“Pabaskugon Ko ang mga Ginakapoy”

1. Ano nga pagpakamaayo ang imo ginakalangkagan sa bag-ong kalibutan?

“BAG-ONG kalibutan.” Kon mabatian mo ini, ano nga mga saad ang madumduman mo? Mahimo ang himpit nga panglawas, bugana kag masustansia nga pagkaon, mabuot nga mga sapat, ukon maayo nga balay. Nahibaluan mo pa gani kon sa diin nga teksto ini mabasa. Pero indi man pagkalimti ang espirituwal kag emosyonal nga mga pagpakamaayo. Kay kon wala ini, indi magdugay ang imo kalipay.

2, 3. Anong pinasahi nga pagpakamaayo ang ginasugid sa aton ni Jeremias?

² Sang gintagna ni Jeremias ang pagpauli sang mga Judiyo gikan sa Babilonia, ginhambal sang Dios kon ano ang ila balatyagon: “Kuhaon mo ang imo tamburin kag magasaot ka upod sa mga nagakinadlaw.” (Basaha ang Jeremias 30:18, 19; 31:4, 12-14.) May ginpasalig pa gid ang Dios nga makapalig-on sa imo: “Pabaskugon ko ang mga ginakapoy, kag busgon ko ang mga nagapalangluya sa gutom.”—Jer. 31:25.

³ Maayo gid ini nga pasalig! Nagsiling si Jehova nga pabaskugon ukon busgon gid niya ang mga ginakapoy kag naluyahan. Ginatuman gid sang Dios ang iya mga saad. Ginapasalig sang mga sinulatan ni Jeremias nga pabaskugon man kita. Labaw sa tanan, nagapalig-on ini kag nagahatag sing paglaum sa aton bisan karon. Isa pa, ginapakita sini sa aton kon paano naton mapalig-on ang iban kag buligan sila nga mapabaskog.

4. Ngaa mahangpan naton ang balatyagon ni Jeremias?

⁴ Nalugpayan gid si Jeremias sa sini nga saad, kag malugpayan man kita. Ngaa? Dumduma ang punto nga ginsambit sa Kapitulo 1 sini nga libro, nga si Jeremias, kaangay ni Elias “isa ka tawo nga may balatyagon kaangay sang aton.” (Sant. 5:17) Ano ang pila ka rason nga naluyahan sing buot ukon medyo napung-awan si Jeremias kon kaisa? Hunahunaa kon ano ang imo batyagon kon yara ka sa iya sitwasyon, kag kon ngaa may mga sitwasyon nga mahimo ka man maluyahan sing buot.—Roma 15:4.

5. Ano ang mahimo nga nagpaluya kay Jeremias?

⁵ Lakip sa nagpaluya sang buot ni Jeremias amo ang ginhimo sang iya mga kasimanwa. Nagdaku sia sa Anatot. Isa ini ka siudad sang mga Levinhon nga mga pila ka kilometros sa naaminhan-sidlangan sang Jerusalem. Siempre pa, may mga abyan kag mga paryente sia sa Anatot. Nagsiling si Jesus nga wala ginapadunggan sa iya kaugalingon nga lugar ang manalagna, kag amo sini ang natabo kay Jeremias. (Juan 4:44) Magluwas nga ang mga kasimanwa ni Jeremias di-matinahuron sa iya kag indi interesado, nagsiling pa gid ang Dios nga ang ‘katawhan sang Anatot nagtinguha sa pagpatay kay Jeremias.’ Akig sila nga nagsiling: “Indi ka magpanagna sa ngalan ni Jehova agod indi ka namon pagpatyon.” Ginpahog sia sang iya mga kasimanwa kag ayhan mga paryente nga dapat kuntani magaapin sa iya.—Jer. 1:1; 11:21.

6. Kon pamatukan ka sang imo katrabaho ukon sang iban, paano makabulig sa imo ang eksperiensia ni Jeremias sa “katawhan sang Anatot”?

⁶ Kon ginaipit ka sang imo mga kaingod, kaeskwela, katrabaho, ukon pila ka miembro sang pamilya, malugpayan ka gid sa pagpakig-angot ni Jehova kay Jeremias. Nagsiling ang Dios nga ‘silutan niya’ ang mga taga-Anatot nga nagapamatok sa manalagna. (Basaha ang Jeremias 11:22, 23.) Nalandas ni Jeremias ang bisan ano nga pagluya sing buot bangod sa pagpamatok sang iya mga kasimanwa kay ginpasalig sia sang Dios. Sang ulihi, ‘ginlaglag niya ang katawhan sang Anatot.’ Sa imo bahin, makasalig ka nga gintan-aw ni Jehova ang mga nagakatabo ukon silutan niya ang mga nagapamatok. (Sal. 11:4; 66:7) Ang imo ‘pagpabilin’ sa mga panudlo sang Biblia kag paghimo sing matarong mahimo makabulig sa pila ka manugpamatok nga indi malaglag.—1 Tim. 4:16.

MGA BUHAT NGA MAKAPALUYA SING BUOT

7, 8. Ano nga pag-abuso ang gin-antos ni Jeremias, kag ano ang epekto sini sa iya?

⁷ Si Jeremias wala lang ginpahog sang iya mga kasimanwa. Ginsakit man sia sang isa ka prominente nga tawo sa Jerusalem, si Pasur nga isa ka saserdote.a Sang nabatian niya ang tagna sang Dios, “ginbunal ni Pasur si Jeremias nga manalagna kag ginbutang sia sa mga pandog.” (Jer. 20:1, 2) Nagsiling ang iban nga ginbakol ukon ginlatigo ni Pasur si Jeremias sing mga 40 ka beses. (Deut. 25:3) Samtang ginaantos ni Jeremias ang kasakit, mahimo nga ginayaguta pa sia sang mga tawo kag ginakadlawan ukon ginaduplaan pa gani. Pero indi lang amo sina ang natabo. Ginbutang sia ni Pasur sa “mga pandog” sa bilog nga gab-i. Ang Hebreong tinaga nga gingamit diri nagapahangop nga nagasiuktot sia. Huo, bilog nga gab-i nga ginpaantos nila si Jeremias sa pandog.

⁸ Ano ang epekto sini kay Jeremias? Nagsiling sia sa Dios: “Nangin kaladlawan ako sa bug-os nga adlaw.” (Jer. 20:3-7) Napensaran pa gani niya nga indi na lang magpanagna para kay Jehova. Pero, nakahibalo ka nga indi ina mahimo ni Jeremias. Sa baylo, ang mensahe ni Jehova nga ginasugo sa iya ‘daw kalayo nga nagadabdab sa mga tul-an ni Jeremias,’ kag kinahanglan niya ini ihambal.—Basaha ang Jeremias 20:8, 9.

9. Ngaa makabulig sa aton kon dumdumon naton ang inagihan ni Jeremias?

⁹ Makabulig sa aton ini nga kasaysayan kon yagutaon kita sang aton mga paryente, kaingod, katrabaho, ukon mga kaeskwela. Indi kita dapat matingala kon maluyahan kita kon kaisa bangod sa mga pagpamatok. Mahimo ina matabo kon ginasakit kita bangod sa matuod nga pagsimba. Naapektuhan ang indi himpit nga si Jeremias, kag indi bala pareho sa iya ang aton balatyagon? Pero, dumduma nga sa bulig sang Dios, napasag-uli ni Jeremias ang iya kalipay kag pagsalig. Tandai, umalagi lang ang pagluya sing buot.—2 Cor. 4:16-18.

10. Ano ang ginasugid sa aton sang Biblia parte sa balatyagon ni Jeremias?

¹⁰ May mga tion nga nagabag-obag-o ang balatyagon ni Jeremias. Amo man bala sina ang nagakatabo sa imo—ayhan malaumon ka gid kag positibo pero gulpi ka lang nangasubo kag nadulaan sing paglaum? Parte sa pagkamalaumon, talupangda ang ginsiling sa Jeremias 20:12, 13. (Basaha.) Pagkatapos sang ginhimo sa iya ni Pasur, nagkalipay si Jeremias nga daw kaangay sang imol nga ginluwas “sa kamot sang mga malauton.” Kon kaisa, mahimo nga malipayon ka gid, kag magaamba pa gani sing pagdayaw kay Jehova! Amo sini ang imo balatyagon kon malandas mo ang isa ka problema ukon may makalilipay nga hitabo sa imo pag-alagad.—Binu. 16:25, 26.

11. Kon pirme nagabag-o ang aton balatyagon, ano ang dumdumon naton parte kay Jeremias?

¹¹ Pero kaangay ni Jeremias, nagabag-o ang aton balatyagon bangod indi kita himpit. Pagkatapos sang iya ‘pag-amba kay Jehova,’ nagpangasubo sia, ayhan naghibi pa gani. (Basaha ang Jeremias 20:14-16.) Grabe gid ang iya kapung-aw, amo nga nakahunahuna sia kon ngaa natawo pa sia! Sa iya masubo nga kahimtangan, nagsiling sia nga ang tawo nga nagpahibalo sang iya pagkabun-ag dapat pakamalauton kag mangin kaangay sang Sodoma kag Gomorra. Pero ang pamangkot amo: Padayon bala nga nangasubo si Jeremias? Nangampo bala sia kag nagpadala sa iya balatyagon? Wala. Sa baylo, nanikasog sia nga malandas ang pagluya sang iya buot, kag nagmadinalag-on sia. Binagbinaga ang masunod nga ginsaysay sang tulun-an sang Jeremias. Ginsugo ni Hari Sedequias ang pangulo nga si Pasur nga mamangkot kay Jeremias parte sa paglikop sang Babilonia sa Jerusalem. Nagtindog si Jeremias kag maisugon nga ginpahayag ang paghukom ni Jehova kag kon ano ang matabo. (Jer. 21:1-7) Maathag nga aktibo gihapon si Jeremias sa pagpanagna!

12, 13. Ano ang aton mahimo para malandas ang mga pagbag-obag-o sang aton balatyagon?

¹² Nagabag-obag-o man ang balatyagon sang pila ka alagad sang Dios karon. Mahimo nga bangod ini sa mga pagbag-o ukon problema sa aton panglawas, kag ayhan makabulig ang eksperto nga doktor sa sini. (Luc. 5:31) Pero kalabanan sa aton nagabatyag sing normal nga kalipay ukon kasubo. Inang negatibo nga mga balatyagon bahin lang sang aton di-kahimpitan. Mahimo nga ginakapoy kita ukon napatyan sang aton pinalangga. Dumduma nga naagyan man ni Jeremias ang pagbag-o sing mga balatyagon, kag nahuptan niya ang kahamuot sang Dios. Para malandas ini, ayhan dapat naton bag-uhon ang aton iskedyul para makapahuway sing maayo. Ukon kinahanglan naton sing tion para malugpayan gikan sa kamatayon sang aton pinalangga. Pero, importante nga magpabilin kita nga regular sa pagtambong sa mga miting kag pagpakigbahin sa teokratikong mga buluhaton. Amo ini ang mga sekreto para makapabilin kita nga balanse kag malipayon sa pag-alagad sa Dios.—Mat. 5:3; Roma 12:10-12.

¹³ Ang imo kasubo mahimo nga talagsa lang, ukon nagaabot-abot, pero makabulig sa imo ang inagihan ni Jeremias. Subong sang nasambit na, kon kaisa nagaluya ang iya buot. Pero, wala niya ini gintugutan nga magpahilayo sa iya sa Dios nga iya ginahigugma kag ginaalagad sing matutom. Sang ginbalusan sing malain ang iya kaayo, nagdangop sia kag nagsalig kay Jehova. (Jer. 18:19, 20, 23) Kabay pa nga ilugon gid naton si Jeremias!—Pan. 3:55-57.

MAPAUMPAWAN MO BALA ANG MGA GINAKAPOY?

14. Paano napalig-on si Jeremias?

¹⁴ Maayo nga binagbinagon naton kon paano napalig-on si Jeremias kag kon paano niya ginpalig-on ang “mga ginakapoy.” (Jer. 31:25) Si Jehova mismo ang nagpalig-on sa manalagna. Handurawa kon paano ka mapalig-on sa ginsiling ni Jehova: “Ginhimo ko ikaw sa sini nga adlaw nga isa ka siudad nga may pamakod . . . Magapakig-away sila sa imo, apang indi sila magadaug sa imo, kay ‘kaupod mo ako nga magaluwas sa imo,’ siling ni Jehova.” (Jer. 1:18, 19) Gani nakasiling gid si Jeremias nga si Jehova “akon kusog kag pamakod kag akon dalangpan sa tion sang kalisdanan.”—Jer. 16:19.

15, 16. Ano ang ginapakita sa aton sang ginhimo nga pagpalig-on ni Jehova kay Jeremias sa aton pagpalig-on sa iban?

¹⁵ Talupangda ang ginsiling ni Jehova kay Jeremias: “Kaupod mo ako.” Ano ang ginapakita sini nga dapat mo himuon kon may kilala ka nga nagakinahanglan sing pagpalig-on? Maayo man nga pamatian mo ang problema sang isa ka utod ukon paryente, pero mas maayo gid kon buligan mo sia. Sa masami, mas maayo nga updan mo ang mga nasit-an pareho sang ginhimo sang Dios kay Jeremias. Nian, mangita sing tion nga palig-unon sila, pero indi lang pagpasobrahi. Mas daku ang mabulig sang pila lang ka tinaga basta makapalig-on ini. Indi man kinahanglan nga maayo ka gid maghambal. Ang simple nga mga tinaga nga nagapakita sing interes, kabalaka, kag utudnon nga pagpalangga makapalig-on gid.—Basaha ang Hulubaton 25:11.

¹⁶ Nangabay si Jeremias: “Dumduma ako kag talupangda, O Jehova.” Kag ano ang natabo? Nagsugid ang manalagna: “Sang makita ko ang imo pulong, ginkaon ko ini. Naghugyaw kag nagkalipay ang akon tagipusuon tungod sang imo pulong.” (Jer. 15:15, 16) Mahimo nga kinahanglan man sang imo ginapalig-on ang mainayuhon nga atension. Siempre pa, indi mo mailog ang pamaagi ni Jehova. Pero, mahimo mo malakip ang pulong sang Dios sa imo ihambal. Inang sinsero, tinagipusuon, kag pasad sa Biblia nga pinamulong makapahalipay gid sa naluyahan sing buot.—Basaha ang Jeremias 17:7, 8.

17. Anong importante nga leksion ang aton matun-an sa pagpakig-angot ni Jeremias kanday Sedequias kag Johanan?

¹⁷ Talupangda nga wala lamang si Jeremias nagbaton sing pagpalig-on gikan sa Dios, kundi ginpalig-on man niya ang iban. Paano? Isa ka bes, ginsugiran ni Hari Sedequias si Jeremias parte sa iya kahadlok sa mga Judiyo nga nakig-alyansa sa mga Babilonianhon. Ginpalig-on sia sang manalagna nga kon tumanon niya si Jehova mangin maayo ang iya kahimtangan. (Jer. 38:19, 20) Sang nalaglag ang Jerusalem kag nagpabilin ang iban nga Judiyo sa pungsod, ang pangulo sang mga soldado nga si Johanan nagplano nga dal-on sa Egipto ang katawhan. Pero, namangkot anay sia kay Jeremias. Ginpamatian sang manalagna si Johanan kag nian nangamuyo kay Jehova. Ginsugid niya ang makapalig-on nga sabat ni Jehova, lakip ang kaayuhan sa pagtuman sa panuytoy sang Dios nga magpabilin sa pungsod. (Jer. 42:1-12) Sa sini nga mga kahimtangan, namati sing maayo si Jeremias antes maghambal. Ang pagpamati importante gid sa pagpalig-on sa iban. Pasugira ang nasit-an sang iya ginabatyag. Pamatii ang iya mga kabalaka kag kahadlok. Kon nagakaigo, palig-una sia. Indi kinahanglan nga pahayagan ka pa sang Dios para palig-unon ang iban, pero malakip mo ang positibo nga pinamulong sa Pulong sang Dios, nga nagahatag sing paglaum.—Jer. 31:7-14.

18, 19. Ano nga paagi sang pagpalig-on sa iban ang mailog naton sa kasaysayan sang mga Recabnon kag ni Ebed-melec?

¹⁸ Wala ginbaton nanday Sedequias kag Johanan ang laygay ni Jeremias, kag amo man sini ang reaksion sang iban subong. Pero indi ini pagtuguti nga magpaluya sa imo. Namati man ang iban kay Jeremias, kag mahimo nga madamo man ang mamati sa imo. Dumduma ang mga Recabnon, mga Kenhanon nga madugay na nga nakig-upod sa mga Judiyo. Ginsugo sila sang ila katigulangan nga si Jehonadab nga subong mga dumuluong, indi sila mag-inom sing alak. Sang ginsalakay sila sang mga Babilonianhon, gindala ni Jeremias ang mga Recabnon sa hulot-kalan-an sang templo. Sa sugo sang Dios, gindulutan sila ni Jeremias sing alak. Bangod sang ila pagtahod sa ila katigulangan, nangin matinumanon ang mga Recabnon kag wala nag-inom sing alak. Kabaliskaran gid ini sa pagkamasinupakon sang Israel. (Jer. 35:3-10) Ginpalab-ot sa ila ni Jeremias ang pagdayaw kag pasalig ni Jehova para sa ila palaabuton. (Basaha ang Jeremias 35:14, 17-19.) Himuon gid naton ini kon nagapalig-on sa iban: Dayawa sila sing sinsero kon posible.

¹⁹ Amo man sini ang ginhimo ni Jeremias kay Ebed-melec, ang Etiopianhon nga opisyal sa palasyo ni Hari Sedequias. Ginpahulog sang mga pangulo sang Juda si Jeremias sa lunangon nga bubon para mapatay. Pero, nakitluoy si Ebed-melec kay Hari Sedequias, nga nagsugo sa iya nga salbaron ang manalagna. Ginhimo gid ini sining dumuluong nga tawo bisan pa mabutang sia sa katalagman. (Jer. 38:7-13) Bangod naakig sa iya ang mga pangulo sang Juda, mahimo nga nabalaka gid si Ebed-melec sa matabo sa iya. Wala sia ginpabay-an ni Jeremias, nga nagalaum nga masarangan ni Ebed-melec ang iya kabalaka. Gin-istorya niya si Ebed-melec kag ginpalig-on parte sa palaabuton nga mga pagpakamaayo sang Dios sa iya.—Jer. 39:15-18.

20. Ano ang gusto naton himuon para sa aton mga kauturan, bata man ukon tigulang?

²⁰ Nasapwan naton sa tulun-an sang Jeremias ang maayo gid nga mga halimbawa para matuman naton ang ginpalig-on ni Pablo sa aton mga kauturan sa Tesalonica: “Padayon nga lugpayi ang isa kag isa kag palig-una ang isa kag isa . . . Ang wala tupong nga kaayo sang aton Ginuong Jesucristo mangin yara sa inyo.”—1 Tes. 5:11, 28.