Bisan nasolbar na sang nagadumala nga hubon sang unang siglo ang isyu parte sa pagtuli, ang pila nga nagapangangkon nga mga Cristiano nagapakatig-a gihapon nga dulaon ang isyu. Gintawag sila ni apostol Pablo nga “indi matuod nga mga kauturan” kag gusto nila “patikuon ang maayong balita tuhoy sa Cristo.”—Gal. 1:7; 2:4; Tito 1:10.
Gusto sining indi matuod nga mga kauturan nga malipay sa ila ang mga Judiyo, para indi paghingabuton ang Cristianismo. (Gal. 6:12, 13) Nagarason sila nga para mangin matarong, dapat nila sundon ang ginasiling sang Mosaikong Kasuguan parte sa mga butang pareho sang pagkaon, pagtuli, kag mga kapiestahan sang mga Judiyo.—Col. 2:16.
Gani indi katingalahan nga ang mga nagasuporta sini nga panudlo indi mapahamtang kon upod nila ang Gentil nga mga kauturan. Makapasubo nga bisan ang pila sa Judiyo nga Cristiano nga nagapanguna sa kongregasyon naimpluwensiahan man sini nga panimuot. Halimbawa, sang nagbisita ang mga representante sang kongregasyon sang Jerusalem sa Antioquia, nagpain sila sa mga kauturan nga Gentil. Bisan si Pedro nga pirme nagapakig-upod sadto sa mga Gentil, nagpain sang iya kaugalingon kag wala magsalo sa ila. Wala niya ginhimo ang gintudlo niya sadto. Bilang resulta, ginsaway ni Pablo si Pedro.—Gal. 2:11-14.