Leksion 1

Kon Paano Mo Mahibaluan Kon Ano ang Ginapatuman sang Dios

Anong importante nga impormasyon ang ginaunod sang Biblia? (1)

Sin-o ang awtor sang Biblia? (2)

Ngaa dapat nimo tun-an ang Biblia? (3)

1. Ang Biblia isa ka hamili nga dulot halin sa Dios. Kaangay ini sa sulat sang isa ka mahigugmaon nga amay sa iya mga anak. Nagasugid ini sa aton sang kamatuoran nahanungod sa Dios​—⁠kon sin-o sia kag kon ano ang iya mga talaksan. Nagapaathag ini kon paano malandas ang mga problema kag kon paano masapwan ang matuod nga kalipay. Ang Biblia lamang ang nagasugid sa aton kon ano ang dapat naton himuon agod mapahamut-an ang Dios.​—⁠Salmo 1:​1-3; Isaias 48:​17, 18.

2. Ang Biblia ginsulat sang mga 40 ka lainlain nga tawo sa sulod sang 1,600 ka tuig, sugod sang 1513 B.C.E. Ginahuman ini sang 66 ka magagmay nga mga tulun-an. Ang mga nagsulat sang Biblia gin-inspirar sang Dios. Ginsulat nila ang iya mga panghunahuna, indi ang ila kaugalingon. Gani ang Dios sa langit, indi ang bisan sin-o nga tawo sa duta, ang Awtor sang Biblia.​—⁠2 Timoteo 3:​16, 17; 2 Pedro 1:​20, 21.

3. Ginpat-od sang Dios nga ang Biblia ginkopya sing sibu kag gintipigan. Mas madamo nga Biblia ang gin-imprinta sangsa iban nga libro. Ang tanan wala malipay nga makita ikaw nga nagatuon sa Biblia, apang indi pagtuguti nga magpauntat ina sa imo. Ang imo dayon nga palaabuton nasandig sa pagkilala mo sa Dios kag sa paghimo sang iya kabubut-on walay sapayan sang bisan ano nga pagpamatok.​—⁠Mateo 5:​10-12; Juan 17:⁠3.