Ngaa Ginatugutan sang Dios ang Kalautan kag Pag-antos?

1. Paano nagsugod ang kalautan?

Nagsugod ang kalautan sa duta sang ginhambal ni Satanas ang una nga kabutigan. Sang primero si Satanas perpekto nga anghel, pero “wala sia magpabilin sa kamatuoran.” (Juan 8:44) Ginhandum niya ang pagsimba nga para lamang sa Dios. Nagbutig si Satanas sa una nga babayi nga si Eva, kag ginsulay niya ang babayi nga sia ang tumanon sa baylo nga ang Dios. Ginbuylugan ni Adan si Eva nga supakon ang Dios. Ang desisyon ni Adan nagresulta sa pag-antos kag kamatayon.​—Basaha ang Genesis 3:1-6, 19.

Sang ginsulay ni Satanas si Eva nga supakon ang Dios, nagrebelde sia sa pagkasoberano sang Dios ukon sa posisyon sang Dios subong Labing Mataas. Ang kalabanan nga tawo nagbuylog kay Satanas sa pagsikway sa Dios bilang ila Manuggahom. Gani si Satanas ang nangin “manuggahom sang kalibutan.”​—Basaha ang Juan 14:30; 1 Juan 5:19.

2. May depekto bala ang mga tinuga sang Dios?

Ang tanan nga hinimuan sang Dios perpekto. Ang mga tawo kag mga anghel nga gintuga sang Dios may ikasarang sa pagtuman sa Dios sing bug-os. (Deuteronomio 32:4, 5) Gintuga kita sang Dios nga may kahilwayan sa pagpili kon bala himuon naton ang maayo ukon ang malain. Paagi sini nga kahilwayan, may kahigayunan kita nga mapakita ang aton gugma sa Dios.​—Basaha ang Santiago 1:13-15; 1 Juan 5:3.

3. Ngaa ginatugutan sang Dios ang pag-antos tubtob subong?

Sugod sang pagrebelde sa Eden, gintugutan ni Jehova ang pagrebelde sa iya pagkasoberano. Ngaa? Agod ipakita nga ang panikasog sa paggahom nga wala ang Dios indi makahatag sing kaayuhan sa mga tawo. (Manugwali 7:29; 8:9) Napamatud-an ini pagligad sang 6,000 ka tuig nga kasaysayan sang tawo. Wala nadula sang manuggahom nga mga tawo ang inaway, krimen, inhustisya, ukon ang balatian.​—Basaha ang Jeremias 10:23; Roma 9:17.

Sa pihak nga bahin, ang paggahom sang Dios makahatag sang kaayuhan sa mga nagabaton sini. (Isaias 48:17, 18) Sa indi madugay, dulaon ni Jehova ang tanan nga gobierno sang tawo. Ang mga nagapasakop lamang sa paggahom sang Dios ang makaistar sa duta.—Isaias 11:9.​—Basaha ang Daniel 2:44.

Tan-awa ang video nga Ngaa Ginapasugtan sang Dios ang Pag-antos?

4. Bangod mapinasensiahon ang Dios, ano nga kahigayunan ang ginahatag sini sa aton?

Nagsiling si Satanas nga wala sing tawo nga mag-alagad kay Jehova bangod lang sang ila gugma sa iya. Gusto mo bala pamatud-an nga kabutigan ina? Mahimo mo gid ini! Bangod sa pagkamapinasensiahon sang Dios, may kahigayunan kita nga ipakita kon bala dampig kita sa paggahom sang Dios ukon sa paggahom sang tawo. Ginapakita naton ang aton ginapili paagi sa aton pagkabuhi.​—Basaha ang Job 1:8-12; Hulubaton 27:11.

5. Paano naton mapakita nga ginapili naton ang Dios bilang Manuggahom?

Ginapili naton ang Dios bilang manuggahom paagi sa pagtuon kag pagpakigbahin sa matuod nga pagsimba nga nabase sa Pulong sang Dios, ang Biblia. (Juan 4:23) Ginasikway naton si Satanas bilang manuggahom kon indi kita makigbahin sa pulitika kag inaway, pareho sang ginhimo ni Jesus.​—Basaha ang Juan 17:14.

Ginagamit ni Satanas ang iya gahom agod palapnagon ang imoral kag makahalalit nga mga buhat. Kon sikwayon naton ini nga mga buhat, mahimo nga tamayon kita ukon pamatukan sang pila naton ka abyan kag paryente. (1 Pedro 4:3, 4) Gani dapat kita magpili. Makig-upod bala kita sa mga tawo nga nagahigugma sa Dios? Tumanon bala naton ang iya maalamon kag mahigugmaon nga mga kasuguan? Kon himuon naton ini, mapamatud-an naton nga butigon si Satanas sang nagsiling sia nga wala sing tawo nga magatuman sa Dios kon yara sa kabudlayan.​—Basaha ang 1 Corinto 6:9, 10; 15:33.

Ang gugma sang Dios sa mga tawo isa ka garantiya nga madula ang kalautan kag pag-antos. Ang mga nagatuo sa sini magakabuhi sing wala katapusan sa duta.​—Basaha ang Juan 3:16.