May Mahatag Kita kay Jehova
1 Nakahibalo ka bala nga may mahatag ang mga tawo sa Dios? Ginhalad ni Abel ang pila sang iya ali nga kasapatan kay Jehova, kag amo man ang ginhimo nanday Noe kag Job. (Gen. 4:4; 8:20; Job 1:5) Ini nga mga halad wala nagahimo sa Manunuga nga magmanggaranon kay sia na ang tag-iya sang tanan nga butang. Apang, paagi sa mga halad mapakita sadtong matutom nga mga lalaki kon daw ano kadaku ang ila gugma sa Dios. Sa karon, mahimo man naton gamiton ang aton tion, kusog, kag pagkabutang sa paghatag kay Jehova sing “halad sang pagdayaw.”—Heb. 13:15.
2 Tion: Dalayawon gid kon ‘baklon naton ang nagakaigo’ nga tion gikan sa indi tanto ka importante nga mga butang agod makahinguyang kita sing mas daku nga tion sa ministeryo! (Efe. 5:15, 16) Ayhan kinahanglan naton bag-uhon ang aton iskedyul agod makaauxiliary payunir kita sing makaisa ukon kapin pa sa isa ka tuig. Ukon ayhan maghinguyang kita sing mas daku nga tion sa ministeryo. Kon magdugang kita bisan 30 minutos lang kada semana sa aton pagbantala nga hilikuton, madugangan sing duha ka oras ang aton tion sa pagbantala kada bulan!
3 Kusog: Agod may kusog kita sa pagbantala kag mahatag naton ang aton pinakamaayo kay Jehova, kinahanglan likawan naton ang mga kalingawan kag trabaho nga nagaubos sang aton kusog. Likawan man naton ang tuman nga pagkabalaka nga “nagapakoko” sang tagipusuon kay ubuson sini ang aton kusog sa pag-alagad sa Dios. (Hulu. 12:25) Mas maayo kon ‘ihaboy naton ang aton lulan kay Jehova’ bisan pa may rason kita sa pagkabalaka!—Sal. 55:22, NW; Fil. 4:6, 7.
4 Pagkabutang: Mahimo man naton gamiton ang aton mga pagkabutang para isakdag sa pagbantala nga hilikuton. Ginpalig-on ni Pablo ang iya masigka-Cristiano nga himuon nga kinabatasan nga “magpain sang bisan pila nga matipon” agod nga may ihatag sa mga nagakinahanglan. (1 Cor. 16:1, 2) Sing kaanggid, mahimo man kita magpain sing kuarta para sa mga kinahanglanon sang aton kongregasyon kag para sa bug-os kalibutan nga hilikuton. Bisan diutay lamang ang aton ihatag kon tinagipusuon ini, pasalamatan gid ini ni Jehova.—Luc. 21:1-4.
5 Madamo sing ginhatag sa aton si Jehova. (Sant. 1:17) Mapasalamatan naton sia kon gamiton naton ang aton tion, kusog kag pagkabutang sa pag-alagad sa iya. Malipay gid si Jehova kon himuon naton ini, kay “ginahigugma sang Dios ang nagahatag sing malipayon.”—2 Cor. 9:7.