Ang Panihapon sang Ginuo​—Selebrasyon nga Nagapadungog sa Dios

ANG mga Cristiano ginsugo nga iselebrar ang Memoryal sang kamatayon sang Cristo. Ini nga selebrasyon gintawag man nga “Panihapon sang Ginuo.” (1 Corinto 11:20) Ngaa importante gid ini? San-o kag paano ini dapat iselebrar?

Ginsugdan ni Jesucristo ini nga selebrasyon sang gab-i sang Judiyo nga Paskua sang 33 C.E. Ang Paskua isa ka selebrasyon nga ginahiwat sadto kada tuig, sa ika-14 nga adlaw sang Judiyo nga bulan nga Nisan. Para makalkular ina nga petsa, ginahulat sadto sang mga Judiyo ang adlaw sa tigpamulak nga ang kalawigon sang kasanag kag kadulom halos pareho nga tig-12 ka oras. Ang una nga lati (new moon) nga pinakamalapit sa sini nga adlaw amo ang una nga adlaw sang Nisan. Ang Paskua masugod 13 ka adlaw pagkatapos sini.

Ginselebrar ni Jesus ang Paskua upod sa iya mga apostoles, ginpalakat niya si Judas Iscariote, kag dayon ginsugdan ang Panihapon sang Ginuo. Ini nga panihapon amo ang nagbulos sa Judiyo nga Paskua, gani dapat ini iselebrar sing makaisa lang kada tuig.

Ang Ebanghelyo ni Mateo nagasiling: “Nagkuha si Jesus sang tinapay kag nagpangamuyo. Dayon gintipiktipik niya ini kag ginhatag sa mga disipulo, nga nagasiling: ‘Kuha kamo, kaon kamo. Ini nagakahulugan sang akon lawas.’ Nagkuha man sia sing isa ka kopa kag nagpasalamat sa Dios. Dayon ginhatag niya ini sa ila, nga nagasiling: ‘Mag-inom kamo tanan sa sini, kay ini nagakahulugan sang akon “dugo sang katipan,” nga ibubo tungod sa madamo para sa kapatawaran sang mga sala.’”—Mateo 26:26-28.

Ang iban nagapati nga ginhimo ni Jesus ang tinapay kag alak nga mangin iya literal nga unod kag dugo. Pero, kompleto pa ang lawas ni Jesus sang ginhatag niya ini nga tinapay. Literal bala nga unod kag dugo ni Jesus ang ginkaon kag gin-inom sang iya mga apostoles? Indi, kay kanibalismo ina kag supak sa sugo sang Dios. (Genesis 9:3, 4; Levitico 17:10) Sa Lucas 22:20, si Jesus nagsiling: “Ini nga kopa nagakahulugan sang bag-o nga katipan pasad sa akon dugo, nga ibubo tungod sa inyo.” Ini bala nga kopa nangin literal nga “bag-o nga katipan”? Imposible gid, kay ang katipan isa ka kasugtanan, indi isa ka butang.

Gani, ang tinapay kag alak mga simbulo lamang. Ang tinapay nagasimbulo sa perpekto nga lawas sang Cristo. Naggamit si Jesus sing tinapay nga nabilin sa panihapon sang Paskua. Ini nga tinapay wala sing lebadura, ukon yeast. (Exodo 12:8) Pirme ginagamit sang Biblia ang lebadura bilang simbulo sang sala ukon kaduluntan. Gani ang tinapay nagarepresentar sa perpekto nga lawas nga ginhalad ni Jesus. Wala ini sing sala.—Mateo 16:11, 12; 1 Corinto 5:6, 7; 1 Pedro 2:22; 1 Juan 2:1, 2.

Ang mapula nga alak nagarepresentar sa dugo ni Jesus. Paagi sa sini nga dugo, nangin mabakod ukon legal ang bag-o nga katipan. Nagsiling si Jesus nga ang iya dugo ginbubo “para sa kapatawaran sang mga sala.” Gani mahimo na mangin matinlo ang mga tawo sa panulok sang Dios kag makasulod sa bag-o nga katipan upod kay Jehova. (Hebreo 9:14; 10:16, 17) Paagi sa sini nga katipan, ukon kontrata, makapalangit ang 144,000 ka matutom nga Cristiano. Didto, mangin mga hari sila kag saserdote para pakamaayuhon ang tanan nga tawo.—Genesis 22:18; Jeremias 31:31-33; 1 Pedro 2:9; Bugna 5:9, 10; 14:1-3.

Sin-o ang dapat magkaon sang tinapay kag mag-inom sang alak? Siempre, ang mga miembro lamang sang bag-o nga katipan, ukon ang mga may paglaum nga mapalangit, ang dapat nga magkaon sang tinapay kag mag-inom sang alak. Ang balaan nga espiritu sang Dios nagakumbinsi sa sini nga mga indibiduwal nga ginpili sila nga mangin mga hari sa langit. (Roma 8:16) Kaupod man sila ni Jesus sa katipan para sa Ginharian.—Lucas 22:29.

Kamusta naman ang mga may paglaum nga magkabuhi sing wala katapusan sa Paraiso sa duta? Ginatuman nila ang sugo ni Jesus kag nagatambong sila sa Panihapon sang Ginuo, pero wala sila nagakaon kag nagainom, kundi matinahuron nga nagatan-aw lamang. Kada tuig, pagtunod sang adlaw sa Nisan 14, ginaselebrar sang mga Saksi ni Jehova ang Panihapon sang Ginuo. Bisan pa pila ka libo na lang sa bilog nga kalibutan ang nagahambal nga sa langit ang ila paglaum, ini nga selebrasyon hamili sa tanan nga Cristiano. Isa ini ka okasyon diin makapamalandong ang tanan parte sa daku nga gugma ni Jehova nga Dios kag ni Jesucristo.—Juan 3:16.