“Amo Ini ang Isiling Mo sa Ila”

1. (a) Ano ang pagkaanggid nanday Jesus kag Jeremias? (b) Ngaa dapat naton ilugon si Jeremias sa aton ministeryo?

SI Jesucristo amo ang aton panguna nga huwaran sa pagbantala sang maayong balita. Pero, talalupangdon nga nasal-an sang mga tawo nga nakaobserbar kay Jesus nga sia si Jeremias. (Mat. 16:13, 14) Kaangay ni Jesus, nakabaton si Jeremias sing sugo halin sa Dios nga magbantala. Halimbawa, isa ka bes ginsilingan sia sang Dios: “Amo ini ang isiling mo sa ila, ‘Amo ini ang ginsiling ni Jehova.’” (Jer. 13:12, 13; Juan 12:49) Sa iya ministeryo, nagpakita si Jeremias sing mga kinaiya nga kaangay kay Jesus.

2. Paano magkaanggid ang kinahanglanon sang mga tawo karon sa mga Judiyo sa tion ni Jeremias?

² Pero mahimo magsiling ang pila ka Saksi: ‘Ang aton pagbantala lain sangsa kay Jeremias. Humalambal sia sang Dios sa pungsod nga nadedikar sa Iya, samtang ang kalabanan sa aton mabantalaan wala makakilala kay Jehova.’ Matuod ina. Pero sa tion ni Jeremias, kalabanan sang mga Judiyo nangin “di-maalamon” kag nagtalikod sa matuod nga Dios. (Basaha ang Jeremias 5:20-22.) Kinahanglan sila magbag-o para batunon ni Jehova ang ila pagsimba. Amo man sini karon ang mga tawo. Nagapangangkon man sila nga Cristiano ukon wala, kinahanglan nga magkahadlok sila kay Jehova kag magsunod sa matuod nga pagsimba. Tan-awon naton kon paano kita makaalagad sa matuod nga Dios kag makabulig sa mga tawo paagi sa pag-ilog kay Jeremias.

“GINTANDOG NI JEHOVA ANG AKON BABA”

3. Ano ang ginhimo sang Dios kay Jeremias sa umpisa sang iya pagpanagna, kag ano ang iya ginbatyag?

³ Dumduma nga sa umpisa sang pagpanagna ni Jeremias, nabatian niya ini nga mga pulong: “Magkadto ka sa tanan nga pakadtuan ko sa imo; kag ihambal mo ang tanan nga isugo ko sa imo. Indi ka mahadlok sa ila, kay ‘kaupod mo ako kag luwason ko ikaw,’ siling ni Jehova.” (Jer. 1:7, 8) Kag nian may ginhimo ang Dios sa iya nga wala niya ginapaabot. Ginsugiran kita ni Jeremias: “Gintandog ni Jehova ang akon baba. Dayon nagsiling si Jehova sa akon: ‘Isiling mo ang akon ihambal. Ginhatagan ko ikaw sing awtoridad sini nga adlaw.’” (Jer. 1:9, 10) Sugod sadto, nahibaluan ni Jeremias nga nagahambal sia para sa Labing Gamhanan nga Dios.a Bangod sa Iya bug-os nga pagsakdag, nangin makugi gid si Jeremias sa sagrado nga pag-alagad.—Isa. 6:5-8.

4. Magsugid sang isa ka talalupangdon nga halimbawa sang kakugi.

⁴ Wala ginatandog sing literal ni Jehova ang iya mga alagad subong. Pero paagi sa iya espiritu, ginapabaskog niya ang ila handum sa pagbantala. Madamo sa ila ang nangin makugi gid. Isa ka halimbawa amo si Maruja nga taga-Espanya. Sobra 40 ka tuig na nga paralisado ang iya mga kamot kag tiil. Nabudlayan sia sa pagpamalaybalay, gani nangita sia sing paagi para mangin aktibo sa ministeryo. Ang isa ka paagi amo ang pagsulat. Ginadiktahan niya ang iya anak nga babayi sang isulat. Sa sulod sang isa ka bulan, si Maruja kag ang iya “sekretarya” nakapadala sing sobra sa 150 ka sulat, nga nagaunod sing isa ka tract kada sobre. Bangod sini, napalab-utan sang maayong balita ang kalabanan nga mga balay sa kaingod nga minuro. Nagsiling si Maruja sa iya bata, “Kon ang isa sa aton mga sulat matupa sa kamot sang isa ka interesado, pakamaayuhon kita ni Jehova sing isa ka pagtuon sa Biblia.” Ang isa ka gulang sa ila lugar nagsulat, “Nagapasalamat gid ako kay Jehova bangod sang mga utod nga kaangay ni Maruja, nga nagatudlo sa iban kon ano gid ang importante.”

5. (a) Paano nahuptan ni Jeremias ang iya kakugi bisan pa sa mga indi pagsapak? (b) Paano mo mahuptan ang imo kakugi sa pagbantala?

⁵ Sa tion ni Jeremias, ang kalabanan sang pumuluyo sang Jerusalem ‘wala nahamuot’ sa kamatuoran sang Dios. Nag-untat bala ang manalagna sa pagbantala bangod madamo ang wala nagsapak sa iya? Wala gid! Nagsiling si Jeremias: “Kaangay ni Jehova, puno ako sang kaakig sa ila. Nakapoy na ako sa pagpugong sini.” (Jer. 6:10, 11) Paano mo mahuptan ina nga kakugi? Ang isa ka paagi amo ang pagpamalandong sa imo indi matupungan nga pribilehiyo subong representante sang matuod nga Dios. Nahibaluan mo nga ginapakahuy-an sang mga prominente sini nga kalibutan ang ngalan sang matuod nga Dios. Pareho sa mga saserdote sang panahon ni Jeremias, ginalimbungan sang mga lider sang relihion ang mga tawo sa inyo teritoryo. (Basaha ang Jeremias 2:8, 26, 27.) Sa kabaliskaran, ang imo pagbantala sang maayong balita parte sa Ginharian sang Dios nagapabutyag sa kaayo sang Dios sa mga tawo. (Pan. 3:31, 32) Ang pagpamalandong sa sina nga kamatuoran makabulig sa imo nga mahuptan ang imo kakugi sa pagbantala kag sa pagbulig sa mga tulad-karnero.

6. Anong makahaladlok nga mga kabudlayan ang naatubang ni Jeremias?

⁶ Magaugyon ka gid nga indi pirme mahapos huptan ang kakugi sa ministeryo. Samtang nagaalagad si Jeremias kay Jehova, nag-atubang man sia sing mga kabudlayan, lakip na sa butig nga mga manalagna. Mabasa mo ang isa ka halimbawa sini sa Jeremias kapitulo 28. Kalabanan sang mga tawo wala nagpamati sa iya, kag kon kaisa nagabatyag sia nga nagaisahanon. (Jer. 6:16, 17; 15:17) Isa pa, may bes nga kinahanglan niya atubangon ang iya mga kaaway nga gusto magpatay sa iya.—Jer. 26:11.

“GINDAYAAN MO AKO, O JEHOVA”

7, 8. Sa anong mapuslanon nga paagi “gindayaan” sang Dios si Jeremias?

⁷ Sang adlaw-adlaw na ang pagyaguta kag pag-insulto kay Jeremias, ginpabutyag niya ang iya balatyagon sa Dios. Paano ayhan “gindayaan” ni Jehova ang iya matutom nga manalagna, subong sang ginsiling sa Jeremias 20:7, 8?—Basaha.

⁸ Indi literal nga gindayaan ukon ginlimbungan ni Jehova si Jeremias paagi sa pila ka pahito. Kundi, “gindayaan” sia sang Dios sa positibo kag mapuslanon nga paagi. Nagbatyag si Jeremias nga tuman kabudlay sang pagpamatok, nga kon sa iya lang, indi gid niya matuman ang ginsugo sang Dios. Pero, natuman niya ini paagi sa pagsakdag kag bulig sang Labing Gamhanan. Gani makasiling ka nga si Jehova nangibabaw sa iya, nga mas mabaskog sia sangsa kay Jeremias kag sa iya tawhanon nga mga huyog. Sang nagabatyag sia nga daw indi na niya masarangan kag indi na sia makapadayon, gingamit ni Jehova ang iya puersa sa pagbuyok sa iya nga daw subong bala nga gindayaan niya si Jeremias. Mas makusog ang Dios sangsa mga kaluyahon sang manalagna. Bisan sa tion sang indi pagsapak, pagsikway, kag kasingki, nakapadayon sia sa pagbantala.

9. Ngaa makatigayon ka sing kaisog sa ginsiling sa Jeremias 20:11?

⁹ Si Jehova kaangay sang “gamhanan kag makakulugmat nga hangaway” nga nagbulig kay Jeremias. (Jer. 20:11) Mapabakod ka man sang Dios para magpabilin ka nga makugi sa matuod nga pagsimba bisan pa may dalagku nga mga problema. Ang iban nga badbad sa sini nga ekspresyon nagasiling—si Jehova pareho sang “maisog nga soldado” nga nagatindog sa imo kiliran.—Ang Pulong sang Dios, APD.

10. Ano ang imo determinado nga himuon kon pamatukan ka?

¹⁰ Ginpadaku ni Pablo ina nga punto sang ginpalig-on niya ang ginapamatukan nga mga Cristiano. Nagsulat sia: “Maggawi kamo sa paagi nga takus sa maayong balita tuhoy kay Cristo, agod . . . makabalita ako . . . nga nagatindog kamo nga malig-on sa isa ka espiritu, nga may isa ka kalag nga nagapanikasog sing tingob tungod sa pagtuo sa maayong balita, kag sa bisan anong paagi wala nagakahadlok sa inyo mga kasumpong.” (Fil. 1:27, 28) Pareho kay Jeremias kag sa mga Cristiano sang unang siglo, makasalig ka gid sa Labing Gamhanan nga Dios samtang ginatuman mo ang imo ministeryo. Kon yagutaon ukon sakiton ka sang pila ka tawo, dumduma nga kaupod mo si Jehova kag hatagan ka niya sing kusog. Ginhatagan niya sing kusog si Jeremias kag ang madamo nimo nga kauturan; gani himuon man niya ini sa imo. Mangayo sing bulig sa iya, kag magsalig nga sabton niya ang imo pangamuyo. Masapwan mo man nga “gindayaan” ka samtang ginahatagan ka sang Dios sing kaisog kag kusog sa paglandas sa mga kabudlayan. Huo, mahimo mo ang mga butang nga sa banta mo indi mo masarangan.—Basaha ang Binuhatan 4:29-31.

11, 12. (a) Ano ang imo mahimo nga pagpahisuno para maistorya ang mas madamo nga tawo sa imo ministeryo? (b) Ano ang puede ninyo himuon sa inyo teritoryo para masunod ang ginapanugda sang piktyur sa pahina 39?

¹¹ Ang aton matun-an sa pag-alagad ni Jeremias makabulig sa aton sa lainlain nga paagi para mangin epektibo nga ministro sang maayong balita. Sang sobra na 20 ka tuig ang iya pag-alagad kay Jehova subong manalagna, nakasiling sia: “Aga pa ako nagabangon kag ginasugid ko ini sa inyo, apang wala kamo magpamati.” (Jer. 25:3) Huo, aga pa sia nagasugod. May matun-an bala kita sa sini? Sa madamo nga kongregasyon, may mga manugbantala nga aga pa nagabugtaw para istoryahon ang mga tawo sa terminal sang bus kag estasyunan sang tren. Sa mga kaumhan, madamo nga Saksi ang nagabantala sa mga mangunguma sing aga pa kag sa iban nga nakabugtaw na sa sina nga tion. May nahunahunaan ka bala nga paagi para maaplikar mo ang ginhimo ni Jeremias sa iya ministeryo? Ano abi kon magbugtaw ka sing aga pa para makaabot sing temprano sa iskedyul sang inyo miting sa pag-alagad sa latagon?

¹² Isa pa, ang pagbantala sa pamalay sa hapon kag gab-i masami nga may maayo nga mga resulta sa madamo nga lugar. Ang iban nagabantala pa gani kon gab-i sa mga gasolinahan, restawran, kag iban pa nga balaligyaan nga bukas sing 24 oras. Mapahisuno mo bala ang imo iskedyul para maabtan ang mga tawo sa ila balay ukon bisan diin nga lugar?

13, 14. (a) Ano ang matun-an naton kay Jeremias parte sa pagduaw liwat? (b) Sa ano nga paagi ginpadaku ang pagtuman sa aton saad nga pagduaw liwat?

¹³ Isa ka bes, ginsugo ni Jehova si Jeremias nga magtagna samtang nagatindog sa mga gawang sang templo ukon sang Jerusalem. (Jer. 7:2; 17:19, 20) Paagi sini, mas madamo ang makabati sang mensahe ni Jehova. Bangod madamo nga negosyante, lakip na ang prominente nga mga tawo sang siudad, ang pirme nagaagi sa sini nga mga gawang, mahimo nga sulitsulit niya nga ginsugilanon ang pila ka tawo para mapaathag sa ila ang ila nabatian sang nagligad. Ano ang aton matun-an sa sini parte sa pagduaw liwat sa mga interesado?

¹⁴ Nahibaluan ni Jeremias nga kabuhi ang nakataya sa iya pagpanagna. Sang indi niya mapalab-ot sa mga tawo ang ginsugo sang Dios, ginpadala niya ang iya abyan nga si Baruc para himuon ini. (Basaha ang Jeremias 36:5-8.) Paano naton mailog si Jeremias sa sini nga bahin? Kon silingan naton ang tagbalay nga mabalik kita, nagabalik bala kita? Kon indi kita makaduaw liwat ukon makadumala sing pagtuon sa Biblia, nagapangita bala kita sing mabulos sa aton? Si Jesus nagsiling: “Dapat nga ang inyo ‘huo’ mangin huo.” (Mat. 5:37) Importante gid ang pagtuman sang aton ginasiling, kay nagarepresentar kita sa Dios sang kamatuoran kag kahim-ong.—1 Cor. 14:33, 40.

15, 16. (a) Paano gin-ilog sang madamo ang halimbawa ni Jeremias sa pagpasangkad sang ila ministeryo? (b) Ano ang imo matun-an sa eksperiensia sa Chile, nga makita sa pahina 40?

¹⁵ Ginpalig-on ni Jeremias ang mga Judiyo sa Babilonia paagi sa pagsulat sa ila sang “ginsaad” ni Jehova nga pagpasag-uli. (Jer. 29:1-4, 10) Sa karon, ang “ginsaad” ni Jehova nga iya tumanon sa indi madugay mahimo man mapalapnag paagi sa sulat kag telepono. Magamit mo bala ini nga paagi para mabuligan ang imo mga paryente ukon ang iban nga yara sa malayo ukon mabudlay makadtuan nga mga lugar?

¹⁶ Paagi sa pag-ilog sa halimbawa ni Jeremias sa iya bug-os nga pagtuman sa iya ministeryo, ang mga manugbantala subong masami nga makatigayon sing maayo nga mga resulta. Gin-istorya sang isa ka Saksi sa Chile ang isa ka babayi nga nagapagua sa estasyunan sang tren. Nalipay sia sang mabatian ang mensahe sa Biblia kag nagsugot nga hinun-anunan nila ang Biblia sa ila balay. Pero nalipatan sang Saksi nga isulat ang adres sang babayi. Bangod gusto niya palambuon ang interes sang babayi sa kamatuoran, nangamuyo sia kay Jehova. Pagkaaga, nagbalik sia sa estasyunan sang tren sa pareho nga oras. Nakita niya liwat ang babayi. Sa sini nga tion, ginkuha niya ang adres sang babayi kag sang ulihi ginduaw niya sia sa ila balay para buligan nga mahangpan ang Kasulatan. Sa indi madugay, hukman sang Dios ang kalibutan ni Satanas. Pero may paglaum ang mga mahinulsulon nga nagatuo sa maayong balita. (Basaha ang Panalambiton 3:31-33.) Gani dapat gid naton sila buligan paagi sa pagbantala sing maid-id sa aton teritoryo.

“AYHAN MAGAPAMATI SILA KAG TALIKDAN NILA”

17. Paano mo mailog ang pamaagi ni Jeremias sa inyo teritoryo?

¹⁷ Indi gusto ni Jehova nga malaglag ang mga tawo. Mga napulo ka tuig antes nalaglag ang Jerusalem, gingamit niya si Jeremias para ipalab-ot ang paglaum sa mga tinapok sa Babilonia. Aton mabasa: “Bantayan ko sila kag pakitaan sing kaayo, kag pabalikon ko sila sa sini nga duta. Tukuron ko sila kag indi ko sila paggub-on. Itanom ko sila kag indi ko sila paggabuton.” Makasiling gid si Jeremias sa ila: ‘May paglaum kamo sa inyo palaabuton.’ (Jer. 24:6; 26:3; 31:17) Gin-ilog ni Jeremias ang pagtamod sang Dios sa katawhan. Gintuman niya ang iya ministeryo upod ang matuod nga kabalaka, nga nagpalab-ot sang pangabay ni Jehova: “Palihug talikdi ninyo ang inyo malain nga dalanon, kag maghimo kamo sing maayo.” (Jer. 35:15) May nahunahunaan ka pa bala nga paagi para mapakita ang tudok nga interes sa mga tawo sa inyo teritoryo?

18, 19. (a) Ano nga pagtamod ang aton isikway sa aton pagbantala? (b) Ano nga panimuot ni Jeremias ang dapat naton huptan?

¹⁸ Wala gid nag-ugdaw ang tudok nga gugma ni Jeremias sa mga tawo. Sang ginlaglag ang Jerusalem, naluoy gihapon sia sa ila. (Basaha ang Panalambiton 2:11.) Ang mga Judiyo mismo amo ang balasulon sa ila kalaglagan. Pero, wala magsiling si Jeremias, ‘Ginsilingan ko na gid kamo.’ Kundi nasubuan gid sia sa natabo sa ila. Sing kaanggid, wala kita napilitan ukon naobligar lang sa pagtuman sang aton ministeryo. Paagi sa pagpanaksi, mapamatud-an naton kon daw ano kadaku ang aton gugma sa aton dalayawon nga Dios kag sa mga tawo nga gintuga sa iya larawan.

¹⁹ Wala sing pribilehiyo ukon posisyon sa sini nga kalibutan ang makalabaw sa pagpanaksi parte sa matuod nga Dios. Amo sini ang ginbatyag ni Jeremias, nga nagsulat: “Sang makita ko ang imo pulong, ginkaon ko ini. Naghugyaw kag nagkalipay ang akon tagipusuon tungod sang imo pulong; kay gintawag ako sa imo ngalan, O Jehova.” (Jer. 15:16) Samtang nagabantala kita, madamo pa ang makakilala kag magahigugma sa Isa nga gin-utangan nila sang ila kabuhi. Paagi sa makugi kag mahigugmaon nga pag-alagad, subong sang ginpakita ni Jeremias, mabuligan gid naton sila.