Iluga ang mga Manalagna—Oseas
1. Ano ang mahimo nga ginpamangkot mo sa imo kaugalingon?
1 ‘Ano nga sakripisyo ang handa ko nga himuon para kay Jehova?’ Mahimo napamangkot mo ini sa imo kaugalingon samtang ginapamalandungan ang kaayo kag kaluoy ni Jehova. (Sal. 103:2-4; 116:12) Si Oseas handa sa pagtuman sa sugo ni Jehova, bisan pa magahimo sia sing daku nga sakripisyo. Paano naton mailog si Oseas?
2. Paano naton mailog ang maayo nga halimbawa ni Oseas sa pagbantala nga hilikuton?
2 Magbantala sa Magamo nga Tion: Ang mensahe ni Oseas panguna nga ginpatuhoy sa napulo ka tribo nga ginharian sang Israel, sa diin ang matuod nga pagsimba halos nadula na. Ginhimo ni Hari Jeroboam II ang malain sa mata ni Jehova kag ginpadayon ang pagsimba sa tinday nga baka nga ginsugdan ni Jeroboam I. (2 Hari 14:23, 24) Ini nga kahimtangan sa espirituwal sang napulo ka tribo nga ginharian ginpadayon sang nagsunod nga mga hari tubtob nga ginlaglag ini sang 740 B.C.E. Walay sapayan sang paglapnag sang butig nga pagsimba, padayon nga nag-alagad sing matutom si Oseas subong manalagna sing mga 59 ka tuig. Determinado man bala kita nga magpadayon sa pagbantala, bisan pa ginapamatukan kita ukon wala ginasapak?—2 Tim. 4:2.
3. Paano ginailustrar sang kabuhi ni Oseas ang kaluoy ni Jehova?
3 Ipakita ang Kaluoy ni Jehova: Ginsugo ni Jehova si Oseas nga ‘mangasawa gikan sa pagkamakihilawason.’ (Os. 1:2) May bata sila nga lalaki sang iya asawa nga si Gomer, pero sang ulihi nagbata si Gomer sing duha pa sa iban nga lalaki. Ang kahanda ni Oseas nga patawaron ang iya asawa nagailustrar sa daku nga kaluoy ni Jehova sa batinggilan nga Israel sang naghinulsol sila. (Os. 3:1; Roma 9:22-26) Handa bala kita nga isakripisyo ang aton personal nga kaayuhan para ipakita ang kaluoy ni Jehova sa tanan nga tawo?—1 Cor. 9:19-23.
4. Ano nga mga sakripisyo ang mahimo naton para kay Jehova?
4 Ginsakripisyo sang iban nga alagad ni Jehova ang ila trabaho nga daku sing sueldo para mas madamo ang ila tion sa ministeryo. Ginpili sang iban nga indi magminyo ukon indi magbata para unahon ang intereses sang Ginharian. Samtang ginapamalandungan ang kabuhi ni Oseas, mahimo isiling naton, ‘Daw indi ko gid guro masarangan ang iya ginhimo.’ Pero samtang nagadalom ang aton apresasyon sa wala tupong nga kaayo ni Jehova kag nagabakod ang aton pagsalig nga buligan kita sang iya balaan nga espiritu, mahimo niya kita gamiton kaangay ni Oseas sa mga paagi nga abi naton indi naton masarangan.—Mat. 19:26; Fil. 2:13.