Mga Reperensia Para sa Pagkabuhi kag Pagministeryo nga Workbook Para sa Miting
© 2025 Watch Tower Bible and Tract Society of Pennsylvania
HULYO 7-13
MGA BAHANDI SA PULONG SANG DIOS HULUBATON 21
Mga Prinsipio nga Makabulig Para Mangin Malipayon ang Pag-asawahay
Paano Ka Makahimo sing Maalamon nga mga Desisyon?
Ang padasudaso nga mga desisyon mahapos lang nga mangin indi maalamon. Ang Hulubaton 21:5 nagapaandam: “Ang mga plano sang maukod nagapadulong gid sa kaayuhan, apang ang tagsatagsa nga padasudaso nagapadulong gid sa kinawad-on.” Halimbawa, ang nagasalimuang nga mga tin-edyer indi dapat magpadasudaso sa pagminyo. Kon indi, mahimo maeksperiensiahan gid nila ang ginsiling ni William Congreve, isa ka Ingles nga manunulat sing drama sa entablado sang ika-18 nga siglo: “Ang nagaminyo sing padasudaso, magahinulsol sing madugay.”
Kon Paano Mangin Madinalag-on ang Pag-asawahay
Mangin mapainubuson. “[Indi maghimo] sang bisan ano bangod sa huyog nga makigbais ukon bangod sa sobra nga pagpaimportante sang kaugalingon, kundi may pagpaubos sang hunahuna nga nagakabig sa iban nga labaw sa inyo.” (Filipos 2:3) Madamo sa mga mag-asawa ang wala nagahangpanay bangod nagabasulay sila kon sin-o ang may sala imbes nga mangin mapainubuson kag pangitaan sing solusyon ang problema. Ang pagkamapainubuson nagabulig sa inyo nga mag-asawa nga malikawan ang pagbinais kon sin-o gid ang husto.
“Magkalipay Ka sa Asawa sang Imo Pagkapamatan-on”
13 Apang ano abi kon nahul-an ang pag-asawahay bangod sang di-maayo nga pagtamdanay sang magtiayon? Ang pagpangita sing solusyon nagakinahanglan sing panikasog. Halimbawa, basi ang masakit nga panghambal amat-amat nga nangin bahin sang ila pag-asawahay kag karon regular na nila ini nga ginahimo. (Hulubaton 12:18) Subong sang ginbinagbinag sa nahauna nga artikulo, makahalalit ini. Ang isa ka hulubaton sa Biblia nagasiling: “Maayo pa magpuyo sa isa ka desyerto, sangsa mag-upod sa palaaway nga babayi upod ang kaakig.” (Hulubaton 21:19) Kon isa ikaw ka asawa sa sining sahi sang pag-asawahay, pamangkuta ang imo kaugalingon, ‘Ang akon bala panimuot nagapabudlay sa akon bana nga makig-upod sa akon?’ Ang mga bana ginasilingan sang Biblia: “Padayon nga higugmaa ang inyo mga asawa kag dili kamo maakig sing tuman sa ila.” (Colosas 3:19) Kon isa ikaw ka bana, pamangkuta ang imo kaugalingon, ‘Ang akon bala kinaiya di-mahigugmaon, sa amo nagasulay sa akon asawa nga mangita sing lugpay sa iban?’ Sa pagkamatuod, ang seksuwal nga imoralidad indi mapakamatarong. Apang, bangod mahimo matabo ining trahedya, maayo nga binagbinagon ang mga problema sing tampad.
Espirituwal nga mga Hiyas
Natuman ang Palanan-awon Tuhoy sa Ginharian sang Dios
9 Sa baylo nga ahaw lamang nga tawo nga nagasakay sa polyino, si Jesus isa na karon ka gamhanan nga Hari. Ginlaragway sia subong nagasakay sa isa ka kabayo—nga gingamit sa Biblia subong simbulo sa inaway. (Hulubaton 21:31) “Yari karon! ang kabayo nga maputi,” siling sang Bugna 6:2, “kag ang isa nga nagasakay sa sini may pana; kag ginhatagan sia sing korona, kag naglakat sia nga nagapangdaug kag sa pagtapos sang iya pagpangdaug.” Dugang pa, tuhoy kay Jesus, si salmista David nagsulat: “Ang sungkod sang imo kusog ipadala ni Jehova gikan sa Sion, nga nagasiling: ‘Magpanglutos ka sa tunga sang imo mga kaaway.’”—Salmo 110:2.
HULYO 14-20
MGA BAHANDI SA PULONG SANG DIOS HULUBATON 22
Mga Prinsipio nga Makabulig sa Pagpadaku sa Kabataan
Magaalagad Bala sa Dios ang Imo Kabataan Pagdaku Nila?
7 Ang mag-asawa nga nagaplano nga magbata dapat mamangkot sa ila kaugalingon: ‘Mapainubuson bala kami? Palangga bala namon si Jehova kag ginapabaloran bala namon ang iya Pulong? Nagakabagay bala kami nga pilion ni Jehova nga mag-atipan sang isa ka bata nga hamili sa iya?’ (Sal. 127:3, 4) Kon isa ikaw ka ginikanan, pamangkuta ang imo kaugalingon: ‘Ginatudluan ko bala ang akon kabataan nga mangin mapisan sa pag-obra?’ (Man. 3:12, 13) ‘Ginapanikasugan ko gid bala nga amligan ang akon kabataan sa malain nga mga impluwensia sa kalibutan ni Satanas nga makahalit sa ila?’ (Hulu. 22:3) Imposible nga maamligan mo ang imo kabataan sa tanan nga problema nga maeksperiensiahan nila. Pero may mahimo ka para mangin handa sila sa mga problema. Bangod palangga mo sila, padayon sila nga tudlui nga magsalig sa mga laygay sang Pulong sang Dios. (Basaha ang Hulubaton 2:1-6.) Halimbawa, kon may paryente kamo nga nag-untat sa pag-alagad kay Jehova, gamita ang Pulong sang Dios para mahangpan sang imo kabataan nga mas importante si Jehova kag dapat kita mangin matutom sa Iya. (Sal. 31:23) Kag kon mapatyan kamo sang pinalangga, ipakita sa imo kabataan ang mga teksto sa Biblia nga makapahaganhagan sang ila kasubo kag makapaumpaw sa ila.—2 Cor. 1:3, 4; 2 Tim. 3:16.
Mga Ginikanan, Hanasa ang Inyo Kabataan nga Higugmaon si Jehova
17 Hanasa ang kabataan samtang lapsag pa sila. Mas maayo kon sugdan sang mga ginikanan ang paghanas sa ila kabataan samtang lapsag pa sila. (Hulu. 22:6) Binagbinaga si Timoteo, nga nangin kaupod sang ulihi ni apostol Pablo sa paglakbay. Ginhanas sia sang iya iloy nga si Eunice kag sang iya lola nga si Loida “kutob sa pagkalapsag.”—2 Tim. 1:5; 3:15.
18 Napadaku nanday Jean-Claude kag Peace, nga taga-Côte d’Ivoire man, ang tanan nila nga anom ka kabataan nga nagahigugma kag nagaalagad kay Jehova. Ano ang nakabulig sa ila? Gin-ilog nila ang halimbawa nanday Eunice kag Loida. Nagsiling sila, “Ginsugdan namon ang pagpatudok sang Pulong sang Dios sa amon kabataan sugod sang natawo sila.”—Deut. 6:6, 7.
19 Ano ang buot silingon sang ‘pagpatudok’ sang Pulong ni Jehova sa imo kabataan? Ang ‘pagpatudok’ nagakahulugan sing “sulitsulit nga pagtudlo kag pagpahanumdom.” Para mahimo ini, dapat regular nga hatagan sang tion sang mga ginikanan ang ila kabataan. Kon kaisa, mahimo matak-an ang mga ginikanan bangod kinahanglan nila sulitsuliton ang ila mga ginatudlo sa ila kabataan. Pero, dapat ini tamdon sang mga ginikanan nga isa ka paagi para mabuligan nila ang ila kabataan nga mahangpan ang Pulong sang Dios kag maaplikar ini.
Mga Ginikanan—Mangin Huwaran sa Inyo mga Anak
Sa pagkamatuod, ang mga bata magagawi gid subong sang mga bata, kag ang iban sa ila may huyog nga mangin batinggilan kag malalison pa gani. (Genesis 8:21) Ano ang mahimo sang mga ginikanan? “Ang kabuangan nahigot sa tagipusuon sang bata; ang bilugon sang disiplina amo ang magapahilayo sini sa iya,” siling sang Biblia. (Hulubaton 22:15) Ginatamod ini sang iban nga mapintas kag karaan. Sa pagkamatuod, ang Biblia nagapamatok sa kasingki kag sa bisan ano nga sahi sang abuso. Ang “bilugon,” bisan pa nga kon kaisa literal, nagarepresentar sa awtoridad sang mga ginikanan nga ginapadapat sing estrikto apang sing mahigugmaon kag sing nagakaigo bangod sang pagkabalaka sa dayon nga kaayuhan sang mga anak.—Hebreo 12:7-11.
Espirituwal nga mga Hiyas
Paano Ka Mangin Malipayon sa Imo mga Pribilehiyo?
11 Mangin mas malipayon pa gid kita sa aton pag-alagad kay Jehova kon himuon naton ang aton bug-os nga masarangan sa bisan ano nga asaynment nga ginhatag sa aton. Mangin “masako gid” sa pagbantala, kag magpakigbahin sing bug-os sa mga hilikuton sa kongregasyon. (Binu. 18:5; Heb. 10:24, 25) Handai sing maayo ang mga pagatun-an sa mga miting para makakomento ka kag mapalig-on ang mga kauturan. Ihatag ang imo pinakamaayo kon may bahin ka sa midweek meeting. Kon ginpangabay ka nga magbulig sa hilikuton sa kongregasyon, mag-abot sa husto nga tion, himua ini dayon, kag ipakita nga masaligan ka. Indi paghunahunaa nga indi importante ang ginapahimo sa imo, kag indi pagpamensara nga uyang lang ini sang imo tion. Panikasugi nga mapauswag ang imo mga ikasarang. (Hulu. 22:29) Kon himuon mo ang imo bug-os nga masarangan sa imo mga asaynment sa pag-alagad kay Jehova, madasig ka nga magauswag kag mangin mas malipayon ka pa gid. (Gal. 6:4) Kag indi ka dalidali nga magsunggod kon ihatag sa iban ang pribilehiyo nga gusto mo. Sa baylo, malipay ka pa gani.—Roma 12:15; Gal. 5:26.
HULYO 21-27
MGA BAHANDI SA PULONG SANG DIOS HULUBATON 23
Mga Prinsipio nga Makabulig Parte sa Pag-inom sang Alkohol
Hupti ang Balanse nga Pagtamod sa Pag-inom sing Alkohol
5 Ano abi kon ang isa nagainom sang alkohol apang nagahalong nga indi sia mamutikan sang iban nga hubog? Ang pila ka tawo daw indi mahibal-an nga hubog bisan pa madamo na sing nainom. Apang, ang paghunahuna nga indi ini makahalit isa ka sahi sang pagdaya sa kaugalingon. (Jeremias 17:9) Sing amat-amat, ang isa mahimo magiyan sa alkohol kag mangin ‘ulipon sa madamo nga alak.’ (Tito 2:3) Tuhoy sa kon paano mangin alkoholiko, ang awtor nga si Caroline Knapp nagsiling: “Isa ini ka mahinay, amat-amat, malalangon, malimbungon nga proseso.” Isa gid ka makamamatay nga siod ang pagpatuyang sa alkohol!
6 Binagbinaga man ang paandam ni Jesus: “Bantayi ang inyo kaugalingon nga ang inyo mga tagipusuon indi gid mabug-atan sang sobra nga pagkaon kag lakas nga pag-inom kag mga kabalaka sa kabuhi, kag yadto nga adlaw magaabot sa inyo sing hinali subong sang siod. Kay magaabot ini sa tanan nga nagapuyo sa nawong sang bug-os nga duta.” (Lucas 21:34, 35) Ang pag-inom indi na kinahanglan nga maglab-ot pa sa pagpahubog antes sini patuyhon kag paluyahon ang tawo—sa pisikal subong man sa espirituwal. Ano abi kon mag-abot ang adlaw ni Jehova kag matabuan nga amo sini ang iya kahimtangan?
it-1-E 656
Pagpahubog
Ginapakamalaut sang Biblia. Ang pag-inom sang maisog nga ilimnon asta mahubog ang isa, ginapakamalaut gid sang Biblia. Ang maalam nga manunulat sang Hulubaton naglaragway sang epekto sang sobra nga pag-inom sang makahulubog nga mga ilimnon. Ang iya paglaragway insakto gid, maathag, kag pareho gid sa ginasiling sang science. Sia nagpaandam: “Sin-o ang makaluluoy? Sin-o ang indi mapahamtang? Sin-o ang palabais? Sin-o ang reklamador? Sin-o ang may mga pilas nga wala sing kabangdanan? Sin-o ang may buron nga mga mata? Ang mga tawo nga palahubog; ang mga nagapangita sing maisog nga alak. Indi ka magtulok sa kapula sang alak nga daw nagainggat sa kopa [kon ang alak manami tan-awon kag daw nagainggat] kag suabe nga imnon [kon nagadalhay lang ini sa tutunlan], kay sa ulihi nagapangagat ini kaangay sang man-ug, kag nagapagua sang hilo kaangay sang dalitan nga man-ug [mahimo ini magresulta sa balatian sa pisikal (halimbawa, ginahalinan ini sang cirrhosis sa atay) kag sa hunahuna (kabangdanan man ini sang delirium tremens), kag puede ini magresulta sa kamatayon]. Makakita ka sing indi kinaandan nga mga butang [maapektuhan sang alkohol ang sentro nga mga bahin nga nagakontrol sang utok, gani indi na ini makapanghikot sing maayo; nagagua ang mga batasan nga kinaandan nga ginatago; may mga halusinasyon ang isa; ang mga blangko nga memorya ginaislan niya sang makawiwili nga mga eksperiensia nga daw tuodtuod gid; wala na sia sing kontrol sa iya ginahimo], kag bisan ano na lang ang imo ginangasal [himuon sini nga tawo ang iya mga ginahunahuna kag mga ginahandum nga sa masami ginapunggan niya].”—Hul 23:29-33; Os 4:11; Mat 15:18, 19.
Nagpadayon ang manunulat sa paglaragway sang personal nga eksperiensia sang palahubog: “Kag pamatyag mo daw yara ka sa tunga sang lawod [naeksperiensiahan niya ang pagsalasala nga daw malumos, nga sa ulihi madulaan sang animo], nga nagahigda sa punta sang palo sang barko [sa sini nga bahin pinakamakusog ang uyog sang barko, gani ara man sa katalagman ang kabuhi sang palahubog kay puede sia maaksidente, ma-stroke, makakita sang away, kag iban pa]. ‘Ginlampusan nila ako, apang wala ako makabatyag. Ginbunal nila ako, apang wala ako makahibalo [siling sang palahubog, nga daw ginaistorya ang iya kaugalingon; wala sia kabalo kon ano ang matuod nga nagakatabo kag sa silot nga nabaton niya bangod sina nga eksperiensia]. San-o ako maumpawan? Mainom pa ako liwat [kinahanglan na niya magtulog para maumpawan sa iya kahulugbon, pero ulipon sia sang ilimnon gani ginapaabot na niya ang tion nga makainom liwat].’” Magapamigado sia bangod daku ang iya ginagasto sa ilimnon kag bangod indi na sia masaligan kag indi sia makaobra.—Hul 23:20, 21, 34, 35.
Espirituwal nga mga Hiyas
Mga Pamangkot Gikan sa mga Bumalasa
Halimbawa, ang sobra nga katambukon mahimo isa ka palatandaan sang pagkahakugan, apang indi ini matuod sa tanan nga kaso. Mahimo nga nangin tuman katambok ang isa bangod sang balatian. Mahimo man nga napanubli niya ini. Dapat man naton dumdumon nga ang sobra nga katambukon isa ka pisikal nga kahimtangan, samtang ang pagkahakugan isa ka panimuot, ang dalok ukon sobra nga pagpatuyang. Gani, ang pagkahakugan indi mapat-od sa kadakuon sang lawas kundi sa panimuot sang isa sa pagkaon. Mahimo nga normal lang ang kadakuon sang isa ka indibiduwal ukon basi maniwang pa gani sia apang hakugan sia. Isa pa, lainlain ang talaksan sang husto nga kabug-aton ukon panglawason sa kada lugar.
HULYO 28–AGOSTO 3
MGA BAHANDI SA PULONG SANG DIOS HULUBATON 24
Pabakura ang Imo Kaugalingon sa Pag-atubang sa mga Kabudlayan
‘Mangin Malig-on Kamo kag Mapag-on’
15 Tun-i ang Pulong sang Dios kag pamalandungi ini. Kon madalom ang mga gamot sang isa ka kahoy, mabakod ini kag indi ini dali matumba. Kon madalom man nga nakapanggamot sa Pulong sang Dios ang aton pagtuo, mangin mabakod kita. Samtang nagadaku ang kahoy, nagadalom man kag nagapangalapkap ang mga gamot sini. Sing kaanggid, kon nagatuon kita kag nagapamalandong, nagadalom man ang aton paghangop sa Pulong sang Dios. Gani mas mangin mabakod ang aton pagtuo kag mas mangin kumbinsido kita nga ang paagi sang Dios amo gid ang pinakamaayo. (Col. 2:6, 7) Pamalandungi kon paano naproteksionan ang mga alagad ni Jehova sang una paagi sa iya mga instruksion kag mga laygay. Halimbawa, nagpokus gid si Ezequiel sang nakita niya sa isa ka palanan-awon nga ginatakus sing maayo sang isa ka anghel ang templo. Napalig-on gid si Ezequiel sa sini nga palanan-awon, kag nagatudlo ini sa aton nga masimba naton si Jehova sa husto nga paagi kon tumanon naton ang iya mga kasuguan. (Ezeq. 40:1-4; 43:10-12) Kon magpain kita sang tion para tun-an kag pamalandungan ang madalom nga mga butang sa Pulong sang Dios, makabenepisyo man kita.
Hupti ang Kalipay sa Tion sang mga Kabudlayan
12 Ang Hulubaton 24:10 nagasiling: “Kon mapunaw ka sa adlaw sang kapiotan, ang imo kusug diotay.” Ang isa pa ka hulubaton nagasiling: “Sa kasubo sang tagiposoon ang espiritu naboong.” (Hulu. 15:13) Ang pila ka Cristiano ginluyahan sing buot tubtob sa punto nga nag-untat na sila sa pagbasa sang Biblia kag sa pagpamalandong sa sini. Ang ila mga pangamuyo nangin rutina na lamang, kag wala na sila nagapakig-upod sa ila mga masigkasumilimba. Ang pagpabilin nga masinulub-on sa madugay nga tion makahalalit.—Hulu. 18:1, 14.
13 Sa pihak nga bahin, ang positibo nga pagtamod makabulig sa aton nga magkonsentrar sa mga aspekto sang aton kabuhi nga makahatag sa aton sing kalipay. Si David nagsulat: “Nagakalipay ako sa paghimo sang imo kabubut-on, O Dios ko.” (Sal. 40:8) Bisan ano man nga problema ang mag-abot sa aton kabuhi, indi gid naton dapat pag-untatan ang aton maayo nga espirituwal nga rutina. Sa pagkamatuod, ang kasubo mabatuan naton paagi sa pagpabilin nga masako sa hilikuton nga makahatag sa aton sing kalipay. Si Jehova nagasugid sa aton nga makasapo kita sing kalipay paagi sa regular nga pagbasa sang iya Pulong kag sa pagpamalandong sa sini. (Sal. 1:1, 2; Sant. 1:25) Paagi sa Balaan nga Kasulatan kag sa aton Cristianong mga miting, makabaton kita sing “matahum nga mga polong” nga makapalig-on gid kag makapahalipay sa aton tagipusuon.—Hulu. 12:25; 16:24.
Mga Pamangkot Gikan sa mga Bumalasa
Ang Hulubaton 24:16 nagasiling: “Bisan pa mapukan sing makapito ang matarong magabangon sia gihapon.” Ginapatuhuyan bala sini ang tawo nga sulitsulit nga nakahimo sang sala pero ginpatawad sang Dios?
Indi. Sa baylo, ginapatuhuyan sini nga teksto ang tawo nga madamo sing problema pero nagabatas.
Gani, ang Hulubaton 24:16 wala nagapatuhoy sa tawo nga nagahimo sang sala kundi sa tawo nga nagabatas sang madamo nga problema. Sa sining malaut nga kalibutan, ang isa ka matarong nga tawo mahimo magmasakit ukon makaeksperiensia sang iban pa nga problema. Mahimo pa gani sia hingabuton sang gobierno bangod sang iya pagtuo. Pero makasalig sia nga buligan sia sang Dios nga makabatas. Hunahunaa ang mabudlay nga mga sitwasyon nga nabatas sang mga alagad sang Dios. Ngaa nabatas nila ini? Bangod “ginapabangon ni Jehova ang tanan nga nagakatumba, kag ginapabakod niya ang tanan nga maluya.”—Sal. 41:1-3; 145:14-19.
Espirituwal nga mga Hiyas
Mga Pamangkot Gikan sa mga Bumalasa
Sang panahon sang Biblia, kon ang isa ka tawo “magpatindug sang [iya] balay,” ukon magpangasawa kag magtukod sang isa ka pamilya, dapat niya pamangkuton ang iya kaugalingon, ‘Makasarang na bala ako mag-atipan kag magsuportar sang akon asawa kag sang amon mangin kabataan sa ulihi?’ Antes sia magtukod sang pamilya, may mga butang sia nga dapat himuon pareho sang pag-atipan sang iya uma ukon patubas. Gani, ang Maayong Balita nga Biblia maathag kag direkta nga nagsiling: “Indi ka magpatindog sing balay kag magpangasawa kon indi pa handa ang imo uma, kag kon wala pa ikaw sing pangita.” Naaplikar man bala ini nga prinsipio sa karon?
Huo. Ang isa ka lalaki nga luyag mangasawa kinahanglan gid nga mangin handa sa sina nga responsibilidad. Kon wala sia sing sablag sa pisikal, dapat sia magtrabaho. Apang, ang iya responsibilidad sa pag-atipan sa pamilya indi lamang ang pag-aman sang materyal nga mga butang. Ginapakita sang Biblia nga kon wala ginaaman sang isa ka tawo ang pisikal, emosyonal, kag espirituwal nga mga kinahanglanon sang iya pamilya, mas malain pa sia sa tawo nga wala sing pagtuo! (1 Tim. 5:8) Gani, kon nagaplano ang isa ka pamatan-on nga lalaki nga mangasawa kag magtukod sang pamilya, maayo nga pamangkuton niya ang iya kaugalingon: ‘Handa na bala ako sa pag-aman sang materyal nga kinahanglanon sang isa ka pamilya? Handa na bala ako nga manguna sa espirituwal nga hilikuton sang isa ka panimalay? Matuman ko ayhan ang akon responsibilidad nga dumalahan ang isa ka regular nga pagtuon sa Biblia upod sa akon asawa kag kabataan?’ Ginapadaku sang Biblia nga importante gid ina nga mga responsibilidad.—Deut. 6:6-8; Efe. 6:4.
Gani ang isa ka pamatan-on nga lalaki nga nagapangita sing palangasaw-on dapat magpamalandong sa prinsipio nga makita sa Hulubaton 24:27. Sing kaanggid ang isa ka pamatan-on nga babayi, maayo man nga mamangkot sa iya kaugalingon kon bala handa na sia sa mga responsibilidad sang isa ka asawa kag iloy. Ini nga mga pamangkot maayo man nga ipamangkot sang mag-asawa sa ila kaugalingon kon nagaplano sila nga magbata. (Luc. 14:28) Ang pagsunod sa sining inspirado nga laygay makabulig gid sa mga alagad sang Dios nga malikawan ang mga problema kag sa amo maagom nila ang makalilipay nga pagkabuhi subong pamilya.
AGOSTO 4-10
MGA BAHANDI SA PULONG SANG DIOS HULUBATON 25
Mga Prinsipio nga Makabulig Para Mangin Maayo ang Aton Ginahambal
Gamita ang Gahom sang Imo Dila Para sa Kaayuhan
6 Ang ginsiling sang Hulubaton 25:11 nagalaragway nga importante nga hibaluon ang nagakaigo nga tion sa paghambal: “Ang pulong nga ginahambal sa nagakaigo nga tion daw mga mansanas nga bulawan sa pilak nga suludlan.” Matahom na ang bulawan nga mga mansanas. Pero mas matahom pa gid ini kon ibutang sa pilak nga suludlan. Sing kaanggid, kon hibaluon naton ang nagakaigo nga tion sa paghambal, mangin mas manami ini pamatian kag makabulig gid. Paano?
7 Mahimo kinahanglan gid sang aton ginahambalan ang aton isiling, pero kon indi naton mahibal-an kon san-o ini dapat ihambal, mangin wala ini sing pulos. (Basaha ang Hulubaton 15:23.) Halimbawa, sang Marso 2011, may linog kag tsunami sa nasidlangan nga bahin sang Japan, nga naghalit sing bug-os sa mga siudad. Masobra 15,000 ka tawo ang napatay. Bisan pa nga nahalitan man ang mga Saksi ni Jehova, gingamit nila ang tagsa ka kahigayunan nga lugpayan paagi sa Biblia ang mga napatyan. Pero madamo sa ila ang Budhista kag may diutay lang ukon wala gid sing nahibaluan sa mga panudlo sa Biblia. Nahantop sang aton mga kauturan nga indi pa nagakaigo nga tion nga sugiran ang nagapangasubo nga mga biktima parte sa pagkabanhaw pagkatapos mismo sang tsunami. Sa baylo, gingamit nila ang ila regalo nga ikasarang sa paghambal sa pagpalig-on kag pagpaathag halin sa Biblia kon ngaa natabo ining malain nga mga butang sa mga inosente.
Gamita ang Gahom sang Imo Dila Para sa Kaayuhan
15 Ang paagi naton sa paghambal pareho ka importante sa aton ginahambal. Sang namulongpulong si Jesus sa sinagoga sa iya banwa nga Nazaret, ‘natingala gid ang mga tawo sa iya matahom nga mga pulong.’ (Luc. 4:22) Ang mainayuhon nga paghambal nagatandog sang tagipusuon kag wala ini nagabuhin sa epekto sang aton ginahambal. Ang matuod, mahimo nga mas batunon pa gani ang aton ginahambal kon mainayuhon kita. (Hulu. 25:15) Mailog naton ang mainayuhon nga paghambal ni Jesus kon mangin malulo kita, matinahuron, kag ginahunahuna naton ang balatyagon sang iban. Sang makita ni Jesus ang panikasog sang kadam-an para lang makapamati sa iya, naluoy sia kag “gintudluan niya sila sing madamo nga butang.” (Mar. 6:34) Bisan sang gin-insulto si Jesus, wala sia magbalos insulto.—1 Ped. 2:23.
16 Mahimo nga indi kita malulo kag mataktikanhon kon suod sa aton ang aton ginaistorya. Basi magbatyag kita nga okey lang mangin prangka sa ila. Mahimo nga amo kita sini kon nagaistorya sa miembro sang aton pamilya ukon sa isa naton ka suod nga abyan sa kongregasyon. Nagbatyag bala si Jesus nga puede na niya mahambalan sing masakit ang iya mga disipulo kay suod sia sa ila? Wala! Sang padayon nga nagbinaisay ang iya suod nga mga sumulunod kon sin-o ang pinakamataas sa ila, mainayuhon sila nga gintadlong ni Jesus kag naggamit sia sang ilustrasyon parte sa bata. (Mar. 9:33-37) Mailog sang mga gulang ang halimbawa ni Jesus paagi sa paglaygay suno “sa espiritu sang kalulo.”—Gal. 6:1.
Pukawa ang Isa kag Isa sa Gugma kag sa Maayong mga Buhat—Paano?
8 Sa pag-alagad sa aton Dios, mahimo naton tanan pukawon ang isa kag isa sa aton paagi sa aton huwaran. Sa pagkamatuod napukaw ni Jesus ang iya mga manugpalamati. Ginhigugma niya ang hilikuton sang Cristianong ministeryo kag ginbayaw ang ministeryo. Nagsiling sia nga kaangay ini sang pagkaon para sa iya. (Juan 4:34; Roma 11:13) Ang subong sina nga kapagsik makalalaton. Mapakita mo man bala ang imo kalipay sa ministeryo? Samtang nagahalong nga indi mangin daw tikalon ikaw, ipaambit sa iban sa kongregasyon ang imo maayo nga mga eksperiensia. Kon ginaagda mo ang iban nga magpanghikot upod sa imo, tan-awa kon bala mabuligan mo sila nga makasapo sing matuod nga kalipay sa pagpakighambal sa iban nahanungod sa aton Dakung Manunuga, nga si Jehova.—Hulubaton 25:25.
Espirituwal nga mga Hiyas
it-2-E 399
Kalulo
Mapakita sang isa ka tawo ang kalulo bangod may pagtuo sia kag may ginakuhaan sang kusog. Pirme sia balanse sa iya mga desisyon kag maayo ang iya pamensaron. Pero, nagakadula ang kalulo sang isa bangod indi sia pirme mahim-os, napaslawan, kulang sang pagtuo kag paglaum, kag nagabatyag nga daw wala na sia sang mahimo. Ang tawo nga indi malulo ginlaragway sini nga hulubaton: “Ang tawo nga wala sing pagpugong sa iya kaakig, daw kaangay sang siudad nga narumpag ang pader.” (Hul 25:28) Madali sia maimpluwensiahan sang bisan ano nga sala nga panghunahuna nga mahimo amo ang rason kon ngaa makahimo sia sang sala nga buhat.
AGOSTO 11-17
MGA BAHANDI SA PULONG SANG DIOS HULUBATON 26
Magpalayo Ka sa Isa nga “Buangbuang”
it-2-E 729 ¶6
Ulan
Mga panag-on. Ang duha ka panguna nga panag-on sa Ginsaad nga Duta amo ang tig-ilinit kag ang tigtulugnaw. Pero, mas insakto kon tawgon ini nga tingadlaw kag tingulan. (Ipaanggid ang Sa 32:4; Amb 2:11, footnote) Halin sa tungatunga sang Abril asta sa tungatunga sang Oktubre, diutay lang nga ulan ang nagatupa. Malaka lang ang ulan sa sini nga panahon sa diin ginahimo ang pag-ani. Ginapakita sa Hulubaton 26:1 nga ang ulan sa tig-alani ginakabig nga indi normal. (Ipaanggid ang 1Sa 12:17-19.) Kon tingulan indi gid man sigesige ang ulan; kundi nagabulosbulos ang ulan kag ang manami nga tiempo. Bangod tigtulugnaw man ini nga tion, kon mabasa ka sa ulan, kurugon ka gid. (Esd 10:9, 13) Gani, importante gid nga may komportable sila nga mapasilungan.—Isa 4:6; 25:4; 32:2; Job 24:8.
Ang Disiplina Nagapatubas sing Mahidaiton nga Bunga
12 Sa iban nga mga tawo mahimo nga kinahanglan ang mas matigdas nga mga tikang, subong ginapakita sang Hulubaton 26:3: “Ang putik para sa kabayo, ang busal para sa asno, kag ang bilugon para sa likod sang mga buangbuang.” Kon kaisa gintugutan ni Jehova ang iya pungsod sang Israel nga paubuson sang mga kagamo nga ila gindala sa ila kaugalingon: “Nagbato sila sa mga pulong sang Dios; kag nagtamay sang laygay sang Labing Mataas. Busa ginpapaubos niya nga may kabudlayan ang ila mga tagipusuon; napukaw sila, kag wala gid sing matabang. Nian nagtuaw sila kay Jehova sa ila kalisdanan; kag ginluwas niya sila sa ila mga kasakitan.” (Salmo 107:11-13) Apang, ang iban nga mga buangbuang, nagpatig-a sang ila kaugalingon sa bagay nga indi na ini mapaayo sang bisan anong disiplina: “Ang tawo nga ginasabdong sing sulit-sulit apang nagapatig-a sang iya tingkoy laglagon sa hinali, kag indi matabangan.”—Hulubaton 29:1.
it-2-E 191 ¶4
Piang, Pagkapiang
Gingamit sa mga hulubaton. “Ang nagatugyan sang mga butang sa buangbuang daw kaangay sang tawo nga nagautod sang iya tiil [nga mangin kabangdanan sang iya pagkapiang] kag nagahalit sang iya kaugalingon,” siling ni Hari Solomon. Matuod gid man nga ang tawo nga nagatugyan sang iya proyekto sa buangbuang daw pareho lang nga nagapiang sa iya kaugalingon. Sigurado nga makita niya nga maguba ang iya ginaplano nga proyekto kag mahalitan ang iya kaugalingon.—Hul 26:6.
Espirituwal nga mga Hiyas
it-1-E 846
Buangbuang
Kon ginasabat sang isa ka tawo ang buangbuang “suno sa iya kabuangan” sa kahulugan nga ginasunod niya ang nagapakanubo nga paagi sang pagpakigbais sini, ginasunod sina nga tawo ang sala nga mga pangatarungan kag mga paagi sang buangbuang. Para indi mangin pareho sa buangbuang sa sini nga kahulugan, ginalaygayan kita sang hulubaton: “Indi pagsabta ang buangbuang suno sa iya kabuangan.” Pero, ginapakita man sa Hulubaton 26:4, 5 nga may benepisyo man kon sabton ang buangbuang “suno sa iya kabuangan.” Nagakahulugan ini nga usisaon ang mga argumento sang buangbuang, ibuyagyag ini bilang kabuangan, kag ipakita nga sala ang iya mga konklusion base sa iya kaugalingon nga argumento.
AGOSTO 18-24
MGA BAHANDI SA PULONG SANG DIOS HULUBATON 27
Ang Mabenepisyo Naton sa Matuod nga Abyan
Ginapabaloran ni Jehova ang Iya Mapainubuson nga mga Alagad
12 Ang mapainubuson nga tawo nagapasalamat kon ginalaygayan sia. Binagbinaga ini nga ilustrasyon. Imadyina nga nagtambong ka sa Cristianong miting. Pagkatapos mo maistorya ang pila ka kauturan, gindala ka sang isa sa ila sa higad kag ginhutikan nga may pagkaon nga nagatapik sa imo ngipon. Sigurado gid nga mahuya ka. Pero indi bala nga pasalamatan mo sia kay ginsilingan ka niya? Ang matuod, mahimo maghunahuna ka nga kuntani kaina ka pa ginsilingan parte sa sini! Sing kaanggid, dapat kita magpaubos kag magpasalamat kon ang aton utod maisog nga naglaygay sa aton sa tion nga kinahanglan gid naton ini. Tamdon naton sia nga aton abyan, indi aton kaaway.—Basaha ang Hulubaton 27:5, 6; Gal. 4:16.
it-2-E 491 ¶3
Kaingod
Pero dapat may pagtuo kag pagsalig ang isa sa iya upod kag maalamon gid nga mapalapitan niya ini sa tion nga kinahanglan niya sang bulig. Naglaygay ang Mga Hulubaton parte sini: “Indi pag-isikway ang imo abyan ukon ang abyan sang imo amay, kag indi ka magkadto sa balay sang imo utod sa tion sang imo kalisdanan; mas maayo ang kaingod [sha·khenʹ] nga yara sa malapit sangsa utod nga yara sa malayo.” (Hul 27:10) Base sa sini, daw ginasiling sang manunulat nga mas daku pa ang mabulig sang isa ka suod nga abyan sang pamilya sangsa isa ka suod nga paryente pareho sang imo utod kon malayo sia. Kay posible indi sia handa nga buligan ka ukon basi indi niya masarangan nga magbulig bangod sang iya kahimtangan, indi pareho sa isa ka abyan nga malapit sa imo.
Mga Pamatan-on, Ano nga Klase sang Kabuhi ang Gusto Ninyo?
7 Ari ang isa ka leksion nga matun-an naton sa indi maayo nga desisyon ni Jehoas: Dapat naton pilion nga mga abyan ang mga nagapalangga kay Jehova kag ang mga nagapanikasog nga mapalipay sia. Buligan kita sini nga klase sang mga abyan nga himuon ang maayo. Puede pa gani naton mangin abyan ang mga mas magulang sa aton ukon ang mga manghod sa aton. Dumduma nga mas bata si Jehoas sangsa iya abyan nga si Jehoiada. Kon parte sa imo mga abyan, pamangkuta ang imo kaugalingon: ‘Ginabuligan bala nila ako nga magbakod ang akon pagtuo kay Jehova? Ginapalig-on bala nila ako nga tumanon ang mga kasuguan sang Dios? Ginaistoryahan bala nila ang parte kay Jehova kag ang mga kamatuoran sa Biblia? Ginatuman bala nila ang mga kasuguan sang Dios? Ginalaygayan bala nila ako kon may ginahimo ako nga indi maayo, ukon ginakunsinti lang nila ang akon ginahimo?’ (Hulu. 27:5, 6, 17) Sa tuod lang, kon indi palangga sang imo mga abyan si Jehova, indi mo sila kinahanglan. Pero kon palangga sang imo mga abyan si Jehova, pabalori sila kay mangin maayo sila nga impluwensia sa imo.—Hulu. 13:20.
Espirituwal nga mga Hiyas
Talalupangdon nga mga Punto Gikan sa Tulun-an sang Hulubaton
27:21. Ang pagdayaw magapakita sa aton kon sin-o gid kita. Mapakita ang pagkamapainubuson kon ang pagdayaw nagapahulag sa aton nga kilalahon ang aton utang nga kabalaslan kay Jehova kag nagapalig-on sa aton nga padayon sia nga alagaron. Mapakita ang kakulang sing pagkamapainubuson kon ang pagdayaw nagapauswag sang balatyagon sang pagkasuperyor.
AGOSTO 25-31
MGA BAHANDI SA PULONG SANG DIOS HULUBATON 28
Ang Kinalain sang Malaut nga Tawo sa Matarong nga Tawo
Ginasunod Mo Bala sing Bug-os si Jehova?
“ANG mga matarong maisog subong sang leon.” (Hulubaton 28:1) Nagatuo sila, nagasalig sing may kompiansa sa Pulong sang Dios, kag masidla nga nagapadayon sa pag-alagad kay Jehova sa atubangan sang bisan anong katalagman.
it-2-E 1139 ¶3
Paghangop
Ang mga nagapalayo sa Ginahalinan sang paghangop. Ang tawo nga nagahimo sang sala wala nagapamensar sa Dios kon nagahimo sang mga desisyon kag mga plano sa iya kabuhi. (Job 34:27) Ginapasugtan niya ang iya tagipusuon amo nga indi niya makita ang sala nga iya ginahimo kag indi niya na mapensaran ang paghimo sing maayo. (Sa 36:1-4) Bisan pa ginasiling niya nga gusto niya simbahon ang Dios, mas nanamian sia sa sugo sang mga tawo sangsa mga sugo sang Dios. Gani ang mga sugo sang tawo ang iya ginasunod. (Isa 29:13, 14) Ginapakamatarong niya ang iya ginahimo kag para sa iya “daw hampang lamang” ini (Hul 10:23) kag nangin bastos sia, mapintas, kag sala ang iya pangatarungan. Ginapensar niya nga indi makita ukon wala mahibaluan sang indi makita nga Dios ang iya sala nga daw indi masarangan sang gahom sang Dios nga mahibaluan ang iya mga ginapanghimo. (Sa 94:4-10; Isa 29:15, 16; Jer 10:21) Paagi sa iya mga ginahimo kag paggawi, daw nagasiling sia nga “Wala sing Jehova” (Sa 14:1-3) kag ginabalewala niya Sia. Bangod wala sia nagapagiya sa mga prinsipio sa Biblia, indi sia kabalo kon ano ang himuon, indi niya makita ang sala sa iya ginahimo, indi mausisa ang mga nadalahig sa sini, kag indi makahimo sang husto nga desisyon.—Hul 28:5.
it-1-E 1211 ¶4
Integridad
Posible ang amo sina nga integridad, indi bangod sa kaisog sang isa nga mabatas ang mga kabudlayan kundi paagi sa mabakod nga pagtuo kag pagsalig kay Jehova kag sa Iya gahom sa pagluwas. (Sa 25:21) Nagapromisa ang Dios nga mangin “taming” sia kag “pangamlig” nga nagabantay sa mga nagalakat nga may integridad. (Hul 2:6-8; 10:29; Sa 41:12) Ang ila padayon nga pagpanikasog nga mapahamut-an si Jehova nagahatag sang kalig-unan sa ila kabuhi, gani magabulig ini sa ila nga malab-ot ang ila mga tulumuron. (Sa 26:1-3; Hul 11:5; 28:18) Pareho sang ginsiling ni Job, bisan wala pa niya ini maintiendihan sing maayo, ang mga wala sing sala mahimo mag-antos bangod sang paggahom sang malauton kag mahimo mapatay upod sa malauton. Pero ginapasalig kita ni Jehova nga nahibaluan niya ang ginahimo sang tawo nga wala sing sala kag siguraduhon Niya nga magapabilin sing dayon ang palanublion sini nga tawo, mangin malinong ang iya palaabuton, kag mapanag-iyahan ang maayo nga mga butang. (Job 9:20-22; Sa 37:18, 19, 37; 84:11; Hul 28:10) Pareho sa naeksperiensiahan ni Job, indi manggad ang makahatag sa isa ka tawo sing balor kag respeto halin sa iban, kundi ang integridad sang isa. (Hul 19:1; 28:6) Masiling gid nga malipayon ang mga kabataan nga may amo sini nga ginikanan (Hul 20:7), bangod makita nila kag masunod ang maayo nga halimbawa sang ila amay. Makabenepisyo man sila bangod may maayo nga reputasyon kag ginarespeto ang ila amay.
Espirituwal nga mga Hiyas
Malikawan Mo ang Espirituwal nga Atake sa Tagipusuon
Sobra nga pagsalig sa kaugalingon. Madamong biktima sang atake sa tagipusuon ang may sobra gid nga pagsalig sa ila kahimtangan sa panglawas antes sila maatake sa tagipusuon. Ang pagpatan-aw ukon mga pagpabulong sa doktor masami nga ginabale wala na lang ukon ginakadlawan pa gani subong indi na kinahanglanon. Sing kaanggid, ang pila mahimo magabatyag nga sanglit madugaydugay na sila nga mga Cristiano, wala gid sing matabo sa ila. Mahimo patumbayaan nila ang pagpatan-aw sa espirituwal ukon pag-usisa sa kaugalingon tubtob mag-abot ang kalamidad. Importante nga huptan sa hunahuna ang maayong laygay batok sa sobra nga pagsalig sa kaugalingon nga ginhatag ni apostol Pablo: “Ang nagahunahuna nga nagatindog sia mag-andam nga indi sia mapukan.” Maalamon nga kilalahon naton ang aton di-himpit nga kahimtangan kag usisaon ang aton kaugalingon sa espirituwal sa tion kag tion.—1 Corinto 10:12; Hulubaton 28:14.