Nabuhi ang Bata nga Babayi!

Nakita ni Jairo nga gin-ayo ni Jesus ang babayi nga ginatagasan sing dugo. Gani makabulig gid si Jesus sa iya dalagita, bisan pa sa banta niya ‘sa karon ang iya anak nga babayi mahimo nga patay na.’ (Mateo 9:18) Posible pa bala nga mabuligan sia?

Samtang nagahambal pa si Jesus sa babayi nga gin-ayo niya, ang pila ka lalaki halin sa balay ni Jairo nag-abot kag nagsiling sa iya: “Ang imo anak nga babayi patay na!” Nagsiling pa sila: “Ngaa tublagon mo pa ang Manunudlo?”—Marcos 5:35.

Masubo gid nga balita! Ini nga tawo, nga ginatahod gid sa komunidad, wala na sing mahimo. Patay na ang iya bugtong nga anak. Pero sang mabatian ni Jesus ang balita, ginpalig-on niya si Jairo: “Indi ka magkahadlok, magtuo ka lang.”—Marcos 5:36.

Gin-updan dayon ni Jesus si Jairo sa ila balay. Sang nag-abot sila, nakita nila nga nagakinagula ang mga tawo. Nagahinibi sila kag nagahaya, kag nagapukpok sang ila kaugalingon sa kasubo. Nagsulod si Jesus kag nakibot sila sa iya ginhambal: “Ang bata wala mapatay, kundi nagakatulog lang.” (Marcos 5:39) Ginkadlawan nila si Jesus pagkabati nila sini. Nahibaluan nila nga patay na ang bata. Pero paagi sa paggamit sang gahom nga ginhatag sang Dios, ipakita ni Jesus nga posible nga mabanhaw ang mga tawo nga pareho lang nga ginpukaw sila sa mahamuok nga katulugon.

Ginpagua ni Jesus ang tanan magluwas lang kanday Pedro, Santiago, Juan, kag ang mga ginikanan sang napatay nga bata. Gin-upod sila nga lima ni Jesus sa ginahamyangan sang bata. Gin-uyatan niya sa kamot ang bata kag nagsiling: “‘Talʹi·tha cuʹmi,’ nga kon badbaron: ‘Inday, nagasiling ako sa imo, “Bangon ka!”’” (Marcos 5:41) Nagbangon sia dayon kag naglakat. Hunahunaa ang kalipay ni Jairo kag sang iya asawa! Bilang pamatuod pa gid nga buhi ang bata, ginsugo ni Jesus nga pakan-on sia.

Antes sini, ginsugo ni Jesus ang iya ginpang-ayo nga indi pag-isugid ang iya ginhimo, kag amo man sini ang iya ginsiling sa mga ginikanan. Pero ang nalipay nga mga ginikanan kag ang iban pa nagpalapnag sang balita “sa bug-os nga rehiyon.” (Mateo 9:26) Indi bala nga malipay ka man magsugid kon makita mo nga ginbanhaw ang imo hinigugma? Amo ini ang ikaduha nga pagbanhaw ni Jesus.