Ano ang Sekreto Agod Mangin Malipayon ang Pamilya?

ANG GINASILING SANG BIBLIA

“Malipayon ang mga nagapamati sa pulong sang Dios kag nagatuman sini!”—Lucas 11:28, Bag-ong Kalibutan nga Badbad.

ANO ANG MABULIG SINI SA IMO?

Mabatyagan mo ang matuod nga gugma.—Efeso 5:28, 29.

Matigayon mo ang tudok nga pagtahod.—Efeso 5:33.

Mabatyagan mo ang matuod nga seguridad.—Marcos 10:6-9.

MAPATIHAN GID BALA NATON ANG GINASILING SANG BIBLIA?

Huo, ari ang duha ka rason:

• Ang Dios amo ang ginhalinan sang pamilya. Ang Biblia nagasiling nga “utang sang tanan nga pamilya . . . ang ngalan sini” kay Jehova nga Dios. (Efeso 3:14, 15) Buot silingon, yara ang pamilya bangod ginhimo ini ni Jehova. Ngaa importante nga mahibaluan ini?

  Binagbinaga: Kon nanamitan ka sang ginkaon mo kag gusto mo mahibaluan kon ano ang mga panakot sini, sin-o ang pamangkuton mo? Siempre ang nagluto.

  Sing kaanggid, agod mahibaluan mo ang sekreto sang malipayon nga pamilya, dapat mo pamangkuton si Jehova, ang naghimo sang patakaran sa pamilya.—Genesis 2:18-24.

• Ang Dios nagakabalaka sa imo. Maalamon nga ang mga pamilya magpagiya kay Jehova paagi sa iya Pulong. Ngaa? Bangod “nagaulikid sia sa inyo.” (1 Pedro 5:6, 7) Gusto gid ni Jehova nga mangin maayo ang imo sitwasyon—kag makabulig gid ang iya laygay!—Hulubaton 3:5, 6; Isaias 48:17, 18.