Makabulig sa Aton ang Pagbantala Agod Makabatas

¹ Ginapalig-on kita sang Pulong sang Dios nga ‘magdalagan nga may pagbatas sang dalaganon nga ginabutang sa aton atubangan.’ (Heb. 12:1) Subong nga ang isa ka manugdalagan kinahanglan nga magbatas agod magdaug, kinahanglan man naton ang pagbatas agod matigayon ang padya nga kabuhi nga dayon. (Heb. 10:36) Paano makabulig sa aton ang Cristianong ministeryo agod makabatas kita sing matutom tubtob sa katapusan?—Mat. 24:13.

² Nagapalig-on sa Espirituwal: Ang pagbantala naton sang makatilingala nga saad sang Biblia tuhoy sa isa ka matarong nga bag-ong kalibutan makabulig sa aton nga mahuptan nga maathag ang aton paglaum. (1 Tes. 5:8) Kon nagabantala kita sing regular, makapaambit gid kita sang mga kamatuoran nga aton natun-an sa Biblia. May kahigayunan kita nga mapangapinan ang aton pagtuo, kag bilang resulta mapalig-on man kita sa espirituwal.

³ Agod makatudlo sing epektibo sa iban, dapat mahangpan gid naton ang mga kamatuoran sa Biblia. Dapat manalawsaw kag pamalandungan naton ang materyal. Ang hanuot naton nga panikasog nagapadalom sang aton ihibalo, nagapalig-on sang aton pagtuo, kag nagapapagsik sa aton sa espirituwal. (Hulu. 2:3-5) Sa amo, samtang ginabuligan naton ang iban, nagalig-on man kita.—1 Tim. 4:15, 16.

⁴ Ang makugi nga pagpakigbahin sa ministeryo isa ka importante nga bahin sang “kompleto nga hinganib gikan sa Dios,” nga kinahanglan naton agod makatindog sing malig-on batok sa Yawa kag sa mga demonyo. (Efe. 6:10-13, 15) Ang pagkasako naton sa balaan nga pag-alagad nagabulig sa aton nga mahuptan nga nasentro ang aton panghunahuna sa makapalig-on nga mga butang kag malikawan nga maimpluwensiahan sang kalibutan ni Satanas. (Col. 3:2) Samtang ginatudluan naton ang iban sang mga dalanon ni Jehova, pirme kita ginapahanumdom nga dapat naton huptan ang aton balaan nga paggawi.—⁠1 Ped. 2:12.

⁵ Ginpabakod Sang Dios: Sa katapusan, ang pagpakigbahin naton sa pagbantala nagatudlo sa aton nga magsandig kay Jehova. (2 Cor. 4:1, 7) Daw ano nga pagpakamaayo ini! Ang pagpalambo naton sining pagsalig nagasangkap sa aton nga indi lamang nga matuman naton ang aton ministeryo kundi malandas man naton ang bisan ano nga mga sirkunstansia nga maatubang naton sa kabuhi. (Fil. 4:11-13) Sa pagkamatuod, ang pagtuon nga magsandig sing bug-os kay Jehova amo ang yabi sa pagbatas. (Sal. 55:22) Sa madamo nga paagi, ang pagbantala nagabulig sa aton nga makabatas.

Bahin 9—Pagdumala sing Mainuswagon nga mga Pagtuon sa Biblia

Paghanda sa mga Estudyante nga Manaksi sing Di-pormal

¹ Sang narealisar nanday Andres kag Felipe nga si Jesus ang ginsaad nga Mesias, indi sila mapunggan sa pagsugid sa iban sang makalilipay nga mensahe. (Juan 1:40-45) Kaangay man karon, samtang nagasugod sa pagtuo ang mga estudyante sa Biblia sa ila natun-an, mapahulag sila nga ihambal ini. (2 Cor. 4:13) Paano naton sila mapalig-on nga manaksi sing di-pormal kag ihanda sila nga himuon ini sing epektibo?

² Pamangkuta lang ang estudyante kon bala nakapakighambal na sia sa iban tuhoy sa iya natun-an sa Biblia. Mahimo nga may mga abyan kag mga katapo sang pamilya nga sarang niya maagda agod mag-upod sa pagtuon. Pamangkuta sia kon may mga kaupod sia sa trabaho, mga kabutho, ukon mga kilala nga interesado. Sa sining paagi makasugod na sia sa pagpanaksi. Dapat mahangpan niya nga kinahanglan ang paghantop kag mangin matinahuron kag malulo kon nagapakighambal sa iban tuhoy kay Jehova nga Dios kag sa iya mga katuyuan.—⁠Col. 4:⁠6; 2 Tim. 2:24, 25.

³ Pagpaambit sang Ila mga Pagpati: Importante gid nga hanason ang mga estudyante sang Biblia nga gamiton ang Pulong sang Dios kon nagapaambit sang ila mga pagpati. Sa pila ka pinili nga punto sa pagtuon, pamangkuta ang estudyante: “Paano mo gamiton ang Biblia agod ipaathag ining kamatuoran sa imo pamilya?” ukon “Ano nga teksto sa Biblia ang imo gamiton agod pamatud-an ini sa isa ka abyan?” Talupangda ang iya sabat, kag ipakita sa iya kon paano ipasad ang iya panudlo sa Kasulatan. (2 Tim. 2:15) Paagi sa paghimo sini, ginahanda mo ang estudyante nga manaksi sing di-pormal, kag kon kalipikado na sia, sa organisado nga pagbantala sang kongregasyon.

⁴ Maalamon nga ihanda ang mga estudyante sa Biblia sa pag-atubang sang paghingabot. (Mat. 10:36; Luc. 8:13; 2 Tim. 3:12) Kon ang iban mamangkot ukon may ginahambal tuhoy sa mga Saksi ni Jehova, mahimo nga magabukas ini sing kahigayunan agod makapanaksi ang mga estudyante. Ang brosyur nga Mga Saksi ni Jehova—⁠Sin-o Sila? Ano ang Ila Ginapatihan? makasangkap sa ila nga “handa pirme sa pagpangapin.” (1 Ped. 3:15) Nagaaman ini sang sibu nga impormasyon nga sarang magamit sang mga bag-uhan agod buligan ang maayo sing tinutuyo nga mga abyan kag mga katapo sang pamilya nga mahangpan ang aton pasad sa Biblia nga mga pagpati kag mga hilikuton.