Kapitulo Trese

Kaluwasan kag Pagkasadya sa Idalom Sang Paggahom Sang Mesias

Isaias 11:1–12:6

1. Ilaragway ang espirituwal nga kahimtangan sang nakigkatipan nga katawhan sang Dios sang panahon ni Isaias.

SANG panahon ni Isaias, malain ang espirituwal nga kahimtangan sang nakigkatipan nga katawhan sang Dios. Bisan sa idalom sang paggahom sang matutom nga mga hari, subong nanday Uzzias kag Jotam, madamo sa katawhan ang nagsimba sa mataas nga mga duog. (2 Hari 15:1-4, 34, 35; 2 Cronica 26:1, 4) Sang maghari si Ezequias, ginkuha niya ang mga butang kag mga padugi nga may kaangtanan sa pagsimba kay Baal gikan sa pungsod. (2 Cronica 31:1) Indi katingalahan nga ginpalig-on ni Jehova ang iya katawhan nga magbalik sa iya kag nagpaandam tuhoy sa disiplina nga magaabot!

2, 3. Ano nga pagpalig-on ang ginhatag ni Jehova para sa ila nga nagahandum sa pag-alagad sa iya walay sapayan sang lapnag nga pagkadimatutom?

² Apang, indi tanan malaut nga mga rebelde. May matutom nga mga manalagna si Jehova, kag walay duhaduha nga may pila ka Judiyo nga nagpamati sa ila. May makalipay nga mga pulong si Jehova para sa ila. Sa tapos malaragway ang daku nga kalaglagan nga matabo sa Juda sa pagsalakay sang Asiria, gin-inspirar si manalagna Isaias sa pagsulat sing isa sang pinakamatahom nga mga dinalan sa bug-os nga Biblia, ang paglaragway sa mga pagpakamaayo nga magaabot sa idalom sang paggahom sang Mesias.a Ang iban nga mga bahin sining mga pagpakamaayo natuman sa diutay nga kasangkaron sang magbalik ang mga Judiyo gikan sa pagkabihag sa Babilonia. Apang ang tagna sa kabilugan may daku nga katumanan karon. Matuod, wala na makita ni Isaias kag sang iban pa nga matutom nga mga Judiyo sang panahon niya ining mga pagpakamaayo. Apang ginpaabot nila ini paagi sa pagtuo kag makita nila ang katumanan sang mga pulong ni Isaias sa tapos sang pagkabanhaw.—Hebreo 11:35.

³ Ang modernong-adlaw nga katawhan ni Jehova nagakinahanglan man sing pagpalig-on. Ang madasig magnubo nga mga prinsipio sa moral sa kalibutan, mapintas nga pagpamatok sa mensahe sang Ginharian, kag ang personal nga mga kaluyahon mabudlay gid para sa ila tanan. Ang makalilipay nga mga pulong ni Isaias tuhoy sa Mesias kag sa iya paggahom makapalig-on kag makabulig sa katawhan sang Dios sa pag-atubang sining mga kabudlayan.

Ang Mesias—Isa ka Sangkol nga Lider

4, 5. Ano ang gintagna ni isaias tuhoy sa pagkari sang Mesias, kag paano gin-aplikar ni Mateo ang mga pulong ni Isaias?

⁴ Mga siglo antes sang panahon ni Isaias, ginpatuhuyan na sang iban nga Hebreong mga manunulat sang Biblia ang pagkari sang Mesias, ang matuod nga Lider, nga ipadala ni Jehova sa Israel. (Genesis 49:10; Deuteronomio 18:18; Salmo 118:22, 26) Karon paagi kay Isaias, nagdugang si Jehova sing dugang pa nga mga detalye. Si Isaias nagsulat: “Magaguwa ang isa ka diutay nga sanga gikan sa tuod ni Jesse; kag gikan sa iya mga gamot mangin mabungahon ang isa ka tugdo.” (Isaias 11:1; ipaanggid ang Salmo 132:11.) Ang “sanga” kag “tugdo” lunsay nagapakita nga ang Mesias mangin kaliwat ni Jesse paagi sa iya anak nga si David, nga ginhaplasan sing lana subong hari sang Israel. (1 Samuel 16:13; Jeremias 23:5; Bugna 22:16) Kon mag-abot ang matuod nga Mesias, ini nga “tugdo,” gikan sa panimalay ni David, magapatubas sing maayong bunga.

⁵ Ang ginsaad nga Mesias amo si Jesus. Ang manunulat sang ebanghelyo nga si Mateo nagpatuhoy sa mga pulong sang Isaias 11:1 sang nagsiling sia nga ang pagtawag kay Jesus nga “Nazareno” nagtuman sang mga pulong sang mga manalagna. Bangod ginpadaku sia sa banwa sang Nazaret, gintawag si Jesus nga Nazareno, isa ka ngalan nga mahimo naangot sa Hebreong tinaga nga gingamit sa Isaias 11:1 para sa “tugdo.”b—Mateo 2:23, footnote; Lucas 2:39, 40.

6. Ano nga sahi sang manuggahom mangin amo ang gintagna nga Mesias?

⁶ Ano nga sahi sang manuggahom mangin amo ang Mesias? Mangin kaangay bala sia sang mapintas, batinggilan nga Asirianhon nga naglaglag sang napulo-ka-tribo nga naaminhan nga ginharian sang Israel? Sa pagkamatuod indi. Tuhoy sa Mesias, si Isaias nagsiling: “Magadulog sa iya ang espiritu ni Jehova, ang espiritu sang kaalam kag sang paghangop, ang espiritu sang laygay kag sang kusog, ang espiritu sang ihibalo kag sang kahadlok kay Jehova; kag magakalipay sia sa kahadlok kay Jehova.” (Isaias 11:2, 3a) Ang Mesias ginhaplasan, indi sing lana, kundi sing balaan nga espiritu sang Dios. Natabo ini sang ginbawtismuhan si Jesus, sang makita ni Juan Bautista ang balaan nga espiritu sang Dios nga nagkunsad kay Jesus sa porma sang isa ka salampati. (Lucas 3:22) Ang espiritu ni Jehova ‘nagdulog’ kay Jesus, kag ginpamatud-an niya ini sang naghikot sia nga may kaalam, paghangop, laygay, kusog, kag ihibalo. Daw ano kaayo nga mga kinaiya para sa isa ka manuggahom!

7. Ano ang ginsaad ni Jesus sa iya matutom nga mga sumulunod?

⁷ Ang mga sumulunod ni Jesus makabaton man sing balaan nga espiritu. Sa isa sang iya mga diskurso, si Jesus nagsiling: “Kon kamo, bisan pa malaut, makahibalo maghatag sing maayong mga dulot sa inyo mga anak, daw ano ka labaw pa nga ang Amay sa langit magahatag sing balaan nga espiritu sa mga nagapangayo sa iya!” (Lucas 11:13) Gani, indi gid kita mangalag-ag nga mangayo sa Dios sing balaan nga espiritu, ni mag-untat kita sa pagpalambo sang maayo nga mga bunga sini—“gugma, kalipay, paghidait, pagkamainantuson, pagkalulo, pagkaayo, pagtuo, pagkakalmado, pagpugong-sa-kaugalingon.” (Galacia 5:22, 23) Nanaad si Jehova nga sabton niya ang pagpangayo sang mga sumulunod ni Jesus sing “kaalam gikan sa hitaas” agod buligan sila nga malandas sing madinalag-on ang mga problema sa kabuhi.—Santiago 1:5; 3:17.

8. Paano si Jesus nakasapo sing kalipay sa kahadlok kay Jehova?

⁸ Ano nga kahadlok kay Jehova ang ginpakita sang Mesias? Si Jesus pat-od nga wala nahadlok sa Dios, nga basi pakamalauton sia. Sa baylo, ang Mesias may matinahuron nga pagkapunaw sa Dios, isa ka mahigugmaon nga pagpadungog sa iya. Ang mahinadlukon-sa-Dios nga tawo nagahandum pirme nga ‘himuon ang mga butang nga kalahamut-an sa iya,’ subong sang ginhimo ni Jesus. (Juan 8:29) Paagi sa pulong kag sa huwaran, si Jesus nagapanudlo nga wala sing daku pa nga kalipay sangsa maglakat kada adlaw nga may mapuslanon nga kahadlok kay Jehova.

Isa ka Matarong kag Maluluy-on nga Hukom

9. Ano nga huwaran ang ginahatag ni Jesus para sa ila nga ginagamit sa paghukom sa mga hulusayon sa Cristianong kongregasyon?

⁹ Gintagna ni Isaias ang dugang pa nga mga kinaiya sang Mesias: “Indi sia maghukom suno lamang sa nakita sang iya mga mata, ni magsabdong man suno lamang sa nabatian sang iya mga dulunggan.” (Isaias 11:3b) Kon dapat ikaw mag-atubang sa isa ka hukmanan, indi mo bala pagpasalamatan ang subong sina nga hukom? Sa iya palangakuan subong Hukom sang tanan nga katawhan, ang Mesias indi madala sang butig nga mga argumento, tuso nga mga taktika sa sulod sang hukmanan, mga huringhuring, ukon naguwa lamang nga mga butang, subong sang manggad. Mamutikan niya ang paglimbong kag wala sia nagatulok sa indi maayo nga panagway sa guwa, kay mahantop niya “ang tinago nga pagkatawo sang tagipusuon,” “ang natago nga tawo.” (1 Pedro 3:4, footnote) Ang superlatibo nga huwaran ni Jesus isa ka modelo para sa tanan nga ginagamit sa paghukom sa mga hulusayon sa Cristianong kongregasyon.—1 Corinto 6:1-4.

10, 11. (a) Sa anong paagi ginatadlong ni Jesus ang iya mga sumulunod? (b) Ano nga paghukom ang ihatag ni Jesus sa mga malauton?

¹⁰ Paano ang superlatibo nga mga kinaiya sang Mesias magaimpluwensia sa iya hudisyal nga mga desisyon? Si Isaias nagpaathag: “Sa pagkamatarong hukman niya ang mga kubos, kag sa katadlong magahatag sia sing pagsabdong tungod sa mga mahagop sang duta. Kag bunalon niya ang duta paagi sa bilugon sang iya baba; kag paagi sa espiritu sang iya mga bibig patyon niya ang malauton. Kag ang pagkamatarong mangin wagkus sang iya hawak, kag ang katutom mangin wagkus sang iya mga balikawang.”—Isaias 11:4, 5.

¹¹ Kon ang iya mga sumulunod dapat tadlungon, ginahimo ini ni Jesus sa isa ka paagi nga makabenepisyo sila sing labi gid—isa ka maayo gid nga huwaran para sa Cristianong mga gulang. Sa pihak nga bahin, ang mga nagabuhat sing kalautan makapaabot sing matigdas nga paghukom. Kon makighusay na ang Dios batok sa sining sistema sang mga butang, ‘bunalon [sang Mesias] ang duta’ paagi sa iya may awtoridad nga tingog, nga nagabungat sing malaglagon nga paghukom para sa tanan nga malauton. (Salmo 2:9; ipaanggid ang Bugna 19:15.) Sa ulihi, wala na sing mabilin nga malauton nga mga tawo nga magatublag sa kalinong sang katawhan. (Salmo 37:10, 11) Si Jesus, nga ang iya hawak kag mga balikawang nawagkusan sing pagkamatarong kag pagkamatutom, may gahom sa paghimo sini.—Salmo 45:3-7.

Nagbag-o nga mga Kahimtangan sa Duta

12. Ano ang mahimo nga ginakabalak-an sang isa ka Judiyo sang ginabinagbinag niya ang pagbalik gikan sa Babilonia padulong sa Ginsaad nga Duta?

¹² Handurawa ang isa ka Israelinhon nga bag-o lang makabati sang sugo ni Ciro nga pabalikon ang mga Judiyo sa Jerusalem kag patindugon liwat ang templo. Biyaan bala niya ang malig-on nga kahimtangan sa Babilonia agod himuon ang malawig nga paglakbay pauli sa Jerusalem? Sa sulod sang 70 ka tuig nga wala ang mga Israelinhon, ang wala maatipan nga mga latagon gintubuan sang mga talungon. Ang mga lobo, mga leopardo, mga leon, kag mga oso hilway karon nga nagalagawlagaw sa sadtong mga latagon. Ginpuy-an man ini sang mga kobra. Ang magapauli nga mga Judiyo dapat magkaon sing sinagod nga mga sapat agod mabuhi—ang mga panong sang mga karnero kag mga baka magaaman sing gatas, de-lana, kag karne, kag ang mga toro amo ang magaguyod sang arado. Matukob ayhan sila sang manunukob nga mga sapat? Kagton ayhan sang mga man-ug ang diutay nga kabataan? Kamusta naman ang katalagman nga basi lambatan sila sa tion sang ila paglakbay?

13. (a) Anong makalilipay nga larawan ang ginlaragway ni Isaias? (b) Paano naton nahibaluan nga ang paghidait nga ginlaragway ni Isaias nagadalahig sing kapin pa sa kalig-unan gikan sa mapintas nga mga sapat?

¹³ Ginlaragway karon ni Isaias ang isa ka makalilipay nga larawan sang mga kahimtangan nga paluntaron sang Dios sa pungsod. Sia nagsiling: “Ang lobo magapuyo kaupod sang lalaki nga kordero sa makadali, kag ang leopardo magahigda kaupod sang kanding nga tinday, kag ang tinday nga baka kag ang may bungaybungay nga leon nga totoy kag ang pinatambok nga sapat magatingob; kag isa lamang ka bata ang magatuytoy sa ila. Kag ang baka kag ang oso magahalab; ang ila mga tinday magahigda nga magkaupod. Kag bisan ang leon magakaon sing dagami kaangay sang toro. Kag ang bata nga nagasuso magahampang sa buho sang kobra; kag ang nalutas nga bata magakuot sang iya kamot sa lulutsan sang kapawa sang man-ug nga dalitan. Indi sila magahimo sing bisan ano nga halit ukon magatuga sing bisan ano nga kagulub-an sa bug-os ko nga bukid nga balaan; bangod ang duta pat-od gid nga matugob sang ihibalo ni Jehova subong sang tubig nga nagatabon sa dagat.” (Isaias 11:6-9) Indi bala makatalandog ining mga pulong? Talupangda nga ang paghidait nga ginlaragway diri resulta sang ihibalo ni Jehova. Busa, indi lamang ang kaluwasan gikan sa mga sapat nga mapintas ang nadalahig. Ang ihibalo ni Jehova indi magapabag-o sa mga sapat, apang magaapektar ini sa mga tawo. Sa ila paglakbay pauli ni sa ila napasag-uli nga duta indi dapat kahadlukan sang mga Israelinhon ang mga sapat nga mapintas ukon ang tulad-sapat nga mga tawo.—Esdras 8:21, 22; Isaias 35:8-10; 65:25.

14. Ano ang daku pa nga katumanan sang Isaias 11:6-9?

¹⁴ Apang, may daku pa nga katumanan ini nga tagna. Sang 1914, si Jesus, nga Mesias, ginpalingkod sa trono sa langitnon nga Bukid Sion. Sang 1919 ang nagkalabilin sang “Israel sang Dios” ginhilway gikan sa Babiloniko nga pagkabihag kag nagpakigbahin sa pagpasag-uli sang matuod nga pagsimba. (Galacia 6:16) Subong resulta, nabuksan ang dalan para sa modernong-adlaw nga katumanan sang tagna ni Isaias tuhoy sa Paraiso. Ang “sibu nga ihibalo,” ang ihibalo ni Jehova, nagpabag-o sang mga personalidad. (Colosas 3:9, 10) Ang mga tawo nga masingki anay nangin mahidaiton. (Roma 12:2; Efeso 4:17-24) Ining mga hitabo nag-apektar karon sa minilyon bangod ang tagna ni Isaias nagalakip sa madasig magdamo nga mga Cristiano nga may dutan-on nga paglaum. (Salmo 37:29; Isaias 60:22) Nakatuon ini sila nga paabuton ang tion nga ang bug-os nga duta ipasag-uli subong isa ka may kalig-unan, malinong nga paraiso, suno sa orihinal nga katuyuan sang Dios.—Mateo 6:9, 10; 2 Pedro 3:13.

15. Makatarunganon bala nga magpaabot kita nga ang mga pulong ni Isaias literal nga matuman sa bag-ong kalibutan? Ipaathag.

¹⁵ Sa sinang napasag-uli nga Paraiso, may dugang pa bala, ayhan mas literal nga katumanan, ang tagna ni Isaias? Daw makatarunganon nga hunahunaon ini. Ang tagna nagahatag sa tanan nga magakabuhi sa idalom sang paggahom sang Mesias sing pareho man nga pasalig nga ginhatag sini anay sa nagbalik nga mga Israelinhon; sila kag ang ila mga anak wala sing dapat kahadlukan nga halit gikan sa bisan ano—tawo man ukon sapat. Sa idalom sang paggahom sang Mesias sa Ginharian, ang tanan nga pumuluyo sang duta makatigayon sing malinong nga mga kahimtangan kaangay sang natigayon sadto ni Adan kag ni Eva sa Eden. Sa pagkamatuod, wala ginasugid sang Kasulatan ang tanan nga detalye kon ano sadto ang pagkabuhi sa Eden—ukon kon mangin ano ini sa Paraiso. Apang, makasalig kita, nga sa idalom sang maalamon kag mahigugmaon nga paggahom ni Hari Jesucristo, ang tanan nga butang mangin subong sang nagakadapat gid.

Ang Putli nga Pagsimba Ginpasag-uli Paagi sa Mesias

16. Ano ang nagtindog subong isa ka sinyales para sa katawhan sang Dios sang 537 B.C.E.?

¹⁶ Ang putli nga pagsimba una nga ginsalakay sa Eden sang nagmadinalag-on si Satanas nga impluwensiahan si Adan kag si Eva sa paglalis kay Jehova. Tubtob karon, wala pa gihapon mangampo si Satanas sa iya tulumuron nga patalikuron sa Dios ang madamo nga masarangan niya. Apang indi gid magtugot si Jehova nga madula ang putli nga pagsimba sa duta. Nadalahig ang iya ngalan, kag ginaulikdan niya ang mga nagaalagad sa iya. Gani, paagi kay Isaias naghatag sia sing isa ka talalupangdon nga saad: “Mahanabo sa amo nga adlaw nga ang gamot ni Jesse magatindog subong isa ka sinyales para sa katawhan. Sa iya bisan ang mga pungsod magaliso agod maghisayod, kag ang iya palahuwayan mangin mahimayaon.” (Isaias 11:10) Sadto sang 537 B.C.E., ang Jerusalem, ang siudad nga ginhimo ni David nga kapital sang pungsod, nangin isa ka sinyales, nga nagpahibalo sa matutom nga nagkalabilin sang nag-alaplaag nga mga Judiyo nga magbalik kag patindugon liwat ang templo.

17. Paano si Jesus ‘nagbangon agod maggahom sa mga pungsod’ sang nahauna nga siglo kag sa aton panahon?

¹⁷ Apang, kapin pa sa sina ang ginapatuhuyan sang tagna. Subong sang napatalupangod na, ginapatuhuyan sini ang paggahom sang Mesias, ang isa ka matuod nga Lider para sa katawhan sang tanan nga pungsod. Ginbalikwat ni apostol Pablo ang Isaias 11:10 agod ipakita nga ang katawhan sang mga pungsod sang panahon niya makatigayon sing duog sa Cristianong kongregasyon. Sa pagbalikwat sang badbad sang Septuagint sining bersikulo, sia nagsulat: “Si Isaias nagasiling: ‘Magaabot ang gamot ni Jesse, kag may isa nga magabangon agod maggahom sa mga pungsod; sa iya ipahamtang sang mga pungsod ang ila paglaum.’” (Roma 15:12) Dugang pa, ang tagna nagalab-ot sa malayo pa—tubtob sa aton adlaw nga ang katawhan sang mga pungsod nagapakita sang ila gugma kay Jehova paagi sa pagsakdag sa hinaplas nga kauturan sang Mesias.—Isaias 61:5-9; Mateo 25:31-40.

18. Sa aton adlaw, paano si Jesus nangin isa ka sinyales?

¹⁸ Sa modernong-adlaw nga katumanan, ‘ina nga adlaw’ nga ginpatuhuyan ni Isaias nagsugod sang ang Mesias ginpalingkod sa trono subong Hari sa langitnon nga Ginharian sang Dios sang 1914. (Lucas 21:10; 2 Timoteo 3:1-5; Bugna 12:10) Kutob sadto, si Jesucristo nangin isa ka maathag nga sinyales, isa ka patimaan, para sa espirituwal nga Israel kag sa katawhan sang tanan nga pungsod nga nalangkag sa matarong nga panguluhan. Sa idalom sang pagtuytoy sang Mesias, ang maayong balita sang Ginharian ginadala sa tanan nga pungsod, subong sang gintagna ni Jesus. (Mateo 24:14; Marcos 13:10) Ining maayong balita may gamhanan nga epekto. “Ang isa ka dakung kadam-an nga wala sing tawo nga makaisip, gikan sa tanan nga pungsod” nagapasakop sa Mesias paagi sa pagbuylog sa hinaplas nga nagkalabilin sa putli nga pagsimba. (Bugna 7:9) Samtang padayon nga nagasulod ang madamo nga bag-uhan agod makig-upod sa nagkalabilin sa espirituwal nga “balay nga palangamuyuan” ni Jehova, nagadugang sila sing himaya sa “palahuwayan” sang Mesias, ang daku nga espirituwal nga templo sang Dios.—Isaias 56:7; Hageo 2:7.

Ang Nahiusa nga Katawhan Nagaalagad kay Jehova

19. Sa anong duha ka okasyon ginpasag-uli ni Jehova ang nagkalabilin sang iya katawhan nga nalapta sa bug-os nga duta?

¹⁹ Nian ginpahanumdom ni Isaias ang mga Israelinhon nga si Jehova nag-aman anay sing kaluwasan para sa ila sang ang pungsod ginpigos sang isa ka gamhanan nga kaaway. Ina nga bahin sang maragtas sang Israel—ang paghilway ni Jehova sa pungsod gikan sa pagkabihag sa Egipto—ginpakabahandi sang tanan nga matutom nga Judiyo. Si Isaias nagsulat: “Mahanabo sa amo nga adlaw nga idaho liwat ni Jehova ang iya kamot, sa ikaduha nga tion, agod kuhaon ang nagkalabilin sang iya katawhan nga nabilin gikan sa Asiria kag gikan sa Egipto kag gikan sa Patros kag gikan sa Cus kag gikan sa Elam kag gikan sa Sinar kag gikan sa Hamat kag gikan sa kapuluan sang dagat. Kag pat-od nga magabayaw sia sing isa ka sinyales para sa mga pungsod kag tipunon niya ang mga naglinapta gikan sa Israel; kag ang mga nag-alaplaag gikan sa Juda tipunon niya gikan sa apat ka ukbong sang duta.” (Isaias 11:11, 12) Subong nga daw ginauyatan sila, tuytuyan ni Jehova ang matutom nga nagkalabilin sa Israel kag Juda gikan sa mga pungsod nga ila ginlaptahan kag dalhon sila pauli nga luwas sa katalagman. Sa diutay nga paagi, natabo ini sang 537 B.C.E. Apang, daw ano ka mahimayaon pa ang daku nga katumanan! Sang 1914, ginbayaw ni Jehova ang ginpalingkod sa trono nga si Jesucristo subong “isa ka sinyales para sa mga pungsod.” Kutob sang 1919 ang mga nagkalabilin sang “Israel sang Dios” nagsugod sa pagpanong sa sini nga sinyales, nga nalangkag sa pagpakigbahin sa putli nga pagsimba sa idalom sang Ginharian sang Dios. Ining tumalagsahon nga espirituwal nga pungsod ‘naghalin gikan sa tagsa ka tribo kag hambal kag katawhan kag pungsod.’—Bugna 5:9.

20. Ano nga paghiusa ang maagom sang katawhan sang Dios sa pagbalik nila gikan sa Babilonia?

²⁰ Ginlaragway karon ni Isaias ang paghiusa sang napasag-uli nga pungsod. Nagapatuhoy sa naaminhan nga ginharian subong Efraim kag sa nabagatnan nga ginharian subong Juda, sia nagsiling: “Ang kahisa sang Efraim madula, kag bisan ang mga nagadumot sa Juda papason. Ang Efraim indi magkahisa sa Juda, ni ang Juda magdumot sa Efraim. Kag magalupad sila sa abaga sang mga Filistinhon sa katundan; magkaupod nga atihon nila ang mga anak sang Sidlangan. Untayon nila ang ila kamot sa Edom kag Moab, kag ang mga anak ni Ammon mangin mga sakop nila.” (Isaias 11:13, 14) Kon magbalik ang mga Judiyo gikan sa Babilonia, indi na sila pagtungaon sa duha ka pungsod. Ang mga katapo sang tanan nga tribo sang Israel magabalik nga nahiusa sa ila duta. (Esdras 6:17) Indi na sila magpakita sing paghinakit kag kaawayon sa isa kag isa. Subong isa ka nahiusa nga katawhan, magahimo sila sing isa ka madaugon nga pagtindog batok sa ila mga kaaway sa palibot nga mga pungsod.

21. Paano ang paghiusa sang katawhan sang Dios karon talalupangdon gid?

²¹ Ang labi pa nga makapahamuot sa gihapon amo ang paghiusa sang “Israel sang Dios.” Sa sulod sang halos 2,000 ka tuig, ang 12 ka simbuliko nga tribo sang espirituwal nga Israel nagaagom sing paghiusa pasad sa gugma sa Dios kag sa ila espirituwal nga mga kauturan. (Colosas 3:14; Bugna 7:4-8) Sa karon, ang katawhan ni Jehova—ang espirituwal nga mga Israelinhon kag sila nga may dutan-on nga paglaum—nagaagom sing paghidait kag bug-os kalibutan nga paghiusa sa idalom sang paggahom sang Mesias, mga kahimtangan nga wala sa mga relihion sang Cristiandad. Ang mga Saksi ni Jehova nagapresentar sing nahiusa nga espirituwal nga tindog batok sa mga panikasog ni Satanas nga tublagon ang ila pagsimba. Subong nahiusa nga katawhan, ginatuman nila ang komisyon ni Jesus nga ibantala kag itudlo ang maayong balita sang Ginharian sang Mesias sa tanan nga pungsod.—Mateo 28:19, 20.

Malandas ang mga Balagbag

22. Paano ni Jehova ‘utdon ang dila sang dagat sang Egipto’ kag “iwarawara ang iya kamot sa Suba”?

²² Madamo sing balagbag, literal kag malaragwayon, agod balabagan ang pagbalik sang mga Israelinhon gikan sa pagkabihag. Paano ini malandas? Si Isaias nagsiling: “Pat-od nga utdon ni Jehova ang dila sang dagat sang Egipto, kag iwarawara ang iya kamot sa Suba sa kainit sang iya espiritu. Kag sakiton niya ini sa pito ka iligan sini, kag palakton niya ang mga tawo nga nasul-ob ang ila mga sandalyas.” (Isaias 11:15) Si Jehova ang magakuha sang tanan nga balagbag sa pagbalik sang iya katawhan. Bisan gani ang balagbag nga subong ka makahaladlok sa dila sang Mapula nga Dagat (subong sang Gulpo sang Suez) ukon daw indi matabok subong sang daku nga Suba sang Eufrates pamalhon, sa malaragwayon nga hambal, agod ang isa ka tawo makatabok nga indi na kinahanglan nga ubahon pa ang iya mga sandalyas!

23. Sa anong paagi may magalutaw nga “isa ka daku nga dalan gikan sa Asiria”?

²³ Sang panahon ni Moises, ginhanda ni Jehova ang dalan agod ang Israel makapalagyo gikan sa Egipto kag magmartsa pasulod sa Ginsaad nga Duta. Himuon man niya ang subong sini karon: “Dapat nga may isa ka daku nga dalan gikan sa Asiria para sa nagkalabilin sang iya katawhan nga mabilin, kon paano nga may dira sa Israel sang adlaw sang pagguwa niya gikan sa duta sang Egipto.” (Isaias 11:16) Tuytuyan ni Jehova ang magabalik nga mga bihag nga subong bala daw nagalakat sila sa isa ka daku nga dalan gikan sa duog nga gintapok sila padulong sa ila dutang natawhan. Ang mga manugpamatok magatinguha sa pagpugong sa ila, apang ang ila Dios, si Jehova, magaupod sa ila. Ang hinaplas nga mga Cristiano kag ang ila mga kaupod karon mapintas man nga ginasalakay, apang maisugon nga nagapadayon sila! Nagguwa sila gikan sa modernong Asiria, ang kalibutan ni Satanas, kag ginabuligan nila ang iban nga himuon man ini. Nahibaluan nila nga ang putli nga pagsimba magamadinalag-on kag magauswag. Indi ini hilikuton sang tawo, kundi iya sang Dios.

Walay Katapusan nga Pagkasadya Para sa mga Sakop Sang Mesias!

24, 25. Ano nga pagpabutyag sing pagdayaw kag pasalamat ang isinggit sang katawhan ni Jehova?

²⁴ Sa malipayon nga mga pulong ginlaragway karon ni Isaias ang paghugyaw sang katawhan ni Jehova bangod sang katumanan sang Iya pulong: “Sa amo nga adlaw pat-od nga magasiling ka: ‘Pasalamatan ko ikaw, O Jehova, kay bisan pa naakig ka sa akon, ang imo kaakig nadula sang ulihi, kag ginlipay mo ako.’” (Isaias 12:1) Ang pagdisiplina ni Jehova sa iya batinggilan nga katawhan matigdas. Apang natuman sini ang katuyuan sini nga ayuhon ang kaangtanan sang pungsod sa iya kag ipasag-uli ang putli nga pagsimba. Ginpasalig ni Jehova ang iya matutom nga mga sumilimba nga sa ulihi luwason niya sila. Indi katingalahan nga nagpabutyag sila sing apresasyon!

²⁵ Ang pagsalig sang ginpasag-uli nga mga Israelinhon kay Jehova may pamatuod gid, kag sila nagsinggit: “‘Yari karon! Ang Dios amo ang akon kaluwasan. Magasalig ako kag indi magkahadlok; kay si Jah Jehova amo ang akon kusog kag akon gahom, kag sia ang nangin akon kaluwasan.’ May paghugyaw nga magasag-ub gid kamo sing tubig gikan sa mga tuburan sang kaluwasan.” (Isaias 12:2, 3) Ang Hebreong tinaga nga ginbadbad nga “gahom” sa bersikulo 2 mabasa nga “kadayawan” sa Septuagint nga bersion. Ang mga sumilimba nagasinggit sa ambahanon bangod sang kaluwasan gikan kay “Jah Jehova.” Subong isa ka pinalip-ot nga porma sang ngalan nga Jehova, ang “Jah” ginagamit sa Biblia sa pagpaalinton sing daku nga pagbatyag sing pagdayaw kag pasalamat. Ang paggamit sing ekspresyon nga “Jah Jehova”—ginadoble ang balaan nga ngalan—nagapadaku sang kabaskugon sang pagdayaw sa Dios sa isa ka mataas pa nga kataason.

26. Sin-o karon ang nagapahibalo sa tunga sang mga pungsod sang mga pagpakig-angot sang Dios?

²⁶ Indi matago sang matuod nga mga sumilimba ni Jehova ang ila kalipay. Si Isaias nagtagna: “Sa amo nga adlaw magasiling gid kamo: ‘Magpasalamat kamo kay Jehova! Magpanawag kamo sa iya ngalan. Ipahayag sa katawhan ang iya mga pagpakig-angot. Sambita ninyo nga ang iya ngalan ginpakataas. Mag-amba kamo kay Jehova, kay naghimo sia sing dalayawon nga mga butang. Ginapahibalo ini sa bug-os nga duta.’” (Isaias 12:4, 5) Kutob sang 1919, ang hinaplas nga mga Cristiano—sang ulihi upod sa bulig sang ila “iban nga mga karnero” nga mga kaupod—‘nagpahayag sing lapnag sang pagkahalangdon sang isa nga nagtawag sa ila gikan sa kadudulman pakadto sa iya makatilingala nga kapawa.’ Sila isa ka “pinili nga kaliwatan, . . . balaan nga pungsod” para sa sining katuyuan. (Juan 10:16; 1 Pedro 2:9) Ginapahayag sang mga hinaplas nga ang balaan nga ngalan ni Jehova ginapakataas kag nagapakigbahin sila sa pagpahibalo sini sa bug-os nga duta. Ginapangunahan nila ang tanan nga sumilimba ni Jehova sa pagkasadya sa iya aman para sa ila kaluwasan. Subong ini sang gintuaw ni Isaias: “Magsinggit ka sing mabaskog kag magsinggit sa kalipay, O ikaw nga babayi nga nagapuyo sa Sion, kay daku sa tunga nimo ang Isa nga Balaan sang Israel”! (Isaias 12:6) Ang Isa nga Balaan sang Israel amo si Jehova nga Dios mismo.

Magtulok sa Palaabuton nga May Pagsalig!

27. Samtang ginahulat ang katumanan sang ila paglaum, ano ang pagsalig sang mga Cristiano?

²⁷ Minilyon karon ang nagpanong sa “sinyales para sa katawhan”—si Jesucristo nga nagalingkod sa trono sa Ginharian sang Dios. Nagakalipay sila nga mangin sakop sina nga Ginharian kag nakunyag sila nga nakilala nila si Jehova nga Dios kag ang iya Anak. (Juan 17:3) Nagabatyag sila sing daku nga kalipay sa ila nahiusa nga Cristianong paghiliupod kag nagatinguha sing lakas nga tipigan ang paghidait nga amo ang tanda sang matuod nga mga alagad ni Jehova. (Isaias 54:13) Kumbinsido nga si Jah Jehova isa ka Dios nga nagatuman sang iya mga saad, may pagsalig sila sa ila ginalauman kag nagakalipay gid sila nga ipaambit ini sa iban. Kabay nga padayon nga gamiton sang tagsa ka sumilimba ni Jehova ang bug-os niya nga kusog sa pag-alagad sa Dios kag sa pagbulig sa iban nga himuon man ini. Kabay nga ipatudok sa tagipusuon sang tanan ang mga pulong ni Isaias kag magkasadya sa kaluwasan paagi sa Mesias ni Jehova!

[Mga nota]

[Mga retrato sa pahina 158]

Ang Mesias amo ang “sanga” gikan kay Jesse, paagi kay Hari David

[Retrato sa pahina 162]

[Retrato sa pahina 170]

Ang Isaias 12:4, 5, suno sa makita sa Dead Sea Scrolls (May marka ang ngalan sang Dios)