“Maghambal Kamo Pirme . . . nga Natimplahan sing Asin”
1. Ano ang kahulugan sang ‘natimplahan sing asin nga panghambal?’
1 “Maghambal kamo pirme nga may pagkamainayuhon, nga natimplahan sing asin, agod mahibaluan ninyo kon paano kamo dapat magsabat sa kada isa.” (Col. 4:6) Ang pagtimpla sing asin sa aton panghambal nagakahulugan nga pilion naton ang husto nga mga tinaga kag ihambal sa paagi nga mangin kalahamut-an sa mga nagapamati. Importante gid ini kon nagabantala.
2. Paano napanaksihan ni Jesus ang isa ka Samaritana?
2 Halimbawa ni Jesus: Samtang nagapahunayhunay sa tupad sang bubon, ginsugilanon ni Jesus ang isa ka Samaritana nga nagsag-ob. Sa ila pagsugilanon, pila ka beses nga ginapautwas sang Samaritana ang madugay na nga hiligot-anon sang mga Judiyo kag mga Samariahanon. Ginpabutyag man niya ang iya pagpati nga ang mga Samariahanon kaliwatan ni Jacob, bisan pa nga hugot nga nagasiling ang mga Judiyo nga sila naghalin sa mga dumuluong. Sa baylo nga supakon ini nga mga komento, ginhuptan ni Jesus nga positibo ang ila pagsugilanon. Subong resulta, nakapanaksi si Jesus kag nakabenepisyo sa sini ang Samaritana kag ang mga lalaki sa ila siudad.—Juan 4:7-15, 39.
3. Paano naton masunod ang halimbawa ni Jesus kon nagaministeryo?
3 Dapat naton dumdumon kon nagabantala kita nga ang aton katuyuan amo ang ‘pagpahayag sang maayong balita tuhoy sa maayo nga mga butang.’ (Roma 10:15) Luyag naton ipaambit sa tagbalay ang isa ka makagalanyat kag makapalig-on nga ginapamulong sang Biblia, nga wala nagahatag sing impresyon sa ila nga ginaatake naton ang ila mga pagpati. Kon magpabutyag sia sing sayop nga pagtamod, dapat nga indi naton gilayon pag-ipadaku nga sayop ang iya pagpati. May mga punto bala sa iya komento nga mahimo naton ugyunan ukon magamit naton subong basihan agod dayawon sia? Puede naton ipatalupangod ang kasulatan paagi sa pagsiling, “Napamensaran mo na bala ini nga teksto?”
4. Ano ang himuon naton kon mangakig ang tagbalay?
4 Kamusta naman kon mangakig ang tagbalay ukon luyag lang niya makigbais? Dapat naton padayon nga ipakita ang kaayo kag kalulo sa aton paggawi kag panghambal. (2 Tim. 2:24, 25) Kon indi magsapak ang isa ka tawo sa mensahe sang Ginharian, mas maayo pa nga magbiya na lang kita sing mataktikanhon.—Mat. 7:6; 10:11-14.
5. Ano ang maayong resulta nga natigayon sang isa ka utod sa pagsabat sing mainayuhon?
5 Maayong mga Resulta: Sang ginpanaksihan sang isa ka utod nga babayi ang ila kaingod, nangakig ang babayi, kag ginbuyayaw sia. Sing mainayuhon, nagsabat ang utod: “Ginakasubo ko nga subong sina ang imo pagtamod. Ti, maayong adlaw na lang sa imo.” Pagligad sang duha ka semana, ginkadtuan sang babayi ang utod kag nangayo sing pasaylo sa iya paggawi kag nagpabutyag sia nga mamati na sia karon kon ano ang isiling sang utod sa iya. Ang mainayuhon nga sabat masami nga may maayo gid nga mga resulta!—Hulu. 15:1; 25:15.
6. Ngaa importante nga natimplahan sing asin ang aton panghambal sa ministeryo?
6 Tinguhai nga maghambal nga natimplahan sing asin kon nagabantala sing maayong balita. Bisan pa di-mabinatunon ang tagbalay, mahimo nga mamati sia sa masunod nga Saksi ni Jehova nga magpanaksi sa iya.