Kon Paano Makasugod sing mga Pagtuon sa Ginatudlo sang Biblia nga Libro

Nalipay gid ang madamo sa aton sa pagdumala sing pagtuon sa Biblia kon makasugod lang kuntani. Ang bag-o nga libro nga Ano Gid ang Ginatudlo Sang Biblia? makabulig sa aton. Gindesinyo ang introduksion sa pahina 3-7 agod masugdan ang paghinun-anon sa tagbalay sa Biblia sa sini nga publikasyon. Bisan yadtong indi pa gid hanas sa ministeryo mahapusan sa paggamit sini sa pagsugod sang mga pagtuon.

◼ Mahimo mo tilawan ini nga pamaagi nga nagagamit sang pahina 3:

Pagkatapos mahinambitan ang isa ka balita ukon problema nga ginakabalak-an sang mga tawo sa inyo teritoryo, ipatalupangod sa tagbalay ang masili sing letra nga mga pamangkot sa pahina 3, kag tuguti sia nga makakomento. Nian buksi ang pahina 4-5.

◼ Ukon mahimo pakamaayuhon mo nga magsugod paagi sa pagpatalupangod sang pahina 4-5:

Mahimo ka magsiling, “Indi bala makalilipay kon matabo ang mga pagbag-o nga ginlaragway diri?” Ukon mahimo ka mamangkot, “Sa diin sining mga saad ang luyag mo nga matuman?” Pamatii sing maayo ang iya sabat.

Kon interesado ang tagbalay sa isa sa mga teksto, ipakita sa iya kon ano ang mga ginatudlo sang Biblia tuhoy sina nga topiko paagi sa pagbinagbinag sang mga parapo sa libro nga nagahinun-anon sa sinang teksto. (Tan-awa ang kahon sa sini nga suplemento.) Binagbinaga ang materyal nga daw nagatuon na sa Biblia. Mahimo ini sa sulod sang lima asta napulo ka minuto sa una pa lang nga pagduaw sa ganhaan mismo.

◼ Ang isa pa ka pamaagi amo ang pagpahambal sa tagbalay nga nagagamit sang pahina 6:

Ipatalupangod sa tagbalay ang mga pamangkot sa ubos sang pahina, kag mamangkot, “Napaligban mo na bala ang bisan diin sini nga mga pamangkot?” Kon interesado sia sa isa ka pamangkot, buksi ang libro sa mga parapo nga nagasabat sa pamangkot. (Tan-awa ang kahon sa sini nga suplemento.) Kon ginbinagbinag ninyo nga duha ang impormasyon, nagadumala ka na sing pagtuon sa Biblia.

◼ Mahimo mo magamit ang pahina 7 sa pagdemonstrar sang pagtuon sa Biblia:

Basaha ang unang tatlo ka dinalan sa pahina, kag nian buksi sa kapitulo 3 kag idemonstrar ang pagtuon nga nagagamit sang parapo 1-3. Kontrataha sia nga mabalik ka agod hinun-anunan ang mga sabat sa mga pamangkot sa parapo 3.

◼ Kon paano mahimos ang pagbalik:

Sa pagtakop sang una nga pagtuon, kontrataha sia nga padayunon ang paghinun-anon sa sunod. Mahimo ka magsiling: “Sa pila lang ka minuto, natun-an naton ang ginatudlo sang Biblia sa isa ka importante nga topiko. Sa sunod, binagbinagon naton ang [magbilin sing pamangkot nga inyo pagabinagbinagon]. Mahimo bala ako makabalik sa amo man sini nga takna sa sunod nga semana?”

Samtang nagahilapit kita sa gintalana nga tion ni Jehova, padayon niya kita nga ginasangkapan para sa aton hilikuton. (Mat. 28:19, 20; 2 Tim. 3:17) Gamiton gid naton sing maayo ining bag-ong galamiton sa pagsugod sing mga pagtuon sa Biblia.

Kon Paano Itanyag ang Ginatudlo Sang Biblia nga Libro

Nalakip sa sini nga suplemento ang nanuhaytuhay nga panugda sa pagtanyag sang Ginatudlo Sang Biblia nga libro. Agod mangin epektibo gid ini, ipabutyag ini sing natural, ipahisuno ang imo pamaagi sa mga tawo sa inyo teritoryo, kag kabisaduha ang mga punto nga yara sa libro. Mahimo man magamit ang iban nga mga presentasyon nga praktikal sa inyo teritoryo.—⁠Tan-awa ang Enero 2005 nga Ang Aton Ministeryo sa Ginharian, p. 8.

Armagedon

◼ “Kon mabatian sang mga tawo ang tinaga nga ‘Armagedon,’ madamo ang nagapensar sing pagpamapas sing mga tawo. Makibot ka bala kon matun-an mo nga ang pag-abot sang Armagedon dapat nga kalangkagan naton? [Tuguti sia nga makasabat. Nian basaha ang Bugna 16:14, 16.] Talupangda ang ginasiling sini kon ano ang mangin kahimtangan pagkatapos sang Armagedon.” Buksi sa pahina 82-4, kag basaha ang parapo 21.

Biblia

◼ “Pirme ginahinambitan sang mga tawo ang Biblia subong Pulong sang Dios. Nagpalibog ka bala kon paano nga ang isa ka libro nga ginsulat sang mga tawo mahimo gid tawgon nga Pulong sang Dios? [Tuguti sia nga makasabat. Nian basaha ang 2 Pedro 1:21 kag ang parapo 5 sa pahina 19-20.] Ini nga publikasyon nagasabat pasad sa Biblia sa sini nga mga pamangkot.” Ipakita ang mga pamangkot sa pahina 6.

◼ “Karon pa gid lang makatigayon ang mga tawo sing mas madamo nga impormasyon. Apang sa banta mo diin ayhan kita makatigayon sing maayong laygay nga makatuytoy sa aton sa malipayon, madinalag-on nga pangabuhi? [Tuguti sia nga makasabat. Nian basaha ang 2 Timoteo 3:16, 17 kag ang parapo 12 sa pahina 23.] Ini nga publikasyon magapaathag kon paano kita magkabuhi nga ginakahamut-an sang Dios kag makapaayo sa aton.” Ipakita ang tsart kag ang laragway sa pahina 122-3.

Inaway/Paghidait

◼ “Ginahingamo gid sang tanan nga tawo ang paghidait. Sa banta mo isa lang bala ka damgo ang paglaum nga mangin mahidaiton ang bug-os nga kalibutan? [Tuguti sia nga makasabat. Nian basaha ang Salmo 46:8, 9.] Nagahinun-anon ini nga publikasyon kon paano tumanon sang Dios ang iya katuyuan kag pahanabuon ang paghidait sa bug-os nga kalibutan.” Ipakita ang laragway sa pahina 35, kag binagbinaga ang parapo 17-21 sa pahina 33-4.

Jehova nga Dios

◼ “Madamo nga tawo nga nagapati sa Dios ang luyag gid makigsuod sa iya. Nahibaluan mo bala nga ginaagda kita sang Biblia nga makigsuod sa iya? [Tuguti sia nga makasabat. Nian basaha ang Santiago 4:8a kag ang parapo 20 sa pahina 16.] Ginhanda ini nga publikasyon agod makatuon pa gid sing dugang ang mga tawo tuhoy sa Dios paagi sa ila kaugalingon nga Biblia.” Ipakita ang nagabukas nga mga pamangkot sa pahina 8.

◼ “Madamo nga tawo ang nagapangamuyo nga pakabalaanon, ukon dayawon ang ngalan sang Dios. Napaligban mo na bala kon ano ina nga ngalan? [Tuguti sia nga makasabat. Nian basaha ang Salmo 83:18 kag ang parapo 2-3 sa pahina 195.] Ginapaathag sini nga libro kon ano gid ang ginatudlo sang Biblia tuhoy kay Jehova nga Dios kag sa iya katuyuan sa katawhan.”

Jesucristo

◼ “Nabatian na sang mga tawo sa bug-os nga kalibutan ang tuhoy kay Jesucristo. Ang iban nagsiling nga indi lamang sia isa ka talalupangdon nga tawo. Ginasimba siya sang iban subong Labing Gamhanan nga Dios. Sa banta mo importante gid bala kon ano ang aton pagpati kay Jesucristo?” Tuguti sia nga makasabat. Nian basaha ang Juan 17:3 kag ang parapo 3 sa pahina 37-8. Ipatalupangod ang nagabukas nga mga pamangkot sa ubos sang tig-ulo sang kapitulo.

Kabuhi nga Walay Katapusan

◼ “Ginahingamo gid sang kalabanan nga mga tawo ang mapagros nga panglawas kag malawig nga kabuhi. Apang kon posible ini, luyag mo bala magkabuhi sing dayon? [Tuguti sia nga makasabat. Nian basaha ang Bugna 21:3, 4 kag ang parapo 17 sa pahina 54.] Ini nga libro nagahinun-anon kon paano naton matigayon ang kabuhi nga walay katapusan kag kon mangin ano ang kabuhi kon matuman ini nga saad.”

Kamatayon/Pagkabanhaw

◼ “Madamo nga tawo ang nagapalibog kon ano gid ang nagakatabo sa kamatayon. Sa banta mo posible ayhan nga mahibaluan naton ini? [Tuguti sia nga makasabat. Nian basaha ang Manugwali 9:5 kag ang parapo 5-6 sa pahina 58-9.] Ini nga libro magapaathag man kon ano ang kahulugan sang ginsaad sang Biblia nga pagkabanhaw sa mga napatay.” Ipakita ang laragway sa pahina 75.

◼ “Kon mapatay ang aton hinigugma, natural lang nga luyag naton sia makita liwat, indi bala? [Tuguti sia nga makasabat.] Madamo ang nalugpayan sa ginsaad sang Biblia nga pagkabanhaw. [Basaha ang Juan 5:28, 29 kag ang parapo 16-17 sa pahina 71-2.] Sabton man sini nga kapitulo ini nga mga pamangkot.” Ipakita ang nagabukas nga mga pamangkot sa pahina 66.

Pabalay

◼ “Sa madamong duog, mas mabudlay makakita sing barato kag disente nga ilistaran. Sa banta mo maabot ayhan ang tion nga may nagakaigo nga balay para sa tanan? [Tuguti sia nga makasabat. Nian basaha ang Isaias 65:21, 22 kag ang parapo 20 sa pahina 34.] Ginapaathag sini nga publikasyon kon paano matuman ini nga saad sang Dios.

Pamilya

◼ “Interesado kita tanan nga makatigayon sang malipayon nga pamilya, indi bala? [Tuguti sia nga makasabat.] May ginsambit ang Biblia nga dapat himuon sang tanan agod magmalipayon ang ila pamilya—⁠pag-ilog sa Dios sa pagpakita sing gugma.” Basaha ang Efeso 5:1, 2 kag ang parapo 4 sa pahina 135.

Pangamuyo

◼ “Napaligban mo na bala kon paano ginasabat sang Dios ang mga pangamuyo? [Tuguti sia nga makasabat. Nian basaha ang 1 Juan 5:14, 15 kag ang parapo 16-18 sa pahina 170-2.] Ginapaathag man sini nga kapitulo kon ngaa dapat kita mangamuyo sa Dios kag kon ano ang aton himuon agod pamatian niya kita.”

Relihion

◼ “Madamo nga tawo ang nagatamod na karon sa relihion sa kalibutan nga amo ang gintunaan sang mga problema sang katawhan sa baylo nga isa ka solusyon. Sa banta mo ginatuytuyan ayhan sang relihion ang mga tawo sa husto nga direksion? [Tuguti sia nga makasabat. Nian basaha ang Mateo 7:13, 14 kag ang parapo 5 sa pahina 145-6.] Ginausisa sini nga kapitulo ang anom ka butang agod mahibaluan ang pagsimba nga ginakahamut-an sang Dios.” Ipakita ang nalista sa pahina 147.

Trahedya/Pag-antos

◼ “Kon may trahedya, madamo ang nagaduhaduha kon bala nagaulikid pa ang Dios sa mga tawo kag nagatalupangod sang ila pag-antos. Napaligban mo na bala ini? [Tuguti sia nga makasabat. Nian basaha ang 1 Pedro 5:7 kag ang parapo 11 sa pahina 11.] Ginapaathag sini nga publikasyon kon paano dulaon sing bug-os sang Dios ang pag-antos sang mga tawo.” Ipakita ang nagabukas nga mga pamangkot sa pahina 106.

[Kahon sa pahina 5]

Mga Pamaagi sa Paghinambit Sang Kahimusan sa Donasyon

“Kon luyag mo magdonar sing diutay nga kantidad sa amon bug-os kalibutan nga hilikuton, nalipay ako sa pagbaton sina subong.”

“Bisan pa wala sing bayad ang literatura nga amon ginatanyag, nagabaton kami sing kasarangan nga donasyon para sa amon bug-os kalibutan nga hilikuton.”

“Natingala ka siguro kon paano namon napadayon ini nga hilikuton. Ini bangod ang amon bug-os kalibutan nga hilikuton ginasakdag sang boluntaryo nga mga donasyon. Kon luyag mo magdonar sing diutay nga kantidad, nalipay ako nga batunon ini subong.”

(1) Pamangkot, (2) Teksto, kag (3) Kapitulo

Ang isa ka simple nga paagi sa pagtanyag sang Ano Gid ang Ginatudlo Sang Biblia? amo (1) mamangkot tuhoy sa iya pagtamod, (2) magbasa sang nagakaigo nga teksto, kag (3) ipatalupangod ang isa ka kapitulo sa libro nga nagahinun-anon sa sina nga topiko paagi sa pagbasa sang nagabukas nga mga pamangkot sa ubos sang tig-ulo sang kapitulo. Kon interesado ang tagbalay, idemonstrar sa iya ang pagtuon sa Biblia nga nagagamit sang nagabukas nga mga parapo sa sina nga kapitulo. Ini nga mga pamaagi mahimo magamit sa pagsugod sang isa ka pagtuon sa una nga pagduaw ukon kon nagaduaw liwat.

◼ “Sa banta mo posible ayhan sa di-himpit nga tawo nga makilala ang aton labing gamhanan nga Manunuga, subong sang ginsiling sa Biblia?” Basaha ang Binuhatan 17:26, 27, kag tuguti sia nga makasabat. Nian buksi sa kapitulo 1.

◼ “Sa mga problema nga ginaatubang naton karon, sa banta mo masapwan pa ayhan naton ang lugpay kag paglaum nga ginalaragway diri?” Basaha ang Roma 15:4, kag tuguti sia nga makasabat. Nian buksi sa kapitulo 2.

◼ “Kon may gahom ka sa paghimo sini, pahanabuon mo ayhan ini nga mga pagbag-o?” Basaha ang Bugna 21:4, kag tuguti sia nga makasabat. Nian buksi sa kapitulo 3.

◼ “Sa banta mo matigayon pa ayhan sang aton mga kabataan ang kahimtangan nga ginlaragway sa sining dumaan nga ambahanon?” Basaha ang Salmo 37:10, 11, kag tuguti sia nga makasabat. Nian buksi sa kapitulo 3.

◼ “Sa banta mo maabot pa ayhan ang adlaw nga matuman ini nga pinamulong?” Basaha ang Isaias 33:24, kag tuguti sia nga makasabat. Nian buksi sa kapitulo 3.

◼ “Napaligban mo na bala kon nahibaluan pa sang mga patay ang ginahimo sang mga buhi?” Tuguti sia nga makasabat. Nian basaha ang Manugwali 9:5, kag buksi sa kapitulo 6.

◼ “Sa banta mo posible ayhan nga makita pa naton liwat ang aton napatay nga mga hinigugma, subong sang ginsiling ni Jesus sa sini nga teksto?” Basaha ang Juan 5:28, 29, kag tuguti sia nga makasabat. Nian buksi sa kapitulo 7.

◼ “Sa banta mo paano ayhan matuman ang kabubut-on sang Dios sa duta subong sang sa langit, subong sang ginsambit sa sining bantog nga pangamuyo?” Basaha ang Mateo 6:9, 10, kag tuguti sia nga makasabat. Nian buksi sa kapitulo 8.

◼ “Sa banta mo nagakabuhi na ayhan kita sa tion nga ginlaragway sini nga tagna?” Basaha ang 2 Timoteo 3:1-4, kag tuguti sia nga makasabat. Nian buksi sa kapitulo 9.

◼ “Madamo ang nagapalibog kon ngaa daw nagalala ang problema sang mga tawo. Sa banta mo indi ayhan amo ini ang rason?” Basaha ang Bugna 12:9, kag tuguti sia nga makasabat. Nian buksi sa kapitulo 10.

◼ “Luyag mo bala mahibaluan ang sabat sa pamangkot kaanggid sa sini?” Basaha ang Job 21:7, kag tuguti sia nga makasabat. Nian buksi sa kapitulo 11.

◼ “Sa banta mo ang pag-aplikar ayhan sini nga laygay sang Biblia makabulig sa mga tawo nga magmalipayon ang ila pamilya?” Basaha ang Efeso 5:33, kag tuguti sia nga makasabat. Nian buksi sa kapitulo 14.

Ang pagtuon sa Biblia sarang mareport kon mahiwat na ini sing duha ka beses pagkatapos mademonstrar ang kahimusan sa pagtuon kag kon may patimaan nga mapadayon ang pagtuon.