Paggamit sing Biblia sa Pagsabat

KON ginapamangkot tuhoy sa aton mga pagpati, sa aton dalanon sang pagkabuhi, sa aton pagtamod tuhoy sa bag-o nga mga hitabo sa palibot, sa aton paglaum sa palaabuton, ginapanikasugan naton nga gamiton ang Biblia sa pagsabat. Ngaa? Bangod amo ini ang Pulong sang Dios. Halin sa Biblia ang aton mga pagpati. Ginapasad naton sa Biblia ang aton dalanon sang pagkabuhi. Ginadihon sini ang aton pagtamod sa mga hitabo sa kalibutan. Ang aton paglaum sa palaabuton napasad sing malig-on sa inspirado nga mga saad sang Biblia.​—2 Tim. 3:​16, 17.

Nahibaluan gid naton ang salabton nga naangot sa aton ngalan. Kita mga Saksi ni Jehova. (Isa. 43:12) Gani ginasabat naton ang mga pamangkot, indi pasad sa tawhanon nga pilosopiya, kundi pasad sa ginasiling ni Jehova sa iya inspirado nga Pulong. Matuod, subong mga indibiduwal may mga opinyon kita tuhoy sa mga butang, apang ginatugutan naton nga dihunon sang Pulong sang Dios ang aton mga pagtamod bangod kumbinsido gid kita nga amo ini ang kamatuoran. Sa pagkamatuod, ang Biblia nagahatag sa aton sing kahilwayan sa pagpili kon ano ang aton naluyagan sa madamo nga butang. Sa baylo nga ipilit ang aton mga naluyagan sa iban, handum naton nga itudlo ang mga prinsipio nga yara sa Kasulatan, sa amo nagatugot sa aton mga tagpalamati nga gamiton ang amo man nga kahilwayan sa pagpili. Kaangay ni apostol Pablo, ginatinguhaan naton “nga palambuon ang pagkamatinumanon paagi sa pagtuo.”​—Roma 16:26.

Ginalaragway si Jesucristo sa Bugna 3:14 subong “ang matutom kag matuod nga saksi.” Paano niya ginsabat ang mga pamangkot kag gin-atubang ang mga kahimtangan nga ginpamangkot sa iya? Kon kaisa paagi sa paggamit sing mga ilustrasyon nga makapahunahuna sa mga tawo. Sa iban nga higayon paagi sa pagpamangkot sa tawo nga nagapamangkot tuhoy sa iya paghangop sa isa ka kasulatan. Masunson nga paagi sa pagkutlo sang mga kasulatan, pagbalikwat sa sini, ukon pagpatuhoy sa sini. (Mat. 4:3-10; 12:​1-8; Luc. 10:25-28; 17:32) Sang unang siglo, ang mga linukot nga Kasulatan masami nga ginatago sa mga sinagoga. Wala sing pamatuod nga may personal nga kopya sining mga linukot si Jesus, apang sunado niya ang Kasulatan kag ginapatuhuyan niya ini pirme kon nagatudlo sa iban. (Luc. 24:​27, 44-47) Makasiling gid sia nga ang iya ginatudlo indi sa iya kaugalingon. Ginapamulong niya ang iya nabatian sa iya Amay.​—Juan 8:26.

Handum naton nga sundon ang halimbawa ni Jesus. Wala naton mabatian sing personal nga nagahambal ang Dios, subong ni Jesus. Apang ang Biblia Pulong sang Dios. Kon ginagamit naton ini subong basihan sang aton mga sabat, ginalikawan naton nga masentro ang igtalupangod sa aton kaugalingon. Ginapakita naton nga sa baylo nga ipabutyag ang opinyon sang di-himpit nga tawo, determinado gid kita nga tugutan nga ang Dios ang magasiling sa kon ano ang kamatuoran.​—Juan 7:18; Roma 3:4.

Sa pagkamatuod, ang aton handum indi lamang ang paggamit sing Biblia kundi ang paghimo sini sa paagi nga mangin mapuslanon gid ini sa nagapamati sa aton. Luyag naton nga mamati sia upod ang bukas nga hunahuna. Depende sa panimuot sang tawo, mahimo mo mapaalinton ang mga panghunahuna sa Biblia paagi sa pagsiling: “Wala ka bala nagaugyon nga ang importante gid amo ang ginasiling sang Dios?” Ukon makasiling ka: “Nahibaluan mo bala nga ginabinagbinag mismo sa Biblia ini nga pamangkot?” Kon nagapakighambal ka sa isa nga wala nagatahod sa Biblia, sarang mo magamit ang medyo tuhay nga introduksion. Mahimo ka makasiling: “Tuguti ako nga ipaambit sa imo ining isa ka dumaan nga tagna.” Ukon mahimo ka magsiling: “Ang libro nga may pinakadamo nga sirkulasyon sa kasaysayan sang tawo nagasiling sini . . . ”

Sa pila ka kahimtangan, ayhan luyag mo nga balikwaton lamang ang isa ka teksto. Apang, kon posible, labing maayo nga buksan mismo ang Biblia kag basahon ang ginasiling sini. Ipakita sa imo kahambal ang kasulatan sa iya mismo kopya sang Biblia kon praktikal ini. Ining direkta nga paggamit sing Biblia masami nga may gamhanan nga epekto sa mga tawo.​—Heb. 4:12.

Ang Cristianong mga gulang may pinasahi nga responsabilidad sa paggamit sing Biblia kon nagasabat sang mga pamangkot. Ang isa sa mga kalipikasyon sa pag-alagad subong gulang amo nga ang utod nga lalaki “nagapanguyapot sing malig-on sa matutom nga pulong may kaangtanan sa iya arte sa pagpanudlo.” (Tito 1:9) Ayhan ang isa ka katapo sang kongregasyon magahimo sing serioso nga desisyon sa kabuhi pagkatapos nga malaygayan sang isa ka gulang. Daw ano ka importante nga ining laygay napasad sing malig-on sa Kasulatan! Ang halimbawa sang isa ka gulang sa paghimo sini makaimpluwensia sa madamo pa sa ila paagi sang pagpanudlo.