Mga Reperensia Para sa Pagkabuhi kag Pagministeryo nga Workbook Para sa Miting
HULYO 4-10
MGA BAHANDI SA PULONG SANG DIOS | 2 SAMUEL 18-19
“Si Barzilai—Isa ka Maayo nga Halimbawa sang Kaugdang”
Barzilai—Ang Tawo nga Nakahibalo sang Iya Masarangan
Pat-od nga ginpasalamatan gid ni David ang bulig ni Barsilai. Wala ini nagapahangop nga luyag lamang balusan sang hari ang kaayo ni Barsilai paagi sa paghatag sa iya sing materyal nga mga kinahanglanon. Indi ini kinahanglan bangod manggaranon na si Barsilai. Ayhan bangod sang maayo nga mga kinaiya sining tigulang amo nga luyag ni David nga magpuyo sia sa palasyo. Ang pagpuyo sa palasyo daku gid kuntani nga kadungganan para kay Barsilai bangod matigayon niya ang mga pribilehiyo nga mangin abyan sang hari.
Barzilai—Ang Tawo nga Nakahibalo sang Iya Masarangan
Ang isa ka rason nga nangindi si Barsilai ayhan bangod tigulang na sia. Mahimo nagahunahuna sia nga indi na sia magadugay. (Salmo 90:10) Ginbuligan gid niya si David suno sa iya bug-os nga masarangan, apang nahibaluan man niya nga may mga butang nga indi na niya masarangan bangod sang iya katigulangon. Gani, bisan pa may kahigayunan sia nga mangin dungganon kag bantog, ginpangindian niya ini. Indi kaangay sang ambisyuso nga si Absalom, si Barsilai maalamon nga nagpakita sing kaugdang.—Hulubaton 11:2.
Barzilai—Ang Tawo nga Nakahibalo sang Iya Masarangan
Ginapadaku sang kasaysayan ni Barsilai nga dapat kita mangin balanse. Sa isa ka bahin, indi naton dapat pangindian ang pribilehiyo sa pag-alagad ukon indi na panikasugan nga lab-uton ini bangod luyag naton nga magpatawhay ukon nagabatyag kita nga indi sangkol. Buligan kita sang Dios kon mangayo kita sa iya sing kusog kag kaalam.—Filipos 4:13; Santiago 4:17; 1 Pedro 4:11.
Sa isa pa ka bahin, dapat nakahibalo man kita sang aton masarangan. Halimbawa, ayhan tuman na kasako ang isa ka Cristiano sa mga hilikuton may kaangtanan sa iya pagsimba sa Dios. Narealisar niya nga kon batunon niya ang dugang nga pribilehiyo, mahimo nga indi na niya maatipanan ang iya Makasulatanhon nga mga responsibilidad kaangay sang pag-aman sa espirituwal kag materyal nga mga kinahanglanon sang iya pamilya. Sa amo nga kahimtangan, indi bala pagpakita sing kaugdang kag pagkabalanse sa iya bahin nga indi pagbatunon ang dugang nga pribilehiyo?—Filipos 4:5, NW; 1 Timoteo 5:8.
Espirituwal nga mga Hiyas
‘Tapusa ang Dalaganon’
19 Kon indi mo na mahimo ang gusto mo himuon sa pag-alagad kay Jehova kag pamatyag mo indi ka mahangpan sang iban, mapalig-on ka sa halimbawa ni Mefiboset. (2 Sam. 4:4) Napiang sia halin sang bata pa sia, kag gintratar sia ni Hari David sing indi makatarunganon base sa ginsiling sang iban parte sa iya. Indi si Mefiboset ang balasulon kon ngaa natabo ini sa iya. Pero wala sia naakig, kag nagpasalamat pa sia sa maayo nga natabo sa iya. Nagpasalamat sia sa ginpakita sa iya ni David nga kaayo sang una. (2 Sam. 9:6-10) Gani sang gintratar sia ni David sing indi makatarunganon, gintinguhaan niya nga mahangpan ang bug-os nga sitwasyon. Wala sia naakig kay nagsala si David. Kag wala niya ginbasol si Jehova sa ginhimo ni David. Ginhunahuna ni Mefiboset kon paano niya masuportahan ang hari nga ginpili ni Jehova. (2 Sam. 16:1-4; 19:24-30) Ginpasulat ni Jehova sa iya Pulong ang maayo gid nga halimbawa ni Mefiboset kay may matun-an kita sa sini.—Roma 15:4.
HULYO 11-17
MGA BAHANDI SA PULONG SANG DIOS | 2 SAMUEL 20-21
“Si Jehova Dios sang Hustisya”
it-1-E 932 ¶1
Gibeon
Sa pagligad sang mga siglo, ang mga Gibeonhon padayon nga nagkabuhi bilang katawhan, bisan ginplanuhan ni Hari Saul nga papason sila. Pero naghulat ang mga Gibeonhon nga si Jehova ang magapadayag sini nga inhustisya. Ginhimo niya ini paagi sa tatlo ka tuig nga tiggulutom sa tion sang paghari ni David. Sa tapos mamangkot si David kay Jehova kag nabal-an niya nga may nadalahig nga sala sa dugo, ginpamangkot ni David ang mga Gibeonhon kon ano ang himuon para matumbasan ang sala. Nagsiling ang mga Gibeonhon nga ‘indi ini mabayaran sang pilak ukon bulawan,’ kay suno sa Kasuguan, indi puede batunon ang gawad para sa isa ka manugpatay. (Nu 35:30, 31) Kabalo man sila nga indi nila puede patyon ang isa ka tawo nga wala sing legal nga awtorisasyon. Gani, ginhulat anay nila nga mamangkot pa gid si David kag nagsiling sila nga ihatag sa ila ang pito ka “anak nga lalaki” ni Saul. Bangod ginsambit nga nakasala sa dugo si Saul kag ang iya panimalay, ginapakita sini nga bisan pa posible si Saul ang nanguna sa pagpatay, mahimo ang iya mga “anak” nagbulig man. (2Sa 21:1-9) Gani, indi ini halimbawa sang pagpatay sa mga anak bangod sa sala sang ila mga amay (Deu 24:16) kundi pagpadapat ini sang silot bangod sa hustisya suno sa kasuguan nga “kabuhi sa kabuhi.”—Deu 19:21.
Espirituwal nga mga Hiyas
Cristianong mga Gulang—‘Masigkamanugpangabudlay Para sa Aton Kalipay’
14 Subong katawhan ni Jehova sa bilog nga kalibutan, ginatuman naton ang aton ministeryo bisan pa sang mga kabudlayan nga ginabutang ni Satanas kag sang iya mga ahente. Ang pila sa aton nagaatubang sang tulad-Goliat nga mga kabudlayan, pero paagi sa bug-os nga pagsalig kay Jehova, ginaatubang naton ini kag ginadaug. Apang kon kaisa, ang padayon nga pagpakig-away sa mga kabudlayan sini nga kalibutan nagapakapoy kag nagapaluya sa aton. Sa sining maluya nga kahimtangan, madali kita mabiktima kag ‘mapatay’ sang mga kabudlayan kon indi naton ini maatubang sing madinalag-on. Sa sini nga sitwasyon, ang suno sa tion nga pagpalig-on sang isa ka gulang makabulig sa aton nga matigayon liwat ang aton kalipay kag kusog, pareho sang naeksperiensiahan sang madamo. Ang isa ka payunir nga mga 65 anyos nagsiling: “May tion sang una nga indi maayo ang akon pamatyag kag daw ginkapoy ako sa pag-alagad sa latagon. Natalupangdan sang isa ka gulang nga nagapaluya ako gani nagpalapit sia sa akon. Nangin makapalig-on ang amon paghambalanay base sa Biblia. Ginsunod ko ang iya mga suhestyon kag nakabulig ini sa akon.” Nagsiling pa sia: “Mapinalanggaon gid yadto nga gulang kay natalupangdan niya ang akon maluya nga kahimtangan kag ginbuligan niya ako!” Huo, makalilipay gid mahibaluan nga may mga gulang kita nga padayon nga nagabantay sa aton kag, pareho ni Abisai sang una, handa sa ‘pagtabang sa aton.’
HULYO 18-24
MGA BAHANDI SA PULONG SANG DIOS | 2 SAMUEL 22
“Magsalig nga Buligan Ka ni Jehova”
Mahimo Gid Bala Ikaw ‘Makapalapit sa Dios’?
11 Isa ka butang ang mabasa nga ang Dios “makusog . . . sa gahom.” (Isaias 40:26) Isa naman ka butang ang mabasa kon paano niya ginluwas ang Israel sa Dagat nga Mapula kag dayon ginsakdag niya ang pungsod sa kahanayakan sa sulod sang 40 ka tuig. Mahanduraw mo ang nagaalimbukad nga tubig nga napihak. Mahanduraw mo ang pungsod—ayhan 3,000,000 tanan—nga nagatabok sa mamala nga letso sang dagat, kag ang nagpunong nga tubig nagatindog kaangay sang mataas nga mga pader sa magtimbang nga bahin. (Exodo 14:21; 15:8) Makita mo ang ebidensia sang maamligon nga pag-atipan sang Dios sa kahanayakan. Ang tubig nagpuswak gikan sa igang. Ang pagkaon, kaangay sang puti nga mga binhi, nakita sa ibabaw sang duta. (Exodo 16:31; Numeros 20:11) Ginapakita diri ni Jehova nga indi lamang nga may gahom sia kundi nga ginagamit niya ini para sa iya katawhan. Indi bala makapasalig ang mahibaluan nga ang aton mga pangamuyo nagadangat sa isa ka gamhanan nga Dios nga “isa ka dalangpan kag kusog para sa aton, isa ka bulig nga madali matigayon sa tion sang kalisdanan”?—Salmo 46:1.
“Matutom Ka sa mga Matutom sa Imo”
Binagbinagon naton sing maayo ang ginsiling ni David. Ang Hebreo nga tinaga nga “matutom” mahimo man ihambal nga “buhat sang mahigugmaon nga kaayo.” Ang matuod nga katutom nabase sa gugma. Mahigugmaon nga nagapakigsuod si Jehova sa mga matutom sa iya.
Talupangda man nga ang katutom indi lang isa ka balatyagon kundi nagadalahig ini sing buhat. Ginpakita ni Jehova ang iya katutom paagi sa mga buhat, subong sang naeksperiensiahan ni David. Sa tion sang mabudlay nga mga kahimtangan ni David, naghulag si Jehova sa pagbulig sa iya, matutom nga nag-amlig kag naggiya sa sining matutom nga hari. Ginpasalamatan ni David si Jehova sa pagluwas sa iya “gikan sa kamut sang tanan niya nga kaaway.”—2 Samuel 22:1.
Ano ang kapuslanan sa aton sang ginsiling ni David? Si Jehova wala nagabag-o. (Santiago 1:17) Matutom gihapon sia sa iya mga pagsulundan kag nagatuman sa iya saad. Sa iban nga salmo, si David nagsulat: ‘Ang GINOO wala nagapabaya sa mga matutom sa iya.’—Salmo 37:28, APD.
Espirituwal nga mga Hiyas
Palambua ang Espiritu sang Pagkamapainubuson
7 Ang pagkamapainubuson sang Dios may daku nga epekto sa salmista nga si David. Sia nag-amba kay Jehova: “Ikaw naghatag man sa akon sang taming sang imo kaluwasan, kag ang imo pagpaubus nagpakadaku sa akon.” (2 Sam. 22:36) Nahibaluan ni David nga nakahimo sia sing dalagku nga mga butang sa Israel bangod sang pagkamapainubuson ni Jehova—nga nagaduko ukon nagapaubos sang iya kaugalingon sa pagbulig sa iya. (Sal. 113:5-7) Sa aton bahin, ano bala nga mga kinaiya, ikasarang, kag mga pribilehiyo ang ‘wala naton nabaton’ halin kay Jehova? (1 Cor. 4:7) Ang isa nga nagagawi sing kubos amo ang “labing daku” bangod mangin mas mapuslanon sia nga alagad ni Jehova. (Luc. 9:48) Tan-awon naton kon paano.
HULYO 25-31
MGA BAHANDI SA PULONG SANG DIOS | 2 SAMUEL 23-24
“Ang Imo Bala Paghatag Isa ka Sakripisyo?”
it-1-E 146
Arauna
Daw ginapakita nga gusto ihatag ni Arauna sing libre ang duta, lakip na ang baka kag inuggatong nga gamiton sa paghalad, pero nagpamilit gid si David nga bayaran ini. Ang rekord sa 2 Samuel 24:24 nagapakita nga ginbakal ni David ang linasan kag baka sing 50 ka siklo nga pilak ($110). Pero, mabasa sa 1 Cronica 21:25 nga nagbayad si David sing 600 ka siklo nga bulawan (mga $77,000) bilang bili sini nga duta. Ang ginsambit lang sang manunulat sang Ikaduhang Samuel amo ang pagbakal sang ginpatindugan sang halaran kag sang mga materyales nga gingamit sa paghalad sadto nga tion. Ginapakita sini, nga ang bili nga ginsambit niya para lang gid sa sini nga mga butang. Pero ang ginatumod sang manunulat sang Unang Cronica amo ang mga butang may kaangtanan sa templo nga ginpatindog didto sang ulihi kag gin-angot niya ini nga pagtukod sa pagbaklanay nga ginhimo sadto. (1Cr 22:1-6; 2Cr 3:1) Bangod tama ka lapad sang duta sang templo, posible nga ang 600 ka siklo nga bulawan nagapatuhoy sa bili sining malapad nga duta imbes nga sa gamay lang nga bahin sang duta nga gingamit para sa una nga halaran nga ginhimo ni David.
Magtuon sa ‘Balayan sang Kamatuoran’
8 Kon ang Israelinhon boluntaryo nga nagahalad kay Jehova para magpasalamat, ukon kon nagadulot sia sing halad-nga-sinunog para pangayuon ang Iya kahamuot, mahimo nga indi sia mabudlayan magpili sang iya ihalad nga sapat. Malipay sia nga ihatag kay Jehova ang iya pinakaali. Ang mga Cristiano subong wala na nagahalad sang ginapatuman sang Mosaikong Kasuguan. Pero nagahalad sila gihapon paagi sa paggamit sang ila tion, kusog, kag pagkabutang sa pag-alagad kay Jehova. Ginsambit ni apostol Pablo ang ‘dayag nga pagpahayag’ sang Cristianong paglaum kag “ang paghimo sing maayo kag ang pagpaambit sing mga butang sa iban” subong mga halad nga nagapahamuot sa Dios. (Heb. 13:15, 16) Makita sa aton panimuot sa pag-alagad kay Jehova kon daw ano ang aton pagpasalamat kag apresasyon sa tanan nga gin-aman Niya sa aton. Gani, pareho sa mga Israelinhon dapat man naton usisaon ang aton panimuot kag motibo sa pag-alagad kay Jehova.
Espirituwal nga mga Hiyas
Talalupangdon nga mga Punto sa Tulun-an nga Ikaduhang Samuel
23:15-17. Ginatahod sing tudok ni David ang kasuguan sang Dios sa kabuhi kag dugo amo kon ngaa sa sining okasyon, wala niya paghimua ang daw kaanggid sa paglapas sa sina nga kasuguan. Dapat naton palambuon ini nga panimuot sa tanan nga sugo sang Dios.
AGOSTO 1-7
MGA BAHANDI SA PULONG SANG DIOS | 1 HARI 1-2
“Nagatuon Ka Bala sa Imo mga Sala?”
it-2-E 987 ¶4
Solomon
Sang nabatian ang tunog sang musika sa Gihon, nga indi man gid malayo, kag ang singgit sang katawhan: “Mabuhi si Hari Solomon,” nalagyo sa kahadlok kag nagsalasala si Adonias kag ang mga kaupod niya nga nagrebelde. Ginpakita ni Solomon nga ang iya paggahom may paghidait kay wala niya gintugutan nga madagtaan sang pagtimalos ang iya pagpungko bilang hari. Kon nagbalos si Solomon, mahimo nga napatay sia. Nalagyo si Adonias kag nagdangop sa santuaryo, gani ginpakuha sia ni Solomon didto kag ginpaatubang sa iya. Ginsilingan ni Solomon si Adonias nga indi sia pagpatyon luwas lang kon may makita nga malain sa iya, dayon ginpapauli sia sa iya balay.—1Ha 1:41-53.
it-1-E 49
Adonias
Pero sang napatay si David, ginkadtuan ni Adonias si Bat-seba kag ginpangabay sia nga kumbinsihon si Solomon nga ipaasawa sa iya si Abisag, ang bataon nga babayi nga nag-atipan kay David. Ang ginsiling ni Adonias nga “ako kuntani ang naghari, kag ako ang ginpaabot sang bug-os nga Israel nga mangin hari” nagapakita nga pamatyag niya gintapakan ang iya kinamatarong, bisan pa daw ginabaton niya nga may panuytoy sang Dios ang pagpili sa hari. (1Ha 2:13-21) Bisan pa ang iya pangabay posible bayad lamang sa iya kay wala ginhatag sa iya ang ginharian, daw ginapakita gid sini nga nagapangibabaw gihapon kay Adonias ang ambisyon, kay suno sa pagsulundan sa dumaan nga Sidlangan, ang mga asawa kag mga babayi sang hari mangin iya lamang sang legal nga manunubli sang hari. (Ipaanggid ang 2Sa 3:7; 16:21.) Amo man sini ang pagtan-aw ni Solomon sa sini nga pangabay nga ginpaagi sa iya iloy, gani ginsugo niya nga ipapatay si Adonias, nga gintuman dayon ni Benaias.—1Ha 2:22-25.
Espirituwal nga mga Hiyas
Talalupangdon nga mga Punto Gikan sa Tulun-an sang Nahaunang Hari
2:37, 41-46. Makatalagam gid ang maghunahuna nga malapas naton ang kasuguan sang Dios kag indi masilutan! Ang hungod nga nagasipak sa ‘masipot nga dalan nga nagapadulong sa kabuhi’ magaantos sa mga resulta sining di-maalamon nga desisyon.—Mateo 7:14.
AGOSTO 8-14
MGA BAHANDI SA PULONG SANG DIOS | 1 HARI 3-4
“Importante Gid ang Kaalam”
Maayo Bala Sia nga Halimbawa Ukon Paandam sa Imo?
4 Sa panugod sang paghari ni Solomon, nagpakita ang Dios sa iya damgo kag ginsilingan sia nga maghimo sing pangabay. Bangod kulang sia sang eksperiensia, nangabay sia sing kaalam. (Basaha ang 1 Hari 3:5-9.) Nahamuot ang Dios kay nangayo ang hari sing kaalam sa baylo sang kamanggaran kag himaya, gani ginhatagan niya si Solomon sing “tagiposoon nga maalam kag mahangponon.” (1 Hari 3:10-14) Subong sang ginsambit ni Jesus, ang kaalam ni Solomon tumalagsahon gid amo nga nabatian ini sang rayna sang Seba kag naglakbay sia sing tuman kalayo agod mapamatian ini mismo.—1 Hari 10:1, 4-9.
5 Wala kita nagapaabot nga makatigayon man sing kaalam paagi sa milagro. Si Solomon nagsiling nga “ang GINOO nagahatag sing kaalam,” pero nagsulat sia nga dapat naton ini pangabudlayan. Nagsiling sia: ‘Ilingig ang imo idulungug sa kaalam kag ipahamtang ang imo tagiposoon sa paghangup.’ Gingamit man niya ang mga ekspresyon subong sang “magtuaw,” ‘magpangita,’ kag “mag-usisa” sang kaalam. (Hulu. 2:1-6) Maathag nga sarang naton matigayon ang kaalam.
6 Maayo nga mamangkot, ‘Ginailog ko bala ang halimbawa ni Solomon sa pagtigayon sing kaalam sang Dios?’ Ang mga problema sa ekonomiya amo ang rason nga ginauna sang madamo ang ila trabaho kag palangabuhian. May epekto man ini sa ila desisyon parte sa sahi kag kalawigon sang edukasyon nga ila kuhaon. Kamusta ikaw kag ang imo pamilya? Ginapakita bala sang imo mga desisyon nga ginapakabahandi mo kag ginapangita ang kaalam sang Dios? May dapat ka bala bag-uhon sa imo pagtamod kag tulumuron agod makatigayon sang dugang nga kaalam? Ang matuod, ang pagtigayon sini para gid sa imo dayon nga kaayuhan. Si Solomon nagsulat: “Niyan mahangpan mo ang pagkamatarung kag katarungan kag ang pag-alangay, ang tagsa ka maayo nga banas.”—Hulu. 2:9
Espirituwal nga mga Hiyas
Si Jehova Isa Ka Dios sang mga Katipan
15 Sang maorganisar ang mga kaliwat ni Abraham subong isa ka pungsod sa idalom sang Kasuguan, ginpakamaayo sila ni Jehova suno sa iya ginsaad sa patriarka. Sang 1473 B.C.E., ang salili ni Moises, nga si Josue, amo ang namuno sa Israel pasulod sa Canaan. Pagkatapos, ang pagbahinbahin sa duta sa tunga sang mga tribo nagtuman sang saad ni Jehova nga ihatag ang duta sa binhi ni Abraham. Sang ang Israel matutom, gintuman ni Jehova ang iya saad nga ihatag sa ila ang kadalag-an batok sa ila mga kaaway. Nagmatuod ini labi na sang maggahom si Hari David. Sang tion sang anak ni David nga si Solomon, ang ikatlo nga bahin sang Abrahamikong katipan natuman. “Ang Juda kag ang Israel madamo subong sang balas nga yara sa baybayon sang dagat sa kadamuon, nga nagakaon kag nagainom kag nagapangalipay.”—1 Hari 4:20.
AGOSTO 15-21
MGA BAHANDI SA PULONG SANG DIOS | 1 HARI 5-6
“Nagtukod Sila sing Bug-os Kusog kag Tagipusuon”
Nahibaluan Mo Bala?
Ang mga sedro sa Lebanon kilala nga mabakod, matahom, mahumot, kag makabato sa mga insekto. Gani, ginpili ni Solomon ang pinakamaayo nga mga materyales para sa templo. Subong, pila na lang ka kagulangan sang mga sedro ang nabilin sa kabukiran sang Lebanon.
it-1-E 424
Sedro
Bangod sa kadamuon sang sedro nga tablon nga gamiton, linibo ka trabahador ang kinahanglan para sa pag-utod sang mga kahoy, pagdala sini sa Tiro ukon Sidon sa baybay sang Mediteraneo, paghimo sini nga mga balsa, kag pagpaanod sini sa dagat, posible pakadto sa Joppe. Dayon ginapatakas ini kag ginahakot pakadto sa Jerusalem. Ginahimo ini suno sa kontrata ni Solomon kag ni Hiram. (1Ha 5:6-18; 2Cr 2:3-10) Sugod sadto, sigesige na ang pag-abot sang kahoy amo nga sang tion sang paggahom ni Solomon, masiling nga ginhimo niya “ang kahoy nga sedro pareho kadamo sa mga kahoy nga sikomoro.”—1Ha 10:27; ipaanggid ang Isa 9:9, 10.
it-2-E 1077 ¶1
Templo
Para maorganisar ang trabaho, nagpatawag si Solomon sing 30,000 ka tawo halin sa Israel kag 10,000 ang ginapadala sa Lebanon kada bulan. Isa ka bulan sila nga matener sa Lebanon kag duha ka bulan sa ila balay. (1Ha 5:13, 14) Para mangin mga manugpas-an sing lulan, ginpatawag niya ang 70,000 ka trabahador halin sa mga “dumuluong nga pumuluyo” sang duta, kag 80,000 ka manugbasbas sang bato. (1Ha 5:15; 9:20, 21; 2Cr 2:2) Nagtangdo man si Solomon sing 550 ka lalaki bilang porman kag mahimo mga 3,300 bilang mga kabulig. (1Ha 5:16; 9:22, 23) Posible nga 250 sa ila ang mga Israelinhon, kag 3,600 ang mga “dumuluong nga pumuluyo” sa Israel.—2Cr 2:17, 18.
Espirituwal nga mga Hiyas
g 5/12 17, kahon
Ang Biblia—Libro sang Sibu nga Tagna, Bahin 1
SIBU NGA PAGREKORD SANG PETSA
Ang importansia sang sibu nga pagrekord sang petsa sa Biblia makita sa 1 Hari 6:1, nga nagasugid kon san-o gin-umpisahan ni Solomon ang pagpatindog sang templo sa Jerusalem. Mabasa naton: “Sa ikap-at ka gatus kag kawaloan nga tuig [eksakto nga 479 ka tuig] sa tapus nga nakagowa ang katawohan sang Israel gikan sa Egipto, sa ikap-at nga tuig sang paghari ni [Solomon] sa Israel, sa bulan nga Zif, nga amo ang ikaduhang bulan, nagsugud sia sa pagpatindug sang balay sang GINOO.”
Suno sa kronolohiya sang Biblia, ang 1034 B.C.E. amo ang ikap-at nga tuig sang paggahom ni Solomon. Kon maisip kita pabalik halin sa sina nga petsa sing 479 ka tuig, matupa kita sa 1513 B.C.E. nga amo ang tuig nga naggua ang Israel sa Egipto.
AGOSTO 22-28
MGA BAHANDI SA PULONG SANG DIOS | 1 HARI 7
“Ano ang Matun-an Naton sa Duha ka Haligi?”
“Magamina Kamo sing Saway sa Kabukiran”
Naggamit si Hari Solomon sang madamo nga saway para patahumon ang templo sa Jerusalem. Madamo sa sini ang gintipon sang iya amay nga si David, halin sa mga ginlutos niya nga mga Sirianhon. (1 Cronica 18:6-8) Ang saway nga “dagat nga tinunaw,” ang daku nga labador nga ginagamit sang mga saserdote para sa pagpanghugas, puede masudlan sing 17,500 ka galon kag mahimo nagabug-at asta sa 30 ka tonelada. (1 Hari 7:23-26, 44-46) May ara man duha ka dalagku nga saway nga haligi nga nagatindog sa atubang sang templo. Nagataas ini sing 8 metros kag may uloulo nga mga 2.2 metros ang kataason. Ining mga haligi may buho sa tunga, kag may kadamulon ini nga 7.5 sentimetros, kag 1.7 metros ang diametro. (1 Hari 7:15, 16; 2 Cronica 4:17) Makahalawhaw pamensaron kon daw ano kadamo nga saway ang kinahanglan para sa paghimo lang sini.
it-1-E 348
Boaz, II
Sa duha ka daku nga haligi nga saway nga ginpatindog sa atubangan sang portiko ni Solomon, ang haligi nga ara sa aminhan ginngalanan nga Boaz, nga posible nagakahulugan nga “Sa Kusog.” Ang haligi sa bagatnan gintawag nga Jaquin, nga nagakahulugan “Kabay Pa Tukuron Niya (ni Jehova) sing Malig-on.” Gani kon sugpunon ining duha kag basahon halin sa tuo pa wala kon ang isa nagaatubang sa S, nagakahulugan ini sing ‘Kabay nga tukuron [ni Jehova] sing malig-on [ang templo] sa iya kusog.’—1Ha 7:15-21; tan-awa ang KAPITAL.
Espirituwal nga mga Hiyas
it-1-E 263
Pagpaligo
Ang pisikal nga katinlo ginapatuman sa mga nagasimba kay Jehova sa pagkabalaan kag kaputli. Ginpakita ini sa mga kahimusan sa tabernakulo kag sang ulihi sa pag-alagad sa templo. Sang gintangdo ang mataas nga saserdote nga si Aaron kag ang iya mga anak nga lalaki, naligo anay sila antes nagsuksok sang mga panapton sang saserdote. (Ex 29:4-9; 40:12-15; Le 8:6, 7) Ginahugasan sang mga saserdote ang ila mga kamot kag tiil sang tubig nga halin sa saway nga labador sa luwang sang tabernakulo, kag sang ulihi, sa metal na nga suludlan sang tubig sa templo ni Solomon. (Ex 30:18-21; 40:30-32; 2Cr 4:2-6) Sa Adlaw sang Pagtumbas Para sa Sala, kaduha maligo ang mataas nga saserdote. (Le 16:4, 23, 24) Ang mga nagdala sang kanding para kay Azazel, sang nabilin nga ginhalad nga mga sapat, kag sang ginhalad nga pula nga baka sa gua sang kampo dapat maligo kag maglaba sang ila bayo antes sila magsulod sa kampo.—Le 16:26-28; Nu 19:2-10.
AGOSTO 29–SEPTIEMBRE 4
MGA BAHANDI SA PULONG SANG DIOS | 1 HARI 8
“Ang Mapainubuson kag Tinagipusuon nga Pangamuyo ni Solomon”
Pauswaga ang Imo mga Pangamuyo Paagi sa Pagtuon sa Biblia
9 Agod pamatian ang aton pangamuyo, dapat nga magagikan ini sa aton tagipusuon. Sa 1 Hari kapitulo 8, si Solomon nagpabutyag sing tinagipusuon nga pangamuyo sa atubangan sang nagtipon nga kadam-an sa Jerusalem para sa inagurasyon sang templo ni Jehova sang 1026 B.C.E. Pagkatapos mabutang ang kaban sang katipan sa Labing Balaan kag napuno sang panganod ni Jehova ang templo, gindayaw ni Solomon ang Dios.
10 Tun-i ang pangamuyo ni Solomon, kag talupangda nga pila ka beses niya ginsambit ang tagipusuon. Ginkilala ni Solomon nga si Jehova gid lamang ang makabasa sang tagipusuon sang tawo. (1 Hari 8:38, 39) Ginpakita man sini nga pangamuyo nga may yara paglaum ang isa nga nakasala nga luyag ‘magbalik sa Dios sing bug-os tagiposoon.’ Kon ang katawhan sang Dios mabihag sang ila kaaway, ang ila mga pangamuyo pamatian kon ang ila tagipusuon bug-os para kay Jehova. (1 Hari 8:48, 58, 61) Gani, maathag nga ang aton mga pangamuyo dapat naggikan gid sa aton tagipusuon.
Ibayaw ang Mainunungon nga mga Kamot sa Pangamuyo
7 Nagapangamuyo man kita sing dayag ukon sing pribado, ang importante nga prinsipio sa Kasulatan nga pirme dumdumon amo nga dapat kita magpakita sing mapainubuson nga panimuot sa aton mga pangamuyo. (2 Cronica 7:13, 14) Ginpakita ni Hari Solomon ang pagkamapainubuson sa iya dayag nga pangamuyo sang gindedikar ang templo ni Jehova sa Jerusalem. Bag-o lang natapos ni Solomon ang isa sang pinakamatahom nga mga tinukod sa duta. Apang, mapainubuson sia nga nangamuyo: “Matuod gid bala nga ang Dios magapuyo sa duta? Yari karon! Ang mga langit, huo, ang langit sang mga langit indi makaigo sa imo; daw ano pa gid ka diutay, nian, ining balay nga akon ginpatindog!”—1 Hari 8:27.
8 Kaangay ni Solomon, dapat kita magmapainubuson kon nagatiglawas sa iban sa dayag nga pangamuyo. Bisan pa nga dapat naton likawan ang pagpakunokuno nga balaan, ang pagkamapainubuson sarang mapakita paagi sa aton tono sang tingog. Ang mapainubuson nga mga pangamuyo indi pakitakita lamang ukon pakunokuno lamang. Ginapatalupangod sini, indi ang nagapangamuyo, kundi ang Isa nga ginapangamuyuan. (Mateo 6:5) Ang pagkamapainubuson mapakita man paagi sa kon ano ang aton ginasiling sa pangamuyo. Kon nagapangamuyo kita sing mapainubuson, indi kita magadikta sa Dios nga himuon ang mga bagay sa aton paagi. Sa baylo, magapakitluoy kita kay Jehova sa pagpanghikot sa paagi nga nagahisanto sa iya sagrado nga kabubut-on. Ginpakita sang salmista ang nagakaigo nga panimuot sang nagpangabay sia: “O Jehova, luwasa kami, palihug! O Jehova, hatagi kami sing kadalag-an, palihug!”—Salmo 118:25; Lucas 18:9-14.
Espirituwal nga mga Hiyas
it-1-E 1060 ¶4
Langit
Si Solomon, nga nagpatindog sang templo sa Jerusalem, nagsiling nga “sa langit, sa pinakamataas nga langit” indi makaigo ang Dios. (1Ha 8:27) Bilang Manunuga sang mga langit, ang posisyon ni Jehova mas mataas katama kon ikumparar sa sini tanan, kag “ang iya ngalan lamang ang labaw sa tanan. Ang iya kadungganan mataas pa sa duta kag langit.” (Sa 148:13) Ginatakus ni Jehova ang literal nga langit nga daw pareho lang kahapos sa pagtakus sang tawo sa isa ka butang paagi sa dangaw nga halin sa punta sang iya kamalagku pakadto sa punta sang iya kamalingking. (Isa 40:12) Ang ginsiling ni Solomon wala nagapahangop nga wala sing espesipiko nga lugar nga ginaistaran ang Dios. Indi man buot silingon sini nga ara sia bisan diin kag sa bisan ano nga butang. Mahangpan naton ini kay nagsiling man si Solomon nga nagapamati si Jehova “sa langit nga imo puluy-an,” nga amo ang mga langit nga ginaistaran sang espiritu nga mga tinuga.—1Ha 8:30, 39.