Mga Pamangkot Gikan sa mga Bumalasa

Ang pila sang mga Saksi ni Jehova ginatanyagan sing trabaho nga nagadalahig sa relihioso nga mga tinukod ukon propiedad. Ano ang Makasulatanhon nga pagtamod sa sina nga trabaho?

Ini nga hulusayon mahimo nga maatubang sang mga Cristiano nga luyag gid iaplikar sing sinsero ang 1 Timoteo 5:8, nga nagapadaku sa importansia sang pag-aman sing materyal sa panimalay sang isa. Bisan pa dapat gid iaplikar sang mga Cristiano ina nga laygay, wala ini nagapakamatarong sa pagbaton nila sing tanan nga klase sang sekular nga trabaho, ano man ini nga sahi sang buluhaton ang nadalahig. Nahangpan sang mga Cristiano ang kinahanglanon nga mangin mabinantayon sa iban pa nga pagpahayag sang kabubut-on sang Dios. Halimbawa, ang handum sang isa ka tawo nga sakdagon ang iya pamilya indi mapakamatarong kon lapason niya ang ginasiling sang Biblia tuhoy sa imoralidad ukon pagpatay. (Ipaanggid ang Genesis 39:4-9; Isaias 2:4; Juan 17:14,16.) Importante man nga ang mga Cristiano maghulag nahisuno sa sugo nga magguwa sa Babilonia nga Daku, ang bug-os kalibutan nga emperyo sang butig nga relihion.—Bugna 18:​4, 5.

Sa bilog nga globo, nagaatubang ang mga alagad sang Dios sing madamo nga mga kahimtangan sa trabaho. Mangin walay pulos kag wala sa amon awtoridad nga tinguhaan nga ilista ang tanan nga mga posibilidad kag maghimo sing pat-od nga mga kasuguan. (2 Corinto 1:24) Apang, hinambitan naton ang pila ka bagay nga mabinagbinag sang mga Cristiano sa paghimo sing personal nga mga desisyon tuhoy sa trabaho. Ginsambit ini sing malip-ot sa Ang Lalantawan sang Enero 15, 1983, sa isa ka artikulo tuhoy sa pagbenepisyo gikan sa aton hatag-Dios nga konsiensia. Ang kahon nagpautwas sing duha ka nagapanguna nga pamangkot kag nian naglista sing iban pa nga mga bagay nga makabulig.

Ang unang importante nga pamangkot amo sini: Ginapakamalaut bala mismo sa Biblia ang sekular nga trabaho? Nagakomento tuhoy sa sini, Ang Lalantawan nagpatalupangod nga ginapakamalaut sang Biblia ang pagpangawat, dinagakaigo nga paggamit sing dugo, kag idolatriya. Dapat likawan sang isa ka Cristiano ang sekular nga trabaho nga direkta nga nagasakdag sang mga buluhaton nga ginadumilian sang Dios, subong sang ginhinambitan bag-o lang.

Ang ikaduha nga pamangkot amo: Ang paghimo bala sini nga trabaho nagahimo sa isa nga kunsabo sa ginapakamalaut nga buhat? Sing maathag, ang isa nga nagatrabaho sa pasugalan, klinika sang pagpaaborsion, ukon balay sang prostitusyon mangin kahimbon sa sinang di-makasulatanhon nga buhat. Bisan pa nga ang iya adlaw-adlaw nga trabaho didto amo lamang ang pagpanilhig sa salog ukon pagsabat sa telepono, mahimo nga nagaamot sia sa buhat nga ginapakamalaut sang Pulong sang Dios.

Madamo nga mga Cristiano nga nagaatubang sing mga desisyon tuhoy sa trabaho ang nakatalupangod nga ang pagbinagbinag lamang sadtong mga pamangkot nakabulig sa ila nga makahimo sing personal nga desisyon.

Halimbawa, gikan sa sinang duha ka pamangkot, mahangpan sang isa kon ngaa ang isa ka matuod nga sumilimba indi dapat mangin direkta nga empleyado sang isa ka butig relihioso nga organisasyon, nga nagatrabaho para sa simbahan ukon sa sulod sini. Ang Bugna 18:4 nagasugo: “Guwa ka sa iya, katawhan ko, kon indi ninyo luyag makaambit sa iya mga sala.” Ang isa ka persona nagapakig-ambit sa mga buhat kag mga sala sang Babilonia nga Daku kon regular sia nga empleyado sang isa ka relihion nga nagapanudlo sang butig nga pagsimba. Kon bala ang empleyado isa ka hardinero, dyanitor, manugkay-o, ukon tagkwenta, ang iya trabaho nagasakdag sang pagsimba nga nagasumpakil sa matuod nga relihion. Dugang pa, ang mga tawo nga makakita sing empleyado nga nagatrabaho sa pagpatahom sang simbahan, pagkay-o sini, ukon paghimo sang relihioso nga mga buhat sini makatarunganon nga mag-angot sa iya sa sina nga relihion.

Apang, ano naman ang tuhoy sa isa nga indi regular nga empleyado sang isa ka simbahan ukon relihioso nga organisasyon? Ayhan ginpatawag lang sia sa paghimo sing emerhensia nga pagkay-o sa nabuslot nga tubo sang tubig sa silong sang simbahan. Wala bala ini sing kinatuhayan sa pagpangontrata, subong sa pag-atop sang simbahan ukon pagpadamol sang atop sini?

Sa liwat, ang nagkalainlain nga mga kahimtangan sarang mahunahuna. Busa repasuhon naton ang dugang nga lima pa ka kahimtangan nga ginpahamtang sang Ang Lalantawan:

1. Ang trabaho bala tawhanon lamang nga pag-alagad nga indi mismo maduhaduhaan sing Makasulatanhon? Binagbinaga subong halimbawa ang kartero. Ang pagdul-ong niya sing sulat wala nagakahulugan nga ginasakdag niya ang ginapakamalaut nga buhat kon ang isa ka tinukod nga iya ginadul-ungan sa isa ka duog isa ka simbahan ukon isa ka klinika sa aborsion. Ginaaman sang Dios ang silak sang adlaw nga nagasilak sa mga bintana sang tanan nga tinukod, lakip ang simbahan ukon klinika sang aborsion. (Binuhatan 14:16, 17) Ang isa ka Cristiano nga kartero mahimo maghinakop nga nagahimo sia sing tawhanon nga pag-alagad sa tanan, adlaw-adlaw. Kaanggid man ini sa isa ka Cristiano nga nagasabat sa isa ka emerhensia—ang isa ka tubero nga gintawag sa pagpauntat sang pagbaha sa isa ka simbahan ukon ang isa ka tagtatap sang ambulansia nga gintawag sa pag-atipan sa isa nga nalipong sa sulod sang simbahan. Sarang niya mahunahuna ini nga isa lamang ka wala gintuyo nga tawhanon nga pagbulig.

2. Tubtob diin may awtoridad ang isa ka persona sa iya ginahimo? Ang isa ka Cristiano nga may balaligyaan indi gid magsugot sa pagbakal kag pagbaligya sing mga idolo, mga pangalap, sigarilyo, ukon soriso nga ginhimo halin sa dugo. Subong tag-iya sia ang may kontrol. Mahimo sia nga palig-unon sang mga tawo sa pagbaligya sing sigarilyo ukon mga idolo kag makaganansia, apang magahulag sia suno sa iya Makasulatanhon nga mga pagpati. Sa pihak nga bahin, ang isa ka Cristiano nga empleyado sa isa ka daku nga balaligyaan sang pagkaon mahimo idestino nga mangin kahero, manugpahining sang salog, ukon bookkeeper. Indi niya makontrol kon ano ang ginabakal kag ginabaligya, bisan pa ang pila sini maduhaduhaan, subong sang sigarilyo ukon mga butang para sa relihioso nga mga selebrasyon.a (Ipaanggid ang Lucas 7:8; 17:7,8.) May kaangtanan ini sa masunod nga punto.

3. Tubtob diin nadalahig ang persona? Balikan naton ang halimbawa sa balaligyaan. Ayhan ang isa ka empleyado nga gindestino sa pagkahero lamang ukon sa pagpamutang sing mga baligya sa istante magauyat kon kaisa sing mga sigarilyo ukon relihioso nga mga butang; diutay ina nga bahin sang iya kabilugan nga trabaho. Apang, tuhay gid ini sa isa ka empleyado sa amo nga balaligyaan nga nagatrabaho sa counter sang tabako! Ang tanan niya nga trabaho, sa bug-os nga adlaw, nasentro sa butang nga supak sa Cristianong mga pagpati. (2 Corinto 7:1) Ini nagapakita kon ngaa ang kasangkaron sang pagkanadalahig ukon pagpakig-angot dapat binagbinagon kon magdesisyon sa mga pamangkot tuhoy sa trabaho.

4. Diin nagahalin ang ginabayad ukon ano ang lugar nga ginatrabahuan? Binagbinaga ang duha ka kahimtangan. Agod mapauswag ang maayong relasyon sa publiko, ang isa ka klinika sa aborsion nagpamat-od nga magbayad sa isa ka tawo nga magtinlo sang mga kalye sa palibot. Ang iya suweldo nagahalin sa klinika sa pag-aborsion, apang wala sia nagaobra didto, kag wala sing makakita sa iya sa klinika sa bug-os nga adlaw. Sa baylo, makita nila sia nga nagahimo sing publiko nga hilikuton nga indi mismo supak sa Kasulatan, bisan sin-o man ang nagabayad sa iya. Tuhay naman ini. Sa isa ka pungsod diin ang prostitusyon legal, ang opisina sang publiko nga pag-alagad sa ikaayong lawas nagasuweldo sa isa ka nars nga magtrabaho sa mga balay sang mga alpot, nagausisa sang kahimtangan sang ikaayong lawas sa tuyo nga panubuon ang paglapnag sang makalalaton nga balatian paagi sa sekso. Bisan pa nga ginasuwelduhan sia sang pangpubliko nga pag-alagad sa ikaayong lawas, ang iya bug-os nga trabaho yara sa balay sang prostitusyon, nagahimo sa imoralidad nga indi makatalagam, nga mas kalahamut-an. Ginapakita sining mga halimbawa kon ngaa dapat binagbinagon ang ginahalinan sang suweldo kag ang lugar sang trabaho.

5. Ano ang epekto sang paghimo sing trabaho; magatublag bala ini sa konsiensia mismo sang isa ukon makapasandad sa iban? Dapat binagbinagon ang konsiensia, ang aton kag ang iya sang iban. Bisan pa nga kon ang isa ka trabaho (lakip ang lugar sini kag ang ginahalinan sang suweldo) daw kalahamut-an sa kalabanan nga mga Cristiano, mahimo magbatyag ang indibiduwal nga magatublag ini sa iya konsiensia. Si apostol Pablo, nga nagpahamtang sing maayong halimbawa, nagsiling: “Nagasalig kami nga may bunayag kami nga konsiensia, samtang nagahandum kami sa paggawi sing bunayag sa tanan nga butang.” (Hebreo 13:18) Dapat naton likawan ang paghimo sing trabaho nga magatublag sa aton; apang, indi man kita dapat mangin mamulayon sa iban nga tuhay ang konsiensia. Sa pihak nga bahin, mahimo nga wala sing makita nga pagsupak sa Biblia ang isa ka Cristiano sa paghimo niya sang isa ka trabaho, apang nahibaluan niya nga makatublag gid ini sa madamo sa kongregasyon kag sa komunidad. Ginpabanaag ni Pablo ang husto nga panimuot sa iya pinamulong: “Sa bisan ano nga paagi wala kami nagahatag sing bisan ano nga kasandaran, agod nga ang amon ministeryo indi makitaan sing sayop; apang sa tagsa ka paagi ginarekomendar namon ang amon kaugalingon subong mga ministro sang Dios.”—2 Corinto 6:3,4.

Karon balikan naton ang panguna nga pamangkot tuhoy sa pagtrabaho sa tinukod sang simbahan, subong sang pag-instalar sing bag-o nga mga bintana, pagtinlo sing mga alpombra, ukon pagmentinar sa dalabukan. Paano madalahig ang nasambit na nga mga butang?

Dumduma liwat ang tuhoy sa awtoridad. Ang Cristiano bala amo ang tag-iya ukon tagdumala nga makapamat-od kon bala himuon ina nga trabaho sa isa ka simbahan? Luyag bala sang isa ka Cristiano nga may amo sinang awtoridad nga makig-ambit sa Babilonia nga Daku paagi sa pagpangontrata sa isa ka ulubrahon ukon pagbulig sa isa ka relihion nga pasanyugon ang butig nga pagsimba? Indi bala pareho ina sa pagdesisyon nga magbaligya sing sigarilyo ukon mga idolo sa balaligyaan mismo sang isa?—2 Corinto 6:14-16.

Kon ang Cristiano isa ka empleyado nga wala sing awtoridad sa kon ano nga mga ulubrahon ang pagabatunon, may iban pa nga bagay nga dapat binagbinagon, subong sang lugar kag kasangkaron sang pagkanadalahig. Ginpangabay lang bala ang empleyado sa pagdul-ong ukon pagplastar sing bag-o nga mga pulungkuan sa isa ka okasyon ukon sa paghimo sing tawhanon nga pag-alagad, kasubong sa pagpatay sang bombero sa kalayo sa isa ka simbahan agod indi ini maglapta? Hangpon ini sing madamo nga tuhay sa isa ka empleyado sa isa ka negosyo nga nagahinguyang sing malawig nga panahon sa pagpintura sang simbahan ukon regular nga pagtatap sa hardin agod mapatahom ini. Inang regular ukon malawig nga pagpakig-angot magapadaku sang posibilidad nga iangot sang madamo ang Cristiano sa isa ka relihion nga ginasiling niya wala niya ginapatihan, nga mahimo makapasandad sa ila.—Mateo 13:41; 18:6,7.

Nabinagbinag naton ang madamo nga importante nga butang tuhoy sa trabaho. Ginpresentar ini suno sa isa ka espesipiko nga pamangkot nga nagadalahig sa butig nga relihion. Apang, bagay man ini binagbinagon kon tuhoy sa iban pa nga mga sahi sang trabaho. Sa tagsa ka kaso, ang mapinangamuyuon nga pag-usisa kinahanglanon, nga nagabinagbinag sa espesipiko—kag ayhan tumalagsahon—nga mga bahin sang sitwasyon. Ang mga butang nga ginpresentar sa ibabaw nakabulig na sa madamong sinsero nga mga Cristiano sa paghimo sing mga desisyon suno sa konsiensia nga nagapabanaag sang ila handum nga maglakat sing matadlong kag matarong sa atubangan ni Jehova.—Hulubaton 3:5,6; Isaias 2:3; Hebreo 12:12-14.

[Footnote]

Madumduman Mo Bala?

Naluyagan mo bala ang pagbasa sa bag-o nga mga guwa sang Ang Lalantawan? Kon amo, tan-awa kon masabat mo ang masunod nga mga pamangkot:

◻ Ngaa ang ekspresyon ni Pablo nga ‘embahador nga salili para kay Cristo’ nagakaigo gid para sa hinaplas nga mga Cristiano? (2 Corinto 5:20)

Sang dumaan nga mga tion, ang mga embahador ginapadala lamang kon may matabo nga pagbangigay agod tan-awon kon mahimo pa malikawan ang pag-inaway. (Lucas 14:31,32) Bangod ang makasasala nga kalibutan sang katawhan nahamulag sa Dios, ginapadala niya ang iya hinaplas nga mga embahador agod pahibaluon ang mga tawo sang iya mga kondisyon para sa pagpasag-uli, nagapalig-on sa ila nga tinguhaan ang pagpakighidait sa Dios.—12/15, pahina 18.

◻ Ano ang apat ka butang nga nagpabakod sang pagtuo ni Abraham?

Una, ginpasundayag niya ang iya pagtuo kay Jehova paagi sa pagpamati sang maghambal ang Dios (Hebreo 11:8); ikaduha, ang iya pagtuo suod nga naangot sa iya paglaum (Roma 14:18); ikatlo, si Abraham pirme nagpakighambal kay Jehova; kag ikap-at, si Jehova nagsakdag kay Abraham sang ginsunod niya ang pagtuytoy sang Dios. Ang amo nga mga butang makapabakod man sang aton pagtuo sa karon.—1/1, pahina 17, 18.

◻ Ano ang kahulugan sang ekspresyon nga “Indi kami pagdalha sa panulay”? (Mateo 6:13)

Nagapangabay kita sa Dios nga indi kita pagtugutan nga mapaslawan kon ginasulay kita nga lapason sia. Matuytuyan kita ni Jehova agod indi kita masulay kag indi madaug ni Satanas, “ang isa nga malaut.” (1 Corinto 10:13)—1/15, pahina 14.

◻ Ano ang dapat himuon sang isa agod mabaton ang pagpatawad sang Dios sa sala nga nahimo?

Ang pagtu-ad sa Dios dapat updan sing paghinulsol kag sing “mga bunga nga nagakaigo sa paghinulsol.” (Lucas 3:8) Ang mahinulsulon nga espiritu kag ang handum nga tadlungon ang sayop magapahulag man sa isa nga pangayuon ang espirituwal nga bulig sang Cristianong mga gulang. (Santiago 5:13-15)—1/15 pahina 19.

◻ Ngaa dapat kita magpanikasog nga mangin mapainubuson?

Ang mapainubuson nga tawo mapailubon kag mabinatason, kag indi tuman kataas ang iya pagkabig sa iya kaugalingon. Ang pagkamapainubuson nagaganyat sang matuod nga abyan nga nagahigugma sa imo. Labi sa tanan, nagadala ini sing pagpakamaayo ni Jehova. (Hulubaton 22:4)—2/1, pahina 7.

◻ Ano ang daku nga kinatuhayan sa ulot sang kamatayon ni Jesus kag ni Adan?

Ang kamatayon ni Adan nagakabagay, kay hungod sia nga naglalis sa iya Manunuga. (Genesis 2:16, 17) Sa kabaliskaran, ang kamatayon ni Jesus indi gid nagakabagay, kay “wala sia sing nahimo nga sala.” (1 Pedro 2:22) Gani sang napatay si Jesus, ginpanag-iyahan niya ang butang nga may daku nga balor nga wala mapanag-iyahan ni Adan sang napatay sia—ang kinamatarong sa himpit tawhanon nga kabuhi. Busa, ang kamatayon ni Jesus may mahalaron nga balor sa paggawad sa katawhan.—2/15, pahina 15,16.

◻ Sa matagnaon nga palanan-awon ni Ezequiel, ano ang ginalaragway sang siudad?

Sanglit ang siudad yara sa tunga sang mahigko (dibalaan) nga duta, mahimo gid nga dutan-on ini. Sa amo, ang siudad nagasimbulo sa dutan-on nga pagdumalahan nga nagadala sing kaayuhan sa tanan nga katapo sang matarong dutan-on nga katilingban.—3/1, pahina 18.

◻ Ngaa ginhinawan ni Jesus ang tiil sang iya mga disipulo sang nagsaulog sang Paskwa sang 33 C.E.?

Wala si Jesus nagpatok sing isa ka rituwal nga paghinaw sang tiil. Sa baylo, ginbuligan niya ang iya mga apostoles nga palambuon ang isa ka bag-o nga panimuot—ang pagkamapainubuson kag kahanda sa paghimo sing labing kubos nga mga hilikuton para sa ila mga kauturan.—3/1, pahina 30.

◻ Sa aton pagpanudlo sa iban, ano ang labi ka importante sangsa duna nga mga ikasarang?

Ini amo ang aton mga kinaiya kag ang ginpalambo naton nga espirituwal nga pamatasan nga mahimo mailog sang mga estudyante. (Lucas 6:40; 2 Pedro 3:11)—3/15, pahina 11, 12.

◻ Paano mapauswag sang pangpubliko nga mga humalambal ang ila pagbasa sing Kasulatan?

Paagi sa pag-ensayo. Huo, paagi sa sulit-sulit nga pagbasa sing mabaskog tubtob makabasa sila sing talunsay. Kon may matigayon nga mga audiocassette sang Biblia, maalamon nga pamatian ang sense stress (ginapadaku nga mga tinaga) kag ang pagbulubag-o sing tono sang nagabasa kag talupangda kon paano ginamitlang ang mga ngalan kag dikinaandan nga mga tinaga.—3/15, pahina 20.

◻ Paano ang ‘espiritu nagabalik sa Dios’ kon ang isa ka tawo mapatay? (Manugwali 12:7)

Sanglit ang espiritu amo ang puwersa sang kabuhi, ini “nagabalik sa matuod nga Dios” sa kahulugan nga ang bisan ano nga paglaum nga kabuhi sa palaabuton para sa sina nga tawo nasandig karon sing bug-os sa Dios. Ang Dios lamang ang makapasag-uli sang espiritu, ukon sang puwersa sang kabuhi, nga nagabuhi liwat sa isa ka tawo. (Salmo 104:30)—4/1, pahina 17.