Epektibo nga Paggamit sing mga Pamangkot

BANGOD ang mga pamangkot nagakinahanglan sing sabat​—ginabungat man ini ukon sa hunahuna lamang—​nagabulig ini agod madalahig ang imo mga tagpalamati. Ang mga pamangkot makabulig sa imo sa pagsugod sing mga paghambalanay kag sa mapagsik nga pagbayluhanay sing mga panghunahuna. Subong humalambal kag manunudlo, mahimo ka maggamit sing mga pamangkot sa pagpukaw sing interes, sa pagbulig sa isa nga makapangatarungan sa isa ka topiko, ukon sa pagdugang sing empasis sa imo ginasiling. Kon ginagamit mo sing maayo ang mga pamangkot, ginapalig-on mo ang iban nga maghunahuna sing aktibo sa baylo nga mamati sing pasapayan. Maghunahuna sing isa ka tulumuron, kag magpamangkot sa paagi nga magabulig sa paglab-ot sini.

Sa Pagpalig-on Sang Paghambalanay. Kon nagapakigbahin ka sa ministeryo sa latagon, mangin alisto sa mga kahigayunan sa pagpalig-on sa mga tawo nga ipabutyag ang ila kaugalingon kon luyag nila.

Ginasugdan sang madamo nga Saksi ang makawiwili nga mga paghambalanay paagi lamang sa pagpamangkot sing, “Napaligban mo na bala . . . ?” Kon ginapili nila ang pamangkot nga ginahunahuna gid sang madamo nga tawo, pat-od nga may makalilipay sila nga tion sa ministeryo sa latagon. Bisan indi pa pamilyar ang tagbalay sa pamangkot, mahimo magapukaw ini sing pagkamausisaon. Ang nagkalainlain nga mga butang mahimo ipakilala paagi sa mga ekspresyon subong sang “Ano sa banta mo . . . ?,” “Ano sa pamatyag mo . . . ?,” kag “Nagapati ka bala . . . ?”

Sang nagpalapit ang ebanghelisador nga si Felipe sa isa ka Etiopianhon nga opisyal sa korte nga nagabasa sing matunog sang tagna ni Isaias, namangkot lamang si Felipe: “Nahibaluan mo gid bala [ukon, nahangpan mo bala] ang imo ginabasa?” (Binu. 8:30) Ini nga pamangkot naghatag sing kahigayunan kay Felipe nga ipaathag ang mga kamatuoran tuhoy kay Jesucristo. Nagagamit sing kaanggid nga pamangkot, nasalapuan sang pila ka modernong adlaw nga mga Saksi ang mga tawo nga nagahandum gid nga mahangpan sing maayo ang kamatuoran sang Biblia.

Kon mahatagan sila sing kahigayunan nga ipabutyag ang ila kaugalingon nga mga pagtamod, madamo nga tawo ang mahuyog pa sa pagpamati sa imo. Sa tapos makapamangkot, mamati sing maayo. Mangin mainayuhon sa baylo nga mamulayon sa pagbaton sing sabat sang tagbalay. Maghatag sing komendasyon kon mahimo mo ini sing sinsero. Sang isa ka okasyon, pagkatapos nga ang isa ka escriba “nagsabat sing maalamon,” gindayaw sia ni Jesus, nga nagsiling: “Indi ka malayo gikan sa Ginharian sang Dios.” (Mar. 12:34) Bisan pa indi pareho ang pagtamod mo sa imo kahambal, mahimo mo sia pasalamatan sa pagpabutyag niya sang iya kaugalingon. Paagi sa iya ginsiling mahimo mahibaluan mo ang panimuot nga kinahanglan mo binagbinagon sa pagpaambit sing kamatuoran sang Biblia sa iya.

Sa Pagpahibalo Sing Importante nga mga Panghunahuna. Kon nagapamulongpulong ka sa isa ka grupo ukon nagapakighambal sa isa ka tawo, tinguhai nga maggamit sing mga pamangkot nga magadul-ong sa importante nga mga panghunahuna. Pat-ura nga ang imo mga pamangkot nagadalahig sang mga butang nga interesado gid ang imo mga tagpalamati. Mahimo mo man gamiton ang mga pamangkot nga nagapukaw sing pagkamausisaon bangod indi gilayon maathag ang sabat. Kon magdulog ka sing makadali pagkatapos makapamangkot, mahimo nga magapamati ang imo mga tagpalamati nga may dugang nga interes sa kon ano ang masunod.

Sang isa ka okasyon, si manalagna Miqueas naggamit sing pila ka pamangkot. Pagkatapos mamangkot kon ano ang ginapaabot sang Dios sa mga nagasimba sa iya, ang manalagna nagpautwas sing apat pa ka pamangkot, ang kada isa nagalakip sang posible nga sabat. Ini tanan nga pamangkot nagabulig sa paghanda sa mga bumalasa agod mahangpan ang sabat nga ginhinakop niya sa sini nga bahin sang iya paghinun-anon. (Miq. 6:​6-8) Mahimo mo man bala ang kaangay sini kon nagapanudlo? Tilawi ini.

Sa Pagpangatarungan sa Isa ka Topiko. Ang mga pamangkot magamit man sa pagbulig sa iban nga mahangpan ang pangatarungan sa isa ka argumento. Sang naghatag sing isa ka serioso nga kapahayagan sa Israel, ginhimo ini ni Jehova, subong sang makita sa Malaquias 1:2-10. Una ginsilingan niya sila: “Ginhigugma ko kamo.” Wala nila mahangpan ini nga gugma, gani namangkot sia: “Indi bala si Esau utod ni Jacob?” Nian ginpatuhuyan ni Jehova ang nahapay nga kahimtangan sang Edom subong pamatuod nga bangod sang ila kalautan, wala ginhigugma sang Dios ina nga pungsod. Ginsundan niya ini sing mga ilustrasyon nga ginasal-utan sang mga pamangkot agod ipadaku ang kapaslawan sang Israel sa paghulag sing nagakaigo sa iya gugma. Ang pila sang mga pamangkot ginprase subong bala nga ang nagapamangkot amo ang di-matinumanon nga mga saserdote. Ang iban mga pamangkot nga ginpamangkot ni Jehova sa mga saserdote. Ang paghambalanay nagapukaw sing mga emosyon kag nagahupot sang aton igtalupangod; ang pangatarungan indi mabais; ang mensahe indi malipatan.

Ang pila ka humalambal epektibo nga nagagamit sang mga pamangkot sa kaanggid nga paagi. Bisan pa mahimo wala ginapaabot ang pagbungat sing sabat, nadalahig ang mga tagpalamati sa hunahuna, nga daw subong bala nagapakigbahin sila sa paghambalanay.

Kon nagadumala kita sing mga pagtuon sa Biblia, nagagamit kita sing isa ka metodo nga nagakinahanglan sang pagpakigbahin sang estudyante. Sa pagkamatuod, mas daku ang benepisyo kon ang estudyante nagasabat sa iya kaugalingon nga mga tinaga. Sa malulo nga paagi, maggamit sing dugang nga mga pamangkot agod mangatarungan upod sa estudyante. Sa yabi nga mga ideya, palig-una sia sa paggamit sing Biblia subong basihan sang iya sabat. Mahimo ka man mamangkot: “Paano ang aton ginahambalan naangot sa sining iban nga punto nga aton na natun-an? Ngaa importante ini? Paano ini dapat mag-apektar sang aton kabuhi?” Ini nga metodo mas epektibo sangsa pagpabutyag sang imo kaugalingon nga mga kombiksion ukon paghatag mo mismo sing dugang nga paathag. Sa sini nga paagi, ginabuligan mo ang estudyante nga gamiton ang iya “ikasarang sa pagpangatarungan” sa pagsimba sa Dios.​—Roma 12:1.

Kon indi mahangpan sang estudyante ang isa ka ideya, mangin mapailubon. Mahimo ginatinguhaan niya nga ipaanggid ang imo ginasiling sa kon ano ang iya ginapatihan sa sulod sang madamo nga tinuig. Ang pagpaathag sing topiko sa tuhay nga anggulo mahimo makabulig. Apang, kon kaisa, kinahanglan lamang ang tuman ka simple nga pagpangatarungan. Maggamit sing madamo nga Kasulatan. Maggamit sing mga ilustrasyon. Nalakip sa sini, maggamit sing simple nga mga pamangkot nga nagapalig-on sa tawo nga mangatarungan sa ebidensia.

Sa Pagpalig-on nga Ipabutyag ang Nasulod nga mga Balatyagon. Kon ginasabat sang mga tawo ang mga pamangkot, wala nila pirme ginapakita kon ano gid ang ila ginabatyag. Ginahatag lamang nila ang mga sabat nga sa pagbanta nila luyag mo. Kinahanglan ang paghantop. (Hulu. 20:5) Subong sang ginhimo ni Jesus, mahimo ka mamangkot: “Nagapati ka bala sa sini?”​—Juan 11:26.

Sang madamo nga disipulo ni Jesus ang nasaklaw sa iya ginsiling kag nagbiya sa iya, ginpalig-on ni Jesus ang iya mga disipulo nga ipabutyag kon ano ang ila ginabatyag. Namangkot sia: “Indi man ninyo luyag nga maghalin, indi bala?” Ginhambal ni Pedro ang ila mga balatyagon, nga nagasiling: “Ginuo, kay sin-o bala kami makadto? Ikaw may mga pulong sang kabuhi nga walay katapusan; kag nagtuo kami kag nahibaluan namon nga ikaw ang Balaan sang Dios.” (Juan 6:67-69) Sang isa pa ka okasyon, ginpamangkot ni Jesus ang iya mga disipulo: “Sin-o ang Anak sang tawo suno sa ginasiling sang mga tawo?” Ginpasundan niya ini sing isa ka pamangkot nga nagpalig-on sa ila nga ipabutyag kon ano ang yara sa ila mga tagipusuon. “Apang, kamo, sin-o bala ako suno sa ginasiling ninyo?” Sa pagsabat, si Pedro nagsiling: “Ikaw ang Cristo, ang Anak sang Dios nga buhi.”​—Mat. 16:13-16.

Kon nagadumala sang isa ka pagtuon sa Biblia, masapwan mo nga mapuslanon ang paggamit sing amo man nga paagi sa pila ka hulusayon. Mahimo ka mamangkot: “Paano ginatamod sang imo mga kabutho (ukon mga kaupod sa trabaho) ini nga butang?” Nian mahimo ka mamangkot: “Ano ang imo ginabatyag sa sini?” Kon mahibaluan mo ang matuod nga balatyagon sang isa ka tawo, posible nga makabulig gid ikaw sing daku subong manunudlo.

Sa Pagdugang Sing Empasis. Magamit man ang mga pamangkot sa pagdugang sing empasis sa mga ideya. Ginhimo ini ni apostol Pablo, subong sang nasulat sa Roma 8:​31, 32: “Kon ang Dios para sa aton, sin-o ang mangin batok sa aton? Sia nga wala magdingot bisan sang iya kaugalingon nga Anak kundi ginhatag sia para sa aton tanan, ngaa indi man niya mainayuhon nga ihatag sa aton ang tanan nga iban pa nga butang upod sa iya?” Talupangda nga, sa tagsa ka kaso, ang pamangkot nagapasangkad sang mga prase nga ginasundan sini.

Pagkatapos marekord ang paghukom ni Jehova batok sa hari sang Babilonia, si manalagna Isaias nagpabutyag sang malig-on nga kombiksion paagi sa pagdugang: “Si Jehova sang mga kasuldadusan nagpanugyan, kag sin-o ang makabungkag sa sini? Kag ang iya kamot nagauntay, kag sin-o ang makapakulo sini?” (Isa. 14:27) Sa kaundan mismo sini, ginapakita sini nga mga pamangkot nga ang ideya nga ginapabutyag indi mapanghiwala. Wala na sing sabat nga ginapaabot.

Sa Pagbuyagyag Sing Sayop nga Panghunahuna. Ang ginahunahuna sing maayo nga mga pamangkot epektibo man nga mga galamiton sa pagbuyagyag sing sayop nga panghunahuna. Antes gin-ayo ang isa ka tawo, ginpamangkot ni Jesus ang mga Fariseo kag ang pila ka eksperto sa Kasuguan: “Tugot bala ang pag-ayo sa adlaw nga inugpahuway ukon indi?” Pagkatapos mahimo ang pag-ayo, ginpasundan niya sing isa pa ka pamangkot: “Sin-o bala sa inyo, kon ang iya anak ukon toro nga baka mahulog sa bubon, ang indi gilayon magbatak sa iya sa adlaw nga inugpahuway?” (Luc. 14:​1-6) Wala sing sabat nga ginpaabot, kag wala man sing nagsabat. Ang mga pamangkot nagbuyagyag sang ila sayop nga panghunahuna.

Kon kaisa, bisan ang matuod nga mga Cristiano mahimo nga may sayop nga panghunahuna. Ang pila sa Corinto sang unang siglo nagdala sang ila mga kauturan sa korte agod husayon ang mga problema nga dapat nila kuntani husayon na lang sa tunga nila. Paano ginlubad ni apostol Pablo ini nga butang? Namangkot sia sing sunod-sunod prangka nga mga pamangkot agod pasibuon ang ila mga panghunahuna.​—1 Cor. 6:1-8.

Paagi sa paghanas, matun-an mo ang epektibo nga paggamit sing mga pamangkot. Apang, dumduma nga mangin matinahuron, ilabi na kon nagapakighambal sa mga tigulang, sa mga tawo nga indi mo kilala, kag sa mga may awtoridad. Gamita ang mga pamangkot sa pagpresentar sing kamatuoran sang Biblia sa makagalanyat nga paagi.