“Malipayon nga Bana sang Isa ka Magayon nga Asawa”

KON kaisa, talangkod nga ginasumbong sang pila ka tawo ang mga Saksi ni Jehova nga nagabungkag sang pag-asawahay. Apang, madamong madinalag-on nga pag-asawahay nga isa lang ka tiayon ang Saksi ni Jehova ang nagapakita nga indi ini matuod. Ang pagsunod sa laygay sang Biblia sa pagkabuhi sang pamilya nagaresulta sa malipayon nga pag-asawahay, subong sang ginapakita sang masunod nga sulat nga ginbalhag sa isa ka Pranses nga pamantalaan.

“Sa halos 28 ka tuig na karon, isa ako ka malipayon nga bana sang isa ka magayon nga asawa nga isa ka Saksi ni Jehova. Ginpadaku niya ang akon lima ka kabataan, duha sa ila indi iya, nga may alangay nga pag-atipan kag daku nga gugma. Subong direktor karon sang kompanya nga may 45 ka empleyado, mapasalig ko kamo nga daku gid ang iya nabulig sa akon propesyonal nga kadalag-an. Amo sina kon ngaa sang nakita ko ang artikulo sa akon pirme ginabasa nga pamantalaan nga nagalaragway sa mga Saksi ni Jehova subong makatalagam sa rehiyon sang Lot-et-Garonne, namat-od ako nga hatagan kamo sing dapat saligan nga pamatuod.”

Ang sulat nagasiling man: “Wala sila nagapanigarilyo ukon nagapahubog. Isa bala ini ka katalagman? Mabinatason sila nga mga Cristiano nga wala nagapilit kay bisan sin-o sang mga pagsulundan nga ila ginasunod. Sa baylo, huwaran sila sa madamong paagi. . . . Wala sila naumid sa mga dinaya sa negosyo ukon sa pagbaligya sing droga. Wala sila nagasumpa sing pagkaputli, kag mapasalig ko kamo, nagapangabuhi sila sing normal. . . .

“Ayhan pamangkuton ninyo ako: Kon amo ngaa ikaw mismo indi isa ka Saksi ni Jehova? Bangod kinahanglan ang Cristianong pagtuo kag estrikto nga moralidad, kag indi ini mahapos makita sa kalabanan nga tawo.”

Abiabihon Mo Bala ang Isa ka Pagduaw?

Bisan sa sining magamo nga kalibutan, sarang ikaw makatigayon sing kalipay gikan sa sibu nga ihibalo sang Biblia tuhoy sa Dios, sa iya Ginharian, kag sa iya matahom nga katuyuan para sa katawhan. Kon luyag mo sing dugang nga impormasyon ukon maluyag nga may isa nga magaduaw sa imo agod magdumala sing walay bayad nga pagtuon sa Biblia, magsulat palihug sa Watch Tower, P.O. Box 2044, 1060 Manila, ukon sa nagakaigo nga direksion nga nalista sa pahina 2.