Ginaapresyar Mo Gid Bala ang mga Pagpakamaayo ni Jehova?

SI Kenichi, isa ka medyo may edad na nga lalaki, nagkadto sa botika agod magbakal sing bulong para sa kataro. Sang gin-inom niya ang bulong, na-allergy sia nga nagresulta sa makatol nga mga guros-guros kag lap-ok-lap-ok sa bug-os niya nga lawas. Indi katingalahan nga nagduhaduha si Kenichi kon bala gin-atipan gid sang parmaseutiko ang iya kinahanglanon.

Mahimo ginatamod sang iban si Jehova nga Dios pareho sa pagtamod ni Kenichi sa parmaseutiko. Nagaduhaduha sila kon bala ang labing gamhanan nga Dios, nga si Jehova, interesado gid sa aton subong mga indibiduwal. Walay sapayan nga ginakilala nila nga ang Dios maayo, indi sila kumbinsido nga nagaulikid sia sa aton sing personal. Amo gid sini kon ginapiutan sila ukon kon ang ila pagsunod sa mga prinsipio sang Biblia nagresulta sa mabudlay nga mga problema. Bangod sang kakulang sing paghantop, ginatamod nila ang ila mga problema kaangay sa makatol nga guros-guros kag lap-ok-lap-ok nga hinali nga nagtubo kay Kenichi, subong nga daw sala ini sang Dios.​—⁠Hulubaton 19:⁠3.

Si Jehova indi dapat ipaanggid sa dihimpit nga mga tawo. Limitado lamang ang ihibalo kag ikasarang sang mga tawo. Indi nila mahangpan sing bug-os ang matuod nga mga ginakinahanglan sang iban, kaangay sa parmaseutiko ni Kenichi. Sa pihak nga bahin, wala sing makapalagyo sa mga mata ni Jehova. Pirme kita ginabuligan ni Jehova bisan wala naton nahantop kag ginaapresyar ini bangod may huyog kita nga tan-awon kon ano ang wala sa aton kag kalimtan ang madamo nga pagpakamaayo nga yara sa aton. Sa baylo nga magmadasig sa pagbasol kay Jehova sa bisan anong problema nga aton ginaatubang, dapat naton tinguhaan nga mahantop ang mga pagpakamaayo nga aton nabaton gikan kay Jehova.

Suno sa Webster’s Ninth New Collegiate Dictionary, ang “pagpakamaayo” mahimo nagakahulugan subong “isa ka butang nga nagadul-ong sa kalipay ukon kaayuhan.” Nagapati ka bala nga matuod gid ini sa mga pagkamaayo gikan kay Jehova?

Indi Matupungan Subong Manug-aman

Kon ang isa ka asawa nagasiling nga ang iya bana isa ka maayo nga manug-aman, buot niya silingon nga ginaatipan niya sing nagakaigo ang mga kinahanglanon sang pamilya, nagaaman sing bastante nga pagkaon, puluy-an, kag panapton para sa kalipay kag kaayuhan sang pamilya. Daw ano kaayo si Jehova subong aton Manug-aman? Talupangda sing maayo ang aton planeta nga Duta, ang puluy-an sang tawo. Nahamtang ini 150,000,000 kilometros ang kalayuon gikan sa adlaw, hustuhan lamang nga distansia para sa hustuhan nga temperatura nga nagapaposible sang kabuhi diri sa duta. Ang 23.5-degree nga paghilay sang aton planeta himpit nga gindesinyo, nga nagaresulta sa lainlain nga mga panahon nga nagapatubas sing bugana nga mga alanyon. Subong resulta, ang duta nagapakaon sing kapin sa lima ka bilyon nga tawo. Si Jehova isa gid ka dalayawon nga Manug-aman!

Dugang pa, ginapasalig kita sang Biblia nga si Jehova interesado gid sa aton subong mga indibiduwal kag sa aton kaayuhan. Hunahunaa lamang, nahibaluan ni Jehova ang mga ngalan sang tagsa sa binilyon ka bituon, kag wala sing bisan isa ka magamay nga pispis nga nagakahulog sa duta nga wala niya mahibaluan. (Isaias 40:​26; Mateo 10:​29-31) Labi pa gid ang iya pag-ulikid sa mga tawo nga nagahigugma sa iya kag ginbakal paagi sa hamili nga dugo sang iya hinigugma nga Anak, si Jesucristo! (Binuhatan 20:28) Husto gid ang ginsiling sang maalamon nga lalaki: “Ang pagpakamaayo ni Jehova​—⁠amo ina ang nagapamanggad, kag wala sia nagadugang sing kasakit sa sini.”​—⁠Hulubaton 10:⁠22.

Mga Pagpakamaayo nga Nagapamanggad sa Aton

May ginapanag-iyahan kita nga isa ka butang nga tuman ka bilidhon nga dapat naton pasalamatan sing daku. Ano ini? Ginapakilala ini sang Biblia sang ini magsiling: “Ang kasuguan sang imo baba maayo para sa akon, labaw pa sangsa linibo nga bulawan kag pilak.” (Salmo 119:​72; Hulubaton 8:10) Bisan pa nga mahimo nga bilidhon subong sang pinili nga bulawan, ang kasuguan ni Jehova labi ka halandumon. Ang sibu nga ihibalo tuhoy sa iya kasuguan lakip ang paghangop kag paghantop nga ginapaambit ni Jehova sa sinsero nga mga nagapangita sing kamatuoran mga butang nga dapat pakabahandion. Ginasangkapan kita sini sa pag-amlig sa aton kaugalingon, sa paglandas sa mabudlay nga mga kahimtangan, sa pag-atubang sa mga problema sing madinalag-on, kag sa amo mangin kontento kag malipayon.

Matuod ini bisan sa mga kabataan. Tan-awa kon paano gin-atubang sang isa ka bata nga babayi ang iya mga problema paagi sa pagsunod sa kasuguan ni Jehova. Ang bata nga babayi nga si Akemi, nagapuyo malapit sa Tokyo. Gin-aplikar sang iya amay kag iloy ang mga prinsipio sa Biblia sa paghanas sa iya kag paagi sa pulong kag halimbawa ginbuligan nila ang ila bata nga makapalambo sing gugma kay Jehova kag sa isigkatawo. Ginapanan-aw ang mga problema nga mahimo niya masumalang sa eskwelahan, gintinguhaan nila nga ihanda sia sa pinakamaayo nga paagi. Apang, sang mag-eskwela na si Akemi sa elementarya, gintamod sia sang iban sang iya mga kabutho subong “pinasahi” bangod nagapangamuyo sia antes magkaon kag matutom nga nagalikaw sa pila ka dimakasulatanhon nga mga hilikuton. Sang ulihi ginhingabot sia sang isa ka grupo sang mga hurong nga naglambat sa iya pagkatapos sang klase kag gintampa sia, ginlubag ang iya mga butkon, kag ginyaguta sia.

Wala magbalos ang bata nga si Akemi, ukon hinadlukan sia sa mga nagpaantos sa iya. Sa baylo, gintinguhaan niya nga iaplikar ang iya natun-an. Subong resulta sang iya maayo nga paggawi kag kaisog, natigayon niya ang pagtahod sang madamo sang iya pareho nga mga estudyante. Ginsugid nila ini sa ila manunudlo, kag kutob sadto nga adlaw, wala na makaeksperiensia si Akemi sang bisan ano nga pag-abuso sa eskwelahan.

Ano ang nakabulig kay Akemi nga maatubang sing madinalag-on ang mabudlay nga kahimtangan? Ang sibu nga ihibalo, ang paghangop, kag kaalam gikan kay Jehova nga ginpatudok sa iya sang iya mga ginikanan. Nahibaluan gid niya ang pagbatas ni Jesus, kag ginpahulag sia sini nga ilugon ang iya halimbawa. Ginbuligan sia sang Biblia sa paghantop nga ang iban nga tawo nagahimo sing sayop nga mga butang bangod sang pagkawalayhinalung-ong, kag nagpalig-on ini sa iya nga kaugtan ang sayop nga ginhimo sadtong mga hurong apang wala ginakaugtan ang mga tawo mismo.​—⁠Lucas 23:​34; Roma 12:​9, 17-21.

Sa pagkamatuod, wala sing ginikanan nga luyag makita nga ginayaguta kag ginaabusuhan ang ila bata. Apang, mahanduraw mo kon daw ano ang kalipay sang mga ginikanan ni Akemi sang mabatian nila ang tanan nga detalye sang natabo. Ina nga sahi sang kabataan isa gid ka pagpakamaayo gikan kay Jehova.​—⁠Salmo 127:​3; 1 Pedro 1:​6, 7.

Mapainumuron nga Paghulat Kay Jehova

Apang, antes mo mabaton ang mga pagpakamaayo ni Jehova, kon kaisa dapat ikaw maghulat sa iya tion. Nahibaluan ni Jehova ang imo kahimtangan kag ginaaman niya ang tagsa ka kinahanglanon kon san-o nga makabulig gid ini sa imo. (Salmo 145:​16; Manugwali 3:​1; Santiago 1:17) Ayhan maluyagon ikaw sa prutas, apang ano ayhan ang pensaron mo sa isa ka tagbalay nga nagaserbe sa imo sing prutas nga alang-alang pa kaunon? Mansanas man ini, kahil, ukon bisan ano, luyag mo ang prutas nga luto, maduga, kag matam-is. Sing kaanggid, ginaaman ni Jehova ang imo kinahanglanon sa husto nga tion​—⁠indi tuman ka temprano kag indi tuman ka ulihi.

Dumduma ang eksperiensia ni Jose. Bisan wala sia makasala sing personal, didto sia nagtupa sa isa ka bartolina sa Egipto. Ang isa ka kaupod nga bilanggo, ang manugtagay ni Paraon, manugguwa na sadto sa bilangguan kag nanaad sia nga isugid niya kay Paraon ang tuhoy sa kaso ni Jose. Apang pagkatapos nga nakaguwa sia nalimtan niya si Jose. Subong bala nga daw ginpabayaan na lamang si Jose. Apang, duha ka tuig sang ulihi, ginpaguwa sia sa bilangguan kag sang ulihi nangin ang ikaduha nga manuggahom sa Egipto. Sa baylo nga madulaan sing pagpaumod, naghulat si Jose kay Jehova. Bangod sini, ginpakamaayo sia sa paagi nga nagkahulugan sing kaluwasan sang kabuhi sang mga Israelinhon kag sa mga Egiptohanon.​—⁠Genesis 39:​1⁠–​41:⁠57.

Si Masashi isa ka gulang sa isa ka kongregasyon sa naaminhan nga Japan. Wala sia ginbartolina, apang dapat sia maghulat kay Jehova. Ngaa? Kutob sang gintukod ang Ministerial Training School sa Japan, isa ka eskwelahan sa paghanas sa kalipikado nga Cristianong mga ministro, handum gid niya nga makaeskwela sa sini. Nangamuyo sia sing hanuot tuhoy sa sini nga pribilehiyo. Ang iya kaupod nga payunir gin-agda, apang walay sapayan sang iya daku nga handum, wala maagda si Masashi. Nagluya gid ang iya buot.

Apang, naghimo sia sing mga tikang agod malandas ang iya ginabatyag. Gintun-an niya ang Biblia kag ang mga publikasyon nga ginbalhag sang Watch Tower Society, labi na ang mga topiko tuhoy sa pagkamapainubuson kag pagkontrol sa emosyon. Ginpasibu niya ang iya panghunahuna kag sa amo labi sia nga nalipay sa iya asaynment. Nian, sa wala niya ginpaabot, nakabaton sia sing imbitasyon nga mag-eskwela sa eskwelahan.

Bangod nakapalambo sia sing mga kinaiya subong sang pagkamapainumuron kag pagkamapainubuson, labi sia nga nakabenepisyo gikan sa eskwelahan. Sang ulihi, ginhatagan sing pribilehiyo si Masashi sa pag-alagad sa iya mga kauturan subong isa ka nagalakbay nga manugtatap. Huo, nahibaluan ni Jehova kon ano ang ginakinahanglan ni Masashi kag gin-aman ini sang tion nga makabulig gid ini sa iya.

Pangitaa ang Iya mga Pagpakamaayo

Sa amo, si Jehova indi kaangay sa parmaseutiko. Bisan pa nga mahimo indi naton mahantop ang pag-ulikid kag pagkabalaka ni Jehova, ang iya mga kaayo nagaabot sa nanuhaytuhay nga paagi​—⁠sa tion kag mga paagi nga makabulig gid sa aton. Gani pangitaa sing padayon ang iya mga pagpakamaayo. Dumduma nga may madamo na ikaw sing rason nga mangin mapinasalamaton. Gin-amanan ikaw sing panguna nga mga aman agod padayon nga mabuhi sa duta. Ginhatagan ikaw sing ihibalo tuhoy kay Jehova kag sa iya himpit nga mga dalanon. Ginhatagan ikaw sing paghangop. Kag nakatigayon ikaw sing paghantop. Ini tanan nagaamot sa imo kaayuhan kag kalipay.

Agod matigayon sing labi pa ang pagpakamaayo ni Jehova, padayon nga tun-i ang Biblia sing regular. Mangabay kay Jehova nga buligan ikaw nga mahangpan kag maaplikar ang tulad-hiyas nga mga panudlo sa iya inspirado nga Pulong. Himuon ikaw sini nga matuod nga manggaranon sa espirituwal, agod nga wala sing makulang sa imo. Huo, magakahulugan ini sang imo kalipay kag pagkakontento karon kag sing kabuhi nga may kabuganaan sa bag-ong kalibutan nga magaabot.​—⁠Juan 10:​10; 1 Timoteo 4:​8, 9.

[Retrato sa pahina 23]

Ang pagpakamaayo ni Jehova bilidhon pa sangsa bulawan