Leksion Gikan sa Marinero

ANG paglayag nga nagaisahanon sa kalalawran makakalapoy. Ang makapabinhod nga epekto sang kakapoy mahapos makadaldal sa isa ka marinero sa makatalagam nga kahimtangan, amo kon ngaa ang mga sala kag sayop nga mga desisyon ginahimo. Bangod sini nga rason, ginaapresyar niya ang kabilihanan sang angkla. Makahatag ini sing kahigayunan sa kapoy nga marinero nga makapahuway kag makapasag-uli nga indi gid maanod. Sa amo man nga tion, mapaatubang sang angkla ang dulong sa hangin kag mga balod kag magahupot sa sakayan sa labing malig-on nga posisyon.

Subong nga ang mga marinero nagaatubang sing madamo nga katalagman sa dagat, ang mga Cristiano nagaatubang man sing padayon nga mga pag-ipit sa sini nga kalibutan kag nagabatyag sang kinahanglanon nga magpahuway. Sa katunayan, ­kis-a nagpanugyan si Jesus sa iya mga disipulo: “Kari kamo, sing pribado sa duog nga baw-ing kag magpahuway sing diutay.” (Marcos 6:31) Sa karon, ang pila nagahinguyang sing pila ka semana sa paglakbay ukon nagahinguyang sing talipuspusan sang semana agod magpahunayhunay upod sa ila pamilya. Ini nga mga tinion mahimo makapaumpaw kag makapapagsik. Apang, paano naton mapat-od nga luwas kita sa katalagman sa espirituwal sa sina nga mga tion? Ano ang mangin espirituwal nga angkla naton nga makabulig sa aton nga indi maanod kag magpabilin nga malig-on?

Si Jehova maalwan nga nag-aman sa aton. Ini wala sing liwan kundi ang iya Balaan nga Pulong, ang Biblia. Paagi sa pagbasa sini adlaw-adlaw, makapabilin kita nga suod kay Jehova kag indi gid madaldal palayo sa iya. Ang mga laygay sini makapabakod sa aton kag makabulig sa aton nga mabatuan ang mga pagsulay ni Satanas kag sang iya kalibutan. Ang paghupot naton sing isa ka regular nga programa sa pagbasa sang Biblia, bisan pa indi sa aton kinaandan nga iskedyul, makabulig agod mangin angkla naton sa espirituwal.—Josue 1:7, 8; Colosas 2:7.

Ginapahanumdom kita sang salmista nga “malipayon ang tawo” nga ‘ang kalipay yara sa kasuguan ni Jehova, kag sa iya kasuguan nagabasa sia sing mahinay sa adlaw kag ­gab-i.’ (Salmo 1:1, 2) Ang pagbasa sang Pulong sang Dios adlaw-adlaw magahatag sa aton sing “malipayon” nga resulta sang matuod nga kaumpawan kag kapagsik, nga handa nga makapadayon sa aton Cristianong dalanon.

Abiabihon Mo bala ang Isa ka Pagduaw?

Bisan sa sining magamo nga kalibutan, sarang ikaw makatigayon sing kalipay gikan sa sibu nga ihibalo sang Biblia tuhoy sa Dios, sa iya Ginharian, kag sa iya matahom nga katuyuan para sa katawhan. Kon luyag mo sing dugang nga impormasyon ukon maluyag nga may isa nga magaduaw sa imo agod magdumala sing walay bayad nga pagtuon sa Biblia, magsulat palihug sa Watch ­Tower, P.O. Box 2044, 1060 Manila, ukon sa nagakaigo nga direksion nga nalista sa pahina 2.