Ang Kongregasyon “Nangin Malinong”

1, 2. Ano ang tuyo ni Saulo sa Damasco?

ANG grupo sang mga lalaki nga nagalakbay malapit na sa Damasco. May malain sila nga plano. Kuhaon nila ang mga disipulo ni Jesus sa ila mga balay, panggapuson, pakahuy-an, kag puersa sila nga dal-on sa Jerusalem para mag-atubang sa akig nga Sanhedrin.

² Ang lider sining grupo nga si Saulo may salabton na sa dugo.a Kasan-o lang, sang ginbato sang iya kaupod nga mga Judiyo si Esteban nga isa ka debotado nga disipulo ni Jesus, ara si Saulo nga nagatan-aw kag nagaugyon sia sa ila ginhimo. (Binu. 7:57–8:1) Indi pa kontento sa paghingabot sa mga sumulunod ni Jesus sa Jerusalem, ginpangunahan pa gid niya ang paghingabot sa mga disipulo ni Jesus sa iban nga siudad. Gusto niya dulaon ang makatalagam nga sekta nga nakilal-an bilang “Ang Dalan.”—Binu. 9:1, 2; tan-awa ang kahon nga “Ang Awtoridad ni Saulo sa Damasco.”

3, 4. (a) Ano ang natabo kay Saulo? (b) Ano nga mga pamangkot ang aton binagbinagon?

³ Sa hinali, may nagkirab nga kapawa sa palibot ni Saulo. Nakita man ini sang mga kaupod niya kag nakibot gid sila amo nga wala sila sang nahambal. Nabulag si Saulo kag natumba. Sang indi na makakita, nabatian ni Saulo ang tingog halin sa langit nga nagasiling: “Saulo, Saulo, ngaa ginahingabot mo ako?” Nakibot, si Saulo namangkot: “Sin-o ka, Ginuo?” Mahimo nga wala niya ginpaabot ang sabat: “Ako si Jesus, nga imo ginahingabot.”—Binu. 9:3-5; 22:9.

⁴ Ano ang matun-an naton sa una nga ginhambal ni Jesus kay Saulo? Ano ang aton mabenepisyo kon balikan naton ang natabo sang nangin disipulo ni Jesus si Saulo? Kag ano nga leksion ang aton makuha sa kon paano gingamit sang kongregasyon ang tion sang kalinong pagkatapos nga nangin disipulo si Saulo?

“Ngaa Ginahingabot Mo Ako?” (Binuhatan 9:1-5)

5, 6. Ano ang matun-an naton sa ginsiling ni Jesus kay Saulo?

⁵ Sang ginpadulog ni Jesus si Saulo sa dalan pa Damasco, wala Sia nagsiling: “Ngaa ginahingabot mo ang akon mga disipulo?” Pareho sang aton nabasa, sia nagsiling: “Ngaa ginahingabot mo ako?” (Binu. 9:4) Maathag nga nabatyagan mismo ni Jesus ang mga pagtilaw nga naeksperiensiahan sang iya mga sumulunod.—Mat. 25:34-40, 45.

⁶ Kon ginahingabot ka bangod sang imo pagtuo sa Cristo, saligi nga nahibaluan ni Jehova kag ni Jesus ang imo kahimtangan. (Mat. 10:22, 28-31) Subong, mahimo nga indi pagdulaon ni Jehova ang pagtilaw. Dumduma nga nakita ni Jesus ang ginhimo ni Saulo sang ginpatay si Esteban kag sang puersa nga gindala ni Saulo ang mga disipulo halin sa ila balay pa Jerusalem. (Binu. 8:3) Sina nga tion wala magpasilabot si Jesus. Pero paagi sa Cristo, ginhatagan ni Jehova sing kusog si Esteban kag ang iban pa nga mga disipulo para makapabilin nga matutom.

7. Ano ang dapat mo himuon para mabatas ang paghingabot?

⁷ Mabatas mo man ang paghingabot kon himuon mo ang masunod: (1) Mangin determinado nga magpabilin nga matutom bisan ano ang matabo. (2) Mangayo sing bulig kay Jehova. (Fil. 4:6, 7) (3) Itugyan kay Jehova ang pagtimalos. (Roma 12:17-21) (4) Saligi nga hatagan ka ni Jehova sing kusog para makabatas asta nga dulaon niya ang pagtilaw.—Fil. 4:12, 13.

“Saulo, Utod Ko, Ginpadala Ako ni Ginuong Jesus” (Binuhatan 9:6-17)

8, 9. Ano ang mahimo nga ginbatyag ni Ananias sa iya asaynment?

⁸ Pagkatapos masabat ang pamangkot ni Saulo nga, “Sin-o ka, Ginuo?” Si Jesus nagsiling sa iya: “Magtindog ka kag magsulod sa siudad, kag isugid sa imo didto ang dapat mo himuon.” (Binu. 9:6) Gintuytuyan ang bulag nga si Saulo pakadto sa iya dalayunan sa Damasco, diin nagpuasa sia kag nangamuyo sing tatlo ka adlaw. Sa amo man nga tion, nakighambal si Jesus kay Ananias parte kay Saulo. Si Ananias isa ka disipulo sa sina nga siudad kag “maayo ang ginasugid tuhoy sa iya sang tanan nga Judiyo” nga nagaistar sa Damasco.—Binu. 22:12.

⁹ Imadyina kon ano ang ginbatyag ni Ananias! Ang Ulo sang kongregasyon, ang ginbanhaw nga si Jesucristo amo gid ang nag-istorya sa iya para sa sinang espesyal nga asaynment. Isa gid ka dungog para sa iya, pero mabudlay ini nga asaynment! Sang ginsugo nga dapat sia makighambal kay Saulo, si Ananias nagsabat: “Ginuo, nabatian ko sa madamo nga tawo ang tuhoy sa sini nga tawo. Madamo gid nga makahalalit nga butang ang ginhimo niya sa imo mga balaan sa Jerusalem. Kag nagkadto sia diri nga may awtoridad halin sa puno nga mga saserdote nga dakpon ang tanan nga nagatawag sa imo ngalan.”—Binu. 9:13, 14.

10. Ano ang matun-an naton kay Jesus parte sa iya pagpakig-istorya kay Ananias?

¹⁰ Wala ginsabdong ni Jesus si Ananias sang ginhambal niya ang iya nabatyagan sa iya asaynment. Pero ginhatagan sia ni Jesus sing maathag nga direksion. Kag ginhatagan sia ni Jesus sing konsiderasyon paagi sa pagsugid sa iya sang rason kon ngaa gusto niya nga himuon ni Ananias ining espesyal nga asaynment. Si Jesus nagsiling parte kay Saulo: “Ginpili ko ini nga tawo agod dalhon ang akon ngalan sa mga pungsod, subong man sa mga hari kag sa mga anak ni Israel. Kay ipakita ko sa iya ang madamo nga butang nga antuson niya tungod sa akon ngalan.” (Binu. 9:15, 16) Nagtuman dayon si Ananias. Ginpangita niya ang manughingabot nga si Saulo kag nagsiling sa iya: “Saulo, utod ko, ginpadala ako ni Ginuong Jesus nga nagpakita sa imo sa dalan sang nagapakadto ka diri, agod makakita ka liwat kag mapuno sing balaan nga espiritu.”—Binu. 9:17.

11, 12. Ano ang matun-an naton kay Jesus, kay Ananias, kag kay Saulo sa sini nga kasaysayan?

¹¹ May mga natun-an kita kay Jesus, kay Ananias, kag kay Saulo sa sini nga kasaysayan. Halimbawa, si Jesus mismo ang nagapanguna sa pagbantala nga hilikuton, base gid sa iya ginpromisa. (Mat. 28:20) Bisan pa nga wala sia nagaistorya sing direkta sa aton subong, ginadumalahan niya ang pagbantala paagi sa matutom nga ulipon nga gintugyanan niya sang iya panimalay. (Mat. 24:45-47) Paagi sa paggiya sang Nagadumala nga Hubon, ginapangita sang mga manugbantala kag mga payunir ang mga gusto magtuon parte sa Cristo. Pareho sang ginsambit na sa nagligad nga kapitulo, madamo sa ila ang nangamuyo nga buligan sang Dios kag nakontak sila sang mga Saksi ni Jehova.—Binu. 9:11.

¹² Matinumanon nga ginbaton ni Ananias ang asaynment kag ginpakamaayo sia. Ginatuman mo bala ang sugo nga manaksi sing maid-id bisan pa nga ginabudlayan ka sa sini? Para sa pila, mabudlay makig-istorya sa mga indi nila kilala kon nagapamalaybalay. Para naman sa iban, mabudlay magbantala sa mga tawo sa ila ulubrahan, sa dalan, ukon paagi sa telepono ukon sa sulat. Nabatuan ni Ananias ang iya kahadlok kag pribilehiyo niya nga buligan si Saulo nga makabaton sing balaan nga espiritu.b Nagmadinalag-on si Ananias bangod nagsalig sia kay Jesus kag nagapati sia nga posible mangin utod si Saulo. Mabatuan man naton ang kahadlok kon pareho kay Ananias magsalig kita nga si Jesus ang nagadumala sang pagbantala nga hilikuton, magpakita sing empatiya sa mga tawo, kag maglaum nga posible mangin utod bisan pa ang makahaladlok gid nga mga tawo.—Mat. 9:36.

“Nagbantala Sia Dayon . . . Tuhoy kay Jesus” (Binuhatan 9:18-30)

13, 14. Kon nagatuon ka sa Biblia pero indi pa bawtismado, ano ang matun-an mo sa halimbawa ni Saulo?

¹³ Naghimo dayon si Saulo sang mga pagbag-o base sa iya natun-an. Pagkatapos mag-ayo, nagpabawtismo sia kag nakigkita sa mga disipulo sa Damasco. Pero may ginhimo pa gid sia. “Nagbantala sia dayon sa mga sinagoga tuhoy kay Jesus, nga ining isa amo ang Anak sang Dios.”—Binu. 9:20.

¹⁴ Kon nagatuon ka sa Biblia pero indi pa bawtismado, mangin pareho ka bala kay Saulo kag magdesisyon nga iaplikar ang imo natun-an? Ibutang ta nga nakita mismo ni Saulo ang milagro sang Cristo, kag mahimo nga nakabulig man ini sa iya nga magpabawtismo. Pero nakita man sang iban ang mga milagro nga ginhimo ni Jesus. Halimbawa, nagatan-aw ang isa ka grupo sang mga Fariseo samtang ginaayo niya ang kamot nga naitus, kag madamo nga Judiyo ang nakahibalo nga ginbanhaw ni Jesus si Lazaro. Pero madamo sa ila ang wala magsapak, ang iban namatok pa gani. (Mar. 3:1-6; Juan 12:9, 10) Indi pareho sa ila, nagbag-o si Saulo. Ngaa nagdesisyon si Saulo nga mangin disipulo sang Cristo samtang ang iban wala? Bangod may kahadlok sia sa Dios sangsa tawo kag gin-apresyar gid niya ang kaluoy sang Cristo nga ginpakita sa iya. (Fil. 3:8) Kon amo man sini ang imo reaksion, wala sing makapugong sa imo nga makigbahin sa pagbantala kag mangin kalipikado sa bawtismo.

15, 16. Ano ang ginhimo ni Saulo sa mga sinagoga, kag ano ang reaksion sang mga Judiyo sa Damasco?

¹⁵ Maimadyin mo bala ang kakibot, katingala, kag kaakig sang mga tawo sang nagsugod sa pagbantala si Saulo parte kay Jesus sa mga sinagoga? “Indi bala amo ini ang tawo nga naghingabot sing mapintas sa mga nagatawag sa ngalan ni Jesus sa Jerusalem?” pamangkot nila. (Binu. 9:21) Sang nagpaathag si Saulo kon ngaa nagbag-o ang iya panimuot kay Jesus, “ginpamatud-an niya nga si Jesus amo ang Cristo paagi sa makapakumbinsi nga mga argumento.” (Binu. 9:22) Pero bisan ano pa nga argumento ni Pablo, indi tanan makumbinsi. Indi sini mabag-o ang pagpati sang mga tawo nga nagapilit sang ila namat-an nga tradisyon ukon nagapakatig-a bangod sang ila bugal. Pero wala nag-untat sa pagbantala si Saulo.

¹⁶ Tatlo ka tuig sang ulihi, padayon gihapon nga ginapamatukan sang mga Judiyo sa Damasco si Saulo. Sang ulihi, gintinguhaan nila nga patyon sia. (Binu. 9:23; 2 Cor. 11:32, 33; Gal. 1:13-18) Sang nahibaluan ni Saulo ang plano, maalamon sia nga nalagyo. Gintunton sia sa bintana sang pader sang siudad paagi sa isa ka alat. Si Lucas nagsiling nga ang mga nagbulig kay Saulo nga makapalagyo sadto nga gab-i “mga disipulo” ni Saulo. (Binu. 9:25) Ini nga mga tinaga daw nagapakita nga ang pila sang nakabati kay Saulo sa Damasco nagbaton sang iya pagpanaksi kag nangin mga sumulunod sang Cristo.

17. (a) Ano ang reaksion sang mga tawo sa kamatuoran sa Biblia? (b) Ano dapat ang padayon naton nga himuon, kag ngaa?

¹⁷ Sang una mo nga ginsugiran ang imo pamilya, mga abyan, kag ang iban pa parte sa mga butang nga imo natun-an, mahimo nagapaabot ka nga mamati sila tanan sa maathag nga kamatuoran sa Biblia. Ang pila mahimo nga namati, pero madamo ang wala. Ang matuod, mahimo nga tratuhon ka nga kaaway sang imo pamilya. (Mat. 10:32-38) Pero kon padayon mo nga ginapauswag ang imo ikasarang sa pagpangatarungan base sa Kasulatan, kag kon padayon ka nga maggawi bilang Cristiano, bisan ang mga nagapamatok sa imo mahimo magbag-o sa ulihi.—Binu 17:2; 1 Ped. 2:12; 3:1, 2, 7.

18, 19. (a) Sang ginpasalig ni Bernabe nga disipulo na si Saulo, ano ang resulta? (b) Paano naton mailog sanday Bernabe kag Saulo?

¹⁸ Sang nagsulod si Saulo sa Jerusalem, natural lang nga indi magpati ang mga disipulo sang nagsiling sia nga disipulo na sia. Pero sang ginpasalig sila ni Bernabe nga disipulo na si Saulo, ginbaton nila sia, kag nagpabilin anay sia upod sa ila. (Binu. 9:26-28) Mainandamon si Saulo, pero wala niya ginkahuya ang maayong balita. (Roma 1:16) Maisog sia nga nagbantala sa Jerusalem, ang lugar diin ginhingabot niya sing mapintas ang mga disipulo ni Jesucristo. Sang narealisar sang mga Judiyo sa Jerusalem nga nangin Cristiano na ang ila kuntani lider, daw indi sila makapati kag gintinguhaan nila nga patyon sia. “Sang mahibaluan ini sang mga kauturan,” siling sa teksto, “gindala nila [si Saulo] sa Cesarea kag ginpakadto sa Tarso.” (Binu. 9:30) Ginsunod ni Saulo ang direksion ni Jesus paagi sa kongregasyon. Nakabenepisyo sia kag ang kongregasyon.

¹⁹ Talupangda nga nagmatumato si Bernabe nga buligan si Saulo. Sigurado gid nga bangod sini nagbakod ang pag-abyanay sining mapisan nga mga alagad ni Jehova. Pareho ka bala kay Bernabe nga handa magbulig sa mga bag-uhan sa kongregasyon, nga nagaupod sa ila sa pagbantala kag nagabulig sa ila nga mangin suod kay Jehova? Makabaton ka sing madamo nga pagpakamaayo kon himuon mo ini. Kon bag-o ka nga manugbantala sing maayong balita, pareho ka bala kay Saulo nga nagabaton sang bulig nga ginatanyag sa imo? Kon mag-upod ka sa mas eksperiensiado nga mga manugbantala, mapauswag mo ang imo ikasarang sa ministeryo, magadugang ang imo kalipay, kag makakita ka sing mainunungon nga mga abyan.

“Madamo ang Nangin Tumuluo” (Binuhatan 9:31-43)

20, 21. Paano ginkalitan sang mga alagad sang Dios ang malinong nga tion sadto kag subong?

²⁰ Pagkatapos nangin disipulo si Saulo kag nakahalin sa Jerusalem, “ang kongregasyon sa bug-os nga Judea kag Galilea kag Samaria nangin malinong.” (Binu. 9:31) Paano ginkalitan sang mga disipulo ining malinong nga tion? (2 Tim. 4:2) Base sa rekord, napalig-on sila. Ginpabakod sang mga apostoles kag sang iban pa nga kauturan nga may responsibilidad ang pagtuo sang mga disipulo. Ginpangunahan man nila ang kongregasyon sa ‘pagtuman kay Jehova kag ginpabakod sila tanan sang balaan nga espiritu.’ Halimbawa, gingamit ni Pedro ini nga tion sa pagpalig-on sa mga disipulo sa banwa sang Lida sa Patag sang Saron. Madamo sa mga nagaistar didto ang nagtuo “sa Ginuo” bangod sang iya panikasog. (Binu. 9:32-35) Wala nawili ang mga disipulo sa personal nga mga hilikuton kundi nanikasog sila nga atipanon ang isa kag isa kag ibantala ang maayong balita. Bilang resulta, “nagdamo ang mga disipulo” sa kongregasyon.

²¹ Sang mga 1990, ang mga Saksi ni Jehova sa madamo nga pungsod nakaeksperiensia man sang malinong nga tion. Ang mga gobierno nga naghingabot sa katawhan sang Dios sa madamo nga tinuig gulpi lang nadulaan sang gahom. Gani nangin mas mahapos ang pagbantala sa mga pungsod nga may pagdumili anay, kag sa iban nga pungsod gindula gid ang pagdumili. Ginkalitan sang linibo ka Saksi ini nga kahigayunan para magbantala kag talalupangdon ang mga resulta.

22. Paano mo magamit sing maalamon ang imo kahilwayan?

²² Ginapanginpuslan mo man bala ang imo kahilwayan? Kon nagaistar ka sa pungsod nga may kahilwayan sa relihion, nanamian si Satanas nga ganyaton ka nga tinguhaan ang materyal nga mga manggad imbes nga alagaron si Jehova. (Mat. 13:22) Indi magpaganyat. Gamita sing maalamon ang tion sang kalinong nga imo gina-enjoy subong. Kabiga ini nga kahigayunan sa pagpanaksi sing maid-id kag sa pagpalig-on sa kongregasyon. Dumduma, mahimo nga gulpi magbag-o ang imo sitwasyon.

23, 24. (a) Ano nga mga punto ang matun-an naton sa hitabo parte kay Tabita? (b) Ano ang dapat naton himuon?

²³ Binagbinaga kon ano ang natabo sa isa ka disipulo nga si Tabita, ukon Dorcas. Nagaistar sia sa Joppe, isa ka banwa nga malapit sa Lida. Gingamit sing maalamon sini nga utod ang iya tion kag pagkabutang. Madamo sia sing “maayo nga binuhatan kag mabinuligon sia sa mga imol.” Pero, gulpi lang sia nagmasakit kag napatay.c Madamo gid nga disipulo sa Joppe ang nasubuan bangod sang iya kamatayon, ilabi na ang balo nga mga babayi nga ginpakitaan niya sing kaayo. Sang nakalab-ot si Pedro sa balay nga ginahamyangan, naghimo sia sing milagro nga wala pa mahimo sang mga apostoles ni Jesucristo. Nangamuyo si Pedro kag ginbanhaw si Tabita! Maimadyin mo bala ang kalipay sang balo nga mga babayi kag sang iban nga disipulo sang ginpabalik sila ni Pedro sa kuarto kag ginpakita niya sa ila nga buhi na si Tabita? Sigurado nga napalig-on gid sila sini nga hitabo nga atubangon ang mga pagtilaw sa palaabuton! Indi katingalahan nga ini nga milagro ‘nabalitaan sa bug-os nga Joppe, kag madamo ang nangin tumuluo sa Ginuo.’—Binu. 9:36-42.

²⁴ May matun-an kita nga duha ka importante nga punto sa sining makapalig-on nga hitabo parte kay Tabita. (1) Malip-ot lang ang kabuhi. Gani importante nga maghimo kita sing maayo nga ngalan sa Dios samtang mahimo pa naton! (Man. 7:1) (2) Sigurado gid ang paglaum nga pagkabanhaw. Natalupangdan ni Jehova ang ginhimo nga kaayo ni Tabita, kag ginpadyaan niya sia. Dumdumon niya ang aton tanan nga hinimuan kag banhawon niya kita kon mapatay gid man kita antes sang Armageddon. (Heb. 6:10) Gani, ara man kita subong sa “mabudlay nga panahon” ukon sa malinong nga tion, magpadayon kita sa pagpanaksi sing maid-id tuhoy sa Cristo.—2 Tim. 4:2.