Masaligan Mo Bala ang Biblia?

SA PAGKUHA mo sang Biblia, ginapaabot mo bala nga makakita sing sensilyo? Kamusta ining dumaan na nga pilak nga sensilyo?

Madamo ang nagahunahuna sa Biblia subong karaan nga libro nga nagahatag sing dikinaandan nga mga sugilanon kag dalayawon nga mga moral. Apang, wala sila nagapati nga ang mga kasaysayan sang Biblia sibu nga maragtas, gani ginapanghiwala nila nga ini ang Pulong sang Dios. Apang, may nagakaigo nga pamatuod sang pagkasibu sang Biblia. Ini nga sensilyo (daku nga laragway) isa ka maayo nga halimbawa. Ano ang ginasiling sang nasulat diri?

Ang sensilyo ginhimo sa Tarso, ang siudad sa bagatnan-sidlangan nga bahin kon ano karon ang Turkey. Ang sensilyo ginhimo sa tion sang paggahom sang gobernador sang Persia nga si Mazaeus sang ikap-at nga siglo B.C.E. Nagpakilala ini sa iya subong gobernador sang probinsia sa “Tabok sang Suba,” nga amo, ang Suba sang Eufrates.

Apang ngaa makawiwili ina nga prase? Bangod makita mo ang kaanggid nga designasyon sa imo Biblia. Ang Esdras 5:6–6:13 nagahatag sang sulat sa tunga ni Dario nga hari sang Persia kag ni Tatnai nga isa ka gobernador. Ang ginahambalan amo ang pagpatindog liwat sang mga Judiyo sang ila templo sa Jerusalem. Si Esdras isa ka lantip nga manugkopya sang Kasuguan sang Dios, kag mapaabot mo nga ang iya ginsulat husto kag sibu. Makita mo sa Esdras 5:6 kag 6:13 nga gintawag niya si Tatnai nga “gobernador sa tabok sang Suba.”

Ginsulat ina ni Esdras sang mga 460 B.C.E., mga 100 ka tuig antes ginhimo ini nga sensilyo. Aba, ang iban nga mga tawo mahimo magabatyag nga ang designasyon para sa isa ka opisyal anay diutay nga detalye. Apang kon masaligan mo ang mga manunulat sang Biblia bisan sa sinang diutay nga mga detalye, indi bala ina magapadugang sang imo pagsalig sa ginsulat pa nila?

Sa nahaunang duha ka artikulo sa sining guwa, makita mo ang dugang pa nga mga rason para sa sina nga pagsalig.

Abiabihon Mo Bala ang Isa ka Pagduaw?

Bisan sa sining magamo nga kalibutan, sarang ikaw makatigayon sing kalipay gikan sa sibu nga ihibalo sa Biblia tuhoy sa Dios, sa iya Ginharian, kag sa iya matahom nga katuyuan para sa katawhan. Kon luyag mo sing dugang nga impormasyon ukon maluyag nga may isa nga magaduaw sa imo agod magdumala sing walay bayad nga pagtuon sa Biblia, magsulat palihug sa Watch Tower, P.O. Box 2044, 1099 Manila, ukon sa nagakaigo nga direksion nga nalista sa pahina 2.