Mga Reperensia Para sa Pagkabuhi kag Pagministeryo nga Workbook Para sa Miting
DISIEMBRE 3-9
MGA BAHANDI SA PULONG SANG DIOS | BINUHATAN 9-11
“Ang Mapintas nga Manughingabot Nangin Makugi nga Saksi”
(Binuhatan 9:1, 2) Apang akig gihapon si Saulo sa mga disipulo sang Ginuo kag luyag gid niya nga pamatyon sila tanan. Nagkadto sia sa mataas nga saserdote 2 kag ginpangabay niya sia nga sulatan ang mga sinagoga sa Damasco. Ini nga mga sulat naghatag sing awtoridad sa iya nga dakpon kag dalhon sa Jerusalem ang bisan sin-o nga lalaki kag babayi nga katapo sang Ang Dalan.
Ang Kongregasyon “Nakaagom sang Isa ka Panag-on sang Kalinong”
MALAPIT na sa Damasco ang serioso sing nawong nga mga manuglakbay nga may malain nga plano. Kuhaon nila ang mga disipulo ni Jesus sa ila mga puluy-an, panggapuson, pakahuy-an, kag ganuyon pa Jerusalem agod mag-atubang sa akig nga Sanhedrin.
2 Ang lider sining grupo nga si Saulo may salabton na sa dugo. Kasan-o lang nga nahamuot sia sa pagtan-aw samtang ginabato sang iya mga kaupod nga panatiko si Esteban, isa ka debotado nga disipulo ni Jesus. (Binu. 7:57–8:1) Indi pa kontento sa paghingabot sa mga sumulunod ni Jesus sa Jerusalem, nangin pabilo si Saulo agod maglapnag ang paghingabot. Luyag niya dulaon ang makatalagam nga sekta nga nakilal-an subong ang “Dalan.”—Binu. 9:1, 2; tan-awa ang kahon nga “Ang Awtoridad ni Saulo sa Damasco,” sa pahina 61.
(Binuhatan 9:15, 16) Apang nagsiling ang Ginuo sa iya: “Lakat ka! Bangod ginpili ko ini nga tawo agod dalhon ang akon ngalan sa mga pungsod, subong man sa mga hari kag sa mga anak ni Israel. 16 Kay ipakita ko sa iya ang madamo nga butang nga antuson niya tungod sa akon ngalan.”
Batuna nga si Jehova ang Aton Maninihon
4 Kon ginatalupangod ni Jehova ang mga tawo, wala sia nagatan-aw sa ila dagway. Sa baylo, ginausisa niya ang ila tagipusuon, ang nasulod nga pagkatawo. (Basaha ang 1 Samuel 16:7b.) Matuod ini sang gintukod sang Dios ang Cristianong kongregasyon. Madamo sang ginbuyok niya sa iya kag sa iya Anak ang daw wala sing pulos. (Juan 6:44) Isa sa ila amo ang Fariseo nga si Saulo, nga ‘manugpasipala, manughingabot, kag arogante nga tawo.’ (1 Tim. 1:13) Pero ang “nagausisa sang mga tagipusuon” wala nagkabig kay Saulo nga wala sing pulos nga daga. (Hulu. 17:3) Sa baylo, ginkabig sia sang Dios nga puede himuon subong mapuslanon nga suludlan, isa ka ‘pinili’ nga magapanaksi “sa mga pungsod, subong man sa mga hari kag sa mga anak ni Israel.” (Binu. 9:15) Ang iban nga gintamod sang Dios nga posible mangin mga suludlan “para sa dungganon nga katuyuan” naglakip sa mga palahubog, imoral, kag mga kawatan anay. (Roma 9:21; 1 Cor. 6:9-11) Sang gintun-an nila ang Pulong sang Dios, nagbakod ang ila pagtuo kay Jehova kag gintugutan nila sia nga dihunon sila.
(Binuhatan 9:20-22) Kag nagbantala sia dayon sa mga sinagoga tuhoy kay Jesus, nga ining isa amo ang Anak sang Dios. 21 Apang ang tanan nga nakabati sa iya natingala kag nagsiling: “Indi bala amo ini ang tawo nga naghingabot sing mapintas sa mga nagatawag sa ngalan ni Jesus sa Jerusalem? Indi bala nagkadto sia diri agod dakpon sila kag dalhon sa puno nga mga saserdote?” 22 Apang nangin maayo pa gid si Saulo sa iya pagbantala. Ginpamatud-an niya nga si Jesus amo ang Cristo paagi sa makapakumbinsi nga mga argumento. Naglibog ang ulo sang mga Judiyo nga nagaistar sa Damasco.
Ang Kongregasyon “Nakaagom sang Isa ka Panag-on sang Kalinong”
15 Mahanduraw mo bala ang kakibot, katingala, kag kaakig sang kadam-an sang nagsugod sa pagbantala si Saulo tuhoy kay Jesus sa mga sinagoga? “Indi bala amo ini ang tawo nga naghingabot sing mapintas sa mga nagatawag sa sini nga ngalan?” pamangkot nila. (Binu. 9:21) Sang nagpaathag si Saulo kon ngaa nagbag-o ang iya panimuot kay Jesus, “ginpamatud-an niya sing makatarunganon nga si Jesus amo ang Cristo.” (Binu. 9:22) Apang indi tanan makumbinsi sang lohiko nga pangatarungan. Indi ini makapabag-o sang panghunahuna sang mga tawo nga nagainsister sang ila namat-an nga tradisyon ukon sa mga tawo nga indi magbag-o bangod sang bugal. Apang wala mangampo si Saulo.
Pagkutkot sing Espirituwal nga mga Hiyas
(Binuhatan 9:4) kag natumba sia sa duta. May nabatian sia nga tingog nga nagasiling sa iya: “Saulo, Saulo, ngaa ginahingabot mo ako?”
Ang Kongregasyon “Nakaagom sang Isa ka Panag-on sang Kalinong”
5 Sang ginpadulog ni Jesus si Saulo sa dalan pa Damasco, wala Sia namangkot sing: “Ngaa ginahingabot mo ang akon mga disipulo?” Subong sang aton nabasa, sia nagsiling: “Ngaa ginahingabot mo ako?” (Binu. 9:4) Huo, nabatyagan mismo ni Jesus ang mga pagtilaw nga naeksperiensiahan sang iya mga sumulunod.—Mat. 25:34-40, 45.
6 Kon ginahingabot ka bangod sang imo pagtuo kay Cristo, saligi nga nahibaluan ni Jehova kag ni Jesus ang imo kahimtangan. (Mat. 10:22, 28-31) Sa karon, mahimo nga indi pagdulaon ni Jehova ang pagtilaw. Dumduma nga nakita ni Jesus ang ginhimo ni Saulo sang ginpatay si Esteban kag ang pagganoy ni Saulo sa mga disipulo halin sa ila puluy-an pa Jerusalem. (Binu. 8:3) Apang sadto nga tion wala magpasilabot si Jesus. Bisan pa sa sini, ginhatagan ni Jehova paagi kay Cristo sing kusog sanday Esteban kag ang iban pa nga mga disipulo agod makapabilin nga matutom.
(Binuhatan 10:6) Ini nga tawo bisita ni Simon, nga isa ka manugpanit, nga may balay sa higad sang baybay.”
nwtsty study note para sa Bin 10:6
Simon, nga isa ka manugpanit: Ang manugpanit nagatandog pirme sang mga panit sang sapat. Nagagamit sia sing timplada nga may apog para makuha ang mga balahibo ukon ang nabilin nga unod kag tambok sa panit. Dayon ginabutangan niya ini sing maisog nga ilimnon para magamit na ini sa paghimo sing mga gamit nga human sa panit. Ini nga proseso grabe kabaho kag nagakinahanglan sang madamo nga tubig, nga mahimo amo ang rason kon ngaa si Simon nagaistar sa higad sang baybay, posible sa gua sang Joppe. Suno sa Mosaikong Kasuguan, ang tawo nga nagatandog sang lawas sang patay nga mga sapat mangin indi matinlo. (Le 5:2; 11:39) Gani ginkabig sang kalabanan nga Judiyo nga mahigko ang mga manugpanit kag indi sila magdayon sa balay sini. Suno sa Talmud, ang obra sang manugpanit mas manubo pa sangsa obra sang nagapanguha sing ipot. Pero wala nagduhaduha si Pedro nga magdayon sa balay ni Simon. Bangod wala sia sing pinilian, mas mahapos na sa iya nga batunon ang iya masunod nga asaynment—ang pagkadto sa balay sang isa ka Gentil. Suno sa pila ka iskolar, ang Griego nga tinaga para sa “manugpanit” (byr·seusʹ) amo ang apelyido ni Simon.
Pagbasa sa Biblia
(Binuhatan 9:10-22) Sa Damasco, may isa ka disipulo nga si Ananias, kag nagsiling ang Ginuo sa iya sa palanan-awon: “Ananias!” Nagsiling sia: “Ano ina, Ginuo ko?” 11 Nagsiling ang Ginuo sa iya: “Magkadto ka sa dalan nga ginatawag Matadlong, kag pangitaa sa balay ni Judas ang tawo nga si Saulo nga taga-Tarso. Kay nagapangamuyo sia subong, 12 kag nakita niya sa palanan-awon ang tawo nga si Ananias nga nagsulod kag nagtungtong sang iya mga kamot sa iya agod makakita sia liwat.” 13 Apang nagsabat si Ananias: “Ginuo, nabatian ko sa madamo nga tawo ang tuhoy sa sini nga tawo. Madamo gid nga makahalalit nga butang ang ginhimo niya sa imo mga balaan sa Jerusalem. 14 Kag nagkadto sia diri nga may awtoridad halin sa puno nga mga saserdote nga dakpon ang tanan nga nagatawag sa imo ngalan.” 15 Apang nagsiling ang Ginuo sa iya: “Lakat ka! Bangod ginpili ko ini nga tawo agod dalhon ang akon ngalan sa mga pungsod, subong man sa mga hari kag sa mga anak ni Israel. 16 Kay ipakita ko sa iya ang madamo nga butang nga antuson niya tungod sa akon ngalan.” 17 Gani naglakat si Ananias kag nagsulod sa balay, kag gintungtong niya ang iya mga kamot kay Saulo. Nagsiling sia: “Saulo, utod ko, ginpadala ako ni Ginuong Jesus nga nagpakita sa imo sa dalan sang nagapakadto ka diri, agod makakita ka liwat kag mapuno sing balaan nga espiritu.” 18 Kag hinali lang nga may nahulog halin sa iya mga mata, nga daw mga himbis, kag nakakita sia liwat. Dayon nagtindog sia kag ginbawtismuhan, 19 kag nagkaon sia kag nagbaskog. Sa sulod sang pila ka adlaw, nagpabilin sia upod sa mga disipulo sa Damasco. 20 Kag nagbantala sia dayon sa mga sinagoga tuhoy kay Jesus, nga ining isa amo ang Anak sang Dios. 21 Apang ang tanan nga nakabati sa iya natingala kag nagsiling: “Indi bala amo ini ang tawo nga naghingabot sing mapintas sa mga nagatawag sa ngalan ni Jesus sa Jerusalem? Indi bala nagkadto sia diri agod dakpon sila kag dalhon sa puno nga mga saserdote?” 22 Apang nangin maayo pa gid si Saulo sa iya pagbantala. Ginpamatud-an niya nga si Jesus amo ang Cristo paagi sa makapakumbinsi nga mga argumento. Naglibog ang ulo sang mga Judiyo nga nagaistar sa Damasco.
DISIEMBRE 10-16
MGA BAHANDI SA PULONG SANG DIOS | BINUHATAN 12-14
“Sanday Bernabe kag Pablo Naghimo sing mga Disipulo sa Malayo nga mga Lugar”
(Binuhatan 13:2, 3) Samtang nagaalagad sila kay Jehova kag nagapuasa, nagsiling ang balaan nga espiritu: “Paina para sa akon si Bernabe kag si Saulo, kay may ipahimo ako sa ila.” 3 Dayon pagkatapos nila magpuasa kag magpangamuyo, gintungtong nila ang ila mga kamot sa ila kag ginpalakat sila.
“Napuno sing Kalipay kag Balaan nga Espiritu”
4 Ngaa sanday Bernabe kag Saulo gid ang ginpili sang balaan nga espiritu nga painon “para sa buluhaton”? (Binu. 13:2) Wala sing sabat ang Biblia. Apang nahibaluan naton nga gintuytuyan sang balaan nga espiritu ang pagpili sa ila. Wala sing ginsambit nga nagpamatok ang mga manalagna kag mga manunudlo sa Antioquia sa desisyon. Sa baylo, ginsakdag gid nila ang pagtangdo. Handurawa kon ano ang ginabatyag nanday Bernabe kag Saulo samtang ang ila walay kahisa nga espirituwal nga mga kauturan ‘nagpuasa kag nagpangamuyo kag nagtungtong sang ila mga kamot sa ila kag nagpalakat sa ila.’ (Binu. 13:3) Dapat nga sakdagon man naton ang mga ginhatagan sing mga asaynment sa Cristianong kongregasyon, lakip ang mga gintangdo subong mga manugtatap sa kongregasyon. Sa baylo nga mahisa sa mga nakabaton sini nga mga pribilehiyo, dapat naton sila ‘tahuron sing daku tungod sa gugma bangod sa ila buluhaton.’—1 Tes. 5:13.
(Binuhatan 13:12) Sang nakita sang gobernador ang natabo, nagtuo sia sa Ginuo, kay nahayanghag sia sa mga butang nga natun-an niya tuhoy kay Jehova.
(Binuhatan 13:48) Sang mabatian ini sang mga tawo nga indi Judiyo, nagkasadya sila kag ginhimaya nila ang pulong ni Jehova, kag nagtuo ang tanan nga may husto nga panimuot sa pagtigayon sing kabuhi nga wala sing katapusan.
(Binuhatan 14:1) Didto sa Iconio, magkaupod nga nagsulod si Pablo kag si Bernabe sa sinagoga sang mga Judiyo. Maayo gid sila maghambal amo nga madamo nga mga Judiyo kag mga Griego ang nangin tumuluo.
“Paghambal nga May Kaisog Paagi sa Awtoridad ni Jehova”
5 Una, naghapit sanday Pablo kag Bernabe sa Iconio, isa ka duog nga Griego gihapon ang kultura kag isa sa labing importante nga siudad sa Romanong probinsia sang Galacia. Nagapuyo sa sini nga siudad ang impluwensiado nga mga Judiyo kag ang madamo nga di-Judiyong proselita. Suno sa ila kustombre, nagsulod sanday Pablo kag Bernabe sa sinagoga kag nagbantala. (Binu. 13:5, 14) “Naghambal [sila] sa paagi nga tungod sini ang daku nga kadam-an sang mga Judiyo kag mga Griego nangin mga tumuluo.”—Binu. 14:1.
(Binuhatan 14:21, 22) Sang nabantala na nila ang maayong balita sa amo nga siudad kag nabuligan ang madamo nga tawo nga mangin disipulo, nagbalik sila sa Listra, sa Iconio, kag sa Antioquia. 22 Ginpabakod nila ang mga disipulo didto, kag ginlaygayan sila nga magpakalig-on sa pagtuo kag nagsiling sila: “Dapat kita magsulod sa Ginharian sang Dios paagi sa madamo nga kabudlayan.”
Alagda ang Dios sing Matutom Bisan Pa sang “Madamo nga Kapipit-an”
4 Pagkatapos maduaw nanday Pablo kag Bernabe ang Derbe, “nagbalik sila sa Listra kag sa Iconio kag sa Antioquia, nga nagapabakod sa mga disipulo, nagapalig-on sa ila nga magpabilin sa pagtuo kag nagasiling: ‘Dapat kita magsulod sa ginharian sang Dios paagi sa madamo nga kapipit-an.’” (Binu. 14:21, 22) Sa umpisa, daw matingala kita sa ila ginsiling. Kay man, ang pag-atubang sa “madamo nga kapipit-an” indi makapalig-on, kundi makapaluya. Gani, paano sanday Pablo kag Bernabe ‘nagpabakod sa mga disipulo’ paagi sa mensahe nga nagapatalupangod sang dugang nga kapipit-an?
5 Mahibaluan naton ang sabat sini kon usisaon naton sing maayo ang ginsiling ni Pablo. Wala sia nagsiling: “Dapat naton batason ang madamo nga kapipit-an.” Sa baylo, nagsiling sia: “Dapat kita magsulod sa ginharian sang Dios paagi sa madamo nga kapipit-an.” Gani ginpabakod ni Pablo ang mga disipulo paagi sa pagpadaku sang positibo nga resulta sang katutom. Ini nga padya indi ilusyon lamang. Si Jesus nagsiling: “Sia nga nagabatas tubtob sa katapusan amo ang maluwas.”—Mat. 10:22.
Pagkutkot sing Espirituwal nga mga Hiyas
(Binuhatan 12:21-23) Isa ka adlaw, sang nagtilipon ang katawhan, nagsuksok si Herodes sing harianon nga bayo kag nagpungko sa lingkuran nga hukmanan kag nagpamulongpulong sa ila. 22 Ang nagtipon nga mga tawo nagsinggit: “Tingog ina sang isa ka dios, kag indi iya sang tawo!” 23 Ginsilutan sia gilayon sang anghel ni Jehova kag nagmasakit sia, bangod wala niya ginhatag ang himaya sa Dios, kag gin-ulod sia kag napatay.
Talalupangdon nga mga Punto Gikan sa Tulun-an sang Binuhatan
12:21-23; 14:14-18. Gin-angkon dayon ni Herodes ang kahimayaan nga dapat lamang ihatag sa Dios. Tuhay gid si Pablo kag si Bernabe kay gilayon nila nga ginpangindian ang pagdayaw kag pagpadungog nga indi para sa ila! Indi naton dapat paghandumon nga padunggan kita bangod sa aton mga hinimuan sa pag-alagad kay Jehova.
(Binuhatan 13:9) Dayon gintulok sia ni Saulo, nga ginatawag man Pablo, nga napuno sing balaan nga espiritu
nwtsty study note para sa Bin 13:9
Saulo, nga ginatawag man Pablo: Halin sadto, gintawag na si Saulo nga Pablo. Si apostol Pablo natawo nga Hebreo pero may Romano nga pagkabanwahanon. (Bin 22:27, 28; Fil 3:5) Gani posible nga halin sang bata sia, duha ang iya ngalan. Ang Hebreo niya nga ngalan Saulo, kag ang iya Romano nga ngalan Pablo. Kinaandan na nga duha ang ngalan sang mga Judiyo sadto ilabi na sa mga nagaistar sa gua sang Israel. (Bin 12:12; 13:1) Ang iban nga paryente ni Pablo may Romano kag Griego man nga mga ngalan. (Ro 16:7, 21) Bilang “apostol nga ginpadala sa mga pungsod,” ginsugo si Pablo nga ibantala ang maayong balita sa mga indi Judiyo. (Ro 11:13) Nagdesisyon sia nga gamiton ang iya Romano nga ngalan kay posible para sa iya mas madali sia batunon sang mga tawo. (Bin 9:15; Ga 2:7, 8) Ang iban nagsiling nga gingamit niya ang iya Romano nga ngalan bilang pagpadungog kay Sergio Paulo. Pero indi ini matuod kay padayon ini nga gingamit ni Pablo bisan wala na sia sa Cipre. Ang iban naman nagsiling nga ginalikawan ni Pablo ang paggamit sang iya Hebreo nga ngalan kay ang pagmitlang sini sa Griego daw kaanggid sa Griego nga tinaga nga nagapatuhoy sa tawo (ukon sapat) nga nagaiwol-iwol kon maglakat.—Tan-awa ang study note para sa Bin 7:58.
Pablo: Sa Cristianong Griegong Kasulatan, ang ngalan nga Pauʹlos, halin sa Latin nga Paulus, nga buot silingon “Diutay; Gamay.” Gingamit ini sing 157 ka beses kon nagapatuhoy kay apostol Pablo kag makaisa kon nagapatuhoy sa proconsul sang Cipre nga si Sergio Paulo.—Bin 13:7.
Pagbasa sa Biblia
(Binuhatan 12:1-17) Sa amo nga tion ginhingabot ni Herodes nga hari ang pila ka miembro sang kongregasyon. 2 Ginpatay niya paagi sa espada si Santiago nga utod ni Juan. 3 Sang nakita niya nga nagpahamuot ini sa mga Judiyo, gindakop man niya si Pedro. (Natabo ini sang Kapiestahan sang Tinapay nga Wala sing Lebadura.) 4 Gindakop niya sia kag ginbilanggo. Apat ka grupo sang mga soldado ang bulosbulos nga nagbantay sa iya, nga ang tagsa ka grupo may apat ka soldado, kay plano niya nga dalhon sia sa atubangan sang katawhan pagkatapos sang Paskua. 5 Samtang yara si Pedro sa bilangguan, ang kongregasyon hanuot nga nagpangamuyo sa Dios para sa iya. 6 Sang gab-i antes ipaatubang ni Herodes si Pedro sa mga tawo, nagakatulog si Pedro nga nagapos sing duha ka kadena sa tunga sang duha ka soldado, kag may mga guardia nga nagabantay sa puertahan sang bilangguan. 7 Apang ang anghel ni Jehova nagatindog didto, kag nagsilak ang kapawa sa selda. Ginpikpik niya si Pedro sa kilid kag ginpukaw niya sia, nga nagasiling: “Dali, magbangon ka!” Kag nahulog ang mga kadena halin sa iya mga kamot. 8 Nagsiling ang anghel sa iya: “Maghimos ka kag isuksok ang imo sandalyas.” Kag ginhimo niya ini. Dayon nagsiling ang anghel sa iya: “Isul-ob ang imo kunop, kag magsunod ka sa akon.” 9 Kag nagsunod si Pedro sa anghel pagua sa bilangguan, apang wala sia makahibalo nga matuod ang ginhimo sang anghel. Ang matuod, abi niya nakakita sia sang palanan-awon. 10 Naglabay sila sa nahauna kag sa ikaduha nga grupo sang mga guardia kag nakalab-ot sila sa gawang nga salsalon nga nagapadulong sa siudad, kag nagbukas ini. Sang nakagua sila kag nagalakat sa dalan, nagbiya sa iya ang anghel. 11 Sang nakamarasmas na si Pedro, nagsiling sia: “Karon nahibaluan ko na nga ginpadala ni Jehova ang iya anghel kag ginluwas niya ako sa kamot ni Herodes kag sa tanan nga ginapaabot sang mga Judiyo nga matabo sa akon.” 12 Sang narealisar ini ni Pedro, nagkadto sia sa balay ni Maria nga iloy ni Juan nga ginatawag Marcos, diin madamo nga disipulo ang nagtipon kag nagpangamuyo. 13 Sang nagpanuktok sia sa puertahan, ginkadtuan ini sang isa ka alagad nga babayi nga si Roda agod tan-awon kon sin-o ang nagapanuktok. 14 Sang nakilala niya ang tingog ni Pedro, nalipay gid sia gani wala niya mabuksan ang puertahan, kundi nagdalagan sia sa sulod sang balay kag ginsugid sa ila nga si Pedro yara sa puertahan. 15 Nagsiling sila sa iya: “Nagbuang ka na.” Apang nag-insister gid sia nga matuod ini. Nagsiling sila: “Anghel niya ina.” 16 Apang padayon nga nagpanuktok si Pedro. Sang ginbuksan nila ang puertahan, nakita nila sia kag nakibot sila. 17 Apang ginsinyasan niya sila nga maghipos kag dayon ginsugiran niya sila sing detalyado kon paano sia ginpagua ni Jehova sa bilangguan, kag nagsiling sia: “Isugid ninyo ini kay Santiago kag sa mga kauturan.” Dayon naglakat sia kag nagkadto sa iban nga lugar.
DISIEMBRE 17-23
MGA BAHANDI SA PULONG SANG DIOS | BINUHATAN 15-16
“Isa ka Desisyon Base sa Pulong sang Dios nga Ginkasugtan sang Tanan”
(Binuhatan 15:1, 2) May pila ka lalaki nga nagdulhog halin sa Judea kag nagpanudlo sa mga kauturan: “Kon indi kamo magpatuli suno sa kasuguan ni Moises, indi kamo maluwas.” 2 Apang sang nakigsuay kag nakigbais si Pablo kag si Bernabe sa ila, ginpakadto nila si Pablo, si Bernabe, kag ang iban pa nga kauturan sa mga apostoles kag sa mga gulang sa Jerusalem nahanungod sini nga isyu.
“May Sinuay nga Natabo”
8 Si Lucas nagpadayon: “Sang nakigsuay kag nakigbais gid si Pablo kag si Bernabe sa ila [sa “pila ka lalaki”], ginpakadto nila [mga gulang] si Pablo kag si Bernabe kag ang iban pa nga kauturan sa mga apostoles kag sa mga gulang nga lalaki sa Jerusalem nahanungod sini nga pagbinaisay.” (Binu. 15:2) Ang tanan nga “nakigsuay kag nakigbais” nagapakatig-a, kag indi ini malubad sang kongregasyon sa Antioquia. Agod matigayon ang paghidait kag paghiusa, maalamon nga namat-od ang kongregasyon nga dal-on ang isyu sa “mga apostoles kag sa mga gulang nga lalaki sa Jerusalem,” nga nagahuman sang nagadumala nga hubon. Ano ang matun-an naton sa mga gulang sa Antioquia?
(Binuhatan 15:13-20) Pagkatapos nila hambal, nagsiling si Santiago: “Mga kauturan, magpamati kamo sa akon. 14 Ginsaysay sing tul-id ni Simeon nga ang Dios nagbaton na karon sa mga indi Judiyo, agod makapili sia halin sa ila sang katawhan nga tawgon sa iya ngalan. 15 Kag nagaugyon sa sini ang ginsiling sang mga Manalagna, subong sang nasulat na: 16 ‘Pagkatapos sini magabalik ako kag patindugon liwat ang naguba nga tolda ni David; kay-uhon ko ang naguba nga bahin sini kag patindugon ini, 17 agod ang nabilin nga mga tawo hanuot nga magpangita kay Jehova, pati na ang mga tawo sang tanan nga pungsod nga ginatawag sa akon ngalan, siling ni Jehova, nga amo ang nagahimo sini nga mga butang 18 nga ginpat-od niya nga himuon sang una.’ 19 Gani ang akon desisyon, indi na pagpabudlayan ang mga tawo sang mga pungsod nga nagasimba sa Dios, 20 kundi sulatan sila nga maglikaw sila sa mga butang may kaangtanan sa idolatriya kag sa seksuwal nga imoralidad, kag indi sila magkaon sing nakuga nga mga sapat, kag maglikaw sila sa dugo.
Ginatahod sang Matuod nga mga Cristiano ang Pulong sang Dios
6 Ang teksto nga nakabulig sa ila amo ang Amos 9:11, 12. Ginkutlo ini sa Binuhatan 15:16, 17, nga nagasiling: “Magabalik ako kag tukuron liwat ang narumpag nga tolda ni David; kag tukuron ko liwat ang kagulub-an sini kag patindugon ini liwat, agod ang nabilin sa sini nga mga tawo hanuot nga magpangita kay Jehova, upod sa mga tawo sang tanan nga pungsod, mga tawo nga ginatawag sa akon ngalan, siling ni Jehova.”
7 Pero basi may magsiling, ‘Wala man sa teksto nga indi na kinahanglan nga tulion ang Gentil nga mga tumuluo.’ Matuod ina. Pero mahimo nga nahangpan na ini sang Judiyong mga Cristiano. Wala nila ginakabig nga ‘mga tawo sang pungsod’ kundi mga utod ang natuli nga mga Gentil. (Ex. 12:48, 49) Halimbawa, suno sa bersion ni Bagster sang Septuagint, ang Ester 8:17, nagasiling: “Madamo nga Gentil ang gintuli kag nangin mga Judiyo.” Gani sang nagtagna ang Kasulatan nga ang nabilin sa panimalay sang Israel (mga Judiyo kag natuli nga mga Judiyong proselita) upod sa “mga tawo sang tanan nga pungsod” (wala matuli nga mga Gentil) mangin mga tawo nga gintawag sa ngalan sang Dios, maathag ang buot silingon. Indi na kinahanglan nga tulion ang mga Gentil nga luyag mangin Cristiano.
(Binuhatan 15:28, 29) Kay ginbuligan kami sang balaan nga espiritu sa pagpamat-od nga indi na kamo pagpabug-atan pa luwas sa sining mga butang nga kinahanglan himuon: 29 Padayon kamo nga maglikaw sa mga butang nga ginhalad sa mga diosdios kag indi kamo magkaon sing nakuga nga mga sapat, kag maglikaw kamo sa dugo kag sa seksuwal nga imoralidad. Kon likawan gid ninyo ini nga mga butang, mangin maayo ang inyo kahimtangan. Maayo nga panglawas sa inyo!”
(Binuhatan 16:4, 5) Samtang nagalakbay sila sa mga siudad, ginapaalinton nila sa mga kauturan ang dapat tumanon nga mga pagsulundan nga ginpamat-uran sang mga apostoles kag sang mga gulang sa Jerusalem. 5 Gani, padayon nga naglig-on sa pagtuo ang mga kongregasyon kag nagdugang ang ila kadamuon adlaw-adlaw.
“Ginapabakod ang mga Kongregasyon”
18 Pila ka tuig nga nag-updanay sanday Pablo kag Timoteo. Subong mga nagalakbay nga manugtatap, pila ka nagkalainlain nga hilikuton ang ila nahimo para sa nagadumala nga hubon. Ang Biblia nagasiling: “Samtang nagalakbay sila sa mga siudad ginapaalinton nila sa mga kauturan didto ang mga mando nga ginpamat-uran sang mga apostoles kag sang mga gulang nga lalaki sa Jerusalem nga tumanon.” (Binu. 16:4) Ginsunod sang mga kongregasyon ang panuytoy halin sa mga apostoles kag sa mga gulang nga lalaki sa Jerusalem. Bangod nangin matinumanon, “ang mga kongregasyon padayon gid nga naglig-on sa pagtuo kag nagdugang sa kadamuon adlaw-adlaw.”—Binu. 16:5.
Pagkutkot sing Espirituwal nga mga Hiyas
(Binuhatan 16:6-9) Dugang pa, naglibot sila sa Frigia kag sa Galacia, bangod gindumilian sila sang balaan nga espiritu nga magbantala sang pulong sang Dios sa probinsia sang Asia. 7 Sang nagdulhog sila sa Misia, luyag nila kuntani magkadto sa Bitinia, apang wala sila gintugutan sang espiritu ni Jesus. 8 Gani nag-agi na lang sila sa Misia kag nagdulhog sa Troas. 9 Sadto nga gab-i nakakita si Pablo sing isa ka palanan-awon—isa ka lalaki nga taga-Macedonia nga nagatindog kag nagapangabay sa iya: “Tabok ka diri sa Macedonia kag buligi kami.”
Magtuon sa Pagkamabinantayon sang mga Apostoles ni Jesus
8 Ano ang matun-an naton sa sini nga kasaysayan? Talupangda nga pagkatapos lamang nga nagkadto si Pablo sa Asia nga nagpasilabot ang espiritu sang Dios. Dayon, pagkatapos lamang nga malapit na sa Bitinia si Pablo nga nagpasilabot si Jesus. Kag pagkatapos lamang nga nakalab-ot si Pablo sa Troas nga gintuytuyan sia ni Jesus pa Macedonia. Si Jesus gihapon ang Ulo sang kongregasyon, gani mahimo nga amo man sini ang himuon niya sa aton. (Col. 1:18) Halimbawa, mahimo nagaplano ka nga magpayunir ukon magsaylo sa lugar nga nagakinahanglan sing manugbantala. Pero, mahimo nga tuytuyan ka lang ni Jesus paagi sa espiritu sang Dios pagkatapos nga nakahimo ka sing mga tikang nga malab-ot ang imo tulumuron. Sa pag-ilustrar: Mapaliko lamang sang drayber ang iya salakyan kon nagadalagan na ini. Sing kaanggid, tuytuyan lamang kita ni Jesus sa pagpasangkad sang aton ministeryo kon nagapanikasog kita nga lab-uton ang aton tulumuron.
(Binuhatan 16:37) Apang nagsiling si Pablo sa ila: “Ginbunal nila kami sing dayag nga wala pa mapamatbatan, bisan pa mga Romano kami, kag ginbilanggo kami. Karon paguaon nila kami sing tago? Indi ina mahimo! Dapat sila ang magkadto diri kag paguaon kami.”
nwtsty study note para sa Bin 16:37
mga Romano kami: Buot silingon Romano nga banwahanon. Si Pablo kag posible si Silas Romano man nga banwahanon. Suno sa Romano nga kasuguan, ang mga banwahanon sini may kinamatarong sa nagakaigo nga pagbista kag indi dapat pagsilutan sa publiko kon wala pa mapamatbatan. Ang Romano nga mga banwahanon may mga kinamatarong kag mga pribilehiyo bisan diin sila nga lugar nga sakop sang emperyo. Ang Romano nga banwahanon napaidalom sa kasuguan sang Roma, indi sa mga kasuguan sang siudad nga iya ginaistaran. Kon kasuhan sia, puede sia magsugot nga kasuhon base sa lokal nga kasuguan. Pero may kinamatarong sia gihapon nga dal-on ini nga kaso sa korte sang Roma. Kon ang iya sala takus silutan sang kamatayon, may kinamatarong sia nga mag-apelar sa emperador. Si apostol Pablo nagbantala sa halos tanan nga bahin sang Emperyo sang Roma. Kon ibase sa rekord, tatlo ka beses niya nga gingamit ang iya kinamatarong bilang Romano nga banwahanon. Ang una diri sa Filipos sang ginpahibalo niya ang mga mahistrado nga gintapakan ang iya kinamatarong sang ginbunal sia.—Para sa duha pa ka higayon, tan-awa ang study note para sa Bin 22:25; 25:11.
Pagbasa sa Biblia
(Binuhatan 16:25-40) Apang sang mga tungang-gab-i na, si Pablo kag si Silas nagpangamuyo kag nagdayaw sa Dios paagi sa ambahanon, kag nagapamati sa ila ang mga bilanggo. 26 Sa hinali lang naglinog sing mabaskog kag nag-uyog ang mga pundasyon sang bilangguan. Dugang pa, hinali nga nagbukas ang tanan nga puertahan, kag nahubad ang mga gapos sang tanan. 27 Nakabugtaw ang manugbilanggo kag sang makita niya nga nabuksan ang mga puertahan sang bilangguan, gingabot niya ang iya espada kag luyag niya kuntani manginmatay, kay nagdumdom sia nga nakapalagyo ang mga bilanggo. 28 Apang nagsinggit si Pablo: “Indi paghaliti ang imo kaugalingon, kay yari pa kami tanan diri!” 29 Gani nagpangayo sia sing mga suga kag dalidali nga nagsulod. Nagakurog nga naghapa sia sa atubangan ni Pablo kag ni Silas. 30 Gindala niya sila sa gua kag nagsiling: “Mga Ginuo, ano ang dapat ko himuon agod maluwas ako?” 31 Nagsiling sila: “Magtuo ka kay Ginuong Jesus, kag maluwas ka, ikaw kag ang imo panimalay.” 32 Dayon ginhambal nila ang pulong ni Jehova sa iya kag sa tanan nga yara sa iya panimalay. 33 Kag sadto nga oras sang kagab-ihon gin-upod niya sila kag ginhugasan niya ang ila mga pilas. Kag sia kag ang iya bug-os nga panimalay ginbawtismuhan dayon. 34 Gindala niya sila sa iya balay kag naghanda sia sing pagkaon sa lamesa para sa ila, kag nagkasadya gid sia upod sa iya bug-os nga panimalay karon nga nagatuo na sia sa Dios. 35 Sang adlaw na, nagpadala ang mga mahistrado sibil sing mga guardia agod magsiling: “Buy-i ini nga mga tawo.” 36 Gani ginbalita sang manugbilanggo kay Pablo ang ila ginsiling: “Nagpadala ang mga mahistrado sibil sing mga tawo agod buy-an kamo nga duha. Gani, maggua na kamo kag maayo lang nga paglakat.” 37 Apang nagsiling si Pablo sa ila: “Ginbunal nila kami sing dayag nga wala pa mapamatbatan, bisan pa mga Romano kami, kag ginbilanggo kami. Karon paguaon nila kami sing tago? Indi ina mahimo! Dapat sila ang magkadto diri kag paguaon kami.” 38 Ginsugid ini sang mga guardia sa mga mahistrado sibil. Kag hinadlukan sila sang mabatian nila nga mga Romano gali ini nga mga tawo. 39 Bangod sini nagkadto sila kag nagpangabay sa ila, kag sang mapagua na nila sila, ginpangabay nila nga maghalin na sila sa siudad. 40 Apang naggua sila sa bilangguan kag nagkadto sa balay ni Lidia. Sang makita nila ang mga kauturan, ginpalig-on nila sila kag dayon naglakat.
DISIEMBRE 24-30
MGA BAHANDI SA PULONG SANG DIOS | BINUHATAN 17-18
“Sunda si Apostol Pablo sa Pagbantala kag Pagtudlo”
(Binuhatan 17:2, 3) Gani suno sa kinabatasan ni Pablo, nagsulod sia sa sinagoga, kag nagpangatarungan sia sa ila pasad sa Kasulatan sa sulod sang tatlo ka adlaw nga inugpahuway, 3 nga nagapaathag kag gingamit niya ining mga sinulatan agod pamatud-an nga ang Cristo kinahanglan mag-antos kag mabanhaw, nagsiling sia: “Ining Jesus nga ginabantala ko sa inyo amo ang Cristo.”
nwtsty study note para sa Bin 17:2, 3
nagpangatarungan: Wala lamang sila ginsugiran ni Pablo sang maayong balita. Ginpaathag niya ini kag naghatag sing pamatuod pasad sa Kasulatan, nga amo ang Hebreo nga Kasulatan. Wala lamang niya ginbasa ang Kasulatan; nagpangatarungan sia base diri, kag ginpasibu ang iya pangatarungan depende sa iya tagpalamati. Ang Griego nga berbo nga di·a·leʹgo·mai ginhatagan sing kahulugan nga “pagbayluhanay sing mga tinaga; paghambalanay; paghinun-anon.” Nagapahangop ini sing pagpakighambal sa mga tawo. Ining Griegong tinaga gingamit man sa Bin 17:17; 18:4, 19; 19:8, 9; 20:7, 9.
gingamit niya ining mga sinulatan: Ang Griegong tinaga literal nga nagakahulugan sing “pagbutang sa tupad (pagbutang sa kilid).” Mahimo ginapahangop sini nga ginkumparar sing maayo ni Pablo ang mga tagna parte sa Mesias nga mabasa sa Hebreo nga Kasulatan sa mga hitabo sa kabuhi ni Jesus. Kag ginpakita niya kon paano gintuman ni Jesus ini nga mga tagna.
(Binuhatan 17:17) Gani nagsulod sia sa sinagoga kag nangatarungan sa mga Judiyo kag sa iban nga mga tawo nga nagsimba sa Dios. Nangatarungan man si Pablo adlaw-adlaw sa mga tawo sa tiendahan.
nwtsty study note para sa Bin 17:17
sa tiendahan: Makita sa aminhan-katundan sang Acropolis ang tiendahan sang Atenas (sa Griego, a·go·raʹ). Nagalapad ini sing 5 ka ektarya ukon sobra pa. Ang tiendahan indi lang lugar nga ginabaligyaan kag ginabaklan kundi sentro man ini sang ekonomiya, pulitika, kag kultura sang siudad. Nanamian ang mga taga-Atenas nga magtipon diri para magdebate.
(Binuhatan 17:22, 23) Dayon nagtindog si Pablo sa tunga sang Areopago kag nagsiling: “Mga taga-Atenas, nakita ko nga mas mahinadlukon kamo sa mga dios sangsa iban. 23 Halimbawa, samtang nagalibotlibot ako diri kag nagapanilag sa inyo ginasimba, nakita ko man ang isa ka altar nga nasulatan ‘Sa Isa ka Dios nga Wala Makilala.’ Gani, ginabantala ko sa inyo ining Dios nga wala ninyo makilala.
nwtsty study note para sa Bin 17:22, 23
Sa Isa ka Dios nga Wala Makilala: Ang Griego nga mga tinaga nga A·gnoʹstoi the·oiʹ bahin sang mga tinaga nga nasulat sa isa ka altar sa Atenas. Makita gid ang kahadlok sang mga taga-Atenas sa mga diosdios kay naghimo sila sing madamo nga templo kag altar. Naghimo pa gani sila sing mga altar para sa indi persona nga mga diosdios, pareho sang Kabantugan, Kaugdang, Enerhiya, Pagpanghaylo, kag Kaluoy. Nahadlok man sila nga basi may nalipatan sila nga dios kag maakig ini. Gani naghimo sila sing altar para “sa Isa ka Dios nga Wala Makilala.” Ginapakita sini nga ginabaton sang mga tawo nga may isa ka Dios nga indi nila kilala. Maalamon nga gingamit ni Pablo ini nga altar nga basihan sang iya pagbantala para ipakilala sa ila ang Dios—ang matuod nga Dios—nga asta sadto nga tion indi pa nila kilala.
Pagkutkot sing Espirituwal nga mga Hiyas
(Binuhatan 18:18) Apang, pagkatapos niya magtener didto sing pila pa ka adlaw, nagpaalam si Pablo sa mga kauturan kag nagpanakayon pakadto sa Siria. Kaupod niya si Priscila kag si Aquila. Ginpautdan niya sing malip-ot ang iya buhok sa Cencrea, kay may panaad sia sa Dios.
Talalupangdon nga mga Punto Gikan sa Tulun-an sang Binuhatan
18:18—Ano nga panaad ang ginhimo ni Pablo? Ang iban nga mga iskolar nagsiling nga si Pablo may panaad sa pagka-Nazareo. (Num. 6:1-21) Apang, ang Biblia wala nagasugid kon ano gid ang panaad ni Pablo. Dugang pa, wala nagasiling ang Kasulatan kon ginhimo niya ini nga panaad antes ukon sa tapos sia makumbertir bilang Cristiano. Kag wala man ini nagasugid kon panugod pa lang sang iya panaad ukon hingapusan na. Kon ano gid man ang rason, ang paghimo sini nga panaad indi sayop.
(Binuhatan 18:21) Nagpaalam sia kag nagsiling sa ila: “Mabalik ako liwat sa inyo, kon kabubut-on ni Jehova.” Halin sa Efeso, nagpanakayon sia
nwtsty study note para sa Bin 18:21
kon kabubut-on ni Jehova: Isa ka ekspresyon nga nagapadaku nga dapat pensaron anay kon ano ang kabubut-on sang Dios kon may himuon ukon may ginaplano. Amo ini nga prinsipio ang ginahunahuna ni apostol Pablo. (1Co 4:19; 16:7; Heb 6:3) Ginpalig-on man ni disipulo Santiago ang iya mga bumalasa sang nagsiling sia: “Kon kabubut-on ni Jehova, magakabuhi kami kag himuon ini ukon ina.” (San 4:15) Ini nga ekspresyon indi lang sa hambal. Kon ang isa sinsero nga nagasiling, “kon kabubut-on ni Jehova,” dapat ang iya ginahimo nahisanto gid sa kabubut-on ni Jehova. Ini nga ekspresyon indi kinahanglan nga ihambal pirme sing matunog kundi sa masami, sa kaugalingon lang sang isa.—Tan-awa ang study note para sa Bin 21:14; 1Co 4:19; San 4:15 kag Apendise C.
Pagbasa sa Biblia
(Binuhatan 17:1-15) Nag-agi sila sa Amfipolis kag Apolonia kag nakalab-ot sila sa Tesalonica, diin may isa ka sinagoga sang mga Judiyo. 2 Gani suno sa kinabatasan ni Pablo, nagsulod sia sa sinagoga, kag nagpangatarungan sia sa ila pasad sa Kasulatan sa sulod sang tatlo ka adlaw nga inugpahuway, 3 nga nagapaathag kag gingamit niya ining mga sinulatan agod pamatud-an nga ang Cristo kinahanglan mag-antos kag mabanhaw, nagsiling sia: “Ining Jesus nga ginabantala ko sa inyo amo ang Cristo.” 4 Bangod sini, ang pila sa ila nangin mga tumuluo kag nag-upod sila kay Pablo kag kay Silas. Amo man sini ang ginhimo sang madamo nga Griego nga nagsimba sa Dios kag sang madamo nga bantog nga babayi. 5 Apang nahisa ang mga Judiyo kag gintipon nila ang pila ka malaut nga tawo nga nagaistambay sa tiendahan kag naghimo sila sing grupo nga nanggamo sa siudad. Gingubat nila ang balay ni Jason kag ginpangita nila si Pablo kag si Silas agod dalhon sila sa mga tawo. 6 Sang wala nila sila makita, ginganoy nila si Jason kag ang pila ka kauturan pakadto sa mga manugdumala sang siudad, kag nagasinggit sila: “Yari man diri ang mga tawo nga nagapanggamo bisan diin, 7 kag gin-abiabi sila ni Jason. Ginasupak sini nga mga tawo ang mga kasuguan sang Cesar, kay nagasiling sila nga may isa pa ka hari, nga amo si Jesus.” 8 Pagkabati nila sini, kinulbaan ang kadam-an kag ang mga manugdumala sang siudad; 9 gani sa tapos nila ginpabayad sing piyansa si Jason kag ang iban pa, ginbuy-an nila sila. 10 Pagkagab-i, ginpalakat dayon sang mga kauturan si Pablo kag si Silas sa Berea. Pag-abot nila didto, nagkadto sila sa sinagoga sang mga Judiyo. 11 Mas maayo ang panimuot sang mga taga-Berea sangsa mga taga-Tesalonica, kay nalangkag gid sila sa pagbaton sa pulong sang Dios, nga ginausisa sing maayo ang Kasulatan sa adlaw-adlaw kon bala matuod gid ini nga mga butang. 12 Gani, madamo sa ila ang nagtuo, pati ang madamo nga kilala nga Griego nga babayi kag lalaki. 13 Apang sang mabalitaan sang mga Judiyo sa Tesalonica nga ginbantala man ni Pablo sa Berea ang pulong sang Dios, nagkadto man sila didto agod sugyuton kag gamuhon ang kadam-an. 14 Ginpalakat dayon sang mga kauturan si Pablo pakadto sa baybay, apang nagpabilin didto si Silas kag si Timoteo. 15 Apang, gindul-ong sang iban si Pablo tubtob sa Atenas. Pagkatapos niya sila matugunan nga paapason gilayon si Silas kag si Timoteo sa iya, nagbalik dayon sila.
DISIEMBRE 31–ENERO 6
MGA BAHANDI SA PULONG SANG DIOS | BINUHATAN 19-20
“Bantayi Ninyo ang Inyo Kaugalingon kag Atipana ang Bug-os nga Panong”
(Binuhatan 20:28) Bantayi ninyo ang inyo kaugalingon kag atipana ang bug-os nga panong, nga sa ila gintangdo kamo sang balaan nga espiritu subong mga manugtatap, agod bantayan ang kongregasyon sang Dios, nga ginbakal niya paagi sa dugo sang iya Anak.
“Bantayi Ninyo ang Panong sang Dios nga Yara sa Inyo Pag-atipan”
5 Ang apostol nagsulat nga ang mga gulang nga lalaki dapat ‘magbantay sang panong sang Dios nga ila ginaatipan.’ Dapat gid nila tandaan nga ang panong iya ni Jehova kag ni Jesucristo. May salabton ang mga gulang kon paano nila ginabantayan ang mga karnero sang Dios. Halimbawa, ginpangabay ka sang imo suod nga abyan nga bantayan anay ang iya kabataan kay may kadtuan sia. Indi mo bala sila pag-atipanon kag pakan-on sing maayo? Kon may magmasakit sa ila, indi mo bala pag-ipadoktor? Sing kaanggid, ang mga gulang dapat ‘magbantay sang kongregasyon sang Dios, nga ginbakal niya paagi sa dugo sang iya Anak.’ (Binu. 20:28) Ginadumdom gid nila nga ang kada karnero ginbakal sang malahalon nga dugo ni Cristo Jesus. Bangod may salabton sila, ginapakaon, ginaamligan, kag ginaatipan sang mga gulang ang panong.
(Binuhatan 20:31) “Gani padayon kamo nga magbantay, kag dumduma ninyo nga sa sulod sang tatlo ka tuig, sa adlaw kag gab-i, wala ako mag-untat sa paglaygay sa tagsatagsa sa inyo nga may paghibi.
Cristianong mga Gulang—‘Masigkamanugpangabudlay Para sa Aton Kalipay’
15 Ang isa ka manugbantay nagapangabudlay gid. Kon kaisa, ang mga gulang indi makatulog bangod nagakabalaka sila sa panong sang Dios kag nagapangamuyo tungod sa ila, ukon nagapulaw para buligan ang mga kauturan. (2 Cor. 11:27, 28) Pero kaangay ni Pablo, malipayon gihapon nga ginatuman sing bug-os sang mga gulang ang ila mga responsibilidad. Nagsulat sia sa mga taga-Corinto: “Malipay gid ako nga ihatag ang tanan kag gamiton ako sing bug-os para sa inyo kalag.” (2 Cor. 12:15) Bangod sang iya gugma sa mga kauturan, ginhatag sing bug-os ni Pablo ang iya kaugalingon para palig-unon sila. (Basaha ang 2 Corinto 2:4; Fil. 2:17; 1 Tes. 2:8) Amo nga ginpalangga gid sia sang mga kauturan!—Binu. 20:31-38.
(Binuhatan 20:35) Ginpakita ko sa inyo sa tanan nga butang nga paagi sa sini nga pagpangabudlay dapat ninyo buligan ang mga maluya kag dapat ninyo dumdumon ang ginsiling ni Ginuong Jesus: ‘Mas malipayon ang nagahatag sangsa nagabaton.’”
“Matinlo Ako sa Dugo sang Tanan nga Tawo”
20 Ang kabuhi ni Pablo tuhay gid sa kabuhi sang mga magahimulos sa ulihi sang panong. Nag-obra sia agod indi mapabug-atan ang kongregasyon. Ginabuligan niya ang iya masigkatumuluo kag wala sia magpaabot sing balos. Ginpalig-on ni Pablo ang mga gulang sa Efeso nga magsakripisyo. “Dapat ninyo buligan ang mga maluya,” siling niya sa ila, “kag dapat ninyo dumdumon ang mga pulong ni Ginuong Jesus, sang sia mismo nagsiling, ‘May kapin nga kalipay sa paghatag sangsa pagbaton.’”—Binu. 20:35.
Pagkutkot sing Espirituwal nga mga Hiyas
(Binuhatan 19:9) Apang sang indi gid magpati ang iban kag ginpakalain pa nila Ang Dalan sa atubangan sang mga tawo, naglakat si Pablo kag gin-upod niya ang mga disipulo. Didto sia sa awditoryum sang eskwelahan ni Tirano nagpamulongpulong adlaw-adlaw.
“Nagatubo kag Nagamadinalag-on” Bisan May Pagpamatok
11 Posible nga nagapamulongpulong si Pablo sa awditoryum sang eskwelahan kada adlaw sugod sa alas onse sang aga asta alas kuatro sang hapon. (Binu. 19:9) Mahimo nga amo ini ang labing malinong kag magin-ot nga inoras kay madamo ang nagauntat sa ila trabaho agod magkaon kag magpahuwayhuway. Handurawa nga kon duha ka tuig ini nga ginhimo ni Pablo, sobra sa 3,000 ka oras ang iya nagamit sa pagpanudlo. Isa pa ini sa mga rason kon ngaa nagatubo kag nagamadinalag-on ang pulong ni Jehova. Mapisan si Pablo kag mapasibusibuon. Ginbag-o niya ang iya iskedyul agod mangin epektibo ang iya ministeryo sa komunidad. Ano ang resulta? “Nakabati sang pulong sang Ginuo ang tanan nga nagapuyo sa distrito sang Asia nga mga Judiyo kag mga Griego.” (Binu. 19:10) Maid-id gid ang iya pagpanaksi!
(Binuhatan 19:19) Gintipon man sang madamo nga nagahimo sing madyik ang ila mga libro kag ginsunog nila ini sa atubangan sang tanan. Sa pag-isip nila, nagabili ini tanan sing 50,000 ka bilog nga pilak.
“Nagatubo kag Nagamadinalag-on” Bisan May Pagpamatok
15 Subong resulta sang pagpakahuya sa mga anak nga lalaki ni Sceva, naglapnag ang kahadlok sa Dios amo nga madamo ang nangin tumuluo kag nagbiya sa espiritistiko nga mga buhat. Daku gid ang impluwensia sang madyik sa kultura sang Efeso. Ang mga panghiwit kag anting-anting kinaandan lang, subong man ang mga orasyon nga sa masami mabasa sa mga sinulatan. Madamo nga taga-Efeso ang nagpagua sang ila mga libro tuhoy sa madyik kag nagsunog sini sing dayag, bisan pa nga linibolibo ka dolyar ang bili sini karon. Si Lucas nagreport: “Busa sa gamhanan nga paagi ang pulong ni Jehova padayon nga nagatubo kag nagamadinalag-on.” (Binu. 19:17-20) Tumalagsahon gid ini nga pamatuod nga ginadaug sang kamatuoran ang kabutigan kag demonismo! Ining matutom nga mga tawo nagpahamtang sing maayong halimbawa sa aton. Nagakabuhi man kita sa isa ka kalibutan nga naimpluwensiahan sang espiritismo. Kon may ginapanag-iyahan kita nga mga butang nga naangot sa espiritismo, dapat himuon man naton ang ginhimo sang mga taga-Efeso nga ginsunog dayon ini! Isikway naton inang makangilil-ad nga mga buhat, bisan ano pa kadaku ang bili sini.
Pagbasa sa Biblia
(Binuhatan 19:1-20) Sang didto si Apolos sa Corinto, nagkadto si Pablo sa kabukiran sang Asia kag nagdulhog sa Efeso. May nakita sia nga pila ka disipulo didto. 2 Ginpamangkot niya sila: “Nakabaton bala kamo sing balaan nga espiritu sang nangin tumuluo kamo?” Nagsabat sila: “Wala gid kami makabati nga may balaan nga espiritu.” 3 Gani nagsiling sia: “Kon amo, sa ano nga sahi sang bawtismo ginbawtismuhan kamo?” Nagsiling sila: “Ginbawtismuhan kami suno sa panudlo ni Juan.” 4 Nagsiling si Pablo: “Ang bawtismo nga ginhimo ni Juan isa ka simbulo sang paghinulsol kag ginsilingan niya ang mga tawo nga dapat sila magtuo sa isa nga nagasunod sa iya, nga amo si Jesus.” 5 Pagkabati nila sini, nagpabawtismo sila sa ngalan ni Ginuong Jesus. 6 Kag sang gintungtong ni Pablo ang iya mga kamot sa ila, nakabaton sila sing balaan nga espiritu, kag naghambal sila sing lainlain nga lenguahe kag nagpanagna. 7 Mga 12 ka lalaki sila tanan. 8 Sa sulod sang tatlo ka bulan, nagkadto si Pablo sa sinagoga kag naghambal nga may kaisog. Nagpamulongpulong sia tuhoy sa Ginharian sang Dios kag nagagamit sia sing mga pangatarungan agod makumbinsi ang mga tawo. 9 Apang sang indi gid magpati ang iban kag ginpakalain pa nila Ang Dalan sa atubangan sang mga tawo, naglakat si Pablo kag gin-upod niya ang mga disipulo. Didto sia sa awditoryum sang eskwelahan ni Tirano nagpamulongpulong adlaw-adlaw. 10 Nagtudlo sia sa sini nga eskwelahan sa sulod sang duha ka tuig, amo nga nakabati sang pulong sang Ginuo ang tanan nga Judiyo kag Griego nga nagaistar sa probinsia sang Asia. 11 Padayon nga naghimo ang Dios sing tumalagsahon nga mga buhat paagi kay Pablo, 12 amo nga bisan ang iya mga panyo kag mga tampi gindala sa nagamasakit nga mga tawo, kag nag-ayo sila, kag naggua man ang mga demonyo. 13 Apang may pila man ka Judiyo nga nagalibot kag nagapanabog sang mga demonyo. Gintilawan nila nga gamiton ang ngalan ni Ginuong Jesus sa mga tawo nga may demonyo, nga nagasiling: “Sa ngalan ni Jesus nga ginabantala ni Pablo, ginasugo ko nga maggua kamo.” 14 Ginahimo ini sang pito ka anak nga lalaki ni Sceva, nga isa ka Judiyo nga puno nga saserdote. 15 Apang nagsiling sa ila ang demonyo: “Kilala ko si Jesus kag si Pablo; apang sin-o kamo?” 16 Dayon gindamhagan sila sang tawo nga may demonyo, kag nadaug niya sila, amo nga nagpalagyo sila sa sadto nga balay nga naubahan kag pilason. 17 Nabalitaan ini sang tanan nga Judiyo kag Griego nga nagaistar sa Efeso. Hinadlukan sila tanan kag padayon nga ginpadunggan ang ngalan ni Ginuong Jesus. 18 Madamo nga tumuluo ang nagkadto kag nagtu-ad nga nakasala sila. 19 Gintipon man sang madamo nga nagahimo sing madyik ang ila mga libro kag ginsunog nila ini sa atubangan sang tanan. Sa pag-isip nila, nagabili ini tanan sing 50,000 ka bilog nga pilak. 20 Gani padayon nga naglapnag kag nagmadinalag-on ang pulong ni Jehova sa gamhanan nga paagi.