga gintumpok sa iya sang iya relihioso nga mga kaaway. Ginhuptan niya ang iya kaligdong sa tion sang iya mga kabudlayan, walay sapayan nga makapangayo sia sing isa ka lehiyon sang mga anghel sa pagbulig sa iya.—Mateo 26:53.

Sang ulihi, si Jesus makahuluya nga ginbitay sa usok sang pag-antos, apang nagpabilin sia nga matutom sa iya Amay. Sa amo, si Pablo nagsulat tuhoy sa iya: “Hupti ninyo ining pagtamod nga yara man kay Cristo Jesus, nga walay sapayan nga nagaluntad sa dagway sang Dios, wala sia maghandum nga mang-agaw, nga mangin katupong sia sang Dios. Wala, kundi gin-ula niya ang iya kaugalingon kag nangin sa dagway sang ulipon kag nangin kaanggid sang mga tawo. Labaw pa sa sina, sang nakita niya ang iya kaugalingon sa bayhon sang tawo, nagpaubos sia kag nangin matinumanon tubtob sa kamatayon, huo, kamatayon sa usok sang pag-antos.”—Filipos 2:5-8.

Gani paano naton mapakita ang matuod nga pagkamapainubuson? Sa praktikal nga mga sitwasyon, paano kita makahulag sing mapainubuson sa baylo nga sa bugalon nga paagi?

Kon Paano Nagahulag ang Mapainubuson nga Tawo

Binagbinagon naton ang pagkamapainubuson sa hilikuton, sa ulubrahan man ukon sa Cristianong pag-alagad. Agod mangin madinalag-on ang hilikuton, kinahanglan nga may mga manugtatap, manedyer, kag mga superbisor. May isa nga dapat maghimo sing mga desisyon. Paano ikaw nagahulag? Nagapangatarungan ka bala, “Sin-o gid sia sa pamatyag niya nga tudluan niya ako sang dapat ko nga himuon? Mas madugay ako sa iya sa sini nga trabaho.” Huo, kon bugalon ikaw, maugot ikaw sa pagpasakop. Sa pihak nga bahin, ang mapainubuson nga tawo nagatinguha nga ‘indi maghimo sing bisan ano bangod sang pagbinaisay ukon bangod sang pagkamaiyaiyahon, kundi sing mapainubuson nga ginakabig ang iban nga labaw.’—Filipos 2:3.

Ano ang imo reaksion kon ang isa ka panugda naghalin sa lamharon nga tawo ukon sa isa ka babayi? Kon mapainubuson ikaw, bisan paano binagbinagon mo ini. Kon bugalon ka, maakig ikaw ukon sikwayon gilayon ini. Naluyagan mo bala ang pagdayaw kag pag-uluinto nga magadul-ong sa imo kapahamakan ukon ang positibo nga laygay para sa imo kalig-unan?—Hulubaton 27:9; 29:5.

Masarangan mo bala atubangon ang mga kabudlayan? Ang pagkamapainubuson makabulig sa imo sa pag-atubang sa mabudlay nga mga kahimtangan kag sa pagbatas, subong sang ginhimo ni Job. Kon bugalon ikaw, mahimo nga maluyahan ka kag mahimo magrebelde sa masakit nga mga kahimtangan kag ginahunahuna nga mga pang-insulto.—Job 1:22; 2:10; 27:2-5.

Ang Pagkamapainubuson Mahigugmaon kag Mapinatawaron

Ang iban nga tawo ginabudlayan sa pagsiling, “Pasensiaha ako. Sala ako. Husto ikaw.” Ngaa? Bangod sang sobra nga bugal! Apang, sa masami ang matuod nga pagpangayo sing pasaylo madali makadula sing dipaghangpanay sang mga magtiayon.

Handa ka bala magpatawad kon may nagsaklaw sa imo? Ukon, bangod sang imo bugal, nagadumot ikaw, ayhan sing mga inadlaw kag mga binulan, nga wala ginabugno ang nagsaklaw sa imo? May ginadumtan ka bala kag nagatinguha nga makabalos? May mga tawo nga napatay bangod sang pagdumtanay. Ginagamit sang iban ang pagguba sa reputasyon. Sa kabaliskaran, ang mapainubuson nga tawo mahigugmaon kag mapinatawaron. Ngaa? Bangod ang gugma wala nagaisip sang kahalitan. Si Jehova handa sadto nga patawaron ang mga Israelinhon kon tunlon nila ang ila bugal. Ang mapainubuson nga mga sumulunod ni Jesus handa nga magpatawad, bisan sing sulitsulit!—Joel 2:12-14; Mateo 18:21, 22; 1 Corinto 13:5.

Ang mapainubuson nga tawo ‘nagapanguna sa pagpadungog sa iban.’ (Roma 12:10) Ang New International Version mabasa: “Padunggi ang isa kag isa labaw sa imo kaugalingon.” Ginadayaw mo bala ang iban kag ginaapresyar ang ila mga ikasarang kag mga abilidad? Ukon pirme ka bala may makita nga diperensia agod musingan ang ila reputasyon? Huo, makasarang ka bala sa pagdayaw sing tunay sa iban nga tawo? Kon ginabudlayan ka sa paghimo sini, ayhan ang kakulang sing pagsalig sa kaugalingon ukon ang bugal amo ang nagapugong sa imo.

Ang bugalon nga tawo matinalak-on. Ang mapainubuson nga tawo mapailubon kag mabinatason. Kamusta ikaw? Nagakaugot ka bala sa bisan diutay dimaayo nga pagtratar? Ina nga reaksion kabaliskaran sang pagkamabinatason. Kon ikaw mapainubuson, indi tuman kataas ang pagkabig nimo sa imo kaugalingon. Dumduma ang natabo sang ginkabig sang mga disipulo ni Jesus ang ila kaugalingon nga tuman kataas—mainit nga nagbinaisay sila kon sin-o ang pinakaimportante sa ila. Nalimtan nila nga sila tanan “wala sing pulos nga mga ulipon”!—Lucas 17:10; 22:24; Marcos 10:35-37, 41.

Ginlaragway sang Pranses nga manunulat nga si ­Voltaire ang pagkamapainubuson subong “ang kaugdang sang kalag . . . ang pangontra sa bugal.” Huo, ang pagkamapainubuson amo ang mapainubuson nga panghunahuna. Ang mapainubuson nga tawo maugdang sa espiritu, indi bugalon. Matinahuron gid sia kag pormal.

Gani ngaa tinguhaan nga mangin mapainubuson? Bangod ang pagkamapainubuson ginakahamut-an sang Dios kag nagabulig sa aton nga matigayon ang pagtuytoy sang Dios. Sa isa ka bahin bangod sang pagkamapainubuson ni Daniel, ginkabig ni Jehova ang manalagna subong isa nga “hinigugma sing daku” kag ginpadalhan niya sia sing isa ka anghel upod ang isa ka palanan-awon! (Daniel 9:23; 10:11, 19) Ang pagkamapainubuson nagadala sing madamo nga padya. Nagadala ini sing matuod nga mga abyan nga nagahigugma sa imo. Labi sa tanan, nagadala ini sing pagpakamaayo ni Jehova. “Ang resulta sang pagkamapainubuson kag sang kahadlok kay Jehova amo ang manggad kag himaya kag kabuhi.”—Hulubaton 22:4.

[Retrato sa pahina 7]

Ang mapainubuson nga tinaga nga nagapangayo sing pasaylo makapasulhay sing kabuhi