Mga Ilustrasyon nga Makatudlo

Mateo 13:34, 35

KON ANO ANG HIMUON: Ilakip sa imo pagpanudlo ang simple nga mga ilustrasyon nga makagalanyat sa imo mga tagpalamati kag makatudlo sang importante nga mga punto.

KON PAANO INI HIMUON:

• Magpili sing simple nga mga ilustrasyon. Pareho kay Jesus, gamita ang magagmay nga butang para ipaathag ang dalagku nga butang, kag ang mahapos para ipaathag ang mabudlay. Indi magdugang sing detalye nga magapakomplikado sa ilustrasyon. Pat-ura nga ang mga bahin sang imo ilustrasyon naaplikar gid sa leksion nga ginatudlo mo agod indi maligban ang imo mga tagpalamati sa detalye nga wala sing labot sa punto.

• Hunahunaa ang imo mga tagpalamati. Pilia ang mga ilustrasyon nga nagadalahig sa mga hilikuton kag interes sang imo mga tagpalamati. Andami nga mahuy-an ukon mapaakig sila sang imo mga ilustrasyon.

• Itudlo ang panguna nga punto. Magpokus sa pag-ilustrar sang mga panguna nga punto indi sa magagmay nga detalye. Pat-ura nga madumduman sang imo tagpalamati indi lang ang ilustrasyon kundi pati na ang punto nga matun-an sa ilustrasyon.