Sang ara na sa gua sang hardin sang Eden si Adan kag si Eva, nakabata sila sing madamo. Ang subang nga si Cain nangin mangunguma, kag ang ikaduha nga si Abel nangin manugbantay sang mga karnero.

Isa ka adlaw, naghalad si Cain kag si Abel kay Jehova. Kabalo ka bala kon ano ang halad? Espesyal ini nga klase sang regalo. Nalipay si Jehova sa ginhalad ni Abel, pero wala sia nalipay sa ginhalad ni Cain. Gani naakig gid si Cain. Ginhambalan ni Jehova si Cain nga basi makahimo sia sing malain bangod sa iya kaakig. Pero wala namati si Cain.

Ginhambalan pa gani ni Cain si Abel: ‘Dali, updi ako.’ Sang sila na lang nga duha, ginpatay ni Cain ang iya utod. Ano ang himuon ni Jehova? Ginsilutan ni Jehova si Cain paagi sa pagpalakat sa iya sa lugar nga malayo sa iya pamilya. Indi na sia puede makabalik.

Ano ang matun-an naton sa sini? Mahimo maakig kita kon indi matuman ang aton gusto. Kon mabatyagan naton nga akig kita—ukon ginhambalan kita sang iban kay nakita nila nga akig kita—dapat bag-uhon kag kontrolon dayon naton ang aton ginabatyag antes pa kita kontrolon sini.

Bangod palangga gid ni Abel si Jehova kag ginhimo niya ang husto, dumdumon gid sia ni Jehova. Kon himuon na sang Dios nga paraiso ang duta, buhion niya liwat si Abel.

Sang ulihi, nagdamo ang tawo sa duta. Mas madamo sa ila ang malain. Bisan ang pila ka anghel sa langit nangin malain man. Naghalin sila sa ila ginaistaran sa langit kag nanaug sa duta. Kabalo ka bala kon ngaa ginhimo nila ina? Para mangin tawo sila kag mangasawa sing mga babayi.

Ang mga anghel kag ang mga babayi nagbata. Ang ila mga bata nagdaku nga makusog katama kag nagapang-away. Ginasakit nila ang mga tawo. Indi gusto ni Jehova nga magpadayon ini. Gani nagdesisyon sia nga laglagon ang malain nga mga tawo paagi sa baha.

Pero may ara tawo nga indi pareho sa ila. Palangga niya si Jehova. Ang iya ngalan amo si Noe. May asawa sia kag tatlo ka bata nga si Sem, si Ham, kag si Jafet, kag may mga asawa man sila. Ginsilingan ni Jehova si Noe nga maghimo sing daku nga arka para sia kag ang iya pamilya indi mapatay sa Baha. Ang arka isa ka daku nga kahon nga puede maglutaw sa tubig. Ginsilingan ni Jehova si Noe nga pasudlon sa arka ang madamo nga sapat para indi man sila mapatay.

Gin-umpisahan dayon ni Noe ang paghimo sang arka. Mga 50 ka tuig ang paghimo sini ni Noe kag sang iya pamilya. Ginhimo nila ang arka suno gid sa ginsugo ni Jehova sa ila. Sa sina man nga tion, ginsugiran ni Noe ang mga tawo parte sa Baha. Pero wala sing namati sa iya.

Sang ulihi, nag-abot na ang tion nga masulod sila sa arka. Tan-awon naton kon ano ang masunod nga natabo.