Nagakaigo Bala Pirme ang Pagtuman?
“NABATIAN mo bala ako?” singgit sang iloy kay gamay nga Johnnie sang nagapaguwa sia sa puerta. Indi, wala niya ginausisa ang palamatin-an ni Johnnie. Ginapat-od niya nga tumanon niya sia kag magpauli sa nagakaigo nga oras.
Sa pagkamatuod, ang pagpamati may kaangtanan sa pagtuman. Busa, indi makapakibot nga sa orihinal nga mga hambal sang Biblia, ang mga tinaga nga nagakahulugan sing pagtuman naangot sa pagpamati. Apang kay sin-o kita mamati? Tumanon bala naton ang bisan sin-o nga nagakinahanglan sini? Kag nagakaigo bala pirme ang pagtuman?
Kon San-o Nagakaigo ang Pagtuman
Ang pagtuman sa aton Manunuga, si Jehova nga Dios, nagakaigo pirme. Subong aton Magbubuhat kag Tuburan sang kabuhi, sia ang una nga may kinamatarong sa pagtuman sang iya mga tinuga. (Salmo 95:6, 7) Subong ang Supremo nga Soberano, ginahatag man ni Jehova ang iya awtoridad sa iban nga nakasunod sa iya mga talaksan, kag nagahimo ini sang aton pagtuman sa ila nga nagakaigo. Ang nagapanguna sa sina nga mga tawo amo si Jesucristo. Sugod sang 1914 sia nangin tinangdo-sang-Dios nga Hari sang langitnon nga Ginharian “agod nga ang tanan nga katawhan, mga pungsod kag mga hambal magaalagad sa iya.” (Daniel 7:13, 14) Dugang pa, subong Ulo sang Cristianong kongregasyon, ginhatagan ni Jesus sing awtoridad ang iban, nga nagahimo sang aton pagtuman sa ila subong kabulig nga mga manugbantay nga nagakaigo.—Hebreo 13:17.
Naghatag man si Jehova sing mga gabayan tuhoy sa pagtuman sa sulod sang pamilya. Ang mga anak ginalaygayan nga ‘tumanon ang ila mga ginikanan sa paghiusa sa Ginuo,’ kag ang mga asawa ginasugo nga ‘magpasakop sa ila bana subong nga sa Ginuo.’ (Efeso 5:21–6:3) Ang mga Cristiano ginapahanumdom nga ‘magpasakop kag magtuman sa mga pangulohan kag mga awtoridad subong mga manuggahom.’ (Tito 3:1) Apang, sa sini tanan, bug-os bala ang aton pagtuman? Pirme bala ini nagakaigo?
Kon San-o Indi Nagakaigo ang Pagtuman
Sa pagkamatuod, ang pagpamati sa mga wala gintugyanan sing awtoridad gikan kay Jehova mahimo magresulta sa kapahamakan. Ang nahauna nga tawo, si Adan, “nagpamati” sa tingog ni Eva kag nagbuylog sa iya sa pagkaon gikan sa kahoy sang pagkilala sa maayo kag malain. (Genesis 3:17) Ano ang resulta? “Paagi sa pagkadimasinulundon sang isa ka tawo madamo ang ginpakamakasasala.” (Roma 5:19) Daw ano ka makahalalit nga resulta sang pagpamati sa sayop nga tawo.
Apang, nagakaigo bala pirme nga mamati sa ila nga gintugyanan sing palangakuan nga may awtoridad? Indi kon gamiton nila ang ila awtoridad sa didiosnon nga paagi. Halimbawa, nahisuno sa prinsipio sang pagsunod sa “mga agalon nga dutan-on,” tumanon naton ang aton mga amo. Apang ano kon suguon nila kita sa paghimo sing butang nga nagasumpakil sa kasuguan sang labing gamhanan nga Dios? Ang masunod nga ginhambal ni Pablo nagapakita sang nagakaigo nga dalanon: “Indi sa pag-alagad nga sa mata, subong nga manugpahamuot sa mga tawo, kundi subong nga mga ulipon ni Cristo, nga nagahimo sang kabubut-on sang Dios sing bug-os kalag.” (Efeso 6:5, 6) Sa isa pa ka okasyon, si Pedro kag ang iban nga mga apostoles nagsiling: “Dapat namon tumanon ang Dios subong manuggahom sa baylo sang mga tawo.”—Binuhatan 5:29.
Amo man nga prinsipio ang naaplikar sa sulod sang pamilya. Bangod wala ginaapresyar ang mga ginapatuman sang Dios, mahimo nga indi pagtugutan sang bana ang asawa sa pagtambong sa Cristianong mga miting sing tayuyon. Pananglit piliton niya sia, kag sakiton pa gani, subong amo ang nagakatabo kon kaisa, agod punggan sia sa pagkadto sa Cristianong mga miting. Ano ang dapat himuon sang asawa? Kon magsunod sia, mahimo nga ibutang niya sa katalagman ang iya espirituwalidad, subong man sang iya pamilya, kag mawasi ang ginalauman nga kabuhi nga walay katapusan. Indi bala mas maayo nga tumanon si Jehova, nahisayran nga wala sing tawo, bisan ang iya bana, ang ginhatagan sing awtoridad sa pagsikway sa sugo nga ‘indi pagbiyaan ang aton pagtilipon sing tingob’?—Hebreo 10:25.
Ang bana ni Miyoko nagpamatok nga ang iya suweldo “ginauyangan” sa iya pagtambong sa mga miting nga wala niya ginaaprobahan. Sang ulihi, wala na sia nagahatag sing kuwarta para sa pag-atipan sa balay, kag si Miyoko isa ka oras nga nagalakat padulong sa Kingdom Hall.
Nag-untat bala sia? Wala. Nagpalapit sia kay Jehova sa pangamuyo kag gin-analisar niya ang iya kahimtangan. Nahisayran ang rason sang iya bana, namat-od si Miyoko nga magtrabaho sing pagdul-ong sing mga pamantalaan. Nagsugot ang iya bana, basta ihatag niya sa iya bana ang katunga sang iya suweldo.
Sa liwat, nangamuyo sia nga kon kabubut-on ni Jehova, makakita sia sing ruta sa malapit. Sa masami, mga isa ka tuig kag kapin antes matigayon sang isa ang luyag niya. Apang, sing makapakibot, sa sulod sang anom ka semana gintanyagan si Miyoko sing ruta malapit sa iya balay. Napalig-on sang hunahuna nga ginpamatian ni Jehova ang iya pangamuyo, nagatrabaho sia halin sa 4:30 tubtob alas 6:00 kada aga. Sang makita ini, ang panimuot sang iya bana amat-amat nga nagbalhin kag nangin kooperatibo sia. Subong nga si Miyoko, nga regular nga nagaauxiliary payunir, naghunahuna kag nag-analisar sang iya kahimtangan, nangamuyo nahanungod sini kag naghikot sing positibo, masapwan mo man nga magaresulta ini sa pagpakamaayo ni Jehova.
Sa pagkamatuod, mahimo may yara pinasahi nga mga kahimtangan ukon mga rason nga pangabayon sang ditumuluo nga bana ang iya asawa nga indi anay magtambong sa Cristianong miting. Mahimo himuon niya ini nga wala sing tuyo nga paluyahon ang iya pagsimba kag pag-alagad kay Jehova nga Dios. Ang paghangop sa mga prinsipio nga nadalahig magabulig sa isa ka Cristianong babayi sa pagpamat-od sing husto nahisuno sa iya kahimtangan.
Sa pagpagrabe pa sang kahimtangan, ano kon silingan sia sang iya bana nga indi pagpaupdon ang ila mga anak sa Cristianong mga miting? Sa pagkamatuod, nahibaluan niya nga bisan pa wala ginabaton sang iya bana ang pagkaulo ni Cristo, sia gihapon ang ulo sang pamilya. (1 Corinto 11:3) Apang, ginahunahuna niya ang espirituwal nga kaayuhan sang kabataan, subong man ang iya handum nga mangin matinumanon kay Jehova. Isa gid ini ka pagtilaw sa iya pagtuo nga tumanon ang iya mga obligasyon sa sining tanan nga bahin. Makabulig gid ang pagpangayo kay Jehova sing kaalam kag paghantop sa pangamuyo. (Santiago 1:5; Filipos 4:6, 7) Ang mataktikanhon nga pagpangatarungan sa iya bana kag ang maayo nga pagpakighambal, nga nagapakita sing malinong kag malum-ok nga espiritu, mahimo nga makabulig man sa paglubad sa problema.—Colosas 4:6; 1 Pedro 3:1-5.
Ang isa ka Cristianong babayi sa Yamato, Hapon, nag-atubang sina nga kahimtangan sang ang iya bana nagdumili sa iya nga paupdon ang ila tatlo ka anak sa miting. Ano ang mahimo niya? Maukod nga gintudluan niya ang iya mga anak sa puluy-an, kag sang husto na sila sa kagulangon sa paghimo sang ila desisyon, ang tagsatagsa nagpili sing tindog dampig kay Jehova kag nagsugod sa pagtambong sa mga miting. Naakig, gintabog sila tanan sang bana sa iya balay.
Ang asawa nakakita sing trabaho kag temporaryo nga nagpuyo sa apartment sang isa ka utod. Apang wala niya ginpabay-an ang mga butang nga mangin subong lamang sini. Nagapauli sia agod tinluan ang balay sang iya bana kag ginalutuan sia sang iya pagkaon. Sang ulihi, sa tapos sang mga isa ka bulan, ginpabalik sila sang bana kag nag-untat sa pagpamatok sa ila. Daw ano nga padya sa ila matutom nga dalanon!
‘Tilawi ang Inspirado nga mga Pulong’
Kamusta naman ang awtoridad sang Cristianong kongregasyon? Sanglit ang mga nagauyat sing responsable nga mga palangakuan gintangdo paagi sa pagpanghikot sang balaan nga espiritu kag ginapasad nila ang ila laygay kag lugpay sa Pulong sang Dios, mapat-od naton nga ang pagtuman sa gintangdo nga awtoridad sa Cristianong kongregasyon nagakaigo. (Binuhatan 20:28; Hebreo 13:17) Apang wala ini nagakahulugan nga ginatuman naton ini nga awtoridad nga wala ginabinagbinag ang ginasiling. Ngaa?
Gintanyag ni apostol Juan ining laygay: “Dili ninyo pagtuuhi ang tanan nga inspirado nga pulong, kundi tilawi ang inspirado nga mga pulong kon bala naghalin ini sa Dios.” (1 Juan 4:1) Wala ini nagakahulugan nga mangin suspetsuso kita sa tanan nga butang nga ginasugid sa aton sang iban. Sa baylo, ginatandaan naton ang mga pulong ni Pablo sa Galacia 1:8: “Bisan pa kon kami ukon ang anghel gikan sa langit magwali sa inyo sing maayong balita nga tuhay sang sa amon ginwali sa inyo, mangin pinakamalaut sia.”
Ang impormasyon sa atubangan naton tuhay bala sa gintudlo sa aton paagi sa “matutom kag mainandamon nga ulipon”? Ang tawo nga nagahambal sina nga mensahe nagahambal bala sa pagpadungog sa ngalan ni Jehova, ukon ginatinguhaan bala niya nga bayawon ang iya kaugalingon? Nahisanto bala ang impormasyon sa kabug-osan nga mga panudlo sang Biblia? Mga pamangkot ini nga magabulig sa aton sa ‘pagtilaw’ sa bisan ano nga daw maduhaduhaan. Ginalaygayan kita nga ‘pat-uron ang tanan nga butang; huptan ang maayo.’—Mateo 24:45; 1 Tesalonica 5:21.
Ang makawiwili nga halimbawa sini amo ang iya ni Hukom Gideon. Agod mapat-od nga si Jehova magaupod sa iya, nagbuko si Gideon sing pagtilaw: “Yari karon ako magabutang sing panit nga may bulbol sa linasan,” siling niya kay Jehova. “Kon may ton-og sa panit lamang, kag mamala ang bug-os nga duta, nian makahibalo ako nga luwason mo ang Israel paagi sa akon.” Sang ginpahanabo ini ni Jehova subong sang ginpangabay niya, luyag pa ni Gideon ang dugang pa nga pasalig: “Pamalha, palihog, ang panit lamang, kag patun-uga sa ibabaw sang bug-os nga duta.”—Hukom 6:37-39.
Si Gideon bala sobra ka mausisaon ukon suspetsuso? Mahimo nga indi, bangod ginbaton ni Jehova ang iya pangabay sa duha ka tion kag ginhimo ang iya pangabay. Luyag pat-uron ni Gideon nga husto ang iya tindog. Bangod wala sing nasulat nga Pulong sang Dios subong naton, amo yadto ang labing epektibo nga paagi para kay Gideon sa ‘pagpat-od.’ Apang, sa tapos mabaton ang pasalig, estrikto nga gintuman niya ang sugo ni Jehova bisan pa ang paggamit sing 300 ka tinawo batok sa isa ka puersa sang kaaway nga 135,000 daw paghikog gikan sa tawhanon nga pagtamod. (Hukom 7:7; 8:10) Nagapakita bala kita sing pareho nga panimuot paagi sa pagpangusisa sa Pulong sang Dios kon ano gid ang kabubut-on ni Jehova kag dayon magpabilin sa sini?
Ang Labing Maalamon nga Pili
Wala ginapaabot ni Jehova nga magpati lamang kita dayon nga wala sing pagpangusisa. Wala niya ginahandum gikan sa aton ang sahi sang pagtuman nga ginatigayon sang isa ka manughanas gikan sa isa ka sapat nga may busal ukon latigo. Amo kon ngaa ginsilingan niya si David: “Dili kamo magsubong sa kabayo ukon sa mula nga walay paghangop, nga ang ila panimuot dapat punggan sang inugpakagat ukon busal.” (Salmo 32:9) Sa baylo, ginhatagan kita ni Jehova sing ikasarang sa paghunahuna kag sa paghantop agod nga, pasad sa paghangop, makapili kita sa pagtuman sa iya.
Sa Hapones, ang tinaga nga kiku (magpamati) nagalakip sa kahulugan nga indi lamang mamati kag magtuman kundi maghukom man sa butang nga maayo man ukon malain. Kon may isa nga magpakighambal sa aton, maayo nga mamati sa sining kahulugan agod nga kon magtuman, himuon naton ini indi bangod sang pagpati lamang kundi sa pili. Kon ang aton langitnon nga Amay, si Jehova nga Dios, maghambal, paagi sa iya Pulong, ang Biblia, ukon paagi sa iya dutan-on nga organisasyon, importante gid nga mamati kita kag magtuman, sa amo ginapamatud-an naton nga kita matinumanon nga mga sumilimba nga wala nagasikway sa mahigugmaon nga pahanumdom: “Ginpamatian mo bala ako?”
[Laragway sa pahina 29]
Kay sin-o ako mamati?
[Laragway sa pahina 31]
Ginpangita ni Gideon ang kabubut-on ni Jehova kag gintuman sia