Mangin “Masako Kaayo” sa Imo Ministeryo

¹ Kon mabasa naton nga si apostol Pablo nagtrabaho subong manughimo sing tolda samtang yara sa Corinto, mahimo kita maghinakop nga naglimite ini sang iya kahigayunan sa pagbantala. Apang, ang Binuhatan 18:5 nagsaysay: “Si Pablo nagsugod nga mangin masako kaayo sa pulong, nga nagapanaksi sa mga Judiyo agod pamatud-an nga si Jesus amo ang Cristo.” Ngaa nangin masako gid si Pablo sa pagbantala nga hilikuton? Bisan pa madamo na ang nangin tumuluo sa Corinto, ginpat-od sa iya sang Ginuo nga may madamo pa nga mangin sumulunod sa sina nga siudad. (Binu. 18:8-11) Amo man bala sini ang aton rason agod mangin masako kaayo sa aton ministeryo? Huo. Madamo pa nga mga tawo ang mahimo masapwan kag matudluan sa kamatuoran.

² Maghinguyang Sing Kapin Pa nga Tion sa Pag-alagad sa Abril: Ayhan tulumuron mo nga mangin masako sa pagbantala sing maayong balita kada bulan. Apang may binulan nga ilabi na nga nagahatag sa aton sing mga kahigayunan agod mangin “masako kaayo” sa sining hilikuton. Nagalakip ini sa bulan sang Abril, labi na nga ang aton pinasahi nga kampanya sang Magpadayon sa Pagbantay! nga brosyur magapadayon tubtob sa Abril 17. Ginatugot bala sang imo kahimtangan nga maka-auxiliary payunir ka ukon madugangan mo ang imo panikasog sa ministeryo sa sini nga bulan? Ginpakamaayo gid ang madamo ang naghimo sini. (2 Cor. 9:⁠6) Kon ginahimo mo ang imo pinakamasarangan, dumduma nga si Jehova nahamuot gid sa imo bug-os kalag nga pag-alagad. (Luc. 21:2-4) Ano man ang imo kahimtangan, himua nga tulumuron nga mangin “masako kaayo” sa imo ministeryo sa Abril kag Mayo. Kag indi gid pagkalimti nga ihatag ang inyo report sa pag-alagad sa talipuspusan sang bulan.

³ Duawa ang mga Bag-uhan nga Nagtambong sa Memoryal: Sa Pilipinas sang nagligad nga tuig, ang nagtambong sa Memoryal 438,418. Ang kabug-usan nga magatambong sa sini nga tuig wala pa mahibaluan. Apang, ang mga report nagapakita nga may daku nga posibilidad para sa mas madamo pa nga “alanyon.” (Mat. 9:37, 38) Gani, sa gilayon, maghimo sing kahimusan nga duawon ang mga interesado nga nagtambong sa Memoryal sang Marso 24 agod mabuligan sila sa espirituwal. Ang pagpalantang sa sinang pagduaw mahimo magtugot ‘sa malaut nga agawon ang pulong sang ginharian nga ginsab-ug sa ila tagipusuon.’ (Mat. 13:19) Ang gilayon nga pagduaw magapakita gid nga “masako [ka] kaayo” sa imo ministeryo.

⁴ Padayon nga Buligi ang mga Di-aktibo: Ang mga gulang dapat maghimo sing kahimusan sa pagduaw sa bisan sin-o nga di-aktibo antes matapos ang Abril sa pagpalig-on sa ila nga magpakigbahin sa ministeryo kon ginatugot ini sang ila mga kahimtangan. Panikasugan sang mga gulang nga hibaluon ang gintunaan sang problema sang indibiduwal kag kon paano gid sia mabuligan agod mangin aktibo liwat sa pag-alagad kay Jehova. Ining mahigugmaon nga bulig magapakita nga ang mga gulang serioso gid sa ila katungdanan subong mga manugbantay sang “panong sang Dios.” (1 Ped. 5:⁠2; Binu. 20:28) Amon gid ginalauman nga ang pila sa ila mangin aktibo liwat sa pag-alagad sa latagon sa tion sang pinasahi nga bulan sang Abril.

⁵ Buligi ang Madamo Pa nga Mangin Di-bawtismado nga mga Manugbantala: Ang inyo bala mga kabataan kalipikado subong bag-o nga mga manugbantala sing maayong balita? Kamusta naman ang iban pa nga inyo ginatun-an sa Biblia? Kon naaprobahan na sila sang mga gulang, indi bala ang Abril isa ka nagakaigo nga tion para sa ila nga magsugod sa pagbantala? Kon ang isa nagauswag kag nagatuon sa Ginapatuman nga brosyur kag sa Ihibalo nga libro, mahimo nga mapadayon ang pagtinuon sa Simbaha ang Dios nga libro. Ang imo tulumuron amo ang pagbulig sa estudyante nga matigayon ang dugang pa nga paghantop sa kamatuoran, mangin kalipikado nga di-bawtismado nga manugbantala, kag mangin dedikado kag bawtismado nga Saksi ni Jehova.—⁠Efe. 3:17-19; 1 Tim. 1:12; 1 Ped. 3:21.

⁶ Ang imo padayon kag matuodtuod nga interes sa imo mga estudyante sa Biblia mahimo magabulig sa ila nga sa ulihi batunon ang kamatuoran. Ang isa ka Saksi nakasugilanon sing tigulang nga magtiayon nga hanuot nga nagpasugot sa isa ka pagtuon sa Biblia. Apang tatlo ka sunodsunod nga semana nga ginpaisol sang mag-asawa ang pagtinuon. Sang ulihi nasugdan gid man ang pagtuon. Nian, ginalang-atan sang magtiayon ang pagtinuon halos kada duha ka semana. Apang, sang ulihi, ang asawa nag-uswag kag nagpabawtismo. “Sang nabawtismuhan na sia,” hinumdom sang utod nga lalaki, “naghibi sia bangod sa kalipay, nga nagpahibi man sa amon nga mag-asawa.” Huo, ang mangin “masako kaayo” sa maayong balita nagadala sing daku nga kalipay!

⁷ Ginapakita sang mga tagna sang Biblia kag mga hitabo sa kalibutan nga kita nagakabuhi sa ulihi nga bahin sang tion sang katapusan. Karon na ang tion nga dapat magpabilin nga nagabantay, mangin “masako kaayo” sa pagbantala sing maayong balita sa iban. Ang Magpadayon sa Pagbantay! nga brosyur isa gid ka maayo nga bulig. Gamita sing maalamon ini sa inyo ministeryo. Si apostol Pablo nagapasalig nga ang aton pagpangabudlay ‘indi gid walay pulos may kaangtanan sa Ginuo.’—⁠⁠1 Cor. 15:⁠58.