Mahimo Ka Gid Bala ‘Makapalapit sa Dios’?

1, 2. (a) Ano ang daw indi mapatihan sang madamo, pero ano ang ginapasalig sa aton sang Biblia? (b) Ano ang tawag sang Dios kay Abraham, kag ngaa?

ANO ang batyagon mo kon ang Manunuga sang langit kag duta magsiling parte sa imo, “Abyan ko sia”? Daw indi ini mapatihan sang madamo. Kay man, paano ang isa ka tawo makapakig-abyan kay Jehova nga Dios? Pero, ginapasalig kita sang Biblia nga puede gid kita mangin malapit sa Dios.

² Sang una, si Abraham nangin malapit gid sa Dios. Gintawag ni Jehova ini nga patriarka nga “akon abyan.” (Isaias 41:8) Huo, ginkabig ni Jehova si Abraham nga abyan niya. Nangin abyan sang Dios si Abraham bangod “nagtuo [sia] kay Jehova.” (Santiago 2:23) Subong, nagapangita man si Jehova sing mga kahigayunan para mangin suod niya nga abyan ang mga nagaalagad sa iya kag higugmaon sila. (Deuteronomio 10:15) Ang Iya Pulong nagapalig-on: “Magpalapit kamo sa Dios, kag magapalapit sia sa inyo.” (Santiago 4:8) Ini nga teksto isa ka pangagda kag isa man ka promisa.

3. Ano ang pangagda sa aton ni Jehova, kag ano ang iya ginpromisa nga himuon niya?

³ Ginaagda kita ni Jehova nga magpalapit sa iya. Handa sia kag gusto niya nga batunon kita bilang mga abyan niya. Nagapromisa sia nga kon may himuon kita para makapalapit sa iya, magapalapit man sia sa aton. Dayon, mabaton naton “ang suod nga pagpakig-abyan kay Jehova” kag espesyal gid ina. (Salmo 25:14) Ang “suod nga pagpakig-abyan” diri nagakahulugan nga masugid sang isa ang iya mga sekreto sa isa ka espesyal nga abyan.

4. Ano ang isa ka suod nga abyan para sa imo, kag ngaa si Jehova amo sina nga klase sang abyan sa mga nagapalapit sa iya?

⁴ May ara ka bala suod nga abyan nga masugiran mo sang imo mga sekreto? Ini nga abyan nagaulikid gid sa imo. Ginasaligan mo sia, bangod napamatud-an mo na nga mainunungon sia. Nagadugang ang imo kalipay kon ginasugid mo ini sa iya. Kon nasubuan ka, nagahaganhagan ang imo kasubo bangod nagapamati gid sia sa imo. Bisan pa daw wala na sing iban nga nakaintiende sa imo, naintiendihan ka niya. Pareho sa sini, kon magpalapit ka sa Dios, may ara ka isa ka espesyal nga Abyan nga nagapabalor, nagaulikid, kag nakaintiende gid sa imo. (Salmo 103:14; 1 Pedro 5:7) Masugid mo sa iya ang tanan, kay nahibaluan mo nga mainunungon sia sa mga mainunungon sa iya. (Salmo 18:25) Pero, may pribilehiyo kita nga mangin abyan sang Dios bangod may ginhimo sia para mangin posible ini.

Ginbuksan ni Jehova ang Dalan

5. Ano ang ginhimo ni Jehova para mangin malapit kita sa iya?

⁵ Kon wala sing magbulig sa aton, kita nga mga makasasala indi gid mangin malapit sa Dios. (Salmo 5:4) “Apang ginpakita sang Dios ang iya gugma sa aton paagi sa pagtugot nga mapatay ang Cristo para sa aton samtang makasasala pa kita,” sulat ni apostol Pablo. (Roma 5:8) Huo, ginpadala ni Jehova si Jesus para “ihatag ang iya kabuhi nga gawad kabaylo sang madamo.” (Mateo 20:28) Puede kita mangin malapit sa Dios kon magtuo kita sa sining halad-gawad. Bangod ang Dios “ang una nga naghigugma sa aton,” ginpaposible niya nga makapakig-abyan kita sa iya.—1 Juan 4:19.

6, 7. (a) Paano naton nahibaluan nga si Jehova indi isa ka Dios nga natago kag indi puede makilala? (b) Paano ginpakilala ni Jehova ang iya kaugalingon?

⁶ May ginhimo pa si Jehova para mangin abyan niya kita. Ginpakilala niya ang iya kaugalingon sa aton. Sa bisan ano man nga pag-abyanay, mangin suod ka lang sa isa ka tawo kon kilala mo gid sia, kag kon nabal-an mo ang iya mga kinaiya kag kon paano sia nagagawi. Gani kon si Jehova isa ka Dios nga natago kag indi puede makilala, indi gid kita mangin malapit sa iya. Pero wala nagapanago si Jehova, kundi gusto niya nga makilala naton sia. (Isaias 45:19) Dugang pa, ang ginasugid niya parte sa iya kaugalingon puede mahibaluan sang tanan, pati sang mga tawo nga ginakabig sang kalibutan nga indi importante.—Mateo 11:25.

⁷ Paano ginpakilala ni Jehova ang iya kaugalingon sa aton? Kon tan-awon naton ang iya mga tinuga, madamo kita sang matun-an parte sa iya personalidad. Halimbawa, mabal-an naton kon ano sia ka gamhanan, kon ano sia kaalam, kag kon ano kadalom ang iya gugma. (Roma 1:20) Pero indi lang paagi sa iya tinuga nga ginapakilala ni Jehova ang iya kaugalingon sa aton. Bilang Daku nga Komunikador, ginpakilala man niya ang iya kaugalingon paagi sa iya Pulong, ang Biblia.

Kon Paano Ginpakilala ni Jehova ang Iya Kaugalingon Paagi sa Iya Pulong

8. Ngaa makasiling kita nga ang Biblia isa ka ebidensia sang gugma ni Jehova sa aton?

⁸ Ang Biblia mismo isa ka ebidensia sang gugma ni Jehova sa aton. Sa iya Pulong, ginapakilala niya ang iya kaugalingon sa mga tinaga nga maintiendihan naton. Ebidensia ini nga ginahigugma niya kita kag gusto niya nga makilala man naton sia kag higugmaon. Ang aton mabasa sa sining manami nga libro magabulig sa aton nga mangin malapit sa iya. (Salmo 1:1-3) Binagbinagon naton ang pila sang makalilipay nga mga paagi nga ginapakilala ni Jehova ang iya kaugalingon paagi sa iya Pulong.

9. Ano ang pila ka halimbawa sang mga teksto sa Biblia nga nagapakilala sang mga kinaiya sang Dios?

⁹ Madamo nga beses nga mabasa sa Biblia ang mga kinaiya sang Dios. Talupangda ang pila ka halimbawa. “Si Jehova mahigugmaon sa katarungan.” (Salmo 37:28) Ang Dios “gamhanan gid.” (Job 37:23) “ ‘Mainunungon ako,’ siling ni Jehova.” (Jeremias 3:12) “Maalam sia.” (Job 9:4) Sia “isa ka Dios nga maluluy-on kag mainawaon, indi dali maakig kag bugana sa mainunungon nga gugma kag kamatuoran.” (Exodo 34:6) “Ikaw, O Jehova, maayo kag handa sa pagpatawad.” (Salmo 86:5) Kag pareho sang ginsambit sa una nga kapitulo, nagapangibabaw ang isa ka kinaiya: “Ang Dios gugma.” (1 Juan 4:8) Kon pamensaron naton kon ano ka dalayawon si Jehova nga Dios, gusto gid naton nga mangin abyan niya.

10, 11. (a) Para buligan kita nga makita sing mas maathag ang iya personalidad, ano ang ginlakip ni Jehova sa iya Pulong? (b) Ano nga halimbawa sa Biblia ang nagabulig sa aton sa pag-imadyin kon paano ginagamit sang Dios ang iya gahom?

¹⁰ Wala lang niya ginsugid sa aton ang iya mga kinaiya, kundi mahigugmaon nga ginlakip ni Jehova sa iya Pulong ang mga halimbawa kon paano niya ginpakita ini nga mga kinaiya. Kon basahon naton ini nga mga halimbawa, maimadyin naton kon ano ang ginhimo ni Jehova, kag mas maintiendihan naton kon ano sia nga klase sang Dios. Gani, mangin malapit pa gid kita sa iya. Binagbinaga ang isa ka halimbawa.

¹¹ Mabasa naton sa Biblia nga ang Dios may “makahalawhaw nga gahom.” (Isaias 40:26) Pero kon mabasa naton kon paano niya ginluwas ang Israel sa Pula nga Dagat kag dayon ginhatag niya ang tanan nila nga kinahanglanon sa kamingawan sa sulod sang 40 ka tuig, magadayaw gid kita kon paano niya ginagamit ang iya gahom. Imadyina ang nagaalimbukad nga tubig nga napihak. Dayon imadyina ang pungsod, nga mga 3,000,000 tanan, nga nagatabok sa mamala nga salog sang dagat, kag ang nagpunong nga tubig nagatindog pareho sang mataas nga mga pader sa magtimbang nga kilid. (Exodo 14:21; 15:8) Makita mo kon paano sila ginproteksionan kag gin-atipan sang Dios sa kamingawan. Ang tubig nagsagawak halin sa daku nga bato. Ang pagkaon, nga daw puti nga mga liso, makita sa ibabaw sang duta. (Exodo 16:31; Numeros 20:11) Ginapakita diri ni Jehova nga indi lang nga may gahom sia kundi ginagamit niya ini para sa iya katawhan. Mapalig-on gid kita nga mabal-an nga ang Dios nga aton ginapangamuyuan may gahom sa pagbulig sa aton kag sia ang ‘aton dalangpan kag kusog, nga handa gid magbulig sa tion sang kalisdanan.’—Salmo 46:1.

12. Paano kita ginabuligan ni Jehova nga “makita” sia sa termino nga maintiendihan naton?

¹² Si Jehova, nga isa ka Espiritu, may iban pa nga ginhimo para makilala pa gid naton sia. Bangod mga tawo lang kita, ang makita lang naton amo ang pisikal nga mga butang, gani indi naton makita ang lugar sang mga espiritu. Kon isugid sang Dios sa aton ang parte sa iya kaugalingon sa termino sang mga espiritu, daw pareho lang ini sa pagtinguha mo nga isugid sing detalyado ang imo hitsura, pareho sang kolor sang imo mata ukon mga pikas, sa isa ka tawo nga natawo nga bulag. Gani, ginabuligan kita ni Jehova nga “makita” sia sa termino nga maintiendihan naton. Kon kaisa, nagagamit sia sing simbuliko nga mga tinaga kag mga ilustrasyon para ikumparar ang iya kaugalingon sa mga butang nga nabal-an naton. Ginagamit pa gani niya ang mga bahin sang lawas sang tawo para isugid ang parte sa iya kaugalingon.a

13. Ano ang pagtawag kay Jehova sa Isaias 40:11, kag ano ang epekto sini sa imo?

¹³ Talupangda kon ano ang pagtawag kay Jehova sa Isaias 40:11: “Kaangay sang manugbantay sang karnero atipanon niya ang iya panong. Paagi sa iya butkon tipunon niya ang mga kordero, kag dalhon niya sila sa iya dughan.” Ginakumparar diri si Jehova sa isa ka manugbantay nga nagagamit sang “iya butkon” sa paghakwat sa mga kordero. Ginapakita sini ang ikasarang sang Dios sa pagproteksion kag sa pagsuporta sa iya katawhan, bisan sa mga mas maluya. May seguridad kita sa iya makusog nga mga butkon, kay kon mainunungon kita sa iya, indi gid niya kita pagbiyaan. (Roma 8:38, 39) Ginadala sang Daku nga Manugbantay ang mga kordero “sa iya dughan,” nga amo ang pagtawag sa mga piniluan sang naibabaw nga bayo, diin ginasulod kon kaisa sang manugbantay ang bag-o nabun-ag nga kordero. Gani ginapasalig kita nga ginapalangga kita kag ginaatipan ni Jehova. Natural lang nga gusto naton mangin malapit sa iya.

“Luyag sang Anak nga Magpaathag Tuhoy sa Iya”

14. Ngaa masiling nga si Jehova nagahatag sing pinakadetalyado nga pagpakilala sang iya kaugalingon paagi kay Jesus?

¹⁴ Sa iya Pulong, nagahatag si Jehova sing pinakadetalyado nga pagpakilala sang iya kaugalingon paagi sa iya hinigugma nga Anak, si Jesus. Wala na sing iban pa nga makapakita kag makapaathag sang panghunahuna kag balatyagon sang Dios sangsa kay Jesus. Kay man, ining panganay nga Anak madugay na nga kaupod sang iya Amay antes gintuga ang iban pa nga espiritu nga mga tinuga kag ang pisikal nga uniberso. (Colosas 1:15) Kilala gid ni Jesus si Jehova. Amo kon ngaa nakasiling sia: “Wala sing nakakilala sa Anak kundi ang Amay, kag wala sing nakakilala sa Amay kundi ang Anak, kag ang bisan sin-o nga luyag sang Anak nga magpaathag tuhoy sa iya.” (Lucas 10:22) Sang si Jesus isa ka tawo sa duta, ginpakilala ukon ginpaathag niya ang parte sa iya Amay sa duha ka importante nga paagi.

15, 16. Ano ang duha ka paagi nga ginpakilala ni Jesus ang iya Amay?

¹⁵ Una, ang mga panudlo ni Jesus nagabulig sa aton para makilala ang iya Amay. Ginsugid ni Jesus ang parte kay Jehova paagi sa mga tinaga nga nagatandog sang aton tagipusuon. Halimbawa, para ipaathag nga maluluy-on ang Dios kag palangga niya ang mga nakasala nga nagahinulsol kag gusto niya nga magbalik sila sa iya, naggamit si Jesus sang isa ka ilustrasyon. Ginkumparar ni Jesus si Jehova sa isa ka mapinatawaron nga amay nga nalipay gid sang makita niya ang iya rebelde nga anak nga nagbalik amo kon ngaa nagdalagan sia kag ginhakos kag mapinalanggaon nga ginhalukan ang iya anak. (Lucas 15:11-24) Nagsiling man si Jesus nga si Jehova isa ka Dios nga ‘nagabuyok’ sa matarong sing tagipusuon nga mga tawo bangod ginahigugma niya ang kada isa sa ila. (Juan 6:44) Nabal-an gani sang Dios kon mahulog sa duta ang isa ka magamay nga maya. “Indi kamo magkahadlok,” paathag ni Jesus, “mas importante pa kamo sangsa madamo nga maya.” (Mateo 10:29, 31) Mabuyok gid kita sa pareho sini ka mapinalanggaon nga Dios.

¹⁶ Ikaduha, ginapakita sa aton sang halimbawa ni Jesus kon ano si Jehova. Perpekto gid nga gin-ilog ni Jesus ang iya Amay amo nga nakasiling sia: “Ang bisan sin-o nga nakakita sa akon nakakita man sa Amay.” (Juan 14:9) Gani, kon ginabasa naton sa mga Ebanghelyo ang parte kay Jesus, ang mga balatyagon nga iya ginpakita kag ang iya pagtratar sa iban, daw pareho lang nga makita naton ang iya Amay. Amo ini ang pinakamaayo nga paagi nga mapakilala ni Jehova ang iya kaugalingon sa aton. Ngaa?

17. Iilustrar kon ano ang ginhimo ni Jehova para buligan kita nga maintiendihan kon ano sia.

¹⁷ Sa pag-ilustrar: Imadyina nga nagatinguha ka nga ipaathag kon ano ang kaayo. Basi ipaathag mo ini paagi sa mga tinaga. Pero kon may matudlo ka nga tawo nga aktual nga nagapakita sang kaayo, kag dayon magsiling ka, “Amo ’na ang halimbawa sang kaayo,” mas nagaathag ang kahulugan sang tinaga nga “kaayo” kag mas mahapos ini intiendihon. Pareho man sini ang ginhimo ni Jehova para buligan kita nga maintiendihan kon ano sia. Wala labot nga ginsugid niya ang parte sa iya kaugalingon paagi sa mga tinaga, ginhatag man niya sa aton ang buhi nga halimbawa sang iya Anak. Aktual nga makita naton kay Jesus ang mga kinaiya sang Dios. Paagi sa rekord sang mga Ebanghelyo nga nagasugid parte kay Jesus, daw pareho lang nga si Jehova nagasiling, “Amo ako sina.” Ano ang ginasugid sang Biblia parte kay Jesus sang ari sia sa duta?

18. Paano ginpakita ni Jesus ang mga kinaiya nga gahom, katarungan, kag kaalam?

¹⁸ Ginpakita ni Jesus ang apat ka panguna nga kinaiya sang Dios sa dalayawon nga paagi. May gahom sia sa balatian, gutom, kag bisan sa kamatayon. Pero, indi pareho sang sakon nga mga tawo nga nag-abuso sa ila gahom, wala gid niya gingamit ang iya gahom sa paghimo sang mga milagro para sa iya kaugalingon ukon para halitan ang iban. (Mateo 4:2-4) Ginhigugma niya ang katarungan. Napuno ang iya tagipusuon sing matarong nga kaakig sang makita niya ang sakon nga mga negosyante nga nagahingalit sa mga tawo. (Mateo 21:12, 13) Gintratar niya sing makatarunganon ang mga imol kag ang mga ginapigos, kag ginbuligan sila nga ‘makakita sing kapahuwayan’ para sa ila kaugalingon. (Mateo 11:4, 5, 28-30) Wala sing tupong ang kaalam sa mga panudlo ni Jesus, nga “labaw pa kay Solomon.” (Mateo 12:42) Pero wala gid ginpadayawdayaw ni Jesus ang iya kaalam. Ang iya mga ginsiling nagtandog sang tagipusuon sang ordinaryo nga mga tawo, bangod maathag, simple, kag praktikal ang iya mga panudlo.

19, 20. (a) Ngaa si Jesus maayo gid nga halimbawa sang gugma? (b) Samtang ginabasa naton kag ginabinagbinag ang halimbawa ni Jesus, ano ang dapat naton dumdumon?

¹⁹ Si Jesus maayo gid nga halimbawa sang gugma. Sa iya pagministeryo, ginpakita niya ang madamo nga bahin sang gugma, lakip ang empatiya kag kaluoy. Kon makita niya nga nagaantos ang mga tawo, naluoy gid sia sa ila. Pero wala lang sia naluoy sa ila, kundi may ginahimo gid sia para buligan sila. (Mateo 14:14) Bisan pa gin-ayo niya ang mga nagabalatian kag ginpakaon ang mga ginagutom, nagpakita pa si Jesus sing kaluoy sa mas importante nga paagi. Ginbuligan niya ang iban nga mahibaluan, batunon, kag higugmaon ang kamatuoran parte sa Ginharian sang Dios, nga magadala sing permanente nga mga pagpakamaayo sa katawhan. (Marcos 6:34; Lucas 4:43) Kag ang pinakaimportante, nagpakita si Jesus sing gugma paagi sa kinabubut-on nga paghalad sang iya kabuhi para sa aton.—Juan 15:13.

²⁰ Si Jesus mapinalanggaon gid kag maluluy-on gani indi katingalahan nga ang tanan nga klase sang tawo gusto mangin malapit sa iya. (Marcos 10:13-16) Pero, samtang ginabasa naton kag ginabinagbinag ang parte sa buhi nga halimbawa ni Jesus, dumdumon naton nga paagi sa sini nga Anak makita naton kon ano nga klase nga persona ang iya Amay, si Jehova.—Hebreo 1:3.

Ini nga Libro Makabulig sa Imo

21, 22. Ano ang nalakip sa pagpangita kay Jehova, kag ano ang ara sa sini nga libro nga makabulig sa aton nga mahimo ini?

²¹ Paagi sa maathag gid nga pagpakilala sang iya kaugalingon sa iya Pulong, ginapahibalo sa aton ni Jehova nga gusto niya nga mangin malapit kita sa iya. Pero wala niya kita ginapilit nga mangin malapit sa iya. Ara sa aton kon gusto naton pangitaon si Jehova “samtang makita pa sia.” (Isaias 55:6) Mapangita naton sia paagi sa pagbasa sang Biblia kay diri naton mabal-an ang iya mga kinaiya kag kon paano sia nagapanghikot. Ang libro nga imo ginabasa subong gindesinyo para buligan ka sa paghimo sini.

²² Matalupangdan mo nga ini nga libro natunga sa mga seksion nga nagabinagbinag sang apat ka importante nga kinaiya ni Jehova: gahom, katarungan, kaalam, kag gugma. Ang kada seksion nagabukas paagi sa sumaryo parte sa isa ka kinaiya. Ang nagasunod nga pila ka kapitulo nagapaathag kon paano ginapakita ni Jehova ini nga kinaiya sa sarisari nga paagi. Ang kada seksion may isa ka kapitulo nga nagabinagbinag kon paano ginpakita ni Jesus ini nga kinaiya, kag may isa man ini ka kapitulo nga nagatudlo kon paano naton mapakita ini nga kinaiya sa aton kabuhi.

23, 24. (a) Ano ang katuyuan sang mga kahon nga “Mga Pamangkot Para sa Pagpamalandong”? (b) Paano ang pagpamalandong nagabulig sa aton para mangin malapit pa gid kita sa Dios?

²³ Sugod sa sini nga kapitulo, may kahon nga natig-uluhan “Mga Pamangkot Para sa Pagpamalandong.” Halimbawa, tan-awa ang kahon sa pahina 24. Ang mga teksto kag mga pamangkot indi rebyu sang kapitulo. Kundi, katuyuan sini nga buligan ka sa pagbinagbinag sang iban pa nga importante nga mga bahin sang tema. Paano mo magamit sing epektibo ini nga mga kahon? Tan-awa ang kada teksto nga ginasambit, kag basaha sing maayo ang mga bersikulo. Dayon sabta ang pamangkot para sa kada teksto. Hunahunaa ang mga sabat. Puede ka mag-research. Pamangkuta pa gid ang imo kaugalingon: ‘Ano ang ginasugid sa akon sini nga impormasyon parte kay Jehova? Paano ko ini sundon sa akon kabuhi? Paano ko ini magamit sa pagbulig sa iban?’

²⁴ Ini nga pagpamalandong makabulig para mangin malapit pa gid kita kay Jehova. Ngaa? Ginapakita sang Biblia nga ang pagpamalandong may epekto sa tagipusuon. (Salmo 19:14) Kon binagbinagon kag apresyahon naton ang aton matun-an parte sa Dios, ang impormasyon nagapanalupsop sa aton malaragwayon nga tagipusuon. Dayon, nagaapektar ini sa aton panghunahuna, nagapukaw sang aton balatyagon, kag nagapahulag sa aton nga iaplikar ang aton natun-an. Ang aton gugma sa Dios nagadalom, kag ini nga gugma, magapahulag sa aton sa paghandum nga pahamut-an sia bilang ang aton pinakapalangga nga Abyan. (1 Juan 5:3) Para mangin amo kita sini kasuod kay Jehova, dapat naton makilala ang iya mga kinaiya kag kon paano sia nagapanghikot. Pero, binagbinagon anay naton ang parte sa pagkabalaan ni Jehova kag kon ngaa ini nga kinaiya makabulig sa aton nga mangin malapit sa iya.