Mga Reperensia Para sa Pagkabuhi kag Pagministeryo nga Workbook Para sa Miting
ABRIL 1-7
MGA BAHANDI SA PULONG SANG DIOS | 1 CORINTO 7-9
“Pagkadiminyo—Isa ka Regalo”
(1 Corinto 7:32) Luyag ko nga mahilway kamo sa mga kabalaka. Ang lalaki nga wala sing asawa nagakabalaka lamang sa mga butang sang Ginuo, bangod luyag niya pahamut-an ang Ginuo.
Gamita ang Imo Pagkadiminyo sa Labing Mapuslanon nga Paagi
Sa masami, ang di-minyo nga tawo may mas madamo nga tion kag kahilwayan sangsa isa nga minyo. (1 Cor. 7:32-35) May kahigayunan sia nga mapasangkad ang iya ministeryo kag gugma sa iban kag mangin suod kay Jehova. Gani, nakita sang pila ka Cristiano ang mga bentaha sang pagkadiminyo amo nga nagdesisyon sila nga ‘hatagan anay ini sing lugar.’ Mahimo nga wala man sa plano sang iban nga mangin di-minyo, apang sang nagbag-o ang ila kahimtangan, ginpangamuyo nila kay Jehova nga buligan sila nga batunon ini kag magpabilin na lang nga di-minyo.—1 Cor. 7:37, 38.
(1 Corinto 7:33, 34) Apang ang lalaki nga may asawa nagakabalaka sa mga butang sang kalibutan, bangod luyag niya pahamut-an ang iya asawa, 34 gani natunga ang iya hunahuna. Ang babayi nga wala sing bana ukon ang birhen nagakabalaka man sa mga butang sang Ginuo, agod mangin balaan sia sa iya lawas kag sa iya espiritu. Apang, ang babayi nga may bana nagakabalaka sa mga butang sang kalibutan, bangod luyag niya pahamut-an ang iya bana.
Talalupangdon nga mga Punto Gikan sa mga Tulun-an sang Corinto
7:33, 34—Ano nga “mga butang sang kalibutan” ang ginakabalak-an sang minyo nga lalaki ukon babayi? Ginapatuhuyan ni Pablo ang kinaandan nga mga kinahanglanon sa kabuhi nga dapat kabalak-an sang minyo nga mga Cristiano. Nalakip sa sini ang pagkaon, panapton, kag puluy-an, apang wala diri nalakip ang malain nga mga butang sining kalibutan nga ginalikawan sang mga Cristiano.—1 Juan 2:15-17.
(1 Corinto 7:37, 38) Apang kon ang bisan sin-o namat-od sa iya tagipusuon nga indi magminyo kag determinado sia sa paghimo sini, bangod indi kinahanglan nga magminyo sia kag mapunggan niya ang iya kaugalingon, maayo ang iya ginahimo. 38 Gani maayo ang ginahimo sang isa nga nagaminyo, apang mas maayo pa gid ang ginahimo sang wala nagaminyo.
Pagkadiminyo—Ganhaan Padulong sa Walay Tublag nga Hilikuton
Ang diminyo nga Cristiano nga nagagamit sang iya diminyo nga kahimtangan sa pagtigayon sing makagod nga mga tulumuron wala nagahimo sing “maayo pa” sangsa minyo nga mga Cristiano. Nagapabilin sia nga diminyo, indi “tungod sa ginharian,” kundi tungod sa personal nga mga rason. (Mateo 19:12) Ang diminyo nga lalaki ukon babayi dapat “nabalaka sa mga butang sang Ginuo,” nabalaka sa “pagtigayon sing kahamuot sang Ginuo,” kag ‘dalayon nga nagaalagad sa Ginuo nga wala sing tublag.’ Nagakahulugan ini sang paghugod sing dinabahinbahin nga igtalupangod sa pag-alagad kay Jehova kag kay Cristo Jesus. Paagi lamang sa paghimo sini nga ang diminyo nga Cristianong mga lalaki kag mga babayi nagahimo sing “maayo pa” sangsa minyo nga mga Cristiano.
Pagkutkot sing Espirituwal nga mga Hiyas
(1 Corinto 7:11) Apang kon magbulag sia, dapat magpabilin sia nga indi minyo ukon magbalik sa iya bana; kag ang bana indi dapat magbiya sa iya asawa.
lvs 250-251
Endnote
Kon kaisa, may pila ka Cristiano nga nagadesisyon sa pagbulag sa ila tiayon bisan wala pa sing imoralidad nga nahimo. (1 Corinto 7:11) Ang isa ka Cristiano mahimo makabulag sa masunod nga mga sitwasyon.
• Hungod nga indi pagsuporta: Indi magsuporta ang bana sa materyal nga kinahanglanon sang iya pamilya, tubtob nga ang iya pamilya wala na sing kuarta ukon kalan-on.—1 Timoteo 5:8.
• Grabe nga pag-abuso sa pisikal: Naglab-ot sa punto nga ang pag-abuso nagbutang na sa katalagman sa kapagros ukon kabuhi sang tiayon.—Galacia 5:19-21.
• Nabutang sa katalagman ang kaangtanan sang isa kay Jehova: Kon magpabilin nga mag-asawa, indi na posible nga makaalagad ang tiayon kay Jehova.—Binuhatan 5:29.
(1 Corinto 7:36) Apang kon ang bisan sin-o nagahunahuna nga indi niya mapunggan ang silabo sang iya balatyagon kag kon indi na sia tuman kabata, amo ini ang dapat niya himuon: Magminyo sia kon luyag niya; wala sia nakasala. Magminyo na lang sila.
Makapabilin Ikaw nga Putli sa Isa ka Imoral nga Kalibutan
Busa, ang mga lamharon indi dapat magdalidali sa pagminyo kon makabatyag sila sang nahauna nga pagsilabo sang seksuwal nga mga balatyagon. Ang pagminyo nagakinahanglan sing isa ka kasugtanan, kag ang pagkabuhi sa sina nga responsabilidad nagakinahanglan sang pagkahamtong. (Genesis 2:24) Mas maayo nga maghulat tubtob ang isa “nakalipas sa kapagsik sang pagkabatan-on”—ang tinion nga ang mga balatyagon sa sekso mabaskog kag makapatiko sang paghukom sang isa. (1 Corinto 7:36) Kag daw ano ka di-maalamon kag sayop para sa isa ka hamtong nga maluyag magminyo nga madalahig sa imoral nga mga relasyon bangod lamang nga wala sing mahimo pakaslan!
Pagbasa sa Biblia
(1 Corinto 8:1-13) Karon, tuhoy sa pagkaon nga ginhalad sa mga diosdios: Tanan kita may ihibalo tuhoy sa sini. Ang ihibalo mahimo bangdan sang pagpahambog, apang ang gugma nagapalig-on. 2 Kon nagahunahuna ang isa nga may nahibaluan sia, wala pa niya mahibalui ang tanan nga dapat niya mahibaluan. 3 Apang kon ang isa nagahigugma sa Dios, kilala niya sia. 4 Gani, tuhoy sa pagkaon sa mga ginhalad sa mga diosdios, nakahibalo kita nga ang diosdios wala sing pulos, kag may isa lang ka Dios. 5 Kay bisan pa may ginatawag nga mga dios, sa langit man ukon sa duta, kag may madamo nga “mga dios” kag madamo nga “mga ginuo,” 6 apang para sa aton may isa lang ka Dios, ang Amay, nga nagtuga sang tanan nga butang kag nagluntad kita para sa iya; kag may isa ka Ginuo, si Jesucristo, nga paagi sa iya nahimo ang tanan nga butang kag nagluntad kita paagi sa iya. 7 Apang, indi tanan nakahibalo sini. Ang iban nagasimba anay sa mga diosdios, kag kon magkaon sila, nagahunahuna sila nga ang ila ginakaon ginhalad sa mga diosdios, gani nadagtaan ang ila maluya nga konsiensia. 8 Apang ang pagkaon indi makapasuod sa aton sa Dios; kon indi kita magkaon, wala sing madula sa aton, kag kon magkaon kita, wala sing madugang sa aton. 9 Apang mag-andam kamo nga ang inyo kinamatarong sa pagpili indi mangin kasandaran sa mga maluya. 10 Kay kon ikaw nga may ihibalo makita nga nagakaon sa templo sang diosdios, indi bala mangisog ang konsiensia sang maluya nga magkaon sang ginhalad sa mga diosdios? 11 Gani tungod sa imo ihibalo, nahalitan ang tawo nga maluya, ang imo utod nga para sa iya napatay ang Cristo. 12 Kon sa sini nga paagi makasala kamo sa inyo kauturan kag mapilasan ninyo ang ila maluya nga konsiensia, nagapakasala kamo sa Cristo. 13 Gani, kon ang pagkaon makapasandad man lang sa akon utod, indi na gid ako magkaon sang karne tubtob san-o, agod indi ko mapasandad ang akon utod.
ABRIL 8-14
MGA BAHANDI SA PULONG SANG DIOS | 1 CORINTO 10-13
“Matutom si Jehova”
(1 Corinto 10:13) Wala sing pagsulay nga nagaabot sa inyo nga wala maagihan sang iban. Apang ang Dios matutom, kag indi sia magtugot nga sulayon kamo labaw sa inyo masarangan, apang kon mag-abot ang pagsulay magahimo man sia sang lulutsan agod mabatas ninyo ini.
Mga Pamangkot Gikan sa mga Bumalasa
Si apostol Pablo nagsulat nga si Jehova ‘indi magtugot nga sulayon kamo labaw sa inyo masarangan.’ (1 Cor. 10:13) Ginapahangop bala sini nga ginahibalo sing abanse ni Jehova ang aton masarangan kag dayon ginapili niya ang mga pagtilaw nga aton atubangon?
▪ Kon matuod ini, binagbinaga ang mahimo mangin epekto sini sa aton. Halimbawa, ang isa ka utod nga may anak nga naghikog namangkot: ‘Ginhibalo bala sing abanse ni Jehova nga masarangan namon sang akon asawa ang paghikog sang amon anak? Natabo bala ini bangod nahibaluan sang Dios nga mabatas namon ini?’ May basihan bala nga magpati nga ginahimo ini ni Jehova kag ginamaniobra niya ang mga nagakatabo sa aton kabuhi?
Kon binagbinagon gid naton sing maayo ang ginsiling ni Pablo sa 1 Corinto 10:13, amo ini ang aton mangin konklusion: Wala sing basihan sa Kasulatan nga magpati nga ginahibalo sing abanse ni Jehova ang aton masarangan kag dayon ginapili niya ang mga pagtilaw nga aton atubangon base sa sini. Binagbinagon naton ang apat ka rason kon ngaa amo sini ang aton konklusion.
Una, ginhatagan ni Jehova ang mga tawo sing kahilwayan sa pagdesisyon. Gusto niya nga kita ang magdesisyon sa aton kabuhi. (Deut. 30:19, 20; Jos. 24:15) Kon himuon naton ang husto, tuytuyan kita ni Jehova. (Hulu. 16:9) Kon himuon naton ang malain, anihon naton ang indi maayo nga resulta. (Gal. 6:7) Gani, kon pilion nga daan ni Jehova ang mga pagtilaw nga aton atubangon, ngaa ginhatagan pa niya kita sing kahilwayan sa pagdesisyon?
Ikaduha, wala kita ginaamligan ni Jehova sa ‘tion kag wala ginapaabot nga hitabo.’ (Man. 9:11) Mahimo matabuan nga mabiktima kita sang aksidente kay wala man kita makahibalo kon diin nga lugar kag kon ano nga oras posible may aksidente. May ginsiling si Jesus parte sa isa ka aksidente sang narumpag ang isa ka torre nga nagpatay sa 18 ka tawo, kag ginpaathag niya nga indi ini pagbuot sang Dios. (Luc. 13:1-5) Makatarunganon gid bala patihan nga ginahibalo sing abanse sang Dios kon sin-o ang mapatay ukon indi sa mga aksidente?
Ikatlo, ang kada isa sa aton nadalahig sa isyu parte sa integridad. Dumduma nga ginkuestyon ni Satanas ang integridad sang tanan nga nagaalagad kay Jehova, kag nagsiling sia nga wala sing makapabilin nga matutom kay Jehova kon tilawan sila. (Job 1:9-11; 2:4; Bug. 12:10) Kon pahanabuon ni Jehova nga indi naton maatubang ang isa ka sahi sang pagtilaw kay indi naton ini masarangan, indi bala nga daw husto ang panumbungon ni Satanas nga nagaalagad lang kita sa Dios para sa aton kaayuhan?
Ikap-at, indi kinahanglan nga hibaluon ni Jehova ang tanan nga mahimo matabo sa aton. Para mahibaluan sang Dios kon ano nga mga pagtilaw ang aton atubangon, dapat niya hibaluon ang tanan parte sa aton palaabuton. Pero wala ini ginasakdag sang Kasulatan. Masarangan sang Dios hibaluon ang palaabuton. (Isa. 46:10) Pero ginapakita sang Biblia nga ginapili lang ni Jehova ang iya ginahibalo sa palaabuton. (Gen. 18:20, 21; 22:12) Gani ginabalanse niya ang iya gahom sa paghibalo sang palaabuton kag ang pagtahod niya sa aton kahilwayan sa pagdesisyon. Indi bala nga amo sini ang mapaabot naton sa Dios nga nagapabalor sang aton kahilwayan kag nagagamit sang iya mga kinaiya sa husto nga paagi?—Deut. 32:4; 2 Cor. 3:17.
Gani, ano ang buot silingon sang ginsiling ni Pablo nga ‘ang Dios indi magtugot nga sulayon kamo labaw sa inyo masarangan’? Ginalaragway ni Pablo ang ginahimo ni Jehova sa tion sang pagtilaw, indi antes sini. Ang ginsiling sang apostol nagapasalig sa aton nga bisan ano man nga pagtilaw ang maatubang naton, buligan kita ni Jehova kon magsalig kita sa iya. (Sal. 55:22) Ang makapalig-on nga ginsiling ni Pablo nabase sa duha ka kamatuoran.
Una, ang mga pagtilaw nga aton ginaatubang ‘naagihan man sang iban.’ Gani ang mga pagtilaw indi tumalagsahon. Masarangan naton ini basta magsalig kita sa Dios. (1 Ped. 5:8, 9) Sa konteksto sang 1 Corinto 10:13, ginpatuhuyan ni Pablo ang mga pagtilaw nga naatubang sang Israel sa kamingawan. (1 Cor. 10:6-11) Ining mga pagtilaw indi tumalagsahon kag masarangan ini sang matutom nga mga Israelinhon. Pero, apat ka beses nga nagsiling si Pablo nga ang “iban sa ila” wala nagtuman. Makapasubo nga ginsunod sang pila ka Israelinhon ang ila malain nga mga handum kay wala sila nagsalig sa Dios.
Ikaduha, “ang Dios matutom.” Ginapakita sang mga pagpakig-angot sang Dios sa iya katawhan nga ginapakitaan niya sang iya mainunungon nga gugma ang “mga nagahigugma sa iya kag [ang] mga nagatuman sang iya mga sugo.” (Deut. 7:9) Ginapakita man sini nga ginatuman pirme sang Dios ang iya mga saad. (Jos. 23:14) Base sa sining mga pamatuod sang katutom ukon pagkamasaligan ni Jehova, ang mga nagahigugma kag nagatuman sa iya makasalig nga tumanon niya ang iya duha ka promisa kon makaatubang sila sing mga pagtilaw: (1) Indi niya pagtugutan nga ang isa ka pagtilaw mangin mabudlay nga indi na masarangan, kag (2) “magahimo . . . sia sang lulutsan.”
Paano nagahimo si Jehova sang lulutsan para sa mga nagasalig sa iya? Kon kabubut-on niya, mahimo niya kuhaon ang pagtilaw. Pero dumduma ang ginsiling ni Pablo: “Magahimo man sia [si Jehova] sang lulutsan agod mabatas ninyo ini.” Gani, masami nga nagahimo sia sang “lulutsan” paagi sa pagbulig sa aton nga mabatas ang mga pagtilaw. Binagbinaga ang pila ka paagi nga nagahimo si Jehova sang lulutsan para sa aton:
▪ “Nagalugpay [sia] sa aton sa tanan naton nga mga pagtilaw.” (2 Cor. 1:3, 4) Mapakalma ni Jehova ang aton hunahuna, tagipusuon, kag ginabatyag paagi sa iya Pulong, balaan nga espiritu, kag espirituwal nga pagkaon nga ginaaman sang matutom nga ulipon.—Mat. 24:45; Juan 14:16, footnote; Roma 15:4.
▪ Mahimo niya kita tuytuyan paagi sa iya balaan nga espiritu. (Juan 14:26) Kon may mga pagtilaw, ang balaan nga espiritu makabulig sa aton nga madumduman ang mga kasaysayan kag prinsipio sa Biblia para makahimo kita sing husto nga desisyon.
▪ Mahimo niya gamiton ang iya mga anghel para buligan kita.—Heb. 1:14.
▪ Mahimo niya kita buligan paagi sa aton mga kauturan. Ang ila mga ginasiling kag ginahimo puede mangin “nagapabakod nga bulig” para sa aton.—Col. 4:11, footnote.
Gani, ano ang mahinakop naton parte sa ginsiling ni Pablo sa 1 Corinto 10:13? Wala ginapili ni Jehova ang mga pagtilaw nga aton ginaatubang. Pero kon may mga pagtilaw sa aton kabuhi, makasalig kita sa sini: Kon bug-os kita nga nagasalig kay Jehova, indi niya pagtugutan nga ang mga pagtilaw sa aton mangin mabudlay nga indi na masarangan; magahimo sia pirme sang lulutsan para mabatas naton ini. Makapalig-on gid ini!
(1 Corinto 10:13) Wala sing pagsulay nga nagaabot sa inyo nga wala maagihan sang iban. Apang ang Dios matutom, kag indi sia magtugot nga sulayon kamo labaw sa inyo masarangan, apang kon mag-abot ang pagsulay magahimo man sia sang lulutsan agod mabatas ninyo ini.
(1 Corinto 10:13) Wala sing pagsulay nga nagaabot sa inyo nga wala maagihan sang iban. Apang ang Dios matutom, kag indi sia magtugot nga sulayon kamo labaw sa inyo masarangan, apang kon mag-abot ang pagsulay magahimo man sia sang lulutsan agod mabatas ninyo ini.
Pagkutkot sing Espirituwal nga mga Hiyas
(1 Corinto 10:8) Indi man kita maghimo sang seksuwal nga imoralidad, subong sang ginhimo sang iban sa ila, amo nga 23,000 sa ila ang napatay sa isa ka adlaw.
Mga Pamangkot Gikan sa mga Bumalasa
Ngaa ang 1 Corinto 10:8 nagasiling nga 23,000 ka Israelinhon ang napukan sa isa ka adlaw bangod sang pagpakighilawas, samtang ang Numeros 25:9 nagasiling nga 24,000?
May pila ka rason nga mahimo magpaathag sa sining kinatuhayan sa kadamuon nga ginsambit sa duha ka bersikulo. Ang pinakasimple mahimo nga ang matuod nga kadamuon yara sa ulot sang 23,000 kag 24,000, sa amo ginbilog ang numero agod nga wala ini sing waki sa taglinibo nga pag-isip (round off).
Binagbinaga ang isa pa ka posibilidad. Ginsambit ni apostol Pablo ang kasaysayan sang mga Israelinhon sa Sitim subong nagapaandam nga halimbawa sa mga Cristiano sa dumaan nga Corinto, isa ka siudad nga bantog sa imoral nga dalanon sang pagkabuhi. Sia nagsulat: “Dili kita magpakighilawas subong sang ginhimo sang iban sa ila, kag sa isa ka adlaw nagkapukan ang duha ka pulo kag tatlo ka libo.” Ginapatuhuyan ang mga ginpatay ni Jehova bangod sang pagpakighilawas, ginsambit ni Pablo ang kadamuon nga 23,000.—1 Corinto 10:8.
Apang, ang Numeros kapitulo 25 nagasugid sa aton nga “ang Israel nagsimpon kay Baal-peor. Kag ang kaakig sang GINUO nagdabdab batok sa Israel.” Nian, ginsugo ni Jehova si Moises nga patyon “ang tanan nga puno sang katawhan.” Kag ginsugo ni Moises ang mga hukom nga himuon ini nga sugo. Sang ulihi, sang ginpatay ni Finehas ang Israelinhon nga nagdala sing Midianhon nga babayi sa kampo, “nagtunong ang kamatay.” Ang kasaysayan natapos paagi sa pinamulong: “Sila nga napatay sa kamatay duha ka pulo kag apat ka libo.”—Numeros 25:1-9.
Ang kadamuon nga ginhatag sa Numeros maathag nga naglakip sa “puno sang katawhan” nga ginpatay sang mga hukom kag sa mga ginpatay sing direkta ni Jehova. Ayhan mga isa ka libo ang mga puno nga ginpatay sang mga hukom, amo nga nangin 24,000 ang kadamuon. Kon bala ining mga puno, ukon mga lider, nagpakighilawas, nagpakigbahin sa mga kapiestahan, ukon nagkunsinti sa mga naghimo sini, nakasala sila paagi sa ‘pagsimpon kay Baal-peor.’
Tuhoy sa tinaga nga ‘pagsimpon,’ ginapaathag sang isa ka reperensia sa Biblia nga mahimo ini magkahulugan sing “pag-angot sang isa sa isa ka tawo.” Ang mga Israelinhon mga katawhan nga dedikado kay Jehova, apang sang ‘nagsimpon sila kay Baal-peor,’ ginguba nila ang ila pagkadedikado sa Dios. Pagligad sang mga 700 ka tuig, paagi kay manalagna Oseas, nagsiling si Jehova tuhoy sa mga Israelinhon: “Nagkadto sila sa Baal-peor, kag nagtugyan sang ila kaugalingon sa butang nga makahuluya, kag nangin kalangil-aran kaangay sang ila ginhigugma.” (Oseas 9:10) Ang tanan nga naghimo sini takus sa mabug-at nga paghukom sang Dios. Sa amo, ginpahanumdom ni Moises ang mga anak sang Israel: “Ang inyo mga mata makakita sang ginhimo sang GINUO bangod sang Baal-peor; kay ang tanan nga tawo nga nagsunod sang Baal-peor ginlaglag sila sang GINUO nga imo Dios gikan sa tunga ninyo.”—Deuteronomio 4:3.
(1 Corinto 11:5, 6) apang ang tagsa ka babayi nga nagapangamuyo ukon nagapanagna nga wala sing pandong sa ulo nagapakahuya sang iya ulo, kay pareho lang sia sa isa ka babayi nga ginkiskisan ang ulo. 6 Kay kon ang isa ka babayi wala nagapandong, dapat sia magpautod sang buhok; apang kon makahuluya sa isa ka babayi nga magpautod sang buhok ukon magpakiskis sang ulo, dapat sia magpandong.
(1 Corinto 11:10) Amo kon ngaa ang babayi dapat may tanda sang pagpasakop sa iya ulo bangod sa mga anghel.
Mga Pamangkot Gikan sa mga Bumalasa
Kinahanglan bala magtakdong ang babayi nga manugbantala sang Ginharian kon nagadumala sing pagtuon sa Biblia upod ang lalaki nga manugbantala?
▪ Ang “Mga Pamangkot Gikan sa mga Bumalasa” sa Hulyo 15, 2002 nga Ang Lalantawan, nagsiling nga dapat magtakdong ang utod nga babayi kon nagadumala sing pagtuon sa Biblia upod ang lalaki nga manugbantala, bawtismado man ukon indi. Ang dugang nga pagbinagbinag sini nagapakita nga kinahanglan bag-uhon ini nga panuytoy.
Kon bawtismado na ang lalaki nga manugbantala nga nagaupod sa utod nga babayi sa pagdumala sang regular nga pagtuon sa Biblia, dapat sia magtakdong. Ginatahod niya ang kahimusan ni Jehova sa pagkaulo sa sulod sang Cristianong kongregasyon bangod sia ang nagahimo sang katungdanan nga kinaandan na nga ginahimo sang mga utod nga lalaki. (1 Cor. 11:5, 6, 10) Pero mahimo niya pangabayon ang utod nga lalaki nga mangamuyo kon makasarang sia kag kalipikado.
Sa pihak nga bahin, kon ang upod sang utod nga babayi indi bawtismado nga manugbantala nga lalaki kag indi niya ini bana, wala na ginapatuman sang Kasulatan nga magtakdong sia. Pero, bangod sa konsiensia sang iban nga utod nga babayi, mahimo sila magtakdong sa sini nga kahimtangan.
Pagbasa sa Biblia
(1 Corinto 10:1-17) Mga kauturan, luyag ko nga mahibaluan ninyo nga ang tanan naton nga katigulangan ginlandungan sang panganod kag sila tanan nagtabok sa dagat. 2 Sila tanan ginbawtismuhan subong mga sumulunod ni Moises paagi sa panganod kag sa dagat, 3 kag sila tanan nagkaon sang pareho nga espirituwal nga pagkaon 4 kag sila tanan nag-inom sang pareho nga espirituwal nga tubig. Kay nag-inom sila halin sa espirituwal nga igang nga nagsunod sa ila, kag ina nga igang amo ang Cristo. 5 Apang, ang Dios wala mahamuot sa kalabanan sa ila, amo nga ginpamatay sila sa kamingawan. 6 Ini nga mga hitabo nangin mga halimbawa sa aton, agod indi kita maghandum sang makahalalit nga mga butang, subong sang ginhimo nila. 7 Indi man kita magsimba sa mga diosdios, subong sang ginhimo sang iban sa ila; subong sang nasulat na: “Nagkaon kag nag-inom ang katawhan, kag nagpangalipay sila.” 8 Indi man kita maghimo sang seksuwal nga imoralidad, subong sang ginhimo sang iban sa ila, amo nga 23,000 sa ila ang napatay sa isa ka adlaw. 9 Indi man naton pag-ibutang sa pagtilaw si Jehova, subong sang ginhimo sang iban sa ila, amo nga napatay sila paagi sa mga man-ug. 10 Indi man kita mangin palakumod, subong sang ginhimo sang iban sa ila, amo nga napatay sila paagi sa manuglaglag. 11 Ining mga butang nga natabo sa ila nangin halimbawa, kag ginsulat ini subong paandam sa aton nga nagakabuhi sa katapusan sang sistema sang mga butang. 12 Gani ang nagahunahuna nga nagatindog mag-andam nga indi sia matumba. 13 Wala sing pagsulay nga nagaabot sa inyo nga wala maagihan sang iban. Apang ang Dios matutom, kag indi sia magtugot nga sulayon kamo labaw sa inyo masarangan, apang kon mag-abot ang pagsulay magahimo man sia sang lulutsan agod mabatas ninyo ini. 14 Gani, mga hinigugma ko, indi kamo magsimba sa mga diosdios. 15 Mga mahinantupon kamo, gani magpamat-od kamo kon bala ang akon ginasiling husto ukon indi. 16 Ang kopa sang pagpakamaayo nga ginapasalamatan naton sa Dios, indi bala ini pagpakig-ambit sa dugo sang Cristo? Ang tinapay nga ginatipiktipik naton, indi bala ini pagpakig-ambit sa lawas sang Cristo? 17 Isa lang ang tinapay, gani bisan madamo kita, isa lang kita ka lawas, kay kita tanan nagapakig-ambit sa isa lang ka tinapay.
ABRIL 22-28
MGA BAHANDI SA PULONG SANG DIOS | 1 CORINTO 14-16
“Ang Dios ‘Magagahom sa Tanan’”
(1 Corinto 15:24, 25) Kag sa katapusan, kon malaglag na niya ang tanan nga panguluhan kag ang tanan nga awtoridad kag gahom, itugyan na niya ang Ginharian sa iya Dios kag Amay. 25 Kay kinahanglan maghari sia tubtob mabutang sang Dios ang tanan nga kaaway sa idalom sang iya mga tiil.
“Ang Kamatayon Dulaon”
10 “Ang katapusan” amo ang katapusan sang Isa ka Libo ka Tuig nga Paggahom ni Cristo, kon mapainubuson kag mainunungon nga matugyan ni Jesus ang Ginharian sa iya Dios kag Amay. (Bugna 20:4) Ang katuyuan sang Dios nga ‘tipunon liwat ang tanan nga butang kay Cristo’ matuman. (Efeso 1:9, 10) Apang, una, laglagon ni Cristo ang “tanan nga panguluhan kag ang tanan nga awtoridad kag gahom” nga nagapamatok sa kabubut-on sang Soberano nga Dios. Indi lamang ang paglaglag nga matabo sa Armagedon ang nalakip sa sini. (Bugna 16:16; 19:11-21) Si Pablo nagsiling: “Kinahanglan [si Cristo] maghari tubtob mabutang sang Dios ang tanan nga kaaway sa idalom sang iya tiil. Subong katapusan nga kaaway, ang kamatayon dulaon.” (1 Corinto 15:25, 26) Huo, ang tanan nga agi sang Adaniko nga sala kag kamatayon madula na. Nian, kinahanglan nga haw-asan sang Dios sing unod ang “handumanan nga mga lulubngan” paagi sa pagbanhaw sa mga patay.—Juan 5:28.
(1 Corinto 15:26) Kag ang kamatayon amo ang katapusan nga kaaway nga iya dulaon.
Tumanon sang Ginharian ang Kabubut-on sang Dios sa Duta
21 Pero kamusta naman ang kamatayon—ang resulta sang balatian kag indi malikawan nga resulta sang sala? Amo ini ang aton “katapusan nga kaaway,” ang kaaway nga pagaatubangon sang tanan nga indi himpit nga tawo pero indi nila madaug. (1 Cor. 15:26) Indi man bala madaug ni Jehova ang kamatayon? Talupangda ang tagna ni Isaias: “Dulaon niya sing dayon ang kamatayon, kag pahiran sang Soberanong Ginuong Jehova ang luha sa tanan nga nawong.” (Isa. 25:8) Mahanduraw mo bala ina nga tion? Wala na sing lubong, patyo, ukon luha sang kasubo! Sa baylo—may mga luha sang kalipay samtang ginatuman ni Jehova ang iya makakulunyag nga saad nga banhawon ang mga patay! (Basaha ang Isaias 26:19.) Sa katapusan, ang tanan nga pilas nga gintuga sang kamatayon magaayo na.
(1 Corinto 15:27, 28) Kay ang Dios “nagpasakop sang tanan nga butang sa idalom sang iya mga tiil.” Apang sang ginsiling nga ‘ang tanan nga butang ginpasakop,’ maathag nga wala ini nagalakip sa Isa nga nagpasakop sang tanan nga butang sa iya. 28 Apang kon mapasakop na ang tanan nga butang sa iya, ang Anak mismo magapasakop man sa Isa nga nagpasakop sang tanan nga butang sa iya, agod ang Dios gid lang ang magagahom sa tanan.
Paghidait sa Isa ka Libo ka Tuig —Kag sa Walay Katubtuban!
17 Wala na sing mas maayo pa nga paglaragway sa mahimayaon nga katapusan sangsa mga pinamulong nga “ang Dios mangin tanan nga butang sa tanan.” Ano ang buot silingon sini? Hunahunaa ang tion sa Eden sang ang perpekto nga mga tawo, nga sanday Adan kag Eva, bahin pa sang mahidaiton kag nahiusa nga pamilya ni Jehova sa bug-os nga uniberso. Si Jehova, nga Soberano sa Uniberso, ang naggahom sing direkta sa tanan niya nga tinuga, mga anghel man ukon tawo. Makakomunikar sila sing personal sa iya, makasimba, kag makabaton sang iya pagpakamaayo. Sia nangin “tanan nga butang sa tanan.”
Pagkutkot sing Espirituwal nga mga Hiyas
(1 Corinto 14:34, 35) ang mga babayi maghipos sa mga kongregasyon, kay wala sila ginatugutan sa paghambal. Sa baylo, magpasakop sila, subong sang ginasiling man sang Kasuguan. 35 Kon may butang nga wala nila mahangpan, sa balay na lang nila sila magpamangkot sa ila bana, kay makahuluya para sa isa ka babayi nga maghambal sa kongregasyon.
w12 9/1 9, kahon
Gindumilian Bala ni Apostol Pablo ang mga Babayi sa Paghambal?
“Ang mga babayi maghipos sa mga kongregasyon,” sulat ni apostol Pablo. (1 Corinto 14:34) Ano ang iya buot silingon? Ginpakanubo bala niya ang ila kaalam? Wala. Ang matuod, pirme niya ginpatuhuyan ang maayo nga panudlo sang mga babayi. (2 Timoteo 1:5; Tito 2:3-5) Sa iya sulat sa mga taga-Corinto, ginlaygayan ni Pablo indi lamang ang mga babayi kundi ang tagsa nga may dulot sa paghambal kag pagpanagna nga “maghipos” kon ang isa ka tumuluo nagahambal. (1 Corinto 14:26-30, 33) Mahimo nga ang pila ka Cristiano nga babayi gusto gid magpabutyag sang ila bag-o nga pagtuo amo nga nagasamulak sila sa humalambal para mamangkot, nga amo ang kinabatasan sa sina nga lugar. Para malikawan ina, ginpalig-on sila ni Pablo nga “magpamangkot sila sa ila bana sa ila balay.”—1 Corinto 14:35.
(1 Corinto 15:53) Kay ang madinulunton pagabayluhan sing indi madinulunton, kag ang mamalatyon pagabayluhan sing indi mamalatyon.
it-1-E 1197-1198
Indi madinulunton
Ang mga masigkamanunubli ni Jesus pagabanhawon sa pareho nga paagi sang iya pagkabanhaw. Pagabanhawon sila para makabaton indi lang sang kabuhi nga wala sing katapusan bilang espiritu nga mga tinuga kundi bilang imortal kag indi madinulunton. Nagkabuhi sila, nag-alagad sing matutom, kag napatay sa madinulunton nga tawhanon nga lawas, pero makabaton sila sang indi madinulunton nga espiritu nga lawas, subong sang ginsiling ni Pablo sa 1 Corinto 15:42-54. Gani ang imortalidad maathag nga nagapatuhoy sa klase sang ila kabuhi, nga wala sing katapusan kag indi malaglag, kag ang indi madinulunton maathag nga nagapatuhoy sa organismo ukon lawas nga ginhatag sang Dios sa ila, ang lawas nga indi madunot, maguba, ukon malaglag. Ginapakita sini nga ginhatagan sila sang Dios sing ikasarang nga mabuhi nga wala nagadepende sa iban nga enerhiya pareho sang iban niya nga tinuga, undanon man ukon espiritu. Nagapamatuod ini nga daku gid ang pagsalig sang Dios sa ila. Pero bisan independiente sila kag indi malaglag, indi buot silingon nga hilway na sila sa kontrol sang Dios; kag pareho sa ila Ulo nga si Jesucristo, padayon sila nga magapasakop sa kabubut-on kag panuytoy sang ila Amay.—1Co 15:23-28; tan-awa man ang imortalidad; kalag.
Pagbasa sa Biblia
(1 Corinto 14:20-40) Mga kauturan, indi kamo maghunahuna kaangay sang bata, kundi mangin kaangay kamo sang lapsag tuhoy sa kalainan, kag maghunahuna kamo kaangay sang hamtong. 21 Nasulat na sa Kasuguan: “‘Paagi sa lenguahe sang mga dumuluong kag sang mga estranghero magahambal ako sa sini nga katawhan, apang indi sila gihapon magpamati sa akon,’ siling ni Jehova.” 22 Gani ang paghambal sing lainlain nga lenguahe indi tanda para sa mga tumuluo kundi para sa mga indi tumuluo, samtang ang pagpanagna indi para sa mga indi tumuluo, kundi para sa mga tumuluo. 23 Gani kon ang bug-os nga kongregasyon nagatipon kag tanan sila nagahambal sang lainlain nga lenguahe, kag may magtambong nga ordinaryo nga mga tawo ukon mga indi tumuluo, indi bala sila magsiling nga mga buang kamo? 24 Apang kon tanan kamo nagapanagna kag kon may magtambong nga isa ka indi tumuluo ukon ordinaryo nga tawo, ang inyo ginasiling mangin sabdong sa iya kag mapahulag sia nga usisaon sing maayo ang iya kaugalingon. 25 Ang mga likom sang iya tagipusuon mangin hayag sa iya. Tungod sini magahapa sia kag magasimba sa Dios, kag magasiling: “Ang Dios yara gid sa inyo.” 26 Mga kauturan, ano ang dapat ninyo himuon? Kon nagatipon kamo, ang iban may salmo, ang iban nagapanudlo, ang iban may bugna, ang iban nagahambal sang lainlain nga lenguahe, kag ang iban nagapatpat. Himua ninyo ang tanan para pabakuron ang isa kag isa. 27 Kag kon may maghambal sang lainlain nga lenguahe, dapat duha ukon tatlo lang gid, kag indi sila magdungan, kag dapat may isa nga magpatpat. 28 Apang kon wala sing manugpatpat, dapat nga maghipos sia sa kongregasyon kag maghambal sa iya kaugalingon kag sa Dios. 29 Pahambala ang duha ukon tatlo ka manalagna, kag ang iban maghangop sang kahulugan sini. 30 Apang kon may makabaton sing bugna samtang nagatipon kamo, maghipos anay ang nagahambal. 31 Sa sini nga paagi, tanan kamo makabulosbulos sa pagpanagna, agod ang tanan makatuon kag mapalig-on. 32 Kag ang mga dulot sang espiritu sa mga manalagna dapat gamiton nila sa husto nga paagi. 33 Kay ang Dios indi Dios sang kagamo, kundi sang paghidait. Kaangay sang kahimtangan sa tanan nga kongregasyon sang mga balaan, 34 ang mga babayi maghipos sa mga kongregasyon, kay wala sila ginatugutan sa paghambal. Sa baylo, magpasakop sila, subong sang ginasiling man sang Kasuguan. 35 Kon may butang nga wala nila mahangpan, sa balay na lang nila sila magpamangkot sa ila bana, kay makahuluya para sa isa ka babayi nga maghambal sa kongregasyon. 36 Halin bala sa inyo ang pulong sang Dios, ukon kamo lang bala ang nakabaton sini? 37 Kon ang isa nagahunahuna nga sia manalagna ukon may dulot sang espiritu, dapat niya batunon nga ang mga ginsulat ko sa inyo sugo sang Ginuo. 38 Apang kon ang isa magbalewala sini, sia man balewalaon. 39 Gani mga kauturan ko, panikasugi ninyo nga magpanagna, apang indi ninyo pagdumilii ang iban nga maghambal sing lainlain nga lenguahe. 40 Kundi himua ninyo ang tanan sing nagakaigo kag suno sa kahimusan.
ABRIL 29–MAYO 5
MGA BAHANDI SA PULONG SANG DIOS | 2 CORINTO 1-3
“Si Jehova—‘Ang Dios nga Nagahatag sang Tanan nga Sahi sang Lugpay’”
(2 Corinto 1:3) nga nagalugpay sa aton sa tanan naton nga mga pagtilaw, agod malugpayan man naton ang iban sa ila mga pagtilaw paagi sa lugpay nga nabaton naton sa Dios.
“Maghibi Upod sa mga Tawo nga Nagahibi”
4 Ang aton Amay nga may mapinalanggaon nga kaluoy nakaeksperiensia man nga mapatyan sang pinalangga, pareho nanday Abraham, Isaac, Jacob, Moises, kag Hari David. (Num. 12:6-8; Mat. 22:31, 32; Binu. 13:22) Ginapasalig kita sang Pulong sang Dios nga ginakalangkagan kag ginahandum ni Jehova nga banhawon sila. (Job 14:14, 15) Sa sina nga tion, malipayon na sila kag may maayo nga panglawas. Dumduma man nga nag-antos kag napatay ang pinalangga gid nga Anak sang Dios, “ang iya kalipay.” (Hulu. 8:22, 30) Indi gid naton malaragway ang kasakit nga ginbatyag ni Jehova sadto.—Juan 5:20; 10:17.
(2 Corinto 1:4) nga nagalugpay sa aton sa tanan naton nga mga pagtilaw, agod malugpayan man naton ang iban sa ila mga pagtilaw paagi sa lugpay nga nabaton naton sa Dios.
“Maghibi Upod sa mga Tawo nga Nagahibi”
14 Gani indi man mahapos kon ano ang isiling sa isa nga nagapangasubo nga napatyan sang pinalangga. Pero ginasiling sang Biblia nga “ang pulong sang maalamon makapaayo.” (Hulu. 12:18) Para lugpayan ang iban, madamo ang naggamit sang brosyur nga Kon ang Isa nga Ginahigugma Mo Mapatay. Pero sa masami, ang pinakamaayo nga mabulig mo amo ang “maghibi upod sa mga tawo nga nagahibi.” (Roma 12:15) “Ginahibi ko na lang ang akon ginabatyag,” siling ni Gaby sang napatay ang iya bana. “Gani daw maumpawan ako kon updan ako sang akon mga abyan maghibi. Mabatyagan ko nga wala ako nagaisahanon sa akon kasubo.”
Pagkutkot sing Espirituwal nga mga Hiyas
(2 Corinto 1:22) Sia man ang nagbutang sang iya selyo sa aton kag naghatag sang espiritu sa aton tagipusuon subong garantiya sa kon ano ang magaabot.
Mga Pamangkot Gikan sa mga Bumalasa
Ano ang “garantiya” kag ang “selyo” nga nabaton sang kada hinaplas nga Cristiano halin sa Dios?—2 Cor. 1:21, 22; footnote.
▪ Garantiya: Suno sa isa ka reperensia, ang Griego nga tinaga nga ginbadbad “garantiya” sa 2 Corinto 1:22 isa ka “legal kag komersial nga tinaga” nga nagakahulugan “pauna nga bayad, deposito, putika, nga abanse nga ginabayad bilang bahin sang kabilugan nga presyo, kag ginasiguro sini nga legal ang pagpanag-iya sa isa ka butang, ukon ginahimo sini nga legal ang kontrata.” Kon ang isa ka Cristiano ginhaplasan sang balaan nga espiritu, makabaton sia sing garantiya, pero ang kabilugan nga bayad, ukon padya, amo ang pagsuklob sang indi madinulunton nga langitnon nga lawas nga ginlaragway sa 2 Corinto 5:1-5. Nalakip man sa padya ang kabuhi nga indi mamalatyon.—1 Cor. 15:48-54.
Sa moderno nga Griego, kaanggid sa sini ang tinaga nga ginagamit para sa engagement ring. Nagakaigo gid ini nga paglaragway sa mga hinaplas nga mangin bahin sang malaragwayon nga asawa sang Cristo.—2 Cor. 11:2; Bug. 21:2, 9.
▪ Selyo: Ginagamit sang una ang selyo subong pamatuod sang pagpanag-iya, pagkamasaligan, ukon kasugtanan. Sa bahin sang mga hinaplas, ginselyuhan ukon “ginpat-inan” sila sang balaan nga espiritu sa malaragwayon nga paagi nga nagapakita nga ginapanag-iyahan sila sang Dios. (Efe. 1:13, 14) Pero, indi permanente ini nga selyo. Mangin permanente ini sa isa ka matutom antes sia mapatay ukon antes magsugod ang dakung kapipit-an.—Efe. 4:30; Bug. 7:2-4.
(2 Corinto 2:14-16) Apang salamat sa Dios nga pirme nagapanguna sa aton sa parada sang kadalag-an upod sa Cristo kag nagapaamyon sang ihibalo tuhoy sa iya sa tanan nga lugar paagi sa aton! 15 Kay para sa Dios kaangay kita sang mahamot nga kaamyon sang balita tuhoy sa Cristo nga mapanimahuan sang mga nagakaluwas pati na sang mga nagakalaglag. 16 Para sa mga nagakalaglag kaamyon ini sang kamatayon nga nagaresulta sa kamatayon, kag sa mga nagakaluwas kaamyon ini sang kabuhi nga nagaresulta sa kabuhi. Kag sin-o ang kalipikado gid sa sini nga pag-alagad?
Nahibaluan Mo Bala?
Ano ang ginpatuhuyan ni apostol Pablo sang ginhinambitan niya “ang parada sang kadalag-an”?
▪ Si Pablo nagsiling: Ang “Dios . . . nagapanguna sa aton sa parada sang kadalag-an upod kay Cristo kag nagapadayag sang kaamyon sang ihibalo tuhoy sa iya sa tanan nga duog paagi sa aton! Kay para sa Dios kita mahumot nga kaamyon ni Cristo sa tunga sang mga nagakaluwas kag sa tunga sang mga nagakalaglag; sa mga nagakalaglag kaamyon sang kamatayon nga nagaresulta sa kamatayon, kag sa mga nagakaluwas kaamyon sang kabuhi nga nagaresulta sa kabuhi.”—2 Corinto 2:14-16.
Ang ginapatuhuyan ni Pablo amo ang prosesyon nga kinaandan na nga ginahimo sang mga Romano para padunggan ang isa ka heneral nga nagdaug sa inaway. Sa sini nga prosesyon, ginaparada ang mga inagaw kag mga bihag. Nagahinugyaw ang mga tawo samtang nagaagi ang heneral kag ang iya mga soldado. May mga baka nga ginadala sa halaran kag ginahalad pagkatapos sang prosesyon. Mahimo nga ginapatay man ang kalabanan nga bihag.
Ang metapora nga “mahumot nga kaamyon ni Cristo” nga nagapahangop sing kabuhi para sa pila ka tawo kag kamatayon naman sa iban, “mahimo naghalin sa kinabatasan sang mga Romano nga pagsunog sing incienso samtang nagaprosesyon,” siling sang The International Standard Bible Encyclopedia. “Ang kaamyon nga simbulo sang kadalag-an nagapahanumdom sa mga bihag nga dali na lang sila patyon.”
Pagbasa sa Biblia
(2 Corinto 3:1-18) Kinahanglan pa bala namon ipakilala liwat ang amon kaugalingon? Ukon pareho sa iban nga tawo, kinahanglan pa bala namon ang mga sulat nga nagadayaw sa amon? Ukon kamo bala ang magahatag sini sa amon? 2 Kamo mismo ang amon sulat, nga nasulat sa amon tagipusuon kag nahibaluan kag ginabasa sang tanan nga katawhan. 3 Kay ginapakita nga kamo sulat sang Cristo nga ginsulat namon subong mga ministro, nga ginsulat indi paagi sa tinta kundi paagi sa espiritu sang buhi nga Dios, indi sa mga tapitapi nga bato kundi sa undanon nga mga tapitapi, sa mga tagipusuon. 4 Paagi sa Cristo may amo kami sini nga sahi sang pagsalig sa Dios. 5 Wala kami nagasiling nga kalipikado gid kami nga himuon ini nga hilikuton, kundi ang amon pagkakalipikado halin sa Dios, 6 nga naghimo sa amon nga kalipikado gid nga mangin mga ministro sang bag-o nga katipan, indi sang nasulat nga kasuguan, kundi sang espiritu; kay ang nasulat nga kasuguan nagapakamalaut padulong sa kamatayon, apang ang espiritu nagahatag sang kabuhi. 7 Dugang pa, ang kasuguan nga nagaresulta sa kamatayon kag gintigib sa mga bato ginhatag nga may himaya, amo nga ang mga anak sang Israel indi makatulok sa nawong ni Moises bangod sa himaya sang iya nawong, apang ina nga himaya pagadulaon. 8 Gani, indi bala nga labi pa nga may himaya ang paghatag sing espiritu? 9 Kay kon ang kasuguan nga nagaresulta sa pagpakamalaut mahimayaon, mas labi pa gid ang ministeryo nga nagaresulta sa pagkamatarong! 10 Ang matuod, bisan ang ginhimo nga mahimayaon sadto ginkuhaan sing himaya, bangod sang himaya nga mas labaw sa sini. 11 Kay kon ang pagadulaon mahimayaon, mas labi pa ang nagapabilin! 12 Bangod may amo kita sini nga paglaum, may daku kita nga kahilwayan sa paghambal, 13 kag wala naton ginailog ang ginhimo ni Moises sang ginatabunan niya ang iya nawong, agod ang mga anak sang Israel indi makatulok sa himaya sang kasuguan nga pagadulaon. 14 Apang ang ila hunahuna naghabol. Kay tubtob karon nga adlaw, ang amo gihapon nga tabon wala pa makuha kon ginabasa ang daan nga katipan, bangod makuha lamang ini paagi sa Cristo. 15 Ang matuod, tubtob karon nga adlaw kon ginabasa ang sinulatan ni Moises, may tabon ang ila tagipusuon. 16 Apang kon ang isa magbag-o sang iya dalanon agod simbahon si Jehova, ang tabon makuha. 17 Si Jehova isa ka Espiritu, kag kon diin ang espiritu ni Jehova, may kahilwayan. 18 Kita tanan wala sing tabon sa aton nawong kag ginapabanaag naton kaangay sang mga espiho ang himaya ni Jehova. Samtang ginahimo naton ini, ginabalhin kita sa amo man nga larawan halin sa himaya padulong sa labi pa nga himaya, suno gid sa ginahimo ni Jehova, nga Espiritu.