Mga Reperensia Para sa Pagkabuhi kag Pagministeryo nga Workbook Para sa Miting
AGOSTO 5-11
MGA BAHANDI SA PULONG SANG DIOS | 2 TIMOTEO 1-4
“Ginhatagan Kita sang Dios Indi sing Espiritu sang Katalaw”
(2 Timoteo 1:7) Kay ginhatagan kita sang Dios indi sing espiritu sang katalaw, kundi sang gahom kag sang gugma kag sang maligdong nga hunahuna.
Mga Pamatan-on—Ipakita ang Inyo Pag-uswag
9 Agod buligan si Timoteo, ginpalig-on sia sang ulihi ni Pablo: “Ginhatagan kita sang Dios indi sing espiritu sang katalaw, kundi sang gahom kag sang gugma kag sang maligdong nga hunahuna.” (2 Tim. 1:7) Ang “maligdong nga hunahuna” amo ang ikasarang nga maghunahuna kag mangatarungan sing husto. Nalakip sa sini ang pag-atubang sa realidad bisan pa nga indi mo ini luyag. Ang pila ka pamatan-on nga wala mag-uswag subong mga Cristiano nangin matalaw kag ginpalagyuhan nila ang mga kabudlayan paagi sa sobra nga pagtulog ukon paglantaw sing TV, pag-drugs ukon pagpahubog, pagkadto pirme sa mga party, ukon paghimo sing seksuwal nga imoralidad. Ginapalig-on ang mga Cristiano nga “sikwayon ang pagkadidiosnon kag kalibutanon nga mga kailigbon kag magkabuhi nga may maligdong nga hunahuna kag pagkamatarong kag diosnon nga debosyon sa tunga sining karon nga sistema sang mga butang.”—Tito 2:12.
(2 Timoteo 1:8) Gani indi pag-ikahuya ang panaksi tuhoy sa aton Ginuo ukon tuhoy sa akon nga isa ka bilanggo tungod sa iya, kundi magpakigbahin ka sa pag-antos sang kapiutan para sa maayong balita paagi sa pagsalig sa gahom sang Dios.
“Magpakaisog kag Magpakabakod!”
7 Si Pablo nagsulat kay Timoteo: “Ang Dios wala maghatag sa aton sang espiritu sang katalaw, kundi sang gahom . . . Busa dili mo ikahuya ang panaksi tuhoy sa aton Ginuo.” (2 Timoteo 1:7, 8; Marcos 8:38) Bangod nabasa naton ining mga pinamulong, sarang naton mapamangkot ang aton kaugalingon: ‘Ginakahuya ko bala ang akon pagtuo, ukon maisog bala ako? Ginasugiran ko bala ang akon mga kaupod sa trabaho (ukon mga kabutho) nga isa ako ka Saksi ni Jehova, ukon ginahinago ko bala ini? Nahuya bala ako nga mangin tuhay sa iban, ukon nalipay bala ako nga mangin tuhay bangod sang akon kaangtanan kay Jehova?’ Kon ang isa nahadlok sa pagbantala sing maayong balita ukon manindugan sa mga pagtuluuhan nga indi naluyagan sang kadam-an, dapat dumdumon niya ang laygay ni Jehova kay Josue: “Magpakaisog kag magpakabakod.” Indi gid pagkalimti nga indi ang opinyon sang aton mga kaupod sa trabaho ukon mga kabutho ang importante kundi ang pagtamod ni Jehova kag ni Jesucristo.—Galacia 1:10.
Pagkutkot sing Espirituwal nga mga Hiyas
(2 Timoteo 2:3, 4) Subong isa ka maayo nga soldado ni Cristo Jesus, magpakigbahin ka sa pag-antos sang kabudlayan. 4 Wala sing soldado nga nadalahig sa negosyo sang kabuhi, agod matigayon niya ang kahamuot sang isa nga naglista sa iya subong soldado.
Pangitaa ang Matuod nga Manggad
13 May mabakod nga pagtuo si Timoteo. Gintawag sia ni Pablo nga “isa ka maayo nga soldado ni Cristo Jesus,” kag ginsilingan sia: “Wala sing soldado nga nadalahig sa negosyo sang kabuhi, agod matigayon niya ang kahamuot sang isa nga naglista sa iya subong soldado.” (2 Tim. 2:3, 4) Ang mga sumulunod ni Jesus subong, lakip ang sobra isa ka milyon nga nagaalagad sing bug-os tion, nagasunod sa laygay ni Pablo sa ila bug-os nga masarangan. Ginatinguhaan nila nga indi masulay sa mga ginatanyag sang kalibutan kay ginadumdom nila ini nga prinsipio: “Ang nagautang ulipon sang nagapautang.” (Hulu. 22:7) Gusto ni Satanas nga ubuson naton ang aton tion kag kusog sa pagpaulipon sa komersio sang iya kalibutan. May mga desisyon nga mahimo bangdan nga malubong sa utang ang isa. Ang iban nagapangutang para makabakal sang balay ukon salakyan, mag-eskwela, ukon magpakasal. Mapakita naton nga maalamon kita kon pasimplehon naton ang aton kabuhi, likawan ang pagpangutang, kag magkinot, para mangin hilway kita sa pag-alagad sa Dios sa baylo nga mangin ulipon sang komersio.—1 Tim. 6:10.
(2 Timoteo 2:23) Isikway man ang binuang kag wala sing pulos nga mga debate, kay nakahibalo ka nga nagaresulta lang ini sa inaway.
Ang Katawhan ni Jehova Nagabiya sa Pagkadimatarong
10 Sa karon, talagsa lang kita makakita sing apostata sa kongregasyon. Sa gihapon, kon makabati kita sing mga panudlo nga wala nabase sa Kasulatan, bisan diin man ini naghalin, dapat naton ini sikwayon gilayon. Indi gid maalamon nga debatihon ang mga apostata, sing personal man, paagi sa pagsabat sa ila mga blog, ukon sa iban pa nga pamaagi sang komunikasyon. Bisan pa katuyuan mo nga buligan ang indibiduwal, ang inyo pag-istoryahanay indi maghisanto sa laygay sang Kasulatan nga bag-o lang naton ginbinagbinag. Subong katawhan ni Jehova, ginalikawan naton sing bug-os, ukon ginasikway, ang apostasya.
Pagbasa sa Biblia
(2 Timoteo 1:1-18) Halin kay Pablo, nga apostol ni Cristo Jesus paagi sa kabubut-on sang Dios suno sa saad nga kabuhi paagi kay Cristo Jesus, 2 para kay Timoteo, nga hinigugma nga anak: Kabay nga mabaton mo ang wala tupong nga kaayo, kaluoy, kag paghidait halin sa Dios nga aton Amay kag kay Cristo Jesus nga aton Ginuo. 3 Nagapasalamat ako sa Dios, nga sa iya nagahimo ako sang sagrado nga pag-alagad upod ang matinlo nga konsiensia, subong sang ginhimo sang akon mga katigulangan, gani wala ko ikaw ginakalimtan sa akon mga pag-ampo sa adlaw kag gab-i. 4 Kon madumduman ko ang imo mga luha, ginahandum ko nga makita ka, agod mapuno ako sing kalipay. 5 Kay ginadumdom ko ang imo pagtuo nga indi salimpapaw, nga una ko nga nakita sa imo lola nga si Loida kag sa imo iloy nga si Eunice, kag nagasalig ako nga makita man ini sa imo. 6 Bangod sini ginapahanumdom ko ikaw nga padabdabon mo kaangay sang kalayo ang dulot sang Dios nga nabaton mo paagi sa pagtungtong ko sang akon mga kamot sa imo. 7 Kay ginhatagan kita sang Dios indi sing espiritu sang katalaw, kundi sang gahom kag sang gugma kag sang maligdong nga hunahuna. 8 Gani indi pag-ikahuya ang panaksi tuhoy sa aton Ginuo ukon tuhoy sa akon nga isa ka bilanggo tungod sa iya, kundi magpakigbahin ka sa pag-antos sang kapiutan para sa maayong balita paagi sa pagsalig sa gahom sang Dios. 9 Ginluwas niya kita kag gintawag kita sa isa ka balaan nga pagtawag, indi bangod sa aton mga buhat, kundi bangod sa iya kaugalingon nga katuyuan kag wala tupong nga kaayo nga madugay na nga ginhatag sa aton paagi kay Cristo Jesus. 10 Apang karon ginhimo na ini nga maathag gid paagi sa pagpadayag sang aton Manluluwas, si Cristo Jesus, nga nagdula sang kamatayon kag nagpaathag sa aton paagi sa maayong balita kon paano matigayon ang kabuhi kag pagkadimadinulunton, 11 nga sa sini gintangdo ako nga manugbantala, apostol, kag manunudlo. 12 Amo ini kon ngaa ginaantos ko man ining mga butang, apang wala ako mahuya. Kay nakilala ko ang Isa nga akon ginatuuhan, kag nagasalig ako nga sarang niya mabantayan ang gintugyan ko sa iya tubtob sa amo nga adlaw. 13 Padayon nga sunda ang talaksan sang maayo nga mga pulong nga nabatian mo sa akon nga may pagtuo kag gugma nga resulta sang pagkanahiusa kay Cristo Jesus. 14 Bantayi ining maayo nga butang nga ginsalig sa imo paagi sa balaan nga espiritu nga yara sa aton. 15 Nakahibalo ka nga gintalikdan ako sang madamo nga tawo sa probinsia sang Asia, lakip sa ila sanday Figelo kag Hermogenes. 16 Kabay nga kaluuyan sang Ginuo ang panimalay ni Onesiforo, kay ginapaumpawan niya ako pirme, kag wala niya ginakahuya ang akon mga kadena sang pagkabilanggo. 17 Sa baylo, sang didto sia sa Roma, ginpangita gid niya ako kag nakita niya ako. 18 Kabay nga kaluuyan sia sang Ginuong Jehova sa amo nga adlaw. Kag nahibaluan mo gid ang tanan nga pag-alagad nga ginhimo niya sa Efeso.
AGOSTO 12-18
MGA BAHANDI SA PULONG SANG DIOS | TITO 1–FILEMON
“Magtangdo Ka sang mga Gulang”
(Tito 1:5-9) Ginbilin ko ikaw sa Creta agod matadlong mo ang mga butang nga may depekto kag suno sa instruksion ko sa imo magtangdo ka sang mga gulang sa tagsa ka siudad: 6 Kon may lalaki nga hilway sa panumbungon, isa lang ang asawa, may tumuluo nga mga anak nga wala ginasumbong nga mapinatuyangon ukon rebelyuso. 7 Kay subong tulugyanan sang Dios, ang isa ka manugtatap dapat nga hilway sa panumbungon, indi puguso, indi madali maakig, indi palahubog, indi masingki, wala nagatinguha nga mamentaha sa makagod kag indi bunayag nga paagi, 8 kundi dapat maabiabihon sia, mahigugmaon sa maayo, maligdong sing hunahuna, matarong, mainunungon, may pagpugong sa kaugalingon, 9 nagapanguyapot sing malig-on sa matutom nga pulong may kaangtanan sa iya kalantip sa pagpanudlo, agod makapalig-on sia paagi sa maayo nga panudlo kag makasabdong sa mga nagahambal batok sa sini.
Mga Pamangkot Gikan sa mga Bumalasa
Bisan pa wala ginapaathag sing detalyado sang Kasulatan kon paano ginahimo sadto ang pagtangdo, may pila ka indikasyon kon paano ini ginhimo. Ginsugiran kita nga sang nagpauli na sanday Pablo kag Bernabe gikan sa ila una nga paglakbay subong misyonero, “nagtangdo sila sang mga gulang nga lalaki para sa ila sa tagsa ka kongregasyon, kag sang nakapangamuyo upod ang pagpuasa, gintugyan nila sila kay Jehova nga ila gintuuhan.” (Binu. 14:23) Pagligad sang mga tuig, si Pablo nagsulat sa iya kaupod sa paglakbay nga si Tito: “Bangod sini ginbilin ko ikaw sa Creta, agod matadlong mo ang mga butang nga may depekto kag magtangdo sang mga gulang nga lalaki sa tagsa ka siudad, suno sa ginsugo ko sa imo.” (Tito 1:5) Daw ginhatagan man sing amo sini nga awtoridad si Timoteo, nga pirme kaupod ni apostol Pablo sa paglakbay. (1 Tim. 5:22) Gani maathag nga ini nga mga pagtangdo ginhimo sang mga nagalakbay nga manugtatap, indi sang mga apostoles kag mga gulang nga lalaki sa Jerusalem.
Base sa sini nga sulundan sa Biblia, ginbag-o sang Nagadumala nga Hubon sang mga Saksi ni Jehova ang pamaagi sa pagtangdo sing mga gulang kag mga ministeryal nga alagad. Sugod sang Septiembre 1, 2014, ang pagtangdo ginahimo suno sa mga masunod: Binagbinagon sing maayo sang kada manugtatap sang sirkito ang mga rekomendasyon sa iya sirkito. Sa tion sang iya pagbisita, tinguhaan niya nga makilala ang mga ginarekomendar, nga nagaupod sa ila sa ministeryo kon posible. Sa tapos mabinagbinag ang mga rekomendasyon upod sa lokal nga hubon sang mga gulang, responsibilidad sang manugtatap sang sirkito ang pagtangdo sing mga gulang kag mga ministeryal nga alagad sa mga kongregasyon sa iya sirkito. Sa sini nga paagi, halos pareho ini nga kahimusan sa unang siglo.
Sin-o ang may lainlain nga katungdanan sa sini nga pagtangdo? Ang “matutom kag mainandamon nga ulipon” ang may panguna nga responsibilidad sa pagpakaon sa panimalay. (Mat. 24:45-47) Nagalakip ini sang pagpangusisa sa Kasulatan, sa bulig sang balaan nga espiritu, agod makahatag sing giya parte sa praktikal nga aplikasyon sang mga prinsipio sang Biblia nga may kaangtanan sa kon paano gin-organisar ang kongregasyon sa bilog nga kalibutan. Ang matutom nga ulipon man ang nagatangdo sang tanan nga manugtatap sang sirkito kag mga katapo sang Komite sang Sanga. Ang tagsa ka sanga talatapan nagahatag man sing praktikal nga bulig sa pagpatuman sang ginhatag nga panuytoy. Ang tagsa ka hubon sang mga gulang may serioso nga katungdanan sa pagbinagbinag sing maayo sa Makasulatanhon nga mga kalipikasyon sang utod nga ila ginarekomendar para sa katungdanan sa kongregasyon sang Dios. Ang kada manugtatap sang sirkito may serioso nga responsibilidad sa pagbinagbinag sing maayo kag sa pagpangamuyo sa mga rekomendasyon sang mga gulang kag dayon magtangdo sa mga utod nga kalipikado.
Pagkutkot sing Espirituwal nga mga Hiyas
(Tito 1:12) Ang isa sa ila, nga ila manalagna, nagsiling: “Ang mga taga-Creta butigon, makatalagam kag mabangis nga mga sapat, mga matamad nga sobra ka palakaon.”
Mga Pamangkot Gikan sa mga Bumalasa
Wala gid sia nagaugyon sa nagalakip sa tanan nga pagyaguta sa rasa ukon etniko batok sa mga taga-Creta. Makasiguro kita sa sina, kay nakahibalo si Pablo nga sa Creta may maayong mga Cristiano nga ginkahamut-an kag ginhaplasan sang Dios sang Iya balaan nga espiritu. (Binuhatan 2:5, 11, 33) May yara madamong debotado nga mga Cristiano sa mga kongregasyon “sa tagsa ka siudad.” Bisan pa ang mga Cristiano indi himpit nga katawhan, makasiguro kita nga indi sila mga butigon kag mahakug nga matamad; kay kuntani wala nila matigayon sing padayon ang kahamuot ni Jehova. (Filipos 3:18, 19; Bugna 21:8) Kag subong sang makita naton karon sa tanan nga mga pungsod, mahimo nga may bunayag sing tagipusuon nga katawhan sa Creta nga nagkasubo sa manubo nga mga talaksan sa moral sa palibot nila kag handa sa pagpamati sa Cristianong mensahe.—Ezequiel 9:4; ipaanggid ang Binuhatan 13:48.
(Filemon 15, 16) Ayhan ang rason nga napahilayo sia sa imo sa malip-ot nga tion, amo nga makabalik sia sa imo sing dayon, 16 indi na subong isa ka ulipon, kundi labaw pa sa isa ka ulipon, subong isa ka hinigugma nga utod, ilabi na sa akon, apang labi pa gid sa imo subong ulipon kag utod sa Ginuo.
Talalupangdon nga mga Punto Gikan sa mga Tulun-an sang Tito, Filemon, kag Hebreo
15, 16—Ngaa wala ginpangabay ni Pablo si Filemon nga hilwayon subong ulipon si Onesimo? Luyag ni Pablo nga tumanon lamang ang sugo sa iya nga ‘magbantala sang ginharian sang Dios kag magpanudlo nahanungod kay Ginuong Jesucristo.’ Busa, wala sia nagaentra sa mga problema sa katilingban, kaangay sang pagpang-ulipon.—Binu. 28:31.
Pagbasa sa Biblia
(Tito 3:1-15) Padayon nga ipahanumdom sa ila nga magpasakop kag mangin matinumanon sa mga panguluhan kag mga awtoridad, mangin handa para sa tagsa ka maayong buhat, 2 indi magpakalain kay bisan sin-o, indi mangin palaaway, kundi mangin makatarunganon, kag mangin malulo gid sa tanan nga tawo. 3 Kay kita man sang una mga buangbuang, indi matinumanon, napatalang, mga ulipon sa nanuhaytuhay nga kailigbon kag kinalipay, nagahimo sang kalainan kag kahisa, makangilil-ad, kag nagadinumtanay. 4 Apang, sang napadayag sang Dios nga aton Manluluwas ang iya kaayo kag gugma sa mga tawo 5 (indi bangod sa mga buhat sang pagkamatarong nga aton nahimo, kundi bangod sa iya kaugalingon nga kaluoy), ginluwas niya kita paagi sa paghugas nga nagdala sa aton sa kabuhi kag sa pagpabag-o sa aton paagi sa balaan nga espiritu. 6 Ginpasagahay niya ini nga espiritu sing bugana sa aton paagi kay Jesucristo nga aton Manluluwas, 7 agod sa tapos mapahayag nga matarong paagi sa wala tupong nga kaayo sinang isa, mangin mga manunubli kita suno sa paglaum nga kabuhi nga wala sing katapusan. 8 Masaligan ini nga pinamulong, kag luyag ko nga padayon mo ini nga ipahanumdom, agod pirme hunahunaon sang mga nagatuo sa Dios ang paghimo sing maayong mga buhat. Ining mga butang maayo kag mapuslanon sa mga tawo. 9 Apang likawi ang binuang nga mga pagbinais kag pag-usisa sa mga listahan sang mga kaliwatan kag mga ginamo kag mga pag-inaway nahanungod sa Kasuguan, kay wala ini sing mahatag nga kaayuhan kag wala sing pulos. 10 Sikwaya ang tawo nga nagapasanyog sang sekta sa tapos nga malaygayan sia sing duha ka beses, 11 kay nakahibalo ka nga ina nga tawo nagsipak sa banas kag nagapakasala kag nagapakamalaut sang iya kaugalingon. 12 Kon mag-abot si Artemas ukon si Tiquico nga ginpakadto ko dira, himua ang imo bug-os nga masarangan nga makigtabo sa akon sa Nicopolis, kay namat-od ako nga magpaligad sing tigtulugnaw didto. 13 Hatagi sanday Zenas, nga batid sa Kasuguan, kag Apolos sang tanan nila nga kinahanglanon agod indi sila pagkulangon sa ila pagpanglakaton. 14 Dapat matun-an man sang aton kauturan nga himuon ang maayong mga buhat para makabulig sila sa tion sang daku nga panginahanglan, agod pirme sila mangin mabungahon. 15 Ang tanan nga kaupod ko nagapangamusta sa imo. Ipalab-ot ang akon pangamusta sa mga tumuluo nga nagapalangga sa amon. Kabay nga mabaton ninyo ang wala tupong nga kaayo.
AGOSTO 19-25
MGA BAHANDI SA PULONG SANG DIOS | HEBREO 1-3
Higugmaa ang Pagkamatarong kag Dumti ang Pagkamalinapason
(Hebreo 1:8) Apang tuhoy sa Anak, nagsiling sia: “Ang Dios amo ang imo trono tubtob sa wala sing katubtuban, kag ang setro sang imo Ginharian amo ang setro sang katarungan.
Dayawa ang Cristo, ang Mahimayaon nga Hari!
8 Sang 1914, ginpalingkod ni Jehova sa langit ang iya Anak subong Mesianiko nga Hari. ‘Ang cetro sang iya katarungan amo ang cetro sang iya ginharian,’ gani ang iya paggahom pat-od nga matarong kag wala sing ginadampigan. Ang iya awtoridad legal kay si Jehova ang pundasyon sang iya ginharian. Isa pa, ang trono ni Jesus magapadayon sa “gihapon kag sa gihapon.” Ginapabugal mo bala nga alagaron si Jehova sa idalom sang gamhanan nga Hari nga gintangdo niya?
(Hebreo 1:9) Ginahigugma mo ang pagkamatarong, kag ginadumtan mo ang pagkamalinapason. Gani ang Dios, nga imo Dios, naghaplas sa imo sing lana sang kalipay labaw sa imo kaupdanan.”
Dayawa ang Cristo, ang Mahimayaon nga Hari!
7 Basaha ang Salmo 45:6, 7. Ginahigugma gid ni Jesus ang pagkamatarong kag ginakaugtan ang bisan ano nga nagapakahuya sa iya Amay, gani gintangdo sia ni Jehova subong Hari sang Mesianikong Ginharian. Ginhaplasan si Jesus sing “lana sang kasadya” labaw pa sa iya mga “kaupdanan,” nga amo ang mga hari sang Juda sa linya ni David. Paano? Una, si Jehova mismo ang nagtangdo kay Jesus. Dugang pa, gintangdo sia ni Jehova subong Hari kag Mataas nga Saserdote. (Sal. 2:2; Heb. 5:5, 6) Luwas sina, si Jesus ginhaplasan indi sang lana kundi sang balaan nga espiritu, kag ang iya pagkahari indi dutan-on kundi langitnon.
Pagkutkot sing Espirituwal nga mga Hiyas
(Hebreo 1:3) Sia ang banaag sang himaya sang Dios kag ang sibu nga larawan sang iya mismo kinaugali, kag padayon niya nga ginapaluntad ang tanan nga butang paagi sa iya gamhanan nga pulong. Kag sa tapos sia makahimo sang pagpaninlo para sa aton mga sala, nagpungko sia sa tuo sang Halangdon sa kahitaasan.
it-1-E 1185 ¶1
Laragway
Ang pagpabanaag bala ni Jesus bilang larawan sang iya Amay wala nagbag-o?
Ang panganay nga Anak sang Dios, nga sang ulihi nangin tawo nga si Jesus, larawan sang iya Amay. (2Co 4:4) Wala sing duhaduha nga ang Anak ang ginaistorya sang Dios sang nagsiling sia, “Mahimo kita sing tawo suno sa larawan naton.” Ang Anak larawan sang Amay, ang Manunuga, halin pa sang gintuga ang Anak. (Gen. 1:26; Ju 1:1-3; Col. 1:15, 16) Sang ari sa duta ang Anak, perpekto sia nga tawo nga nagpabanaag gid sing bug-os sang mga kinaiya sang iya Amay sa masarangan sang isa ka tawo. Gani, makasiling sia nga “ang bisan sin-o nga nakakita sa akon nakakita man sa Amay.” (Ju 14:9; 5:17, 19, 30, 36; 8:28, 38, 42) Pero labi pa gid nga ginpabanaag ni Jesus ang larawan sang Dios sang ginbanhaw sia bilang espiritu nga persona kag ginhatagan sing “bug-os nga awtoridad sa langit kag sa duta” sang iya Amay, si Jehova nga Dios. (1Pe 3:18; Mat 28:18) Bangod ginbayaw sang Dios si Jesus sa “mataas gid nga posisyon,” napabanaag sang Anak sang Dios ang himaya sang iya Amay sing labi pa sangsa tion antes sia nagkadto sa duta. (Fil 2:9; Heb 2:9) Subong, sia ‘ang sibu nga larawan sang kinaugali mismo sang Dios.’—Heb. 1:2-4.
(Hebreo 1:10-12) Kag: “Sa ginsuguran ikaw, O Ginuo, ginpasad mo ang mga sadsaran sang duta, kag ang mga langit binuhatan sang imo mga kamot. 11 Magataliwan sila, apang ikaw magapabilin; kag kaangay sang panapton magadaan sila, 12 kag piuron mo sila kaangay sang kunop, kaangay sang panapton, kag magabag-o sila. Apang ikaw amo man gihapon, kag wala ka sing katapusan.”
it-1-E 1063 ¶7
Langit
Ang mga pulong sa Salmo 102:25, 26 nagapatuhoy kay Jehova nga Dios, pero sang ginkutlo ini ni apostol Pablo, ginpatuhoy niya ini kay Jesucristo. Ngaa? Bangod ang bugtong nga Anak sang Dios amo ang iya Ahente sa pagtuga sang pisikal nga uniberso. Ginpakita diri ni Pablo ang kinatuhayan sang Anak sa pisikal nga uniberso. Ang Anak magapabilin sing dayon, pero ang pisikal nga mga tinuga, kon gustuhon sang Dios, puede niya “piuron . . . kaangay sang kunop” para indi na magluntad.—Heb 1:1, 2, 8, 10-12; ipaanggid ang 1Pe 2:3, footnote.
Pagbasa sa Biblia
(Hebreo 1:1-14) Sang una nagpakighambal ang Dios sa aton mga katigulangan paagi sa mga manalagna sa madamo nga higayon kag sa madamo nga paagi. 2 Karon sa katapusan sini nga mga adlaw nagpakighambal sia sa aton paagi sa isa ka Anak, nga gintangdo niya nga manunubli sang tanan nga butang, kag paagi sa iya ginhimo niya ang mga sistema sang mga butang. 3 Sia ang banaag sang himaya sang Dios kag ang sibu nga larawan sang iya mismo kinaugali, kag padayon niya nga ginapaluntad ang tanan nga butang paagi sa iya gamhanan nga pulong. Kag sa tapos sia makahimo sang pagpaninlo para sa aton mga sala, nagpungko sia sa tuo sang Halangdon sa kahitaasan. 4 Gani nangin maayo pa sia sangsa mga anghel bangod nagpanubli sia sang ngalan nga mas maayo gid sangsa ila ngalan. 5 Halimbawa, sin-o sa mga anghel ang ginsilingan sang Dios: “Ikaw ang akon anak; karon nga adlaw ako nangin imo amay”? Kag sa liwat: “Mangin amay niya ako, kag mangin anak ko sia”? 6 Apang tuhoy sa tion nga ipadala niya liwat ang iya Panganay sa napuy-an nga duta, nagsiling sia: “Kag ang tanan nga anghel sang Dios magyaub sa iya.” 7 Subong man, tuhoy sa mga anghel nagsiling sia: “Ginhimo niya ang iya mga anghel nga gamhanan nga mga puersa, kag ang iya mga alagad nga dabdab sang kalayo.” 8 Apang tuhoy sa Anak, nagsiling sia: “Ang Dios amo ang imo trono tubtob sa wala sing katubtuban, kag ang setro sang imo Ginharian amo ang setro sang katarungan. 9 Ginahigugma mo ang pagkamatarong, kag ginadumtan mo ang pagkamalinapason. Gani ang Dios, nga imo Dios, naghaplas sa imo sing lana sang kalipay labaw sa imo kaupdanan.” 10 Kag: “Sa ginsuguran ikaw, O Ginuo, ginpasad mo ang mga sadsaran sang duta, kag ang mga langit binuhatan sang imo mga kamot. 11 Magataliwan sila, apang ikaw magapabilin; kag kaangay sang panapton magadaan sila, 12 kag piuron mo sila kaangay sang kunop, kaangay sang panapton, kag magabag-o sila. Apang ikaw amo man gihapon, kag wala ka sing katapusan.” 13 Apang sin-o sa mga anghel ang ginsilingan niya: “Pungko ka sa akon tuo tubtob mahimo ko ang imo mga kaaway nga palatungan sang imo mga tiil”? 14 Indi bala sila tanan mga espiritu para sa balaan nga pag-alagad, nga ginpadala agod mag-alagad sa mga magapanubli sang kaluwasan?
AGOSTO 26–SEPTIEMBRE 1
MGA BAHANDI SA PULONG SANG DIOS | HEBREO 4-6
“Himua ang Imo Bug-os nga Masarangan nga Makasulod sa Kapahuwayan sang Dios”
(Hebreo 4:1) Gani, sanglit may saad pa nga makasulod sa iya kapahuwayan, magbantay nga wala sing isa sa inyo nga indi makasulod sa sini.
(Hebreo 4:4) Kay sa isa ka bahin nagsiling sia tuhoy sa ikapito nga adlaw sing subong sini: “Kag ang Dios nagpahuway sa ikapito nga adlaw sa tanan niya nga binuhatan,”
Kapahuwayan sang Dios—Ano Ini?
3 May duha ka pamatuod nga ang ikapito nga adlaw nagapadayon gihapon sang unang siglo C.E. Una, binagbinaga ang ginsiling ni Jesus sa mga naghingabot sa iya sang nagpang-ayo sia sa Adlaw nga Inugpahuway, kay ginkabig nila ini nga pag-obra. Nagsiling sia: “Ang akon Amay padayon nga nagapangabudlay tubtob karon, kag padayon ako nga nagapangabudlay.” (Juan 5:16, 17) Ano ang iya buot silingon? Ginsumbong si Jesus nga nagpangabudlay sa Adlaw nga Inugpahuway. Nasabat ini sang nagsiling sia: “Ang akon Amay padayon nga nagapangabudlay.” Daw pareho lang nga nagsiling si Jesus: ‘Pareho ang hilikuton namon sang akon Amay. Kon ang akon Amay padayon nga nagapangabudlay sa iya linibo ka tuig nga Adlaw nga Inugpahuway, wala sing rason nga indi ako magpangabudlay, bisan sa Adlaw nga Inugpahuway.’ Gani ginapakita sini nga kon tuhoy sa duta, nagapadayon pa ang dakung Adlaw nga Inugpahuway sang Dios, sang unang siglo.
4 Ang ikaduha nga pamatuod ginhatag ni apostol Pablo sang ginkutlo niya ang Genesis 2:2 tuhoy sa kapahuwayan sang Dios. Sia nagsulat: “Kita nga nagtuo nagasulod sa kapahuwayan.” (Heb. 4:3, 4, 6, 9) Gani, ang ikapito nga adlaw nagapadayon pa sang panahon ni Pablo. Daw ano pa kalawig ining adlaw sang kapahuwayan?
5 Agod masabat ina nga pamangkot, dapat naton dumdumon ang katuyuan sang ikapito nga adlaw. Ginapaathag ini sang Genesis 2:3: “Ang Dios nagpakamaayo sang adlaw nga ikapito kag nagpakabalaan sini.” Ini nga adlaw ‘ginpakabalaan’ ukon ginpain ni Jehova para sa katumanan sang iya katuyuan. Ina nga katuyuan amo nga ang duta pagapuy-an sang matinumanon nga katawhan nga magaatipan sa sini kag sa tagsa ka buhi nga butang. (Gen. 1:28) Para sa katumanan sini nga katuyuan, si Jehova nga Dios kag si Jesucristo, ang “Ginuo sang adlaw nga inugpahuway,” “padayon nga nagapangabudlay tubtob karon.” (Mat. 12:8) Gani ang adlaw sang kapahuwayan sang Dios matapos kon matuman na ang iya katuyuan, sa katapusan sang Isa ka Libo ka Tuig nga Paggahom ni Cristo.
(Hebreo 4:6) Gani, sanglit ang iban magasulod pa sa sini, kag ang mga una nga ginpahayagan sang maayong balita wala makasulod sa sini bangod sang pagkadimatinumanon,
Kapahuwayan sang Dios—Ano Ini?
6 Ginpaathag sang Dios kanday Adan kag Eva ang iya katuyuan para sa duta, apang wala sila magtuman. Indi lamang sila ang naghimo sini kundi minilyon pa sugod sadto. Bisan ang katawhan nga ginpili sang Dios, ang pungsod sang Israel, napukan man sa pagkadimatinumanon. Gani, ginpaandaman ni Pablo ang mga Cristiano sang unang siglo nga bisan sila mahimo man magsunod sa mga Israelinhon sadto. Sia nagsulat: “Busa himuon naton ang aton bug-os nga masarangan sa pagsulod sa sina nga kapahuwayan, kay basi may isa nga mapukan sa amo man nga sahi sang pagkadimatinumanon.” (Heb. 4:11) Talupangda nga suno kay Pablo indi makasulod sa kapahuwayan sang Dios ang mga di-matinumanon. Ano ang ginapahangop sini? Posible bala nga indi kita makasulod sa kapahuwayan sang Dios kon sa pila ka paagi ginapamatukan naton ang iya katuyuan? Importante gid sa aton ang sabat sa sini kag amo sina ang binagbinagon naton sa sini nga artikulo. Pero, tun-an anay naton ang tuhoy sa pagsulod sa kapahuwayan sang Dios paagi sa pagbinagbinag sang malain nga halimbawa sang mga Israelinhon.
(Hebreo 4:9-11) Gani may nabilin pa nga kapahuwayan kaangay sa adlaw nga inugpahuway para sa katawhan sang Dios. 10 Kay ang tawo nga nakasulod sa kapahuwayan sang Dios nakapahuway man sa iya kaugalingon nga mga buhat, subong nga ang Dios nagpahuway man sa iya mga buhat. 11 Gani himuon naton ang aton bug-os nga masarangan nga makasulod sa sina nga kapahuwayan, agod wala sing magsunod sa amo man nga pagkadimatinumanon.
Kapahuwayan sang Dios—Ano Ini?
16 May pila ka Cristiano subong nga nagapati gihapon nga ang kaluwasan matigayon paagi sa pagsunod sa Mosaikong Kasuguan. Maathag gid ang ginsiling ni Pablo sa mga taga-Efeso: “Paagi sa sining wala tupong nga kaayo ginluwas kamo paagi sa pagtuo; kag indi ini bangod sa inyo, dulot ini sang Dios. Indi, indi ini bangod sa mga buhat, agod wala sang tawo nga may rason sa pagpabugal.” (Efe. 2:8, 9) Gani, ano ang buot silingon sang pagsulod sang mga Cristiano sa kapahuwayan sang Dios? Ginpain ni Jehova ang ikapito nga adlaw—ang iya kapahuwayan—agod tumanon sing bug-os ang iya katuyuan sa duta. Makasulod kita sa kapahuwayan ni Jehova—ukon makaupod sa iya pagpahuway—kon manghikot kita suno sa iya katuyuan nga ginapahayag sa aton paagi sa iya organisasyon.
17 Sa pihak nga bahin, kon balewalaon naton ang laygay sang Biblia paagi sa matutom kag mainandamon nga ulipon, kag sundon ang aton gusto, ginapamatukan naton ang katumanan sang katuyuan sang Dios. Ginabutang naton sa katalagman ang aton maayo nga kaangtanan kay Jehova. Sa masunod nga artikulo, binagbinagon naton ang mga kahimtangan nga masami ginaatubang sang katawhan sang Dios kag kon paano ginapakita sang aton mga desisyon kon bala nakasulod na kita sa kapahuwayan sang Dios.
Pagkutkot sing Espirituwal nga mga Hiyas
(Hebreo 4:12) Kay ang pulong sang Dios buhi kag gamhanan kag matalom pa sa bisan ano nga espada nga duha sing sulab kag nagadulot tubtob sa paghamulag sang kalag kag espiritu, kag sang mga lutalutahan sa utok sa tul-an, kag sarang makahantop sang mga panghunahuna kag mga tinutuyo sang tagipusuon.
Mga Pamangkot Gikan sa mga Bumalasa
Ano ang “pulong sang Dios” nga ginsiling sang Hebreo 4:12 nga “buhi kag gamhanan”?
▪ Ginapakita sang konteksto nga ang ginapatuhuyan ni apostol Pablo amo ang mensahe, ukon ang pagpahayag sang katuyuan sang Dios, nga makita naton sa Biblia.
Pirme ginapaathag sa aton mga publikasyon ang Hebreo 4:12 nga ang Biblia makapabag-o sa mga tawo, kag husto man ini. Pero mas maayo kon binagbinagon pa gid naton ang Hebreo 4:12 suno sa konteksto. Ginpalig-on ni Pablo ang Hebreo nga mga Cristiano nga sakdagon ang mga katuyuan sang Dios. Madamo sa sini ang ginsulat sa balaan nga mga sinulatan. Ang isa ka halimbawa nga gingamit ni Pablo amo ang mga Israelinhon nga ginluwas sa Egipto. May paglaum sila nga makasulod sa ginsaad nga duta “diin nagailig ang gatas kag dugos,” kag mangin matawhay sila didto.—Ex. 3:8; Deut. 12:9, 10.
Amo sini ang katuyuan sang Dios. Pero ginsikway sang mga Israelinhon ang panuytoy ni Jehova kag wala sila magtuo, gani diutay lang sa ila ang nakasulod sa ginsaad nga duta. (Num. 14:30; Jos. 14:6-10) Pero, nagsiling si Pablo nga ‘may saad pa nga makasulod sa kapahuwayan sang Dios.’ (Heb. 3:16-19; 4:1) Ini nga “saad” bahin sang katuyuan sang Dios. Mabasa naton ini nga katuyuan kag masakdag ini pareho sa Hebreo nga mga Cristiano. Para ipadaku nga ining saad yara sa Kasulatan, ginkutlo ni Pablo ang Genesis 2:2 kag Salmo 95:11.
Gani dapat malipay kita nga “may saad pa nga makasulod sa [kapahuwayan sang Dios].” Nagasalig kita suno sa Biblia nga makasulod kita sa kapahuwayan sang Dios amo nga nanghikot kita para matigayon ini. Wala naton ini ginhimo paagi sa pagsunod sa kasuguan nga ginhatag kay Moises ukon paagi sa iban pa nga mga buhat para kahamut-an ni Jehova. Sa baylo, nagatuo kita kag nalipay nga sakdagon ang ginpahayag nga katuyuan sang Dios. Subong sang nasambit na, linibo sa bilog nga kalibutan ang nagtuon sang Biblia para mahibaluan nila ang katuyuan sang Dios. Madamo sa ila ang nagbag-o sang ila pagkabuhi, nagtuo, kag nangin bawtismado nga mga Cristiano. Ginapakita sang ila pagbag-o nga “ang pulong sang Dios buhi kag gamhanan.” Ang katuyuan sang Dios nga yara sa Biblia nakaimpluwensia na sa aton subong kag magapadayon pa ini.
(Hebreo 6:17, 18) Sa sini man nga paagi, sang nagpamat-od ang Dios nga ipakita sing mas maathag sa mga manunubli sang saad nga indi mabag-o ang iya katuyuan, gingarantiyahan niya ini paagi sa isa ka panumpa, 18 agod paagi sa sining duha ka butang nga indi mabag-o nga may kaangtanan sini imposible nga magbutig ang Dios, kita nga nagpalagyo padulong sa dalangpan mapalig-on gid nga manguyapot sa paglaum nga ginbutang sa aton atubangan.
it-1-E 1139 ¶2
Paglaum
Ining paglaum sang kabuhi nga wala sing katapusan kag ang pagkadimadinulunton sang mga “umalambit sa langitnon nga pagtawag” (Heb. 3:1) napasad sing malig-on kag masaligan gid. Ginasakdag ini sang duha ka butang diin ang Dios imposible nga magbutig, nga amo ang iya promisa kag ang iya panumpa, kag ang paglaum ara sa Cristo, nga isa na subong ka imortal sa langit. Gani ini nga paglaum pareho sa “angkla para sa kalag, pat-od kag malig-on, kag ini nga paglaum nagadul-ong sa aton sa sulod sa likod sang kurtina, [subong nga ang mataas nga saserdote nagsulod sa Labing Balaan sa Adlaw sang Pagtumbas Para sa Sala], diin si Jesus, nga nangin mataas nga saserdote sa wala sing katubtuban kaangay ni Melquisedec nagsulod sing una para sa aton.”—Heb. 6:17-20.
Pagbasa sa Biblia
(Hebreo 5:1-14) Ang tagsa ka tawo nga gintangdo bilang mataas nga saserdote nagaalagad sa mga tawo sa mga butang may kaangtanan sa ila pagsimba sa Dios, agod maghalad sang mga dulot kag mga halad para sa ila mga sala. 2 Makapakita sia sing kaawa sa mga wala sing nahibaluan kag nakasayop bangod sia may kaluyahon man, 3 kag bangod sina kinahanglan maghalad sia para sa iya mga sala subong sang ginahimo niya para sa katawhan. 4 Indi mabaton sang tawo ini nga kadungganan suno sa iya luyag, luwas lang kon tawgon sia sang Dios, kaangay kay Aaron sadto. 5 Sa amo man, wala ginhimaya sang Cristo ang iya kaugalingon paagi sa paghimo sang iya kaugalingon nga mataas nga saserdote, kundi ginhimaya sia sang Isa nga nagsiling sa iya: “Ikaw ang akon anak; karon nga adlaw, ako nangin imo amay.” 6 Nagsiling man sia sa isa pa ka bahin, “Ikaw saserdote sa wala sing katubtuban kaangay ni Melquisedec.” 7 Sang nagakabuhi ang Cristo sa duta nag-ampo sia kag nagpangabay man sa Isa nga makaluwas sa iya sa kamatayon, nga may mabaskog nga paghibi kag mga luha, kag ginpamatian ang iya mga pangamuyo bangod sang iya kahadlok sa Dios. 8 Bisan pa anak sia, nakatuon sia sang pagkamatinumanon sa mga butang nga iya gin-antos. 9 Kag sang nahimpit na sia sa sini, ang tanan nga nagatuman sa iya makabaton sang wala sing katapusan nga kaluwasan paagi sa iya, 10 bangod gintangdo sia sang Dios nga mataas nga saserdote kaangay ni Melquisedec. 11 Madamo kami sang masiling tuhoy sa Cristo, kag mabudlay ini ipaathag, bangod mahinay kamo sa paghangop. 12 Kay bisan pa dapat nga mga manunudlo na kamo kuntani karon, nagakinahanglan kamo liwat sang isa nga magatudlo sa inyo sugod sa nahauna nga mga butang sang sagrado nga mga kapahayagan sang Dios, kag nagakinahanglan kamo liwat sang gatas, indi sang matig-a nga pagkaon. 13 Kay ang tagsatagsa nga padayon nga nagainom sang gatas wala makahibalo sa pulong sang pagkamatarong, kay bata sia. 14 Apang ang matig-a nga pagkaon para sa hamtong nga mga tawo, nga paagi sa paggamit sang ila mga ikasarang sa paghangop nahanas ini nga makilala ang maayo kag malain.