Ang Gahom sang Malulo nga Pulong

“Isa ka tagipusuon nga nagakuko bangod sa kabalaka, makapaumpaw gid sa sini ang isa ka malulo nga pulong!”​—⁠Hulubaton 12:​25, Knox.

ANG mga Cristiano indi hilway sa kalalat-an. Nagakabalaka sila kon kaisa bangod nagakabuhi sila sa sining “makahalanguyos nga mga tion nga mabudlay atubangon.”​—⁠2 Timoteo 3:⁠1.

Kon nagaantos sina nga kalamidad, daw ano nga pagpakamaayo ang makabati sing malulo nga mga pulong halin sa isa ka matutom nga abyan! “Ang matuod nga kaupod mahigugmaon sa tanan nga tion, kag isa ka utod nga natawo kon may kahuol,” siling sang Biblia. (Hulubaton 17:17) Ang matutom nga tawo nga si Job nakilala subong amo sini nga sahi sang abyan. Bisan si Elifaz naghambal tuhoy sa iya: “Kon ang isa nasandad, maluya kag lapyo, ang imo mga pulong nagpalig-on sa iya sa pagtindog.”​—⁠Job 4:​4, Today’s English Version.

Apang, sang si Job mismo nagkinahanglan sing pagpalig-on, si Elifaz kag ang iya mga kaupod wala nagbungat sing malulo nga mga pulong. Ginbasol nila si Job sa iya kalalat-an, ginapahangop nga may yara sia pila ka tinago nga sala. (Job 4:⁠8) Ang The Interpreter”s Bible nagkomento: “Ang ginakinahanglan ni Job amo ang kaawa sang tagipusuon sang tawo. Ang iya nakuha amo ang paalagisud sang ‘matuod’ kag matahom nga relihiosong mga wali kag makatalaka nga mga halambalanon sa moral. Naligban gid si Job sang mabatian ang mga pulong ni Elifaz kag sang iya mga kaupod nga napilitan sia sa pagsinggit: “Tubtob san-o bala ang pagsakit ninyo sa akon kalag kag pagdugmok ninyo sa akon sa mga pulong?”​—⁠Job 19:⁠2.

Dili gid naton pagpasinggiton sa kasakit ang aton masigkaalagad ni Jehova bangod sang aton walay pasunaid, dimalulo nga mga pulong. (Ipaanggid ang Deuteronomio 24:15.) Ang isa ka hulubaton sa Biblia nagapaandam: “Ang imo ginahambal magaamlig sang kabuhi ukon magalaglag sini; gani dapat mo batunon ang mga resulta sang imo mga pulong.”​—⁠Hulubaton 18:​21, TEV.

Sa pagkilala sa gahom sang pulong, sundon naton ang halimbawa ni apostol Pablo. Sang sa Macedonia, sia “nagpalig-on sa mga didto paagi sa madamo nga pulong.”​—⁠Binuhatan 20:⁠2.

Abiabihon Mo Bala ang Isa ka Pagduaw?

Bisan sa sining magamo nga kalibutan, sarang ikaw makatigayon sing kalipay gikan sa sibu nga ihibalo sa Biblia tuhoy sa Dios, sa iya Ginharian, kag sa iya matahom nga katuyuan para sa katawhan. Kon luyag mo sing dugang nga impormasyon ukon maluyag nga may isa nga magaduaw sa imo agod magdumala sing walay bayad nga pagtuon sa Biblia, magsulat palihug sa Watch Tower, P.O. Box 2044, 1099 Manila, ukon sa nagakaigo nga direksion nga nalista sa pahina 2.