Mangin Suod sa Dios
Ginpakilala ni Jehova ang Iya Kaugalingon
PAANO mo ilaragway ang Dios, ang iya personalidad kag kon paano sia nagapanghikot? Hunahunaa nga puede mo pamangkuton ang Dios parte sa iya kaugalingon kag dayon mapamatian mo sia samtang ginasugid niya sa imo ang iya mga kinaiya. Naeksperiensiahan ini sang propeta nga si Moises. Maayo gid kay gintuytuyan sia sa pagsulat sang natabo.
Sa Bukid sang Sinai, nangabay si Moises kay Jehova: “Ipakita sa akon ang imo himaya.” (Exodo 33:18) Pagkasunod nga adlaw, nakapribilehiyo ang propeta nga makita ang himaya sang Dios.a Indi detalyado ang paglaragway ni Moises sa iya nakita sa sini nga palanan-awon. Pero ginrekord niya ang mas importante nga butang, ang ginsiling sang Dios. Binagbinagon naton kon ano ang ginsiling ni Jehova, nga mabasa sa Exodo 34:6, 7.
Ang una nga ginsugid ni Jehova parte sa iya kaugalingon amo nga sia “Dios nga maloloy-on kag mainayohon.” (Bersikulo 6) Suno sa isa ka iskolar sa Biblia, ang Hebreong tinaga nga “maloloy-on” nagapakita nga ang Dios “mainayuhon nga nagapalangga, kaangay sang isa ka amay sa iya kabataan.” Ang tinaga nga “mainayohon” may kaangtanan sa verb nga “nagalaragway sa tinagipusuon nga pagbulig sang isa sa nagakinahanglan.” Maathag nga gusto ni Jehova nga mahibaluan naton nga kaangay sia sang isa ka ginikanan nga mapinalanggaon nga nagaatipan sa iya kabataan, kag nagahatag gid sang ila mga kinahanglanon.—Salmo 103:8, 13.
Dayon nagsiling si Jehova nga sia “makuli [mahinay] sa pagpangakig.” (Bersikulo 6) Indi sia madali maakig sa mga tawo nga nagaalagad sa iya, kundi mapailubon sia sa ila. Ginabatas niya ang ila pagkamakasasala kag ginahatagan sila sing kahigayunan nga magbag-o.—2 Pedro 3:9.
Nagsiling pa gid ang Dios nga sia “bugana sa malig-on nga paghigugma kag sa pagkatutum.” (Bersikulo 6) Ang mahigugmaon nga kaayo, ukon matutom nga gugma, isa sa maayo nga mga kinaiya ni Jehova nga ginapakita niya sa iya mga alagad, amo nga ang ila relasyon malig-on kag nagapadayon. (Deuteronomio 7:9) Si Jehova tuburan man sang kamatuoran. Wala sia nagapangdaya kag indi man sia madayaan. Bangod sia ang “Dios sang kamatooran,” masaligan gid naton ang tanan nga ginasiling niya, pati na ang iya mga saad sa palaabuton.—Salmo 31:5.
Ang isa pa ka importante nga kamatuoran amo nga gusto ni Jehova nga mahibaluan naton nga nagapatawad sia sang “kalautan kag sang paglapas kag sang sala.” (Bersikulo 7) ‘Handa sia sa pagpatawad’ sa mga mahinulsulon. (Salmo 86:5) Pero, wala man ginakunsinte sang Dios ang kalautan. Ginpaathag niya nga “indi [sia] mas-a magpasaylo sang malalison.” (Bersikulo 7) Ang balaan kag makatarunganon nga Dios magasilot gid sa hungod nga nagapakasala. Maabot gid ang tion nga silutan sila bangod sa ila sala.
Ang paglaragway ni Jehova sa iya mga kinaiya nagapakita nga gusto niya nga makilala naton sia kag mahibaluan naton ang iya personalidad kag kon paano sia nagapanghikot. Indi ka bala mapalig-on nga tun-an pa gid ang iya maayo nga mga kinaiya?
[Nota]
a Indi si Jehova ang nakita ni Moises, kay wala sang tawo nga makakita sa Dios kag mabuhi pa. (Exodo 33:20) Maathag nga ginhatagan ni Jehova si Moises sing palanan-awon sang Iya himaya, nga nagapakigsugilanon sa iya paagi sa anghel subong iya representante.