Iluga ang Katarungan ni Jehova
1 “Si Jehova mahigugmaon sang katarungan.” (Sal. 37:28) Busa, bisan pa nga nagdesisyon sia nga laglagon ining di-matarong nga kalibutan, naghimo sia sing kahimusan nga ihatag anay ang paandam. (Mar. 13:10) Naghatag ini sing kahigayunan sa mga tawo nga maghinulsol kag maluwas. (2 Ped. 3:9) Ginapanikasugan bala naton nga ilugon ang katarungan ni Jehova? Ang kalisod bala kag pag-antos sang katawhan nagapahulag sa aton nga ipaambit ang paglaum sang Ginharian sa iban? (Hulu. 3:27) Ang gugma sa katarungan magapahulag sa aton nga magbantala sing aktibo.
2 Magbantala Sing Walay Pili: Paagi sa walay pili nga pagbantala sang katuyuan sang Dios, ‘nagahimo kita sing katarungan.’ (Miq. 6:8) Dapat batuan naton ang di-himpit nga huyog nga hukman ang iban pasad sa ila nagua nga panagway. (Sant. 2:1-4, 9) Ang “kabubut-on [ni Jehova] amo nga ang tanan nga sahi sang tawo maluwas kag makadangat sa sibu nga ihibalo sang kamatuoran.” (1 Tim. 2:4) Ang kamatuoran sa Pulong sang Dios makahimo sing tumalagsahon nga mga pagbag-o sa kabuhi sang mga tawo. (Heb. 4:12) Ang paghibalo sining katunayan makapahulag sa aton nga mangin positibo sa pagpalapit sa mga indibiduwal, bisan yadtong mahimo nga wala nagapamati sang nagligad.
3 Ang isa ka utod nga babayi nga nagaobra sa isa ka balaligyaan medyo nahadlok sa hitsura sang isa ka regular nga kostumer. Walay sapayan sini, sang may kahigayunan sia, gintilawan niya nga panaksihan ining kostumer tuhoy sa saad sang Dios nga Paraiso. Ining lalaki matigdas nga nagsabat nga wala sia nagapati sa mga sugidsugid kag nga sia isa ka hippie kag giyan sa droga. Apang wala mangampo ang utod nga babayi. Isa ka adlaw ginpamangkot sining lalaki ang utod nga babayi kon ano ang iya masiling tuhoy sa malaba nga buhok sang lalaki, gani mataktikanhon nga ginpaathag sang utod nga babayi kon ano ang ginasiling sang Biblia tuhoy sa sini. (1 Cor. 11:14) Sa kalipay sining utod nga babayi, sang masunod nga adlaw nakapamarbas na ining lalaki kag nakapagunting! Nangabay ining lalaki sing isa ka pagtuon sa Biblia, diin nalipay ang isa ka utod nga lalaki sa pagdumala, kag nag-uswag hasta sa pagdedikar kag pagpabawtismo. Kaangay sining tawo, madamo sang nagaalagad kay Jehova karon ang mapinasalamaton sa walay pili kag wala untat nga mga panikasog sang mga nagdala sa ila sang mensahe sang Ginharian.
4 Dulaon ni Jehova sa dili madugay ang pagkadimatarong sa duta. (2 Ped. 3:10, 13) Sa malip-ot nga tion nga nabilin, kabay nga ilugon naton ang katarungan ni Jehova paagi sa paghatag sa tanan sing kahigayunan nga makapalagyo sa nagapakari nga kalaglagan sang di-matarong nga kalibutan ni Satanas.—1 Juan 2:17.