Paano Ikaw Dumdumon ni Jehova?

“DUMDUMA ako, O Dios ko.” Nakitluoy si Nehemias sa Dios sing madamong beses paagi sining pinamulong. (Nehemias 5:​19; 13:​14, 31) Natural lamang nga kon ang mga tawo ginahul-an sing daku, nagapakitluoy sila sa Dios sing subong sini.

Apang, ano ang ginahunahuna sang mga tawo kon ginapangabay nila ang Dios nga dumdumon sila? Maathag nga nagalaum sila nga indi lamang mga ngalan nila ang dumdumon sang Dios. Walay duhaduha nga nagalaum sila subong sang isa sang mga kriminal nga ginpatay sa tupad ni Jesus. Indi kaangay sa isa pa, nakitluoy sia kay Jesus: “Dumduma ako kon magsulod ka sa imo ginharian.” Luyag niya nga indi lamang dumdumon ni Jesus kon sin-o sia kundi nga may himuon man sia para sa iya​—⁠nga banhawon sia.​—⁠Lucas 23:⁠42.

Pirme ginapakita sang Biblia nga sa bahin sang Dios, ang “pagdumdom” nagakahulugan sing positibo nga aksion. Halimbawa, sa tapos nga gin-anaw ang duta sa sulod sang 150 ka adlaw, “gindumdom sang Dios si Noe . . . , kag ginpahuyop sang Dios ang isa ka hangin sa ibabaw sang duta, kag naghubas ang mga tubig.” (Genesis 8:1) Mga siglo sang ulihi, si Samson, nga ginbulag kag ginkadenahan sang mga Filistinhon, nangamuyo: “Jehova, dumduma ako, palihug, kag pabaskuga ako, palihug, sining makaisa na lamang.” Gindumdom ni Jehova si Samson paagi sa paghatag sa iya sing labaw-sa-tawo nga kusog agod makatimalos sia batok sa mga kaaway sang Dios. (Hukom 16:​28-30) Nahanungod naman kay Nehemias, ginpakamaayo ni Jehova ang iya mga panikasog, kag napasag-uli ang matuod nga pagsimba sa Jerusalem.

“Ang tanan nga butang nga ginsulat sadto anay ginsulat subong instruksion sa aton, agod nga paagi sa aton pagbatas kag paagi sa paglipay gikan sa Kasulatan makatigayon kita sing paglaum,” sulat ni apostol Pablo. (Roma 15:4) Kon dumdumon naton si Jehova paagi sa pagtinguha nga himuon ang iya kabubut-on, subong sang ginhimo sang iya matutom nga mga alagad sang una, makasalig kita nga dumdumon kita ni Jehova paagi sa pagbulig sa aton nga matigayon ang aton mga kinahanglanon sa adlaw-adlaw, paagi sa pagsakdag sa aton sa mga pagtilaw sa aton, kag paagi sa pagluwas sa aton kon hukman niya ang mga di-diosnon.​—⁠Mateo 6:​33; 2 Pedro 2:⁠9.

Abiabihon Mo bala ang Isa ka Pagduaw?

Bisan sa sining magamo nga kalibutan, sarang ikaw makatigayon sing kalipay gikan sa sibu nga ihibalo sang Biblia tuhoy sa Dios, sa iya Ginharian, kag sa iya matahom nga katuyuan para sa katawhan. Kon luyag mo sing dugang nga impormasyon ukon maluyag nga may isa nga magaduaw sa imo agod magdumala sing walay bayad nga pagtuon sa Biblia, magsulat palihug sa Watch Tower, P.O. Box 2044, 1060 Manila, ukon sa nagakaigo nga direksion nga nalista sa pahina 30.