Dapat Bala Naton Pamangkuton ang Dios?

ANG iban nagasiling nga indi naton dapat pamangkuton ang Dios. Nagapati sila nga indi matinahuron nga pamangkuton ang Dios kon ngaa ginatugutan niya ukon wala ginatugutan nga matabo ang pila ka butang. Amo man bala sina ang imo pagpati?

Kon huo, mahimo makibot ka nga madamo nga maayo nga tawo ang nagpamangkot sa Dios. Talupangda ang pila sang ila mga pamangkot:

Ang matutom nga si Job: “Ngaa bala ginatago mo ang imo nawung, kag ginaisip mo ako nga imo kaaway?”—Job 13:24.

Ang matutom nga si propeta Habacuc: “Ngaa bala nagatolok ka sa maluibon, kag nagahipus ka kon ang malauton maghalunhon sang tawo nga matarung pa sa iya?”—Habacuc 1:13.

Si Jesucristo: “Dios ko, Dios ko, ngaa ginpatumbayaan mo ako?”—Mateo 27:46.

Kon basahon mo ang mga teksto antes kag pagkatapos sini nga mga bersikulo, makita mo nga wala naakig si Jehovaa nga Dios sa ila pagpamangkot. Indi kita dapat matingala sa iya pagkamapinasensiahon. Halimbawa, wala natak-an ang Dios kon mangayo kita sa iya sang aton pisikal nga mga kinahanglanon para mangin mapagros kita. Nalipay sia nga ihatag ini sa aton. (Mateo 6:11, 33) Ginatudluan man niya kita para mangin mapagros ang aton hunahuna kag emosyon. (Filipos 4:6, 7) Ang matuod, ginsilingan ni Jesus ang iya mga disipulo: “Padayon sa pagpangayo, kag hatagan kamo.” (Mateo 7:7) Ginapahangop sini nga promisa ni Jesus nga mabaton naton indi lang ang materyal nga mga butang kundi ang mga sabat man sa aton mga pamangkot.

Kon may tsansa ka nga pamangkuton ang Dios, diin sa sini ang gusto mo ipamangkot?

• Ano ang katuyuan sang akon kabuhi?

• Ano ang matabo kon mapatay ako?

• Ngaa ginapaantos mo ako?

Makita mo ang mga sabat sang Dios sa iya Pulong, ang Biblia, kay “ang pagsulat sa bug-os nga Kasulatan gintuytuyan sang Dios.” (2 Timoteo 3:16) Binagbinaga kon ngaa ginpamangkot ini sang iban kag kon ano ang sabat sang Biblia.