Ginapaambit Naton ang Aton Paglaum sa Ginharian
1 Sa sining makahalanguyos nga katapusan nga mga adlaw, madamo nga tawo ang wala sing paglaum. (Efe. 2:12) Ang iban di-maalamon nga nagsalig sa materyal nga mga manggad, tawhanon nga mga gumalahom, moderno nga siensia, kag iban pa. Malipayon gid kita bangod may tunay kita nga paglaum sa palaabuton, isa ka paglaum nga “subong sang angkla para sa kalag, pat-od kag malig-on”!—Heb. 6:19, NW.
2 Sa pagdumalahan sang Ginharian sang Dios, himuon nga paraiso ang duta. Banhawon ang aton napatay nga mga hinigugma. (Binu. 24:15) Wala na sing kaimulon, inhustisya, balatian, pagtigulang, kag kamatayon. (Sal. 9:18; Mat. 12:20, 21; Bug. 21:3, 4) Pila lamang ini sa mga saad ni Jehova nga matuman sa indi madugay. Ano nga bahin sang aton paglaum ang ginakalangkagan mo nga matuman?
3 Pagwali sing Maayong Balita: Indi naton dapat pagsulohon ang paglaum sa Ginharian. Ang gugma sa Dios kag sa isigkatawo amo ang magapahulag sa aton sa pag-ilog kay Jesus kag “sa pagwali sang maayong balita sa mga imol, . . sa pagbantala sing pagbuhi sa mga bihag kag pagpasag-uli sang itololok sa mga bulag, sa paghilway sang mga ginpigus.” (Luc. 4:18) Ginpaambit ni apostol Pablo ang maayong balita sa merkado kag sa bisan diin nga may mga tawo. Nangin masako gid sia sa iya ministeryo. (Binu. 18:5) Ang pag-ilog sa iya makugi nga halimbawa sa pagpakigbahin sa ministeryo amo ang magapugong sa “mga kabalaka sining sistema sang mga butang kag ang madaya nga gahom sang manggad” nga magpaburon sang aton paglaum subong mga Cristiano.—Mar. 4:19.
4 Wala nagalubad ang aton paglaum sa Ginharian bisan pa makasugilanon kita sing mga tawo nga di-masinapakon, mga indi interesado sa mensahe tuhoy sa Ginharian, ukon dayag nga nagapamatok sa aton. “Lig-onon ta ang pagtu-ad sang aton paglaum nga indi mationg.” (Heb. 10:23) Wala naton “ginakahuya ang maayong balita.” (Roma 1:16) Sa ulihi, mahimo nga mamati ang pila sa aton bangod sang aton ginapakita nga kombiksion kag pagbatas.
5 Bisan pa nagakaigo nga ipatalupangod naton ang nagalain nga kahimtangan sa kalibutan nga amo ang katumanan sang tagna sa Biblia, indi kita mga manugbantala sang kapahamakan. Sa baylo, ang aton ministeryo nasentro sa aton paglaum sa Ginharian, nga amo ang maayong balita sang Ginharian sang Dios. Kabay pa nga ibantala naton ining maayong balita nga may kombiksion kag kakugi agod ‘matigayon naton ang kabug-usan nga paglaum tubtob sa katapusan.’—Heb. 6:11.